Taro na Dauwiliwili

Era na tiko i vei na timoni ena loma ni duanaudolu na yabaki ni veiliutaki i Karisito?

E sega ni sauma vakamatata na taro oqo na iVolatabu. Ia, kevaka eda dikeva vata e so na tikinivolatabu eda rawa ni siqema na vanua era na tiko kina na timoni ena loma ni duanaudolu na yabaki ni veiliutaki i Karisito.

Ni vakatakila tiko na ka ena yaco ena itekitekivu kei na itinitini ni duanaudolu na yabaki, e tukuna na yapositolo o Joni: “Ka’u a raica e dua na agilose sa lako sobu mai lomalagi, sa taura e na ligana nai dola kei bulubulu [“qara,” VV] sa sega ni vakabotona ka dua na sinucodo levu. A sa laki taura na gata levu, a gata makawa, o koya oqo na Tevoro, kei Setani, a sa vesuki koya me oti mada e dua na udolu na yabaki, a sa biuti koya ki bulubulu sa sega ni vakabotona, a sa sogolati koya eloma, a sa dregata nai sogo vei koya, me kakua ni temaki ira tale na veivanua ko koya, ka me oti mada na yabaki e dua na udolu: ia ni sa oti oqo, ena qai sereki vakalailai tale.” (Vakatakila 20:​1-3) E vakamacalataki ena veitikina oqo na nona sogolati ga o Setani kei na nona sereki tale vakalailai. Dina nira sega ni tukuni na timoni, ia e sega ni vakabekataki ni gauna e vesuki Setani kina qai sogolati koya na agilosi e taura tiko na idola ni qara e sega ni vakabotona, oya o Jisu Karisito sa vakalagilagi oti, ena cakava tale ga vei ira na timoni.​—Vakatakila 9:​11.

Ena gauna e buli kina o Jisu me Tui ena 1914 mai lomalagi, a cakava e dua na ka e veisautaka vakadua na bula i Setani kei ira na timoni. E tukuna na Vakatakila 12:​7-9: “Sa tubu nai valu mai lomalagi; o Maikeli kei ira na nona agilose era sa veivala kei na gata levu; a sa ia vata nai valu na gata levu kei ira na nona agilose [ira na timoni], a ra sa sega ni gumatua: a sa sega tale ni kune e dua na nodra tikina mai lomalagi. A sa biu tani na gata levu, na gata makawa, a yacana na Tevoro, kei Setani, o koya sa temaki ira kecega na kai vuravura: a sa biu ki vuravura, a ra sa biu vata kaya na nona agilose.” Tekivu mai na gauna oya, sa yalani sara tu ga nona bula o Setani kei ira nona timoni e vuravura. Eda rawa gona ni raica e ke, ni gauna ena mai vesuki Setani kina o Jisu Karisito me tarova tu kina nona veivakamuai cala me duanaudolu na yabaki, ena cakava tale ga vei ira na timoni.

Vakasamataka mada na imatai sara ga ni parofisai ena iVolatabu. E tukuni kina ni kaya na Kalou: “Ka’u na vakaveimecakitaki kemudrau [Setani] kei na yalewa [isoqosoqo vakalomalagi i Jiova], kei na nomu kawa [i Setani] kei na nona kawa [Jisu Karisito]; ena butuqaqia na ulumu ko koya, ia ko na qaqia na bukubukuni-yavana.” (Vakatekivu 3:​15) Na butuqaqi ni ulu ni gata e okati kina na nona sogolati o Setani ena duanaudolu na yabaki ni veiliutaki i Karisito. E tomana na parofisai ni rau na veimecaki o koya e butuqaqia na ulu ni gata kei na kawa i Setani. Na kawa oqo, se isoqosoqo, e okati kina e dua na iwasewase tawarairai era lewena na agilosi ca, se timoni. E kena irairai gona ni sogolati Setani o Jisu, ena vesuki qai sogolati ira tale ga na timoni. Nodra rerevaka na yalo velavela na ibulubulu e sega ni vakabotona, e vakaraitaka nira sa kila tiko nira na vesu kina ena dua na gauna mai muri.​—Luke 8:​31.

Ia, e rawa beka ni tukuni ni vuna era sega ni cavuti kina na timoni ena Vakatakila 20:​1-3, baleta nira vakarusai vata kei na iwasewase rairai ni kawa i Setani ena Amaketoni? E sega ni tokona na tikina oqo na iVolatabu. E tukuna me baleta na itinitini i Setani: “Ia sa biu na tevoro sa temaki ira ki na drano buka waqa sa vakasulifure, sa tiko kina na manumanu kei na parofita vakailasu; ia eratou na vakararawataki e na siga kei na bogi ka sega ni mudu.” (Vakatakila 20:10) Na manumanu kila kei na parofita vakailasu e dusia na veika vakapolitiki, erau tiki tale ga ni isoqosoqo rairai i Setani. (Vakatakila 13:​1, 2, 11-​14; 16:​13, 14) Erau na tini vakarusai ena Amaketoni, ena gauna e vakavurumemeataka qai vakaotia kina na veimatanitu kece e vuravura na Matanitu ni Kalou. (Taniela 2:​44) E vakamacalataka na iVolatabu na “buka waqa tawa boko, sa vakarautaki me nona na tevoro kei na nona agilose.” (Maciu 25:41) Nona viritaki o Setani kei ira nona timoni ena “drano buka waqa sa vakasulifure” vata ga erau viritaki kina na manumanu kila kei na parofita vakailasu, e dusia ni o ira kece oqori era na vakarusai vakadua. Kevaka sa vakarusai ena Amaketoni na iwasewase tawarairai kaukaua vakayalo oqo ni kawa i Setani, o ira na timoni, ke a tukuni ena Vakatakila 20:10 nira a tu tale ga ena drano vakaitakarakara kei rau na manumanu kila kei na parofita vakailasu. Nira sega gona ni tukuni na timoni ena tikinivolatabu oqori, e dusia tiko ga oya nira na sega ni vakarusai ena Amaketoni.

Me vaka nira sega ni cavuti na timoni nira kolotaki ena qara e sega ni vakabotona, e sega tale ga ni cavuti nira na sereki mai kina. Ia, na kedra itinitini e tautauvata ga kei na ka e sotava na Tevoro. Era na sereki vata na Tevoro ra qai cakacaka vata kei koya mera temaki ira tale vakadua na kawatamata ni sa cava na duanaudolu na yabaki. Ni oti oqo era na qai kolotaki vata kece ena drano buka waqa mera na rusa kina vakadua.​—Vakatakila 20:​7-9.

O koya gona, dina ni tukuni ga ena Vakatakila 20:​1-3 nona tauri qai biu ena qara e sega ni vakabotona o Setani, ia eda rawa ni siqema nira na okati tale ga kina na nona agilosi. Ena sega ni vakatarai o Setani se nona ilawalawa timoni mera vakaleqa na inaki ni Kalou, oya me vukici na vuravura me parataisi kei na kena vakalesui na kawatamata ina bula uasivi ena loma ni duanaudolu na yabaki ni veiliutaki i Karisito.