O Dau Ciqoma na Veivuke i Jiova?

“Sa dau vukei au na Turaga [o Jiova] ka’u na sega ni rere!”​—IPERIU 13:6, VV.

1, 2. Na cava e bibi kina meda ciqoma na veivuke i Jiova me tuberi keda ena noda bula?

KAYA mada ni o lakova tiko e dua na gaunisala dredre e veidelana. Ia o sega ni lako duadua tiko baleta ni sa bole e dua e kila vinaka na gaunisala oya mo drau salavata. E kenadau ena ilakolako vaka oqo qai kaukaua cake sara vei iko, ia e vosota ga mo drau lako vata tiko. E raica ni o dau tarabe ena so na gauna. Ni rui kauaitaki iko, e tuberi iko ni drau lakova e dua na tolo ni sala vakarerevaki. O na cata beka me vukei iko? Sega! Baleta ni o kauaitaka na nomu bula.

² E dredre sara na noda ilakolako na lotu Vakarisito. Ia, eda na lakova duadua beka na sala rabailailai oqori? (Maciu 7:14) Sega, e vakaraitaka na iVolatabu ni o koya na dauveituberi vinaka duadua, na Kalou o Jiova, e vakatarai ira na tamata mera lako vata kei koya. (Vakatekivu 5:24; 6:9) E dau vukei ira tiko beka nona tamata era lako vata kei koya o Jiova? E kaya o koya: “Sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.” (Aisea 41:13) Me vakataki koya na dauveituberi ena noda vosa vakatautauvata, e dau tuberi ira vakayalololoma o ira kece na vinakata mera lako vata kei koya o Jiova. Ena sega sara ga ni dua vei keda me cata na veivuke oya!

3. Na taro cava eda na veivosakitaka?

³ Eda veivosakitaka ena ulutaga sa oti e va na sala e vukei ira kina na nona tamata ena gauna makawa o Jiova. E vukei ira tale beka ga vaka oqori na nona tamata ena gauna oqo? Eda rawa ni ciqoma vakacava na veivuke vaka oqori? Meda dikeva mada na rua na taro oqori. Nida cakava oqo, eda na nuidei ni na vukei keda dina o Jiova.​—Iperiu 13:6, VV.

Vukei Keda na Agilosi

4. Na cava era nuitaka kina na tamata ni Kalou ena gauna oqo nira na vukei ira na agilosi?

⁴ Era vukei ira tiko beka na tamata i Jiova ena gauna oqo na agilosi? Io, e vaka kina. Ena gauna oqo era sa sega ni laurai na agilosi ena gauna era vukei ira kina na dau sokalou dina nira vakaleqai. Ena gauna mada ga vakaivolatabu, e dau vakavudua ga na nodra rairai. E levu ga na ka era cakava e tawarairai, me vaka ga ena gauna oqo. Ia, era dau vakayaloqaqataki dina o ira na tamata ni Kalou era vakila ni vukei ira na agilosi. (2 Tui 6:14-17) E vaka kina vei keda ena gauna oqo.

5. E vakaraitaka vakacava na iVolatabu nira vakaitavi tiko na agilosi ena cakacaka vakavunau nikua?

⁵ Era dau kauaitaka vakalevu na agilosi i Jiova na cakacaka lavotaki eda vakaitavi tiko kina. Na cakacaka cava oya? E sauma na Vakatakila 14:6 (VV): “Au sa qai raica e dua tale na agilosi, ni sa vuka tu e macawa, ka sa tu vua e dua na i Tukutuku Vinaka tawa mudu, me kacivaka vei ira era tiko e vuravura, ki vei ira kece ga na veimatanitu kei na veiyavusa, kei na veimataqali vosa kei na veimataqali tamata.” Na ‘itukutuku vinaka tawamudu’ oqo e vauci vata kei na “i Tukutuku Vinaka ni matanitu,” e parofisaitaka o Jisu ena “vunautaki” ina “vuravura taucoko, me i vakadinadina ki na veivanua kece ga” ni bera ni cava na ituvaki kei vuravura. (Maciu 24:14, VV) Ia, era sega ni vunau tiko na agilosi. E solia ga o Jisu na itavi bibi oqo vei ira na tamata. (Maciu 28:19, 20) E sega li ni uqeti keda na noda kila nira na vukei keda na agilosi yalosavasava, o ira na ibulibuli vakayalo era kaukaua, nida cakava na cakacaka oqori?

6, 7. (a) Na cava e vakadinadinataka nira tokona tiko noda cakacaka vakavunau na agilosi? (b) E rawa nida nuitaka vakacava mera tokoni keda na agilosi i Jiova?

⁶ E levu sara na ivakadinadina ni nodra tokoni keda tiko na agilosi ena noda cakacaka. Me kena ivakaraitaki, eda dau rogoca vakalevu na nodra sotava na iVakadinadina i Jiova ena cakacaka vakavunau na tamata era se qai masuta oti ga na Kalou me vukei ira mera raica na ka dina. E yaco vakalevu na ka oqori, e sega kina ni rawa ni kainaki ni yaco vakacalaka. Nira vukei keda tiko na agilosi, sa qai levu cake ga na tamata era sa vakayacora tiko na ka e kacivaka na ‘agilosi e vuka voli e macawa’: “Mo ni rerevaka na Kalou ka vakalagilagia.”​—Vakatakila 14:7, VV.

⁷ O bau gadreva mera vukei iko tale ga na agilosi kaukaua nei Jiova? Ia mo vakaogai iko ena cakacaka vakavunau. (1 Korinica 15:58, VV) Nida vakaitavi vakalevu ena cakacaka lavotaki e solia vei keda o Jiova, eda na qai rawa ni nuitaka nira na vukei keda na agilosi.

Vukei Keda Nodra iLiuliu na Agilosi

8. Na itutu cecere cava e taura tu o Jisu mai lomalagi, e vakayaloqaqataki keda vakacava oqo?

⁸ E vakarautaka tale ga o Jiova e dua tale na agilosi me vukei keda. E vakamacalataki koya na Vakatakila 10:1 (VV) me “agilosi kaukauwa” qai “vaka na matanisiga na matana.” Na agilosi e laurai ena raivotu oqo e vakatakarakarataki Jisu Karisito ena gauna sa taura kina na nona kaukaua mai lomalagi. (Vakatakila 1:13, 16) E agilosi li o Jisu? Io, e rawa ni vakatokai tale ga me agilosi baleta ni o koya e agilosi turaga. (1 Cesalonaika 4:16) Na cava na agilosi turaga? Na vosa oqori e kena ibalebale na “iliuliu ni agilosi.” O Jisu e kaukaua duadua vei ira na luve i Jiova vakayalo. Sa lesi koya tale ga o Jiova me liutaki ira na Nona mataivalu agilosi. E kaukaua dina nona veivuke na agilosi turaga oqo. E kaukaua vakacava?

9, 10. (a) E “dauveivuke” vakacava o Jisu nida valavala ca? (b) E vukei keda vakacava na ivakaraitaki i Jisu?

⁹ E vola na yapositolo qase o Joni: “Kevaka e mani valavala ca e dua na tamata sa tiko e dua na noda dauveimasulaki [“dauveivuke,” NW] e na mata i Tamada, ko Jisu Karisito na yalododonu.” (1 Joni 2:1, VV) Na cava e kaya kina o Joni ni o Jisu e noda “dauveivuke” nida “valavala ca”? Baleta nida valavala ca e veisiga, qai tini ina mate na ivalavala ca. (Dauvunau 7:20; Roma 6:23) Ia, e solia o Jisu na nona bula me isoro ni noda ivalavala ca. E tiko tale ga ena yasa i Tamana dauloloma me kere veivosoti ena vukuda. Eda gadreva kece na veivuke vaka oya. Ia eda na rawata vakacava? E dodonu meda veivutunitaka na noda ivalavala ca da qai kerea na veivosoti e yavutaki ena isoro i Jisu. Meda kua tale ga ni tomana na noda valavala ca.

¹⁰ E sega ni mate wale ga ena vukuda o Jisu, e noda ivakaraitaki tale ga o koya. (1 Pita 2:21, VV) Na nona ivakaraitaki e vukei keda ena noda ilakolako meda kua kina ni vakayacora na ivalavala ca bibi me rawa kina nida vakamarautaka tiko ga na Kalou o Jiova. Eda sega li ni marautaka na veivuke oqo? A yalataka o Jisu vei ira nona imuri ni na vakarautaki e dua tale na ka me vukei ira.

Vukei Keda na Yalo Tabu

11, 12. Na cava na yalo i Jiova, e vakacava na kena kaukaua, na cava eda vinakata kina nikua?

¹¹ A yalataka o Jisu: “Au na qai masuti Tamaqu, me na solia vei kemudou e dua tale na Dauveivuke, me tiko vata kei kemudou ka tawa mudu. Sa i koya na Yalo ka mai vakaraitaka na veika dina me baleta na Kalou. E sega ni vakabauti koya rawa ko vuravura.” (Joni 14:16, 17, VV) Na “Yalo ka mai vakaraitaka na veika dina” oqo, se yalo tabu, e sega ni ka bula, e igu kaukaua ga i Jiova. E sega ni vakaiyalayala na kena kaukaua. Oqo na kaukaua a vakayagataka o Jiova ni bulia na lomalagi kei vuravura, ena nona vakayacora na cakacaka mana, kei na nona vakaraitaka ena raivotu na lomana. Ni sa sega ni vakayagataka tiko vaka oya na yalona o Jiova ena gauna oqo, e kena ibalebale beka oqo nida sa sega ni gadreva na yalona?

¹² Kena veibasai ga! Ena “gauna cacamatua, lewalewai dredre” oqo, sa da qai vinakataka ga vakalevu na yalo tabu i Jiova. (2 Timoci 3:1, NW) Ena vakaukauataki keda meda vosota na veivakatovolei. Ena vukei keda tale ga meda bucina na itovo vinaka e vukea na noda toro voleka vei Jiova kei ira na tacida vakayalo. (Kalatia 5:22, 23) E rawa ni yaga vakacava vei keda na dauveivuke totoka oqo e vakarautaka o Jiova?

13, 14. (a) Na cava eda vakadeitaka kina ni vinakata o Jiova me solia na yalona tabu vei ira na nona tamata? (b) Na cava eda rawa ni cakava e vakaraitaka nida sega ni via ciqoma na yalo tabu?

¹³ E vinakati taumada meda kerea na yalo tabu. E kaya o Jisu: “Kevaka dou sa kila, ko i kemudou na tamata ca, mo dou solia na ka vinaka vei ira na luvemudou, sa na qai wacava sara na levu ni nona via solia na Yalo Tabu na Tamamudou vakalomalagi vei ira era kerea vua!” (Luke 11:13,VV) Io, o Jiova e Tamada vinaka duadua. Kevaka eda kerei koya ena vakabauta me solia vei keda na yalo tabu, e macala tu ga ni na solia dina vei keda na isolisoli oqori. Ia, vakacava, eda bau dau kerea? E dodonu meda kerea na isolisoli oqori nida masu e veisiga.

¹⁴ Kena ikarua, eda ciqoma tale ga na isolisoli oqo nida cakacaka vata kaya. Me kena ivakaraitaki: Kaya mada ke dua na lotu Vakarisito e saga tiko vakaukaua me kua ni dau raica na iyaloyalo vakasisila. Sa masuta na yalo tabu me vukei koya me kua ni cakava na itovo vakasisila oqo. Sa kerei iratou tale ga na qase ni ivavakoso me ratou vukei koya, ratou qai vakasalataki koya me kua ni raica tale na iyaloyalo ca. (Maciu 5:29) Vakacava ke sega ni muria na ivakasala oya ni bacani me raica na iyaloyalo vakasisila? E salavata tiko beka na ka e cakava kei na nona masuta na yalo tabu me vukei koya? Se e rawa sara ga ni vakararawataka tiko na yalo tabu ni Kalou me vakayalia kina na isolisoli oqo? (Efeso 4:30) E dodonu ga meda saga vakaukaua meda ciqoma tiko ga na ivukevuke totoka e solia mai oqo o Jiova.

Vukei Keda na Vosa ni Kalou

15. Eda vakaraitaka vakacava nida sega ni raica na iVolatabu me vaka e ivola wale?

¹⁵ Na iVolatabu sa dau vukei ira voli mai na tamata i Jiova ena veisenitiuri sa oti. Meda kua gona ni raica na iVolatabu me vaka e ivola wale, ia meda raica ga me vaka e dua na isolisoli kaukaua e vukei keda. Ia e vinakati na sasaga meda qai ciqoma kina na veivuke oqo. E gadrevi me tiki ni veika eda dau cakava e veisiga na wili iVolatabu.

16, 17. (a) E vakaraitaka vakacava na Same 1:2, 3 na yaga ni kena wiliki na lawa ni Kalou? (b) E vakaraitaka vakacava na Same 1:3 ni vinakati kina na sasaga se cakacaka vakaukaua?

¹⁶ E kaya na Same 1:2, 3 me baleta na tamata e itovo vakalou: “Ia ka sa marau tiko e na vunau i Jiova; a sa vakananuma tiko na nona vunau e na siga kei na bogi. Ena tautauvata kei na kau sa tei e na bati ni uciwai, [“vica na uciwai,” NW] sa vuataka na vuana e na kena gauna, a drauna talega ena sega ni malai; ia na ka kecega sa cakava ko koya ena yaco.” O raica rawa na ka e tukuna tiko na tikina oqo? E rawa nida wilika na tikina oqori da qai kaya ni oqo e vakamacalataka tiko e dua na vanua ni vakacegu vinaka, e dua na kau e ivakaruru e tubu toka e bati ni uciwai. Ena totoka dina ke da lai moce toka ena dua na yakavi ena vanua vaka oya! Ia e sega ni sureti keda tiko na same oqo meda lai vakacegu. E tukuna tiko e duatani na ka, e vakaraitaka tiko ga e dua na sasaga se cakacaka kaukaua me caka. Eda kila vakacava?

¹⁷ Na kau oqo e sega ni dua ga na kau wale e lai bula toka e bati ni uciwai. E kauvuata, qai lai “tei” toka e “bati ni vica na uciwai.” E rawa vakacava me lai bula toka e dua na kau ena bati ni vica na uciwai? E rawa vua na dauteitei me kelia e so na ivakata me vakadrodroya kina na wai mai na vica na uciwai ina nona loga ni kauvuata. Io, sa qai matata na ka e tukuni tiko! Kevaka eda vua vakayalo, me vaka beka na kau oya, ena vakaraitaka oqo ni sa vakayacori e levu na cakacaka ena vukuda. Eda sa lewena tiko na isoqosoqo e solia vei keda na wai savasava ni ka dina, ia ena vinakati tale ga meda cakava na noda itavi. Ena vinakati meda gunuva na wai vakamareqeti oqo, oya meda dau vakasamataka da qai dau vakasaqaqara ena loma ni Vosa ni Kalou me rawa kina ni curuma na ka dina na noda vakasama kei na lomada. Oya ga na sala eda rawa tale ga ni vuataka kina na vua vinaka.

18. Na cava e gadrevi me qai rawa kina ni kunei ena iVolatabu na isau ni noda taro?

¹⁸ Ena sega ni yaga vei keda na iVolatabu kevaka e tava toka ga ena vata. E sega tale ga ni rawa meda bobo tu ga sa tadola vakacakamana na iVolatabu ina drauniveva e tiko kina na isau ni noda taro. Ni vinakati meda vakatulewa, e dodonu meda vakasaqara na ‘kilaka vakalou’ me vaka eda vakasaqara na iyau vuni. (Vosa Vakaibalebale 2:1-5) E dau gadrevi meda vakasaqara vinaka na ivakasala vakaivolatabu e walia na noda leqa. Era levu na ivola vakaivolatabu eda rawa ni vakayagataka ena noda vakasaqaqara. Kevaka eda vakayagataki ira na ivola oqo ena noda vakelia na vuku mai na Vosa ni Kalou, eda sa vakayagataka dina tiko na ka e vakarautaka o Jiova me vukei keda.

Vukei Keda Noda iTokani ena Vakabauta

19. (a) Na cava meda raica kina na veiulutaga ena Vale ni Vakatawa kei na Yadra! me sala ni nodra veivuke na noda itokani ena vakabauta? (b) Sa vukei iko vakacava e dua vei rau na ivoladraudrau oqo?

¹⁹ O ira na tamata i Jiova era dau veivukei vakataki ira. Sa veisautaka beka oqo o Jiova? E se sega. E rawa nida nanuma lesu kece na gauna era vukei keda kina na noda itokani ena vakabauta ena gauna sara ga eda gadreva tu kina na veivuke. Me kena ivakaraitaki, o rawa beka ni nanuma lesu e so na ulutaga ena Vale ni Vakatawa se Yadra! e vakacegui iko ena gauna o gadreva kina na veivuke se mo walia kina e dua na leqa o sotava se ena gauna e vakatovolei kina na nomu vakabauta? E solia vei iko na veivuke oqori o Jiova ni vakayagataka na “dauveiqaravi yalo dina ka vuku,” o koya e lesia me vakarautaka na “kakana e na kena gauna dodonu.”​—Maciu 24:45-47, VV.

20. Ena sala cava soti era yaco kina na qase ni ivavakoso mera “i solisoli vei ira na tamata”?

²⁰ Levu na gauna era solia sara ga vakadodonu na nodra veivuke na noda itokani ena vakabauta. De dua e tara na lomada na nona ivunau e dua na qase ni ivavakoso lotu Vakarisito, se e sikovi keda me lai vukei keda ena gauna eda sotava tiko kina na ituvaki dredre, se e vakasalataki keda meda walia e dua na noda malumalumu. E vola mai e dua na tacida yalewa e vukei koya e dua na qase ni ivavakoso: “Ena neirau cakacaka vakavunau tiko, e saga meu tukuna vua na ka e tu e lomaqu. Au se qai kerei Jiova ga ena bogi me vakaraitaka vei au e dua me keirau veitalanoa. Ena siga ga e tarava sa vosa sara mai vakayalololoma na tacida oqo. E vukei au meu raica ni sa dau vukei au voli mai o Jiova ena veiyabaki sa oti. Au vakavinavinakataki Jiova ena nona tala mai na qase ni ivavakoso oqo.” Ena sala oqori era vakaraitaka kina na qase ni ivavakoso nira “i solisoli vei ira na tamata,” e vakarautaka o Jiova ena vuku i Jisu Karisito mera vukei keda meda lako tu ga ena sala ni bula.​—Efeso 4:8, VV.

21, 22. (a) Na cava e yaco nira muria na ivakasala ena Filipai 2:4 na lewe ni ivavakoso? (b) Na cava e yaga tale ga kina na veicakacaka vakayalololoma lalai?

²¹ E sega wale ga ni o ira na qase, o ira yadudua sara ga na lotu Vakarisito yalodina era na via muria na ivakaro vakauqeti oqo: “Me ra kakua ni dui nanuma ga na tamata yadua na ka e baleti ira, ia me ra dau nanuma tale ga na ka e baleti ira na tani.” (Filipai 2:4,VV) Ena laurai na cakacaka e vu mai na veilomani nira muria kece na lewe ni ivavakoso vakarisito na ivakasala oya. Me kena ivakaraitaki, a sotava e vica vata na leqa e dua na vuvale. Rau lako vata ina sitoa o tama kei luvena goneyalewa. E yacovi rau e dua na vakacalaka e gaunisala ni rau sa lesu tiko i vale. E mate o luvena yalewa; qai mavoa sara vakaca o tama. Ni suka mai valenibula o tama, a sega mada ga ni cakava rawa e dua na ka me baleti koya. E vusolo na loma i watina baleta ni sega ni rawa ni qaravi koya duadua. Rau mani lomasoli e dua na veiwatini ena ivavakoso me rau lai qaravi rau ena nodrau vale ena vica vata na macawa.

²² Ia e sega ni dau vaka kece oya na lelevu ni cakacaka vakayalololoma e vakaraitaki se me vaka kece oya na noda vakuai keda ena so na ka. So na veivuke eda ciqoma e lalai toka ga. Ia se mani vakacava na kena lailai, eda dau vakavinavinakataka ga. O rawa beka ni vakasamataka e dua na gauna e tauca kina vei iko e dua na vosa vakayalololoma se cakava e dua na cakacaka vakayalololoma e dua na tacida ena gauna sara ga o gadreva kina? E dau vakaraitaka vaka oya o Jiova na nona kauaitaki keda.​—Vosa Vakaibalebale 17:17; 18:24.

23. E raica vakacava o Jiova na noda veivukei vakataki keda?

²³ O bau gadreva me vakayagataki iko o Jiova ena nodra vukei na tani? E dola tu vei iko na cakacaka lavotaki oqori. Ena marautaka dina o Jiova na nomu soli iko. E kaya na nona Vosa: “Sa ia na soli ka vei Jiova ko koya sa lomani ira na dravudravua; ia na ka sa solia ko koya ena saumi tale vua.” (Vosa Vakaibalebale 19:17) E ka ni veivakalougatataki vei keda na noda soli keda ena vukudra na tacida. (Cakacaka 20:35) Era na sega ni vakila na marau ni soli ka oqo se na kena ciqomi na veivukei o ira na tawasei ira. (Vosa Vakaibalebale 18:1) O koya gona, meda yalodina tiko mada ga ena noda dau tiko ena soqoni vakarisito me rawa kina nida veivakayaloqaqataki.​—Iperiu 10:24, 25, VV.

24. Na cava meda kua ni kaya kina nida vakuai baleta nida sega ni raica na cakacaka veivakurabuitaki i Jiova ena veigauna sa oti?

²⁴ Eda sega li ni marautaka na veisala e so e vukei keda tiko kina o Jiova? Dina eda sega ni bula tiko ena gauna e vakaraitaka kina o Jiova na veicakacaka veivakurabuitaki, ia eda sega ni vakuai. Na ka ga e bibi oya na nona solia vei keda o Jiova na veivuke eda gadreva me rawa kina nida yalodina tiko ga. Kevaka eda vosota kece tiko ena vakabauta, eda na raica votu na cakacaka vakatubuqoroqoro qai lagilagi duadua me na qai vakayacora o Jiova! Meda vakayagataka vinaka mada ga na veivuke vakayalololoma i Jiova me rawa kina nida cavuta tale ga na vosa e noda tikinivolatabu ni yabaki 2005: “E dau vukei au o Jiova.”​—Same 121:2, NW.

Na Cava O Nanuma?

E vukei keda vakacava o Jiova nikua—

• ni vakayagataki ira na agilosi?

• ni vakayagataka na yalona tabu?

• ni vakayagataka na nona Vosa e vakauqeta?

• na nona vakayagataki ira na noda itokani ena vakabauta?

[iYaloyalo ena tabana e 18]

Eda marautaka na noda kila nira tokona tiko na cakacaka vakavunau na agilosi

[iYaloyalo ena tabana e 21]

E rawa ni vakayagataka o Jiova e dua eda veitokani ena vakabauta me vakacegui keda