‘O Jiova na Noqu iVukevuke’

“Ai Sala Vakaiukuuku” na Bula Vaqase

“NA BULA vinaka duadua,” e kaya o Muriel, e yabaki 101. E biuta vaka oqo o Theodoros, e yabaki 70: “E itavi dokai dina!” E kaya o Maria, e yabaki 73: “Au vakayagataka vinaka sara ga na noqu bula.” Ratou a qarava na Kalou o Jiova ena nodratou bula taucoko o iratou na tukuni toka oqo.

Era wili vata kei ira na dauveiqaravi gugumatua i Jiova e vuravura raraba o ira na itabaqase vaka oqo. Dina nira sa qase sara, ra sa sega soti ni bula vinaka, ra qai sotava tale ga e so na ituvaki leqataki, ia era se qaravi Jiova tiko ga mai na vu ni yalodra. Ena ivavakoso lotu Vakarisito, era ivakaraitaki vinaka ra qai dokai na itabaqase ena vuku ni nodra yalodina ena sokalou. E taleitaka vakalevu o Jiova na nodra veiqaravi na itabaqase, dina ni yalani na ka e rawa nira cakava ena vuku ni kedra ituvaki.a​—2 Korinica 8:​12.

E vakavotuya na Same na ivakarau ni bula e rawa nira namaka na itabaqase yalodina. Era rawa ni vaka na vunikau e bula dede ia e vuavuaivinaka tiko ga. E lagata na daunisame ena vukudra na itabaqase yalodina: “Era na vuavua tiko ni ra sa qase mai; era na drokadroka ka bulabula.”​—Same 92:14.

Era rivarivabitaka e so na itabaqase nira na sega ni kauaitaki ra qai vakawaleni baleta nira sa malumalumu. E vakamasuti Jiova o Tevita: “Kakua ni biuti au e na gauna ka’u sa qase mai kina; kakua ni laivi au ni sa oti na noqu kaukauwa.” (Same 71:9) Na cava ena vakabulabulataka e dua ni sa qase, me kua kina ni malumalumu? Na itovo vakalou ni yalododonu. “Ena bulabula na yalododonu me vaka na balabala,” e lagata na daunisame.​—Same 92:12.

O ira era vakayagataka na nodra bula mera qaravi Jiova ena yalodina era na vuavuaivinaka tiko ena gauna mada ga era sa qase kina. Ni levu mada ga na ka era cakava ena nodra bula mera vukei ira kina kei na so tale, e vuataka na vua vinaka, e via vaka na sorenikau e kaburaki qai sega ni taqei rawa na levu ni vuana. (Kalatia 6:​7-​10; Kolosa 1:​10) Kevaka gona era vakasabusabutaka na nodra bula ena veika e baleti ira ga qai sega ni salasalavata kei na ivalavala ni Kalou na ka era cakava, ena sega kina ni levu sara na kedra idivi nira sa qase mai.

E vakabibitaki tale ga ena iVolatabu ena Vosa Vakaibalebale na ivalavala dodonu e iukuuku ni bula vaqase. Eda wilika kina: “Ai sala vakaiukuuku na ulu sika, ni sa kune e na sala ni valavala dodonu.” (Vosa Vakaibalebale 16:31) Io, e vakavotuya na vinaka ni tamata e loma ke bulataka na ivalavala dodonu. Ena vakarokorokotaki kevaka e muria tiko ga na sala ni ivalavala dodonu ena nona bula taucoko. (Vunau ni Soro 19:32) Ena dokai na ulusika kevaka e tu vua na vuku kei na itovo vakalou.​—Jope 12:12.

E talei vei Jiova ni dua na tamata yalododonu e vakayagataka na nona bula taucoko me qarava kina na Kalou. E kaya o Jiova ena iVolatabu: “Ia ka’u sai koyakoya tikoga ka yacova na gauna dou na qase kina; ka’u na keveti kemudou mo dou sa sika mada ga: ka’u a bulia, ia ka’u na ia tikoga na veikeveti, kei na veiroqoti, ka’u na ia talega na veivakabulai.” (Aisea 46:4) E veivakacegui dina noda kila ni yalataka tu na Tamada vakalomalagi dauloloma ni na vakaukauataki ira nona dauveiqaravi yalodina era sa qase, qai tokoni ira tale ga!​—Same 48:14.

Kevaka sa talei vei Jiova na nona sokalou tu mai e dua ena nona bula taucoko, e sega li ni dodonu meda dokai koya? Ke da vakatotomuria na rai ni Kalou, eda na vakamareqeti ira tale ga eda vakabauta vata era sa itabaqase. (1 Timoci 5:​1, 2) Meda vakaraitaka gona na noda loloma vakarisito nida vukei ira ena so na ka.

Muria na Sala ni iValavala Dodonu, e Dina ni sa Kala na Matanisiga

E vakadeitaka o Solomoni: “E na sala ni valavala dodonu sa rawa na bula.” (Vosa Vakaibalebale 12:28) Nona sa qase e dua e sega ni dodonu me tarovi koya mai na nona goleva na sala oqo. Me kena ivakaraitaki, mai Moldova, e dua na turaga sa yabaki 99 e vakayagataka na nona bula vakaitabagone me cuqena kina na nona vakabauta vakominisi. E sakitaka o koya ni a bau veivosaki kei ira na iliuliu kilai levu vakominisi, me vakataki V. I. Lenin. Ia, ni sa kasura na veiliutaki vakominisi, sa sega ni qai vakainaki na nona bula na turaga oqo. Nira mai vakaraitaka gona vua na iVakadinadina i Jiova ni iwali duadua ga ni leqa ni kawatamata na Matanitu ni Kalou, e ciqoma na ka dina ena iVolatabu qai vulica sara vagumatua. Ka ni rarawa ga ni mani sega ni rawa ni dua na dauveiqaravi papitaiso i Jiova, ena kena sa mai dromu koso na nona matanisiga ena nona sa takali.

Ni vulica tiko na bula savasava e namaka vei keda na Kalou, e kila sara e dua na marama yabaki 81 mai Hungary ni dodonu me vakamautaka na turaga erau sa tiko vata ena vica na yabaki. E vakamacalataka ena yalodoudou vua na turaga erau tiko vakasuva na nona rai vakaivolatabu. Ka ni kurabui vua ni a vakadonuya me rau vakamau. Ni oti ga na nodrau vakamau, e totolo sara na nona toso vakayalo. E yaco me dua na dautukutuku bera ni papitaiso ni oti ga e walu na vula nona tekivu vulica na iVolatabu, oti ga vakalailai sa papitaiso sara. E rawa gona ni iukuuku dina vei ira na sa qase na yalododonu!

Io, era kila deivaki na itabaqase lotu Vakarisito yalodina ni kauaitaki ira na Kalou. Ena sega tale ga ni vakanadakui ira na yalodina vua o Jiova. Ia, e yalataka ga ni na tuberi ira, tokoni ira, qai vakaukauataki ira ena gauna mada ga sa ra qase kina. Era vakadinata na vosa ni daunisame: ‘O Jiova na noqu ivukevuke.’​—Same 121:2.

[iVakamacala e ra]

[Tikina bibi ena tabana e 9]

“Ai sala vakaiukuuku na ulu sika, ni sa kune e na sala ni valavala dodonu.”​—VOSA VAKAIBALEBALE 16:31

[Kato ena tabana e 8]

E VAKAMAREQETI IRA NA NONA DAUVEIQARAVI ITABAQASE O JIOVA

“Mo tu cake e matadra sa sika na uluna, ka doka na matadra na tamata qase.” ​—Vunau ni Soro 19:32.

“Ia ka’u sai koyakoya tikoga ka yacova na gauna dou na qase kina; ka’u na keveti kemudou mo dou sa sika mada ga.” ​—Aisea 46:4.