Vakarautaki kei na Qaravi ni Vanua ni Sokalou

EDA vakaroti na dauveiqaravi i Jiova meda dau soqoni vata meda vakavulici, meda veivakayaloqaqataki tale ga. (Iper. 10:23-25) Na imatai ni vanua era sokalou kina na Isireli, e vakatokai me “valeniveitavaki, na valelaca ni veitavaki.” (Lako 39:32, 40) E muri, e qai tara o Solomoni na luvei Tevita e dua na vale se valenisoro, me vakalagilagi kina na Kalou. (1 Tui 9:3) A vakarusai na valenisoro qori ena 607 B.G.V., era mani tuvanaka na Jiu mera soqoni vata ena valenilotu mera sokalou. E tara tale na valenisoro ni toso na gauna, e tomani kina na sokalou dina. E dau veivakavulici o Jisu ena valenilotu kei na valenisoro. (Luke 4:16; Joni 18:20) A liutaka mada ga e dua na soqoni ena ulunivanua.—Maciu 5:1–7:29.

² Ni mate o Jisu, era soqoni na lotu vaKarisito ena vanua era dau osota vakalevu na lewenivanua kei na nodra vale na mataveitacini mera rogoca na vosa ni Kalou, mera veimaliwai tale ga. (Caka. 19:8, 9; Roma 16:3, 5; Kolo. 4:15; Fmon. 2) So na gauna era dau soqoni na lotu vaKarisito taumada ena vanua mera kua kina ni laurai vei ira na dau veivakacacani. Io, era dau guta na tamata yalodina ni Kalou ena veigauna sa oti mera sota ena vanua me ‘vakavulici ira kina o Jiova.’—Aisea 54:13.

³ Nikua tale ga e dau vakayacori na soqoni vaKarisito ena nodra vale na tacida se vanua era dau osota vakalevu na lewenivanua. E dau vakayacori na soqoni ni cakacaka vakavunau ena nodra vale na tacida. O ira na solia nodra vale era raica qori me ka dokai. Levu era kaya ni vukei ira vakayalo nodra solia nodra vale ena inaki qori.

VALE NI SOQONI

⁴ Na nodra soqoni na iVakadinadina i Jiova e dau vakayacori ena Vale ni Soqoni. E dau voli na qele me tara kina na Vale ni Soqoni se vakavinakataki ga e dua na vale. Vica na ivavakoso ena vakayagataka e dua na Vale ni Soqoni me vakabula ilavo, me vakayagataki vinaka tale ga na vanua ni sokalou. Ena so na vanua, e redetaki na olo. Ena Vale ni Soqoni vovou kei na kena e vakayacori kina e levu na veisau, ena veiganiti me vakatabui. Ke vakayacori ga na veisau lalai ena Vale ni Soqoni sa tiko rawa, e sega ni vinakati me vakatabui tale.

⁵ E sega ni dodonu me veivakadrukai na irairai ni Vale ni Soqoni. E duidui na itaratara ni Vale ni Soqoni ena veiyasa i vuravura, e bibi ga me ganita na sokalou. (Caka. 17:24) Me vakatau ena ituvaki ni vanua, e dodonu me marautaki na vanua e tiko kina, me toka tale ga ena vanua e ganiti ira e levu.

⁶ Na Vale ni Soqoni yadua ena vakailavotaka ga na ivavakoso ni iVakadinadina i Jiova e vakayagataka. Ena sega ni kau wavoki na veleti ni soli se kerei na lewe ni ivavakoso mera solia e dua na wase ni ilavo. Ena vakarautaki na kato ni cau qai vakatau vei ira na tiko ena soqoni nodra biuta nodra cau me saumi kina na bili kei na so tale. Era cau mai vu ni lomadra.—2 Kor. 9:7.

⁷ Dodonu mera raica na lewe ni ivavakoso ni ka dokai mera tokona vakailavo na Vale ni Soqoni, mera solia tale ga nodra gauna ena kena samaki kei na kena qarauni me rakorako tu ga. Ena lesi e dua na qase se dauveiqaravi me tuvanaka qori. Dau kena ivakarau me samaka na vanua ni soqoni na iwasewase lalai qai liutaka sara ga na kena ivakatawa se nona ivukevuke.Na irairai ni Vale ni Soqoni e loma kei na tautuba me rokovi kina o Jiova kei na nona isoqosoqo.

⁸ Ke vica na ivavakoso e vakayagataka e dua na Vale ni Soqoni, me qai lesia na ilawalawa qase ni vica na ivavakoso qori e dua na Komiti e Qarava na Vale ni Soqoni me dau raica na kena vakavinakataki, me qaravi vinaka tale ga na lomanibai. Ena lesia na ilawalawa qase ni vica na ivavakoso qo e dua na kena kodineita. Ena muria na komiti qo na veidusimaki ni ilawalawa qase ni ivavakoso kece, qai raica me vakayacori na sasamaki, vakavinakataki vakatotolo na ka e ca, me tu tale ga na kena iyaya. Ena vinakati mera cakacaka vata ra qai veitokoni na ivavakoso qori.

⁹ Ni vakayagataka tiko e dua ga na Vale ni Soqoni e vica na ivavakoso, e dodonu mera veivosakitaka na qase na veisau ni gauna ni soqoni ena yalo ni veinanumi kei na veilomani. (Fpai. 2:2-4; 1 Pita 3:8) Me kua ni dua na ivavakoso me via lewa na nodra gauna ni soqoni na vo ni ivavakoso. Ni veisiko na ivakatawa ni tabacakacaka ina dua na ivavakoso, mera veisautaka na nodra gauna ni soqoni na vo ni ivavakoso era vakayagataka vata tiko na Vale ni Soqoni.

¹⁰ E rawa ni vakayagataki na Vale ni Soqoni ena vakamau kei na vunau ni veibulu, ia me kerei rawa na veivakadonui ni Komiti ni Cakacaka ni iVavakoso. Ratou na dikeva vinaka na komiti na kerekere, ratou qai yavutaka nodratou vakatulewa ena veidusimaki ni valenivolavola ni tabana.

¹¹ O ira e vakadonui mera vakayagataka na Vale ni Soqoni ena inaki qo, e dodonu mera qarauna nodra vakayagataka me veiganiti kei na sokalou savasava. Mera qarauna me kua ni vakayacori e dua na ka me vakarogorogocataki kina na yaca i Jiova se na ivavakoso. (Fpai. 2:14, 15) Ena veidusimaki ni valenivolavola ni tabana, so na gauna e rawa ni vakayagataki na Vale ni Soqoni ena Vuli ni Qase kei na Vuli ni Painia.

¹² E dodonu mera doka na lewe ni ivavakoso na vanua ni soqoni. Me laurai ena nodra isulusulu, sasauni, kei na nodra ivalavala nira raica vakabibi na nodra sokaloutaki Jiova. (Dauv. 5:1; 1 Tim. 2:9, 10) Nodra muria na veidusimaki qo e vakaraitaka nira doka na soqoni vaKarisito.

¹³ Bibi me kua ni dua na ka e vakaleqa na soqoni. Mera dabe vata na gone kei na nodra itubutubu. E rawa nira kerei na itubutubu era vagone mera dabe ena dua na vanua era na sega ni vakasosani ira kina vakalevu na vakarorogo, ena rawarawa tale ga mera kauti luvedra i tuba mera vakavulici se vakacegui ira.

¹⁴ Ena soqoni, era dau lesi na tacida tagane era rawata na kena ivakatagedegede mera dauveivukei. Mera tu vakarau mera veivuke, mera veikauaitaki, mera dau vakatulewa vinaka. E okati ena nodra itavi na nodra kidavaki na ka vou mera kila nira kauaitaki, ra vukei na bera mai ena vanua mera dabe kina, mera wilika qai vola na kedra iwiliwili na tiko ena soqoni, mera qarauna tale ga mera kua ni rui katakata se liliwa na tiko ena soqoni. Ke veiganiti, era na kerei ira na itubutubu mera qarauni luvedra mera kua ni veiciciyaki se qito ena buturara ni bera se ni suka na soqoni. Ke mani vakasosa e dua na gone, me vosa vakayalovinaka vei nona itubutubu na dauveivukei me kauti luvena i tuba.E yaga vakalevu nona itavi meda vakarorogo vinaka kina ena soqoni. E vinaka mera dauveivukei na qase kei ira na dauveiqaravi ni ivavakoso.

TARA VALE NI SOQONI

¹⁵ Eso na lotu vaKarisito ena imatai ni senitiuri era vutuniyau, e vola kina na yapositolo o Paula: “Me tautauvata ga, na ka e levu vei kemuni ena gauna qo, ni solia vei ira e lailai vei ira na ka, ia na ka e levu vei ira mera solia vei kemuni me vakalevutaka na ka e lailai vei kemuni, me tautauvata kina.” (2 Kor. 8:14) E vakayacori tale ga qori nikua. Era cau na ivavakoso kece e veiyasa i vuravura me vakailavotaki kina na tara ni Vale ni Soqoni kei na kena vakavinakataki. E vakavinavinakataka vakalevu na isoqosoqo kei na ivavakoso era vukei, nodra veitokoni vakayalololoma na mataveitacini e veiyasa i vuravura.

¹⁶ Na valenivolavola ni tabana e digia na ivavakoso me vakayagataka na Vale ni Soqoni. E lewa na gauna kei na vanua me tara kina na Vale ni Soqoni vou, me vakavinakataki tale ga na Vale ni Soqoni sa tu rawa. Ni yaco na leqa tubukoso, e tuvanaki me vakavinakataki na Vale ni Soqoni e vakacacani. Ena so na gauna ena vakavinakataki tale ga nodra vale na mataveitacini.

¹⁷ Na valenivolavola ni tabana e tuvanaki ira na bolecakacaka mera veivuke ena kena voli na qele, vakarautaki na peleni ni vale, ivolatara ni tara vale, tarataravaki kei na vakavinakataki ni Vale ni Soqoni.Ni vinakati me tara na Vale ni Soqoni ena levu na vanua, e vinakati kina e levu na bolecakacaka. Era uqeti o ira kece era sa papitaiso era via veivuke, era yacova tale ga na kena ivakatagedegede mera vakalewena na kena fomu, mera solia ina Komiti ni Cakacaka ena nodra ivavakoso. Rawa nira veivuke tale ga na dautukutuku bera ni papitaiso ena tara se vakavinakataki ni nodra Vale ni Soqoni.

VALE NI SOQONI LELEVU

¹⁸ Ena levu na gauna era dau soqoni na lotu vaKarisito taumada ena iwasewase lalai. Ia so na gauna era dau soqo vata na “ilawalawa levu.” (Caka. 11:26) Era dau soqoni tale ga vakalewe levu nikua na tamata i Jiova ena soqo ni tabacakacaka kei na soqo ni veiwasewase. E dau saumi eso na vale me vakayacori kina na soqo, ia eso na vanua e tara na Vale ni Soqoni Lelevu ena inaki qo.

¹⁹ So na gauna e dau voli na vale sa tara rawa tu qai vakavoutaki me Vale ni Soqoni Lelevu. Ia vakalevu ga me voli na qele qai tara e dua na vale vou. E duidui na levu ni Vale ni Soqoni Lelevu me vakatau ena dui vanua. Na tara ni vale va qo ena vakatau ena nona dikeva vinaka na valenivolavola ni tabana na kena isau, kei na levu ni gauna me vakayagataki kina.

²⁰ Na valenivolavola ni tabana e lesi ira na tacida tagane mera qarava na kena vakavinakataki kei na veika tale eso. E dau tuvanaki mera samaka na Vale ni Soqoni Lelevu na tabacakacaka kece era vakayagataka, me samaki vakarua e veiyabaki, me vakavinakataki tiko ga. Era uqeti na ivavakoso kece mera tokona ena nodra vinaka kece na ituvatuva qo.—Same 110:3; Mala. 1:10.

²¹ So na gauna e rawa ni vakayagataki na Vale ni Soqoni Lelevu ena so tale na ka vakayalo me vaka na vuli vakalou kei na nodra bose na ivakatawa ni tabacakacaka. Na Vale ni Soqoni Lelevu e vakatabui me vanua ni sokalou me vaka ga na Vale ni Soqoni. Nida soqoni ena Vale ni Soqoni Lelevu, e dodonu me rakorako noda ivalavala, isulusulu, kei na sasauni me vaka ga ena Vale ni Soqoni.

²² E vakalougatataki keda o Jiova ena gauna ni ivakataotioti qo nira tabili mai na ka vou ina isoqosoqo. (Aisea 60:8, 10, 11, 22) Oya na vuna eda tokona kina na ituvatuva ni kena vakarautaki kei na kena qaravi na vanua ni soqoni me savasava qai rakorako. Nida cakava qo eda vakaraitaka nida vakavinavinakataka na vanua ni sokalou e vakarautaki meda veivakayaloqaqataki kina, vakabibi ni sa toro voleka mai na siga i Jiova.