Taro na Dauwiliwili

Ni vola na yapositolo o Joni “na loloma sa maucokona vinaka sa vakasava tani na rere,” na cava e vakaibalebaletaka ena “loloma sa maucokona vinaka,” kei “na rere” cava sa vakasavi tani?

“Sa sega na rere e na loloma,” e vola na yapositolo o Joni, “ia na loloma sa maucokona vinaka sa vakasava tani na rere. Ka ni sa yaco na yaluma e na rere, ia ko koya sa rere tiko e sa sega ni taucoko vinaka e na loloma.”​​—⁠1 Joni 4:​18, VV.

E laurai ena veitikina yavolita ni veivosakitaka tiko o Joni na noda doudou ni vosa​​—⁠vakauasivi na kena semati vata na noda lomana na Kalou kei na noda doudou ni torovi koya. Laurai oqo ena tikina e 17: “E na ka oqo sa yaco kina me levu sara na loloma vei keda, . . . me da doudou kina e na siga ni lewa.” O koya gona, na titobu ni nona lomana na Kalou e dua na lotu Vakarisito kei na nona vakila ni lomani koya na Kalou, ena vakatau kina na nona doudou​​—⁠se sega​​—⁠ni torova na Kalou ena masu.

E vakavure vakasama na matavosa, “na loloma sa maucokona.” Ni vakayagataka na iVolatabu na “maucokona,” e sega ni dusia na uasivi, se dua na ka e taucoko vakaoti. Ia, na kena rawati e dua na ivakatagedegede vinaka, e dina ni vakaiyalayala ga. Kena ivakaraitaki na ka e kaya o Jisu ena Vunau ena Ulunivanua: “Mo dou qai vinaka sara, me vaka sa vinaka sara na Tamamudou sa tiko mai lomalagi.” A kaya tiko o Jisu vei iratou na nona imuri, ke ratou lomani ira ga era lomani iratou, e kena ibalebale ni sega ni taucoko na nodratou loloma, e tawayaga, e sega ni vinaka. E dodonu gona me ratou vakataucokotaka, se ratou toroya cake na ivakatagedegede ni nodratou loloma ena nodratou lomani ira sara mada ga na nodratou meca. Na vakasama vata oqo e koto ena nona vola o Joni “na loloma sa maucokona.” E cavuta tiko ni dodonu me vu mai lomada na noda lomana na Kalou, na loloma e taucoko qai tara na veibasoga kece ni noda bula.​​—⁠Maciu 5:​46-​48; 19:​20, 21.

Ni torova na Kalou ena masu e dua na lotu Vakarisito, e kila vinaka tu ni tamata ivalavala ca, e sega ni uasivi. Ia, ke taucoko na nona lomana na Kalou qai vakila tale ga ni lomani koya na Kalou, ena sega ni ora na lomana se rerevaka de cati koya se vakatauca na Kalou na kena itotogi. Ena doudou na talaucaka na lomana vua, qai kerea tale ga na nona veivosoti, e yavutaki ena isoro ni veivoli i Jisu Karisito e vakarautaka vakayalololoma na Kalou. E lomanuidei o koya e masu ni na rogoci koya na Kalou.

E rawa vakacava vua e dua me “taucoko vinaka e na loloma” me “vakasava tani” kina na nona rerevaka, de lakolako ena cati koya se vakatauca na Kalou na kena itotogi? “Ko koya yadua sa muria na vosa ni Kalou sa taucoko vinaka na nona loloma vua na Kalou,” e kaya na yapositolo o Joni. (1 Joni 2:​5, VV) Vakasamataka mada: E dina nida ivalavala ca, ia na Kalou e lomani keda ga, ena sega li ni lomani keda vakalevu cake ke da veivutuni, da qai gumatua na ‘muria na nona vosa’? (Roma 5:8; 1 Joni 4:​10) Io, ke da yalodina tiko ga, e rawa nida lomanuidei me vaka ga na yapositolo o Paula, ni a kaya me baleta na Kalou: “O koya ka a sega ni bureitaka na Luvena dina, ka ni a soli koya ga e na vukuda kece, e na sega li ni solia wale ga vei keda na ka kece ga?”​​—⁠Roma 8:​32, VV.