‘Mo Dou Masu Vaka Oqo’

O KILA beka na Masu ni Turaga? Oqori na ivakarau ni masu a vakavulica o Jisu Karisito. Ena nona iVunau ena Ulunivanua, a kaya kina o Jisu: “O koya mo dou qai masu vakaoqo.” (Maciu 6:⁠9) Me vaka ni tauyavutaka o Jisu, e vakatokai kina me Masu ni Turaga.​​—⁠Paternoster, ena vosa vakalatina.

E lewe vica vata na milioni ena veiyasa i vuravura era dau cavuqaqataka na Masu ni Turaga, rairai era na taleva vakavuqa e veisiga. Ena veiyabaki wale tiko ga oqo, levu era cavuqaqataka na masu oqo e koronivuli vaka kina ena so na soqo. Na cava e vakamareqeti kina na Masu ni Turaga?

A vola o Cyprian, e dua na daunicioloji ena ikatolu ni senitiuri: “Na masu cava tale e taucoko vakaoti na kena vakasama vakayalo, qai tauyavutaka sara ga o Karisito . . . ? Na masu cava tale e cabo vakaidina vua na Tamada, vakauasivi ni a vakavulici keda sara ga kina o Luvena, na vu ni Ka Dina?”​​—⁠Joni 14:⁠6.

Ena nodra ivoladusidusi na lotu Katolika Vakaroma, e okata na Masu ni Turaga me “itakele ni masu vakarisito.” E vakadeitaka na World Book Encyclopedia nira raica vakabibi na veilotu kece ni Veivanua Vakarisito na masu oqo, era vakatoka kina me dua vei ira “na yavutu ni vakabauta vakarisito.”

Ia, e vakadinadinataki ni levu vei ira era wiligusutaka na Masu ni Turaga, era sega ni kila vinaka na kena ibalebale. “Ke o dua na lotu Vakarisito, e sega ni vakabekataki ni na taladrodro na nomu cavuqaqataka na Masu ni Turaga,” e kaya na niusiveva ni Canada na Ottawa Citizen, “ia ke o cavuta vakaberabera, o na raica ni via dredre toka na kila na kena ibalebale.”

E bibi beka meda kila na ibalebale ni ka eda masulaka vua na Kalou? Na cava e vakavulica kina vei keda o Jisu na Masu ni Turaga? Na cava na kena ibalebale vei keda? Meda dikeva sara mada na isau ni veitaro oqori.