Dau Caka Vinaka ena Gauna e Gadrevi Kina

“MEDA caka vinaka vei ira na tamata kecega,” e veiuqeti kina na yapositolo o Paula, “ka vakalevu vei ira era veitokani e na vakabauta.” (Kalatia 6:10) Era saga vakaukaua na iVakadinadina i Jiova e vuravura raraba mera vakaitovotaka na ivakavuvuli oqori, mera dau caka vinaka vei ira na tamata kece ga, vakauasivi vei ira era vakabauta vata. E dau laurai ena gauna sara ga e gadrevi tu kina na veivuke. Meda dikeva mada e so na kena ivakaraitaki e se qai yaco wale ga oqo ena tolu na vanua.

Ena Tiseba 2002, e ravuti Guam kina e dua na cava qai tiko na kaukaua ni cagi ena 300 na kilomita dua na aua. Levu na vale era vakacacani, so era vakarusai sara ga vakadua. Sega ni bera nona vakarautaka na ivavakoso e kea e dua na ilawalawa mera lai vukei ira na vuvale iVakadinadina era vakaleqai vakalevu. E vakarautaki mai na valenivolavola ni tabana e Guam na iyaya ni cakacaka vaka kina o ira na veivuke ena kena tara tale na vale era sa vakacacani tu, e veivuke tale ga kina na valenivolavola mai Hawaii. Ni oti ga e vica na macawa na kena yaco na cava oqori, era yaco yani i Guam e dua na ilawalawa matai mera veivuke ena tara vale, era veitokoni na tacida e kea ena nodra kerea nodra siga ni gade me rawa kina nira veivuke. Na nodra cakacaka vata ena marau e ivakadinadina ena itikotiko oya.

Ena taudaku ni korolevu o Mandalay, e Myanmar, a yaco e dua na kama ena dua na vanua e volekata na Kingdom Hall. E tiko voleka e kea e dua na tacida yalewa sa malumalumu tu vakayalo, kei na nona vuvale. Sa mua sara tiko ga na cagi ena vanua e tiko kina na nona vale, mani cici o koya ena Kingdom Hall me kere veivuke kina. A vakavinakataki tiko na Kingdom Hall, ra qai tu sara ga kina e levu na tacida. Era kurabui nira raici koya nira sega ni kila ni tiko voleka ga e kea. Era yavala totolo na mataveitacini mera tokitaka na nona iyaya na tacida oqo ena dua tale na vanua me maroroi kina. E sega ni iVakadinadina o watina, ia ni rogoca ga na kama sa totolo sara i vale, ni qai yaco yani era sa veivuke tiko na mataveitacini. E drukataka qai vakavinavinaka tale ga, baleta ni ituvaki vaka oqori era dau cakanodra sara ga kina na daubutako. Na nodra yalololoma na mataveitacini e uqeta na tacida oqo kei na luvena tagane me rau veimaliwai tale kei na ivavakoso, rau dau tiko wasoma tale ga ena soqoni vakarisito kece.

Ena loma ni yabaki vakacakacaka sa sivi, era vakila mai Mozambique na dausiga ena vuku ni lauqa kei na leqa ni itei. E yavala totolo sara na valenivolavola ni tabana ni iVakadinadina i Jiova e kea, me vakarautaka na kakana vei ira era vakaleqai tu. E wasei ena Kingdom Hall na kakana, so na gauna ni oti na soqoni ni ivavakoso. E kaya e dua na tacida yalewa e itubutubu le dua: “Au nuiqawaqawa niu lako ina soqoni, niu sega ni kila se cava meu na vakani iratou kina na luvequ ni keitou sa suka i vale.” E vakacegu na lomana nira vukei koya vakayalololoma na mataveitacini. E kaya: “Ni vaka sara ga na veivakaturi vei au!”

Era dau “caka vinaka” tale ga vakayalo na iVakadinadina ena nodra tukuna yani na itukutuku vakaivolatabu ni veivakacegui kei na inuinui. Era vakabauta na ka e tukuna e dua na vuku ena gauna makawa ni kaya: “Ia ko koya sa vakarorogo vei au [vuku vakalou], ena tiko vinaka, ka na vakacegu ka sega ni rerevaka e dua na ka ca.”​—Vosa Vakaibalebale 1:33.

[iYaloyalo ena tabana e 31]

1, 2. Veisoliyaki tiko na kakana e Mozambique vei ira era gadreva tu

3, 4. Levu na vale era vakacacani ena gauna e ravuti Guam kina e dua na cava

[Credit Line]

Gone ena imawi: Andrea Booher/FEMA News Photo; dua na marama, e cake: AP Photo/Pacific Daily News, Masako Watanabe