Ra Kalougata o Ira na Dau Vakarokorokotaka na Kalou

“Era na lako mai ka soro vei kemuni na Turaga [Jiova]; ka ra na vakarokorokotaka na yacamuni.”​—SAME 86:9.

1. Na cava e duatani kina noda vakacaucautaka na Kalou, ni vakatauvatani kei ira na nona ibulibuli era sega ni bula?

SA DODONU ga mera vakacaucautaki Jiova na nona ibulibuli kece. Era vakacaucautaki koya galugalu na nona ibulibuli era sega ni bula, ia o keda ga na tamata e rawa nida vakasama, lialiaci, vakavinavinaka, da qai sokalou tale ga. E kaya kina vei keda na daunisame: ‘Dou sere vakadomoilevu vua na Kalou, na veivanua kece ga. Dou seretaka na yacana. Dou vakavinavinaka vua.’​—Same 66:1, 2.

2. O cei era rogoca na ivakaro ni Kalou me vakarokorokotaki na yacana? Na cava na vuna?

² E levu era sega ni vakabauta ni bula tiko na Kalou, era sega tale ga ni via vakarokorokotaki koya. Ia, era vakaraitaka e sivia na ononamilioni na iVakadinadina i Jiova ena 235 na vanua, nira raica na “veika vuni” ni Kalou ena nona ibulibuli, era sa ‘rogoca’ tale ga na nodra vakadinadinataki koya galugalu na veika e bulia. (Roma 1:20; Same 19:2, 3) Na nodra sa qai vulica gona na iVolatabu, era sa mai kilai Jiova kina, ra lomani koya tale ga. Sa tukuna tu mai na Same 86:9, 10: “Na veimatanitu kecega ko ni a cakava era na lako mai ka soro vei kemuni na Turaga [Jiova]; ka ra na vakarokorokotaka na yacamuni. Ni sai kemuni ka levu, ka sa cakava na ka e veivakurabuitaki: sai kemuni duaduaga na Kalou.”

3. Era ‘veiqaravi vakacava ena siga kei na bogi’ na “[i]soqosoqo levu”?

³ E vaka tale ga oqori na ka e tukuni ena Vakatakila 7:9, 15 me baleta “nai soqosoqo levu” ni dausokalou era “qaravi koya [na Kalou] e na siga kei na bogi e nona vale-ni-lotu.” E sega ni kena ibalebale oqo ni vinakata na Kalou meda sa vakacaucautaki koya tu ga ena siga kei na bogi, ia era veituyaki tu ena dela i vuravura o ira na dau qaravi koya. Ni sa bogi gona e dua na yasa ni vuravura, era ogaoga tiko ena dua tale na yasa i vuravura na dauveiqaravi ni Kalou ena cakacaka vakavunau. E rawa ni tukuni kina ni o ira na tamata i Jiova era qaravi koya tiko ena siga kei na bogi. Sa voleka sara oqo na gauna mera mai vakacaucautaki Jiova kina na “ka kecega era cegu rawa.” (Same 150:6) Ia, ena gauna mada ga oqo, na cava eda rawa ni cakava yadudua meda vakacaucautaki koya kina na Kalou? Na ka ni bolebole cava eda na rairai sotava? Na ka ni veivakalougatataki cava era na sotava o ira na dau vakarokorokotaka na Kalou? Me saumi na taro oqori, da dikeva mada e dua na ivakaraitaki vakaivolatabu me baleti ira na mataqali i Kata e Isireli.

Ka ni Bolebole ena Gauna Makawa

4. Na ka ni bolebole cava era sotava na mataqali i Kata?

⁴ Ni bera nira yacova yani na Vanua Yalataki na Isireli, era sa kerea rawa na lewe ni mataqali i Kata me nodra ivotavota na vanua ni susu manumanu ena tokalau kei Joritani. (Tiko Voli Mai na Lekutu 32:1-5) E levu na ka ni bolebole era na sotava ena nodra tawana na vanua oqori. O ira na lai tawana na Ra kei Joritani ena taqomaki ira na vanua kikilo—⁠ni sa dau itataqomaki tu ga oqori ena gauna ni kaba vakaivalu. (Josua 3:13-17) Ia, e kaya me baleta na tokalau kei Joritani o George Adam Smith ena nona ivola The Historical Geography of the Holy Land: “E bucabuca vakadua tu na vanua oqo me yacova sara yani na vanua talasiga o Arapea. E sega na veitokaitua, sega na kikilo me kena itataqomaki. Era dau kabai rawarawa sara ga na tiko kina mai vei ira na yavusa dau veitokiyaki. Ena veiyabaki, e so na ilawalawa lelevu era dau ravuta mai na vanua bucabuca oqo ena nodra vaqara kedra.”

5. Ena veiuqeti i Jekope, na cava mera cakava na kawa i Kata ke ra sa na valuti?

⁵ Na cava ena cakava na mataqali i Kata ena ituvaki voravora oqo? Ena senitiuri yani e liu, a parofisaitaka na tukadra o Jekope ena gauna sa vakarau mate tu kina: “Ko Kata, ena gumatua mada vua e dua na matai valu: Ia emuri ena gumatua ko koya.” (Vakatekivu 49:19) Ena rairai veivakayalolailaitaki na vosa oqori ena imatai ni gauna e dikevi kina. Ia, oqori sara ga na ivakaro e soli tiko vei ira na mataqali i Kata mera vala lesu. E vakadeitaka vei ira o Jekope ke ra cakava na ka oqori, era na qai seuta ena madua na meca, era na qai vala tiko na mataqali i Kata me yacova sara nira qaqa.

Ka ni Bolebole ena Noda Sokalou Nikua

6, 7. E tautauvata vakacava na kedra ituvaki na mataqali i Kata kei na ka era sotava tiko na lotu Vakarisito nikua?

⁶ Me vakataki ira ga na mataqali i Kata, eda sega ni galala na lotu Vakarisito nikua mai na drakidrakita ni bula ni gauna ni ivakataotioti oqo; eda na sega tale ga ni vukei vakacakamana nida sotava tiko na veika oqo. (Jope 1:10-12) E levu vei keda e sotava tiko na veika dredre mai koronivuli, na sasagataki ni bula e veisiga, vaka kina na nodra susugi na gone. Sa qai kena ikuri na noda leqa yadudua se veika eda dau lomaleqataka. E so era dau vosota na leqa ni yago me vaka na lokiloki se mataboko se tauvimate e vaka voli na ‘votonikau e lauta tiko na lewedra.’ (2 Korinica 12:7-10) E so tale era bikai ena rarawa nira nanuma ni sega tu na kedra yaga. “Na veisiga ca” era dau sotava na lotu Vakarisito era sa qase ena rairai vakataotaka na nodra qaravi Jiova ena igu a tu vei ira ena dua na gauna.​—Dauvunau 12:1.

⁷ Kena ikuri na nona tukuna na yapositolo o Paula nida “veivala talega kei ira . . . na veivavakoso yalo ca e na veiyasana vakalomalagi.” (Efeso 6:12) Eda sega tale ga ni galala mai na “yalo ni vuravura,” yalo ni talaidredre kei na itovo vakasisila ena nona veiuqeti o Setani kei ira na nona timoni. (1 Korinica 2:12; Efeso 2:2, 3) Me vakataki Loti ga na tamata dau rerevaka na Kalou, ena rairai vakararawataki keda tale ga na ka vakasisila era tukuna ra qai cakava tiko nikua na tamata era tu wavoliti keda. (2 Pita 2:⁠7) Eda sega tale ga ni galala ena nona dau sagai keda sara ga mai vakadodonu o Setani. E veivala tiko o koya kei ira na ivovo ni lumuti, era dau “vakabauta na vosa ni Kalou, ka taura tikoga nai tukutuku kei Jisu.” (Vakatakila 12:17) Era vakacacani tale ga mai vei Setani na lewe ni “so tani tale na sipi” i Jisu, ni dau vakatabui na nodra cakacaka ra qai dau tusaqati.​—Joni 10:16.

Soro Koso se Vala Lesu?

8. Eda na sabaya vakacava na veivakacacani i Setani? Na cava na vuna?

⁸ Na cava meda cakava ena veivakacacani i Setani? Me vakataki ira ga na mataqali i Kata ena gauna makawa, meda kaukaua tiko ga vakayalo da qai vala lesu, salavata kei na noda muria na veidusimaki ni Kalou. E ka ni rarawa nira sa soro koso tiko e so nira lomaleqataka na dredre ni bula, ra sa vakawaletaka kina na nodra itavi vakayalo. (Maciu 13:20-22) E kaya e dua na iVakadinadina ena vu ni kena sa qai lailai tiko ga na kedra iwiliwili na dau tiko ena soqoni ena nona ivavakoso: “Era sa vakacauoca na mataveitacini. Era sa rui lomaocaoca vakalevu.” E levu na ka e vu ni nodra dau oca na tamata nikua. Era sa lai nanuma kina ni nodra sokalou e sa ikuri tale tiko ni nodra oca, qai colacola bibi. Ia, oqori beka na rai donu?

9. Ena vakacegui keda vakacava na noda colata na ivua i Karisito?

⁹ Dikeva mada na ka e tukuna o Jisu ena nona gauna, vei ira na lewe vuqa era lomaocaocataka tiko na dredre ni bula: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou.” E ibalebale beka ni vosa i Jisu ni na kunei na vakacegu kevaka eda vakalailaitaka na gauna eda qarava kina na Kalou? Sega sara ga, e kaya o koya: “Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou.” Na ivua e dua na kau se kaukamea era dau vakayagataka na manumanu kei na tamata mera colata kina na icolacola bibi. Na cava sara mada ena via colata tale kina e dua na ivua vaka oqo? Sega beka nida sa “oca” rawa tu? E dina, ia e rawa tale ga ni kena ibalebale ena vosa vakirisi: “Daru mai cola vata na noqu ivua.” Vakasamataka mada: E via vukei keda o Jisu ena colati ni noda icolacola bibi! Eda na sega ni colata ena noda kaukaua ga vakataki keda.​—Maciu 9:36; 11:28, 29, ivakamacala e ra ena NW; 2 Korinica 4:7.

10. Na cava na yaga ni noda saga meda vakarokorokotaka na Kalou?

¹⁰ Nida colata na ivua me baleta na cakacaka ni veivakatisaipelitaki, eda sa vorati Setani sara tiko ga. E yalataka na Jemesa 4:7: “Vorata na tevoro, ena dro tani kina vei kemudou ko koya.” E sega ni kena ibalebale oqo ni na rawarawa noda vorati koya. Ena gadrevi na sasaga ena noda qarava na Kalou. (Luke 13:24) Ia e yalataka na iVolatabu ena Same 126:5: “O ira era sa tagi lako ni ra sa kabukaburaki voli, era na sere ga ni ra sa tatamusuka.” Eda qarava dina tiko e dua na Kalou dauvakavinavinaka. E “saumi ira talega era sa dauvakasaqarai koya,” qai vakalougatataki ira era vakarokorokotaki koya.—⁠Iperiu 11:6.

Vakacaucautaki Jiova ena Nomu Kacivaka Nona Matanitu

11. Ena taqomaki keda vakacava na cakacaka vakavunau mai na veivakacacani i Setani?

¹¹ E vakarota o Jisu: “Dou lako yani ka qisi ira me ra noqu tisaipeli na lewe ni veivanua kece ga.” Na cakacaka vakavunau e sala levu duadua eda ‘vakacabora kina na imadrali ni vakavinavinaka,’ vua na Kalou. (Maciu 28:19, VV; Iperiu 13:15) E tiki ni “yaragi kecega ni Kalou” na noda ‘vakaivava ena itukutuku vinaka ni veisaututaki’—⁠me taqomaki keda mai na veivakacacani i Setani. (Efeso 6:11-15) Na noda vakacaucautaka na Kalou ena cakacaka vakavunau e sala vinaka me vaqaqacotaka tiko ga kina na noda vakabauta. (2 Korinica 4:13) Ena sega kina vei keda na rai cala. (Filipai 4:⁠8) Na noda dau cakacaka vakavunau eda na marautaka kina na veimaliwai kei ira eda sokalou vata tiko.

12, 13. Ena yaga vakacava vei ira na veivuvale na nodra dau vakaitavi ena cakacaka vakavunau? Tukuna e dua na kena ivakaraitaki.

¹² E rawa ni marautaki vakavuvale na cakacaka vakavunau. E sega ga ni kauta laivi oqo na nodra gadreva na gone na ka ni veilasamaki tale e so. Ia, me sagai na cakacaka vakavunau vakavuvale me bulabula. Ena marautaki vakalevu ke ra vakavulici ira rawa na luvedra na itubutubu mera kenadau ena cakacaka vakavunau. Vakacava, era sega beka ni dau marau na gone nira cakava vakavinaka e dua na ka? Nira veiraurautaka gona na itubutubu na ka, ra qai sega ni vakaukauataki ira na luvedra mera cakava na ka era sega ni rawata, era sa vukei ira sara tiko ga kina mera marautaka na cakacaka vakavunau.​—Vakatekivu 33:13, 14.

¹³ Kena ikuri, era dau veivolekati na lewe ni vuvale era vakacaucautaka vata na Kalou. Kena ivakaraitaki, e dua na tacida yalewa sa biuti koya tu na watina e sega ni vakabauta, qai qaravi ratou tiko e lima na gone. E ka ni bolebole gona vua na cakacaka saumi, me qaravi iratou kina vakayago na luvena. E vakaweleweletaka beka na nodratou veika vakayalo na luvena baleta ni dau oca vakalevu? E nanuma lesu o koya: “Au dau vulica sara ga vakavinaka na iVolatabu kei na ivolatabaki vakaivolatabu, au qai saga meu muria na ka au wilika. Au dau kauti iratou na luvequ ena soqoni kei na cakacaka vakavunau e veivale. E yaga sara ga qo baleta ni ratou sa papitaiso kece na luvequ.” O koya gona, nomu vakaitavi vakalevu ena cakacaka vakavunau ena vukei iko tale ga ena nomu saga mo tuberi iratou na luvemu ena “[i]vunau kei nai vakavuvuli ni Turaga.”​—Efeso 6:4.

14. (a) Era vakacaucautaka vakacava na Kalou na gone e koronivuli? (b) Na cava ena vukei ira na itabagone mera kua ni “maduataka nai tukutuku-vinaka”?

¹⁴ Kemuni na gone, ke vakatarai vakalawa mo ni wasea na nomuni vakabauta, o ni dau vakacaucautaka na Kalou ena nomuni vunau e koronivuli, se sogota voli na gusumuni na nomuni rerevaka na tamata? (Vosa Vakaibalebale 29:25) E vola e dua na iVakadinadina yabaki 13 mai Puerto Rico: “Au sega vakadua ni madua na vunau e koronivuli niu kila ni qo na ka dina. Au dau laveta na ligaqu ena kalasi meu vakamacalataka na ka au sa vulica mai na iVolatabu. Keu galala au dau lai wilika tu na ivola Young People Ask ena laibri.”a E vakalougatataka beka o Jiova na nona sasaga? E tukuna o koya: “So na gauna era dau vakatarogi au na lewe ni noqu kalasi, so sara mada ga era dau kerea me dua tale ga nodra ivola.” Kevaka o se sega ni cakava tiko na ka oqo, de dua e gadrevi mo vuli vagumatua vakataki iko mo ‘kila kina na loma ni Kalou, e yaga, e vinaka, qai dodonu.’ (Roma 12:2) O na sega vakadua ni “maduataka nai tukutuku-vinaka” ke o vakadeitaka e lomamu ni dina na ka o vulica tiko.​—Roma 1:16.

‘Dola tu na Katuba’ ni Veiqaravi

15, 16. Na ‘katuba levu ni veiqaravi’ cava era sa curuma e so na lotu Vakarisito, kei na veivakalougatataki cava era sotava kina?

¹⁵ E vola na yapositolo o Paula ni sa tadola tu e matana “e dua na katuba levu ni cakacaka.” (1 Korinica 16:9, VV) Ena rawa beka ena kemu ituvaki mo curuma e dua na katuba ni cakacaka sa tadola tu e matamu? Me kena ivakaraitaki, na nomu painia tudei se painia veivuke, o na vakayagataka tiko kina ena nomu cakacaka vakavunau e 70 se 50 na aua ena dua na vula. Era dau taleitaki dina na painia vei ira na nodra itokani lotu Vakarisito ena vuku ni nodra veiqaravi voli ena yalodina. Nodra vakaitavi vakalevu ena cakacaka vakavunau e sega ni kena ibalebale nira sa uasivi cake kina vei ira na vo ni mataveitacini. Era vakaitovotaka ga na ka e veiuqeti kina o Jisu: “E sega na ka keitou uasivi cake kina ko i keitou mai vei ira na kena vo ni tamata; ni keitou sa vakayacora ga na ka sa neitou i tavi me keitou cakava.”​—Luke 17:10, VV.

¹⁶ Ena vinakati vei koya e painia na lewa matau, na tuvatuvanaki maqosa, kei na yalo ni soli bula. Ia, e salavata mai kei na levu sara na ka ni veivakalougatataki. “E ka ni veivakalougatataki na noqu wasea vakadodonu vei ira e so tale na ivakavuvuli dina,” e kaya e dua na painia gone o Torika. “Nida cakacaka vakapainia eda na dau vakayagataka wasoma na iVolatabu. O koya gona, nikua niu qai dau gole yani e veivale, sa tiko sara ga ena noqu vakasama na veitikinivolatabu e ganiti ira na itaukeinivale yadua.” (2 Timoci 2:15) E kaya e dua na painia o Maca: “Dua tale na ka ni veivakalougatataki na noda raica sara ga na kena tarai ira na tamata na ka dina.” E vakatale ga oqori nona marau e dua na itabagone, o Maciu ena nona dau “raica ni sa ciqoma na ka dina e dua. E sega ni tukuni rawa na marau e kunei kina.”

17. E walia vakacava e dua na lotu Vakarisito na rai cala e dau tu vua me baleta na cakacaka vakapainia?

¹⁷ O bau vakasamataka tu mo painia? De dua o sa via painia tu, ia o nanuma ni sega ni ganiti iko. “Sa dau duatani tu ga na noqu rai me baleta na cakacaka vakapainia,” e kaya e dua na ganeda goneyalewa, o Keinona. “Au nanuma ni sega ni ganiti au. Au sega mada ga ni kila meu tekivuna vakacava na veivosaki se meu maqosa ena noqu vakamacalataka na iVolatabu.” Ia, era lesia na qase e dua na tacida yalewa matua e painia me rau cakacaka vata. “Au marautaka na cakacaka vata kei koya,” e kaya o Keinona. “E vakavuna sara ga noqu via painia.” De dua o na via painia tale ga ena gauna o uqeti kina se tuberi iko e dua.

18. Na veivakalougatataki cava era sotava o ira na cakacaka vakaulotu?

¹⁸ Na nomu vakaitavi tale ga ena cakacaka vakapainia ena rawa ni tadola kina vei iko e so tale na basoga ni veiqaravi. Kena ivakaraitaki, e so na veiwatini e rawa nira lai vulica na kaulotu, oti mera lesi sara yani ina veimatanitu tani. Era na lai sotava e so na ka dredre me vaka na bula ena vanua era vulagi kina, vulici ni vosa vou, itovo vou, kei na nodra tovolea na kakana vou. Ia, e lailai wale sara na ka e gadrevi vei ira mera cakava ni vakatauvatani kei na veivakalougatataki levu era na sotava kina. E kaya o Mildred, e dua na daukaulotu makawa mai Mexico: “Au sega vakadua ni veivutunitaka na noqu vakatulewataka meu daukaulotu. Sa dau noqu gagadre tu ga, niu se goneyalewa lailai.” Na veivakalougatataki cava e sotava kina? “E dau dredre me kune na vuli iVolatabu ena vanua au a bula tu mai kina. Ia e ke, e le va vakadua noqu vuli iVolatabu eratou vakadonui me ratou lako ena cakacaka vakavunau ena dua vata ga na gauna!”

19, 20. E sa mai vakalougatataki ira vakacava e levu na nodra veiqaravi e Peceli, e vanuatani, kei na nodra vuli ena Koronivuli ni Vuli Veiqaravi Vakaitalatala?

¹⁹ Era dau vakalougatataki tale ga vakalevu o ira na veiqaravi tu e Peceli ena veivalenivolavola ni tabana ni iVakadinadina i Jiova. E kaya o Sven, e dua na cauravou me baleta na nona veiqaravi tiko e Peceli mai Jamani: “Au kila niu cakava tiko e dua na ka ena tawamudu na kena yaga. Au a rawa sara ga ni vakayagataka na taledi e tu vei au e vuravura. Ia, keu cakava oqori ena vaka ga na maroroi ilavo ena dua na baqe e sa vakarau beqaravu.” E ka ni bolebole dina nikua me dua e sega ni saumi nona cakacaka. Ia, e kaya o Sven: “Ni o suka i vale, o kila ni ka o cakava ena siga oya, o cakava sara tiko ga vei Jiova. Ena vakamarautaki iko sara ga vakalevu.”

²⁰ E so na tacida era marautaka tiko na veivakalougatataki ni veiqaravi e vanuatani, era veivuke tiko ena tara ni veivalenitabana. Erau vola mai e dua na veiwatini sa veiqaravi ena walu na matanitu: “Dua na ka nodra vinaka na mataveitacini. Dau luluvu na lomai keirau ni keirau dau biubiu. Sa baci voleka qo na ikawalu ni gauna me keirau vakila kina na mosi ni veitalatala. Keirau marautaka dina na ka keirau sotava!” Sa qai tiko tale ga na Koronivuli ni Vuli Veiqaravi Vakaitalatala. Na koronivuli oqo era vakavulici kina vakayalo na tacida tagane dawai e ganiti ira. E vola mai e dua e sa vuli oti kina: “Au sega ni kila se vosa cava meu cavuta meu vakavinavinakataka kina na kena vakarautaki na koronivuli vinaka oqo. Na isoqosoqo cava tale e saga tu me vakarautaka na veivakavulici vaka oqo?”

21. Na ka ni bolebole cava era sotava na lotu Vakarisito kece ena nodra veiqaravi vua na Kalou?

²¹ Io, sa levu sara ga na basoga ni veiqaravi era sa tadola tu. E sega ni levu vei keda e rawa ni veiqaravi e Peceli se i vanuatani. O Jisu mada ga e kaya ni sega ni tautauvata na levu ni ka era ‘vuataka’ na lotu Vakarisito baleta ni duidui na kedra ituvaki yadua. (Maciu 13:23) Sa ka ni bolebole kina vei keda na lotu Vakarisito meda vakayagataka vinaka na galala e dui tu vei keda meda qaravi Jiova kina ena kena levu eda rawata. Eda na vakacaucautaki Jiova sara tiko ga ena noda cakava oqori, da qai vakadeitaka ni vakamarautaki koya. Dikevi Ecelina mada, e dua na tacida yalewa sa qaravi tiko ena nodra vale na malumalumu. E dau vunau wasoma vei ira na tiko e kea, e dau vunau tale ga ena talevoni. Dina ni vakaiyalayala ga na ka e rawata, ia e solia nona vinaka kece ena nona veiqaravi.​—Maciu 22:37.

22. (a) Na sala cava so eda rawa ni vakarokorokotaka kina na Kalou? (b) Na gauna lagilagi cava sa waraki keda tu?

²² Ia, mo nanuma tiko, ni cakacaka vakavunau e dua ga vei ira na sala eda vakacaucautaki Jiova kina. Eda na vakamarautaki Jiova nida ivakaraitaki vinaka ena noda itovo kei na isulusulu nida tiko e valenicakacaka, koronivuli, vaka kina e vale. (Vosa Vakaibalebale 27:11) E yalataka na Vosa Vakaibalebale 28:20: “A tamata lomadina ena vakalougatataki vakalevu.” Sa dodonu ga kina meda ‘kakaburaki vakalevu’ ena noda veiqaravi vua na Kalou, nida na tatamusuki tale ga kina vakalevu. (2 Korinica 9:6) Na noda kakaburaki gona vakalevu eda na qai vakalougatataki kina meda raica sara ga na nodra sa na vakarokorokotaki Jiova na “ka kece ga sa cegu rawa” baleta ni dodonu ga me caka duadua vua na veivakarokorokotaki vaka oqori!​—Same 150:6.

[iVakamacala e ra]

O se Nanuma Tiko?

• Era qaravi Jiova tiko vakacava na tamata ni Kalou ena “siga kei na bogi”?

• Na ka ni bolebole cava era sotava na mataqali i Kata, na cava eda vulica kina na lotu Vakarisito?

• E taqomaki keda vakacava na cakacaka vakavunau mai na veivakacacani i Setani?

• Na ‘katuba levu’ cava era sa curu tiko kina e so, kei na veivakalougatataki cava era sotava kina?

[iYaloyalo ena tabana e 15]

Me vaka ga nodra valuti ira lesu na dau veivakacacani na mataqali i Kata, mera vorata tale ga na lotu Vakarisito na veivakacacani i Setani

[iYaloyalo ena tabana e 17]

Eda dau marautaka na veimaliwai nida cakacaka vakavunau

[iYaloyalo ena tabana e 18]

Na cakacaka vakapainia e rawa ni tadola tale kina e so na katuba ni veiqaravi e wili kina na:

1. Veiqaravi e vanuatani

2. Veiqaravi e Peceli

3. Kaulotu