Taro na Dauwiliwili

Na cava era kaya kina na iVakadinadina i Jiova ni 144,000 e cavuti ena Vakatakila e sega ni matanifika vakaivakatakarakara, ia na kena levu dina ga oya?

E vola na yapositolo o Joni: “Sa qai tukuna vei au ni kedra iwiliwili era sa vakatakilakilataki era sa le 144,000.” (Vakatakila 7:​4, VV) Na matavosa “era sa vakatakilakilataki,” ena iVolatabu, e dusia tiko e dua na ilawalawa era digitaki mai vei ira na kawatamata mera veiliutaki kei Karisito mai lomalagi mera na lewa na Parataisi e vuravura. (2 Korinica 1:​21, 22; Vakatakila 5:​9, 10; 20:⁠6) E tiko e vica na vuna e sega ni tauri kina vakaivakatakarakara na matanifika na 144,000. Dua e kune sara ga ena veitikina e yavolita na Vakatakila 7:​4, VV.

Ni oti na kena tukuni ena raivotu vei Joni na yapositolo me baleta na ilawalawa e 144,000, a qai vakaraitaki vua e dua tale na ilawalawa. Na ikarua ni ilawalawa oqo e vakamacalataka o Joni ni “dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa.” Na isoqosoqo levu oqo e vakaibalebaletaki ira era na bulata na “veivakararawataki levu” sa roro tiko mai, ena rusa kina na vuravura ca nikua.​​—⁠Vakatakila 7:​9, 14.

Ia, dikeva na duidui e cavuta o Joni ena tikina e 4 kei na 9 ni Vakatakila wase 7. E kaya ni o ira na ilawalawa taumada “era sa vakatakilakilataki,” e kilai na kedra iwiliwili. Ia, na ikarua ni ilawalawa, “nai soqosoqo levu,” e tawakilai na kedra iwiliwili. Ni matata vaka oqo na kedrau duidui, e macala ni sega ni vakaivakatakarakara na matanifika na 144,000. Kevaka me matanifika vakaivakatakarakara qai vakaibalebaletaka e dua tale na ilawalawa e tawawiliki rawa, sa na qai sega na betena na duidui levu e votu ena rua na tikinivolatabu oqo. Koya gona, na veitikina yavolita e dusia vakamatata ni 144,000 e sega ni matanifika vakaivakatakarakara, e kena levu dina ga oya.

E so na vuku ni iVolatabu ena gauna e liu kei na gauna oqo, era duavata ena vakasama ni matanifika oya e sega ni vakaivakatakarakara. Kena ivakaraitaki, ena rauta na 100 na yabaki sa oti, ena nona ivakamacala me baleta na Vakatakila 7:​4, 9, na daunivosa, o Doketa Ethelbert W. Bullinger mai Peritania, a kaya: “E rawarawa ga na kila na dina oqo: e dua na matanifika e kilai na kena levu qai veibasaitaki ena wase oqo kei na dua na iwiliwili e tawakilai.” (The Apocalypse or “The Day of the Lord,” tabana e 282) Wale tiko ga oqo, o Robert L. Thomas, Jr., e parofesa ni New Testament ena The Master’s Seminary mai Mereke, e vola: “E sega na yavu ni kena tukuni ni vakaivakatakarakara ga na iwiliwili oqo.” E tomana: “E kena levu dina ga oya ena [Vakatakila 7:4], ni veidutaitaki kei na iwiliwili e tawakilai ena Vakatakila 7:⁠9. Ke nanumi ni ivakatakarakara ga na iwiliwili oya, sa kena ibalebale ni matanifika kece ena Vakatakila sa na tauri vakaivakatakarakara.”​​—⁠Revelation: An Exegetical Commentary, Volume 1, tabana e 474.

E so era kaya ni vakayagataka vakalevu na vosa vakaivakatakarakara na Vakatakila, sa dodonu tale ga mera tauri vakaivakatakarakara na matanifika kece e kune kina, okati tale ga kina na 144,000. (Vakatakila 1:​1, 4; 2:​10) E matata vinaka ni vakasama oya e cala. E macala ni levu na matanifika ena Vakatakila e vakaivakatakarakara, ia e okati tale ga kina na matanifika e sega ni vakaivakatakarakara. Kena ivakaraitaki, e cavuta o Joni “na yacadra nai apositolo ni Lami e lewe tinikarua.” (Vakatakila 21:14) E macala ni 12 e cavuti e ke e sega ni matanifika vakaivakatakarakara. E tomana na yapositolo o Joni ena nona vola me baleta na “dua na udolu na yabaki” ni veiliutaki i Karisito. Oya tale ga e sega ni matanifika vakaivakatakarakara, ni dikevi vakavinaka na ka e tukuna na iVolatabu.a (Vakatakila 20:​3, 5-7) O koya gona, na kena tauri vakaivakatakarakara se sega e dua na matanifika ena Vakatakila ena vakatau ena veitikina yavolita kei na ka e cavuti tiko.

Na matanifika na 144,000 e sega ni vakaivakatakarakara, ia e dusi ira e dua na iwiliwili lailai, e ilawalawa lailai dina ni vakatauvatani kei na “[i]soqosoqo levu,” e lakolako vata tale ga oqo kei na so tale na tikinivolatabu. Me kena ivakaraitaki, ena dua tale na nona raivotu na yapositolo o Joni e vakamacalataka ni o ira na 144,000 e vaka nira “sa voli mai vei ira na tamata me ra i sevu.” (Vakatakila 14:​1, 4, VV) Na vosa “i sevu” e vakaibalebaletaka e dua na iwase lailai e digitaki taumada. Na nona a bula voli e vuravura o Jisu, a tukuna tale ga me baleti ira era na veiliutaki kei koya ena nona Matanitu mai lomalagi qai vakatokai ira na “qele-ni-sipi lailai.” (Luke 12:32; 22:29) Io, era le lailai sara o ira era digitaki mai vei ira na tamata mera na veiliutaki e lomalagi, ni vakatauvatani kei ira era na bula ena Parataisi e vuravura sa voleka mai.

O koya gona, na veitikina yavolita na Vakatakila 7:4 kei na veika e sa vakamacalataki oti e kune ena so tale na tikinivolatabu, e vakadeitaka ni 144,000 e sega ni matanifika vakaivakatakarakara, ia e kena levu dina ga oya. E dusi ira era na veiliutaki kei Karisito mai lomalagi mera na lewa na parataisi e vuravura era na tawana na tamata mamarau era qaravi Jiova, qai sega ni kilai na kedra iwiliwili.​​—⁠Same 37:⁠29.

[iVakamacala e ra]

[iYaloyalo ena tabana e 31]

E yalani ga na kedra iwiliwili na itaukei vata kei Karisito mai lomalagi, e 144,000

[iYaloyalo ena tabana e 31]

Na “[i]soqosoqo levu” e sega ni wiliki rawa

[iTaba ni Credit Line ena tabana e 31]

Kalokalo: Courtesy of Anglo-Australian Observatory, photograph by David Malin