Taro na Dauwiliwili

Na cava e vakaibalebaletaka o Jisu ni kaya vei ira nona tisaipeli: “Au a raici Setani ni sa lutu sobu mai lomalagi me vaka na livaliva”?

Se qai digitaki ira oti ga na le 70 na tisaipeli o Jisu, qai “talai ira me ra lako yayarua ka liu vua ki na veikoro kecega kei na veitikina sa via lako kina ko koya.” Nira lesu mai na 70 na tisaipeli era marau ni vuavuaivinaka na nodra ilesilesi ni cakacaka vakavunau. Era kaya, “Turaga, era sa guca vei keimami na tevoro, e na vuku ni yacamuni.” Ena gauna vata oya e kaya kina o Jisu: “Au a raici Setani ni sa lutu sobu mai lomalagi me vaka na livaliva.”​​—⁠Luke 10:​1, 17, 18.

Nida se qai wilika vakadua na tikinivolatabu oqo, e vaka e vakaibalebaletaka tiko o Jisu ina dua na ka sa yaco oti. Ia, ni oti e 60 na yabaki nona cavuta o Jisu na veivosa e koto oqori e cake, na kena turaga o Joni na yapositolo a qai vakayagataka na vakasama vata oqori, ena nona vola: “Sa biu tani na gata levu, na gata makawa, a yacana na Tevoro, kei Setani, o koya sa temaki ira kecega na kai vuravura: a sa biu ki vuravura, a ra sa biu vata kaya na nona agilose.”​​—⁠Vakatakila 12:⁠9.

A se tiko ga mai lomalagi o Setani ena gauna e vola kina o Joni na veivosa oqori. Eda kila vakacava? Baleta na Vakatakila e ivola ni parofisai, sega ni ivola ni itukutuku makawa. (Vakatakila 1:⁠1) Koya gona, na gauna a bula voli kina o Joni a se bera ni kolotaki mai vuravura o Setani. E macala ena kena ivakadinadina ni ka oqo a qai yaco ga ni oti vakalailai nona vakatikori o Jisu me Tui ni Matanitu ni Kalou ena 1914.a​​—⁠Vakatakila 12:​1-​10.

Na cava e kaya kina o Jisu me baleta na nona cemuri mai lomalagi o Setani ni vaka e sa vakayacori oti? E so na vuku era kaya ni o Jisu a cudruvi ira na nona tisaipeli nira dokadokai ira. Era nanuma ni vaka e kaya tiko o Jisu: ‘Dou sa qaqa vei ira na timoni, ia dou kakua ni dokadoka kina. A dokadoka o Setani, qai totolo kina nona bale.’

Eda sega ni rawa ni vakadeitaka sara se oya na ka e vakaibalebaletaka o Jisu se sega. Ia e kena irairai ni a marau vata tiko kei ira nona tisaipeli o Jisu, qai dusia na nona na vakarusai o Setani. Ni vakatauvatani kei ira nona tisaipeli, o Jisu e kila vinaka tu na gaga ni nona veicati na Tevoro. Vakasamataka mada na marau e vakila o Jisu ni rogoca na nodra vakamalumalumutaki na timoni vei ira na nona tisaipeli era tamata ga! Na nodra vakamalumalumutaki na timoni ena gauna oya e ivakatakilatakila ni ka ena yaco ena gauna mai muri. Oya na gauna ena vala kina kei Setani o Jisu, e vakatokai tale ga me o Maikeli na agilosi uasivi, qai kolotaki Setani laivi mai lomalagi.

Ena nona kaya o Jisu ni a raici Setani “sa lutu,” e vakadeitaka kina ni na bale dina o Setani. Oqo e tautauvata kei na so tale na parofisai ena iVolatabu ni tukuna tiko na veika ena yaco mai muri, ni vaka era sa yaco oti. Me kena ivakaraitaki na parofisai me baleta na Mesaia ena Aisea 52:⁠13–​53:12 na kena itukutukuni e vaka ga sa vakayacori oti. E kena irairai ni via vakaraitaka o Jisu ni na yaco dina nona cemuri mai lomalagi o Setani me vaka ga na inaki nei Tamana. E kila deivaki tale ga o koya ena gauna lokuci ni Kalou ena vesu kina o Setani kei na nona timoni ena qara sega ni vakabotona, oti era na qai vakarusai yani vakadua.​​—⁠Roma 16:20; Iperiu 2:​14; Vakatakila 20:​1-3, 7-​10.

[iVakamacala e ra]