Oni na Via Bula Tawamudu?

“A U SEGA ni rere na mate,” e kaya e dua na kena marama ni Japani. “Ia au rarawataka ga niu sa na biuta tu mai na noqu senikau.” E kila vinaka na lotu Vakarisito a veisiko yani na vuna e vosa kina vaka oya na marama oqo, baleta ni sa dua na ka na rairai totoka ni nona basenikau. E levu gona vei ira na kaya nira sega ni rere na mate, era marautaka dina na vakatubuqoroqoro ni veika buli ra qai diva tale ga mera bula tawamudu.

Na bula tawamudu? E levu era na taura tu ga vakamamada na vakasama oqo. So tale era na rairai kaya sara mada ga nira sega ni taleitaka mera na bula tawamudu. Na cava ena vaka kina oya na nona rai e dua?

Ena Vakavucesa Beka na Bula Tawamudu?

E so era nanuma ni na vakavucesa na bula tawamudu. Rairai e vu oqo ena nodra raici ira na sa qase era sa vakacegu mai ena nodra cakacaka ni sega na ka yaga mera vakaogai ira kina, era sara retioyaloyalo ga. Ke vaka oya na nomu nanuma, vakasamataka na ka e kaya o Robert Jastrow e dua na saenitisi ni maliwalala a tarogi me baleta na bula tawamudu, e ka ni veivakalougatataki se itotogi. A sauma o Jastrow: “E ka ni veivakalougatataki vei ira era dau via vulika, vakauasivi ena nodra via vakarabailevutaka na nodra kilaka. Nira vakasamataka gona na gauna e tawamudu e yalataki mera cakava kina oya, e vakacegui ira dina. Ia, vei ira e qiqo na nodra rai, ra qai sega ni via vulika, ena vaka na itotogi na bula tawamudu, nira sega ni kila se cava mera na vakaogai ira kina.”

O koya gona, na nomu nanuma ni na vakavucesa na bula tawamudu, e vakatau ga ena ituvaki ni nomu rai. Ke o ‘via vulika, vakauasivi nomu via vakarabailevutaka na nomu kilaka,’ vakasamataka mada na levu ni ka o na rawa ni vulica ena veika e vauca na ivakatagi, droini, teitei, cakacakaniliga, vaka kina e so tale na ka o dau taleitaka. Na bula tawamudu gona e vuravura, e solia sara ga na gauna mo rawa ni vakarabailevutaka kina na veika o dau vinakata mo kila.

Dua tale na ka ena marautaki dina kina na bula tawamudu, oya na nomu na vakila kei na nomu vakaraitaka tawamudu na loloma. Eda a buli meda dauloloma, da qai bulabula vinaka nida vakila nida lomani. Na veilomani e kauta mai na bula marau dina, ni toso na gauna ena sega ni seavu. Nida bula tawamudu gona e sa na tawavakaiyalayala na gauna e rawa nida na bucina kina na noda lomani ira na wekada qai vakauasivi na Kalou. “Kevaka e dua sa lomana na Kalou, sa kilai vua ko koya,” e kaya na yapositolo o Paula. (1 Korinica 8:3) Sa dua dina na inuinui totoka​—na noda veikilai kei na Turaga Cecere ni lomalagi kei vuravura! Kuria oya, ena sega ni mudu na noda vulica na veika me baleta na noda Dauveibuli loloma. Ena sega gona ni vakavucesa na bula tawamudu, ia ena marautaki ga.

Levu Era Vakamareqeta na Bula ni Lekaleka Ga

So era nanuma ni mareqeti ga na bula ni dau lekaleka ga. Era na rairai vakatauvatana kei na koula ni dau kune ga vakalalai. Kevaka e dau kune ena veisaqata na koula, e sa na sega ni saulevu. De dina beka oya, ia, e se rairai vinaka ga. E vaka tale ga oya na bula.

Eda na rawa ni vakatauvatana tale ga na bula tawamudu kei na levu ni cagi e maliwalala. Ke dua na waqanunu sa sega ni rawa ni vakavudevude, e macala nira na mareqeta sara na cagi ena loma ni waqanunu na kaiwaqa. Ia nira sa vueti bula, o nanuma beka nira na vosakudrukudrutaka na levu ni cagi e maliwalala e rawa nira ceguva? E macala ni sega!

Me vakataki ira na kaiwaqa oya, e rawa tale ga nida vueti bula, me sega wale ga ni vica tale na yabaki na noda bula ia me tawamudu. “Ni sa kenai sau ni valavala ca na mate,” e vola na yapositolo o Paula, “ia sai solisoli walega ni Kalou na bula tawa mudu, e na vuku i Jisu Karisito na noda Turaga.” (Roma 6:​23) Ena vuku ni isoro ni veivoli i Jisu, ena vakaotia na Kalou na ivalavala ca kei na mate qai solia vei ira na kawatamata talairawarawa na isolisoli ni bula tawamudu. E dodonu meda vakavinavinakataka vakalevu na ituvatuva vakayalololoma oqo!

O Sega li ni Nanumi Ira na Wekamu Lomani?

Era na rairai vakasamataka tu e so: ‘Vakacava o ira na wekaqu lomani? Ke ra na sega ni tiko tikivi au ena sega ni vakaibalebale vei au na bula tawamudu e vuravura.’ Rairai o sa na kila na ka dina ena iVolatabu qai vulica ni o rawa ni bula tawamudu ena parataisi e vuravura. (Luke 23:43; Joni 3:​16; 17:3) E dau kena ivakarau ga meda na vinakati ira na lewe ni noda vuvale, e so tale na wekada lomani, kei ira na noda itokani voleka mera na tiko tale ga e kea, mera vakila na marau vata ga o nuitaka mo na sotava ena vuravura vou ni yalododonu e yalataka tu na Kalou.​—2 Pita 3:​13.

Ia, vakacava ke sega ni vinakata na nomu itokani kei ira na wekamu lomani mera bula tawamudu ena parataisi e vuravura? Kua ni vakalaiva oqori me vakayalolailaitaki iko. Tomana tiko ga nomu vulica na kilaka dodonu ena iVolatabu kei na nomu bulataka. A vola na yapositolo o Paula: “Ko sa kila vakaevei, o iko na yalewa se ko na vakabula na watimu, se segai? se ko sa kila vakaevei, o iko na tagane, se ko na vakabula na watimu, se segai?” (1 Korinica 7:​16) E rawa tale ga ni veisau na tamata. Me kena ivakaraitaki, e dua na turaga e dau saqata na lotu Vakarisito a veisau qai yaco e muri me dua na qase ni ivavakoso. A kaya: “Dua na ka na noqu vakavinavinakataka na nodratou a muria dei tiko ga na noqu lewenivuvale na ivakavuvuli vakaivolatabu, dina ga niu dau tusaqati iratou.”

E kauaitaka dina na Kalou na nomu bula kei na nodra bula na wekamu lomani. Io, “sa sega ni . . . vinakata [o Jiova] me rusa e dua, me yacova ga na veivutuni ko ira kecega na tamata.” (2 Pita 3:9) E vinakata na Kalou o Jiova mo bula tawamudu kei ira na wekamu lomani. Na nona loloma e uasivia sara na noda loloma na tamata ivalavala ca. (Aisea 49:15) Cava gona o sega ni bucina kina e dua na veiwekani vinaka kei na Kalou? O na rairai rawa ni vukei ira na wekamu lomani mera cakava tale ga vaka kina. Kevaka mada ga era se sega ni nuitaka na bula tawamudu, ena rawa ni veisau na ituvaki ni nodra rai ke ra raica ni o bulataka sara ga na kilaka dodonu o sa vulica ena iVolatabu.

Vakacava o ira na wekamu lomani era sa takali? E le vica vata na milioni era sa takali, e yalataka gona na iVolatabu na inuinui totoka ni veivakaturi​—oya na nodra vakabulai mera bula ena Parataisi e vuravura. A yalataka o Jisu Karisito: ‘Sa lako mai na gauna o ira kece ga ena ibulubulu, era na lako mai kina.’ (Joni 5:​28, 29) Era na vakaturi sara mada ga o ira era a sega tu ni kila na Kalou ena gauna era mate kina, ni kaya na iVolatabu: “Ni na tu cake tale ko ira na mate, ko ira na yalododonu kei ira na sega ni yalododonu.” (Cakacaka 24:15) Ena ka marautaki dina na noda kidavaki ira era na vakaturi mai na mate!

Eda Rai Vakanamata ina Bula Tawamudu

Ke o kunea rawa edaidai na marau kei na bula vakacegu, e dina ni vuravura oqo e sotava tu e levu na leqa, me qai sega vakacava ni o na marautaka na bula tawamudu ena parataisi e vuravura? Ni vakamacalataka e dua na iVakadinadina i Jiova na veivakalougatataki ena kauta mai na bula tawamudu, a kaya e dua na marama: “Au sega ni vinakata meu bula tawamudu. Sa rauti au ga na balavu ni bula e toka ga ena 70 se 80 na yabaki.” A vakarorogo tale tiko ga e dua na qase ni ivavakoso, a mani taroga vua: “Oni bau vakasamataka li se na cava ena yacovi iratou na luvemuni ke oni takali?” A luluvu na marama oqo ena nona vakasamataka na rarawa eratou na sotava na luvena. “Au sa qai liaca ni noqu rai e votu kina na noqu dau nanumi au ga,” e kaya, “au raica tale ga ni bula tawamudu e sega ni dua na inuinui eda nanumi keda ga kina, ia e vauca tale ga na noda nanumi ira kina na tani.”

So era rairai nanuma ni sega ni dua e kauaitaka na nodra bula se mate. Ia e kauaitaka dina na noda Dausoli Bula, ena nona kaya: “Me vaka na dina ni noqu bula, . . . au sa sega ni vinakata me mate na tamata ca; au vinakata ga me lesu mai na tamata ca mai na nonai tovo, ka me bula.” (Isikeli 33:11) Ke sa kauaitaka sara mada ga na Kalou na nona bula na tamata ca, sa qai wacava na titobu ni nona kauaitaki ira era lomani koya.

O Tui Tevita e Isireli makawa a nuitaka na nona veikauaitaki vakayalololoma o Jiova. Dua na gauna a kaya o Tevita: “Ni sa laivi au na tamaqu kei na tinaqu, ena qai keveti au cake ko Jiova.” (Same 27:10) E sega ni vakabekataki ni a kila o Tevita ni rau lomani koya na nona itubutubu. Ia kevaka mada ga erau mani biuti koya​—ni rau wekana voleka duadua​—e kila o Tevita ni na sega ni biuti koya na Kalou. Ena vuku ni nona loloma kei na nona veinanumi, e dulaka tu vei keda o Jiova na bula tawamudu kei na veiwekani tawamudu kei koya. (Jemesa 2:​23) Sega li ni dodonu meda ciqoma ena vakavinavinaka na isolisoli totoka oqo?

[iYaloyalo ena tabana e 7]

Ena marautaki na bula tawamudu nida lomana na Kalou, da lomani ira tale ga na wekada