Na Vakasaqarai ni “Mata-ni-civa Talei Sara” Nikua
“[E]na vunautaki mada na i Tukutuku Vinaka ni matanitu ki na vuravura taucoko, me i vakadinadina.”—MACIU 24:14, VV.
1, 2. (a) Na cava era nanuma o ira na Jiu ena gauna i Jisu me baleta na Matanitu ni Kalou? (b) Na cava sa qai cakava o Jisu me matata kina vei ira na Matanitu ni Kalou? Na cava a mani yaco?
ENA gauna a mai bula kina e vuravura o Jisu, e dau wewenigusudra na Jiu na Matanitu ni Kalou. (Maciu 3:1, 2; 4:23-25; Joni 1:49) Ia, levu era sega ni kila na raba ni vanua e kovuta kei na ivakarau ni kena veiliutaki; era sega tale ga ni kila ni matanitu vakalomalagi. (Joni 3:1-5) E so mada ga na imuri i Jisu e sega tu ni matata vei ira se cava na Matanitu ni Kalou kei na veika mera cakava mera veiliutaki kina kei koya.—Maciu 20:20-22; Luke 19:11; Cakacaka 1:6.
2 Ni toso na gauna, e levu sara na ka sa qai vakavulica vakamalua o Jisu vei iratou nona tisaipeli, wili kina na vosa vakatautauvata ni mataniciva talei sara e veivosakitaki ena ulutaga sa oti, e tukuna kina ni bibi me ratou gumatua ni vakasaqara na Matanitu vakalomalagi. (Maciu 6:33; 13:45, 46; Luke 13:23, 24) E kena irairai, ni uqeti iratou sara ga na veika oqo, baleta ni oti ga oya eratou gumatua sara ni vunautaka ena yaloqaqa na itukutuku vinaka ni Matanitu ni Kalou ina iyalayala kei vuravura, me vaka e vakadinadinataki ena ivola na Cakacaka.—Cakacaka 1:8; Kolosa 1:23.
3. Na cava e tukuna o Jisu me baleta na Matanitu ni Kalou ena noda gauna?
3 Vakacava ena gauna oqo? Sa vunautaki vei ira e vica vata na milioni na veika vinaka ena sotavi ena vuravura parataisi ena ruku ni veiliutaki ni Matanitu ni Kalou. Ena nona parofisai vakairogorogo me baleta na ‘iotioti ni veisiga ni ituvaki kei vuravura,’ a kaya kina vakamatata o Jisu: “[E]na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kece ga, sa na qai yaco mai na i vakataotioti.” (Maciu 24:3, 14, VV; Marika 13:10) A vakamacalataka tale ga ni cakacaka levu oqo e dodonu ga me vakayacori, e dina ni na basika na ka ni bolebole e rawa ni vakadredretaka me vaka na veivakacacani. Ia, a vakadeitaka: “Ko koya ena vosota me yacova nai vakataotioti, ena vakabulai.” (Maciu 24:9-13) Na veika kece oqo e gadrevi kina na yalo ni vakuai koya kei na yalodina e laurai vua na dauveivoli ena vosa vakatautauvata i Jisu. Era tiko beka e so nikua e vaka oya na nodra vakabauta kei na nodra gumatua ni vakasaqara na Matanitu ni Kalou?
Marau ni Kunea na Ka Dina
4. E cakayaco vakacava vei ira nikua na ka dina me baleta na Matanitu ni Kalou?
4 Dua na ka nona marau na dauveivoli ena vosa vakatautauvata i Jisu ni kunea na “mata-ni-civa talei sara” a vakasaqara voli. Na marau oqo a uqeti koya me cakava na ka kece ga e rawata me taukena kina. (Iperiu 12:1) E vakatale ga oya nikua, na ka dina me baleta na Kalou kei na nona Matanitu e vakayarayarataki ira mai na tamata qai vakauqeti ira. Eda nanuma lesu kina na ivakamacala nei Brother A. H. Macmillan, ni volatukutukutaka na nona vakasaqara na Kalou kei na nona inaki vua na kawatamata ena ivola Faith on the March. E kaya: “Na ka au sa kunea era sa kunea tale tiko ga e vica vata na udolu na tamata e veiyabaki. Era vakataki iko kei au, nira lako mai na veimatanitu, matatamata, duidui nodra ivakarau ni bula, qai duidui nodra yabaki. Na ka dina e sega ni veivakaduiduitaki. E vakayarayarataki ira mai na tamata kece ga.”
5. Na itukutuku vakasakiti cava e laurai ena yabaki vakacakacaka ni 2004?
5 E laurai e veiyabaki na dina ni vosa oqo, ni uqeti ira e drau na udolu na tamata lomadina na itukutuku vinaka ni Matanitu ni Kalou mera yalataka nodra bula vei Jiova ra qai cakava na lomana. E vakatale ga oya ena yabaki vakacakacaka ni 2004, e tekivu ena Sepiteba 2003 me yacova na Okosita 2004. Ena loma ni 12 na vula oqori, era papitaiso kina e le 262,416 me ivakaraitaki ni nodra yalataki ira vei Jiova. E vakayacori oqo ena 235 na vanua, era oga kina na iVakadinadina i Jiova ni vakavulici ira ena iVolatabu na le 6,085,387 e veimacawa me rawa nira vukei na tamata e duidui nodra ivakarau ni bula, mai na veimatanitu, veiyavusa, kei na duivosavosa mera ciqoma na ka dina ena iVolatabu e rawati kina na bula.—Vakatakila 7:9.
6. E rawati vakacava na tubu ena veiyabaki?
6 E rawati vakacava oqo? Macala ni o Jiova e vakayarayarataki ira na tamata lomadina vaka oqo vua. (Joni 6:65; Cakacaka 13:48) Ia, me kua ni guilecavi nodra lomasoli kei na nodra sasaga vagumatua o ira era vakarabailevutaka nodra veiqaravi ena nodra vakasaqara na Matanitu ni Kalou. A vola o Brother Macmillan ni sa yabaki 79: “Ena imatai ga ni gauna au vulica kina na veika e yalataki me baleti ira na tauvimate kei na mate, au sega tale ni qai vakatitiqataka na inuinui oqo ena iVolatabu. Tekivu sara ga e kea au sa sasagataka meu vakalevutaka noqu kila na iVolatabu meu vukei ira kina e so era vakataki au era dau vakasaqara mera kila na Kalou Kaukaua Duadua, o Jiova, kei na nona inaki vua na kawatamata.”
7. Na ivakaraitaki cava e dusia na nodra marau kei na nodra gugumatua o ira na kunea na ka dina ena iVolatabu?
7 E laurai tale ga na yalogu vaka oqo vei ira na dauveiqaravi i Jiova nikua. Dikeva me kena ivakaraitaki na tacida yalewa o Daniela mai Vienna, e Austria. E kaya: “Me tekivu mai niu se gone, e dau noqu itokani vinaka duadua na Kalou. Au dau via kila na yacana baleta ni vosa ‘Kalou’ e sega ni voleka sara vei au. Ia, au a wawa sara tiko me yacova niu sa yabaki 17, na gauna era qai lako mai kina e vale na iVakadinadina i Jiova. Era vakamacalataka na veika kece au via kila me baleta na Kalou. Au sa qai kunea na ka dina, dua na ka na kena vinaka! Ena levu ni noqu marau au tekivu vunau kina vei ira na tamata kece.” Ia era mani vakalialiai koya nona itokani e koronivuli ena vuku ni ka e cakava. E tomana o Daniela: “E vaka au raica sara ga e matanavotu na vakayacori ni parofisai ena iVolatabu, niu vulica ni a kaya o Jisu vei iratou nona imuri ni ratou na cati qai vakacacani ena vuku ni yacana. Dua na ka noqu marau kei na noqu qoroqoro.” Sega ni dede, sa yalataka o Daniela nona bula vei Jiova, papitaiso, qai kakavaka na cakacaka vakadaukaulotu. Ni oti nodrau vakamau kei Helmut, erau tekivu vunau sara vei ira era vakaitikotiko e Vienna era vosataka na vosa vakaaferika, vakajaina, vakafilipaini, kei na vakaidia. Rau sa veiqaravi vakadaukaulotu tiko oqo o Daniela kei Helmut ena cevaira kei Aferika.
Era Sega ni Soro Koso
8. Na cava e dua na sala era vakaraitaka kina e levu na nodra lomana na Kalou kei na nodra yalodina ina nona Matanitu?
8 Na veiqaravi vakadaukaulotu e dua na sala era vakaraitaka kina na tamata i Jiova na nodra lomana na Kalou kei na nodra yalodina ina nona Matanitu. Me vakataki koya na dauveivoli ena vosa vakatautauvata i Jisu, o ira era lesi ena itavi oqo era bolea mera lako ina vanua yawa ena vuku ni Matanitu ni Kalou. Era sega ni lako o ira oqo mera lai vakasaqara na itukutuku vinaka ni Matanitu ni Kalou; era lai vakasavuya ga vei ira era tu vakayawa, mera vakavulici ra qai vukei mera tisaipeli i Jisu Karisito. (Maciu 28:19, 20, VV) Ena levu na vanua, ena vinakati mera vosota na ituvaki dredre sara. Ia e levu na veivakalougatataki era sotava ena vuku ni nodra dau vosota.
9, 10. Na ituvaki marautaki cava era sotava na daukaulotu ena veivanua yawa, me vaka na Central African Republic?
9 Taura mada me kena ivakaraitaki, mai na Central African Republic, era le 16,184 na tiko ena iVakananumi ni mate i Karisito ena yabaki sa oti, oqo e rauta ni vakavitutaki na iwiliwili ni dautukutuku e kea. Me vaka ni sega na livaliva ena levu na vanua oya, na cakacaka kece sa dau vakayacori ga vakalevu e tautuba ena ruku ni vunikau. Oya na vuna era cakava tale ga vaka kina na daukaulotu nira vunau ra qai veivakavulici ena iVolatabu. E sega wale ga ni rarama qai mudre na cagi e tautuba, e tiko tale na kena yaga. Era doka na iVolatabu na lewenivanua, qai matau mera dau misika na ulutaga e baleta na lotu me vaka nodra dau malekata ena so tale na vanua na veivosakitaki ni qito se itukutuku ni draki. Era dau kauai vakalevu o ira era tavali, ra qai veitomani ena vuli.
10 Koya gona ni veivakavulici tiko ena iVolatabu e tautuba e dua na daukaulotu, a gole sara yani e dua na cauravou e tiko ena tai kadua ni gaunisala qai kaya ni se bera ni dua e sikova koya, mani kerea me lai raici koya na daukaulotu oqo me rau vuli iVolatabu. Marau na daukaulotu me vakayacora na nona kerekere, sa toso vinaka sara tiko na cauravou oqo. E dau matau vei ira na ovisa ena vanua oqo mera tarovi ira na iVakadinadina e gaunisala. E sega ni kena inaki mera solia na kedra itotogi se samani, mera kerea ga na itabataba vovou ni Vale ni Vakatawa kei na Yadra! se mera vakavinavinakataka na ulutaga era taleitaka vakalevu.
11. E dina ni sotavi na dredre, era raica vakacava ga nodra cakacaka o ira na daukaulotu e sa dede nodra veiqaravi?
11 Levu vei ira era tekivu daukaulotu ena 40 se 50 na yabaki sa oti era se yalodina tiko ga ena nodra veiqaravi. Era ivakaraitaki vinaka dina vei keda ena vakabauta kei na vosota! E tolu na vanua erau sa veiqaravi kina vakadaukaulotu e dua na veiwatini ena loma ni 42 na yabaki sa oti. E kaya o tagane: “E sotavi na veika dredre. Kena ivakaraitaki, e 35 na yabaki neirau vosota voli na mate na malaria. Ia keirau sega vakadua ni veivutunitaka neirau vakatulewa me keirau daukaulotu.” E tomana o yalewa: “E levu dina na veika me vakavinavinakataki. E marautaki na cakacaka vakavunau, qai rawarawa me tekivutaki na vuli iVolatabu. Na nodra dau lako mai ena soqoni na gonevuli ra qai mai veikilai, e vaka ga na nodra sotasota na vuvale.”
Era “Okata me Sega ni Yaga na Ka Kece Ga”
12. E vakaraitaka vakacava e dua ni vakamareqeta dina na Matanitu ni Kalou?
12 Ni sa kunea na dauveivoli na mataniciva talei sara, “sa lako ka volitaka na ka kecega sa tu vua, ka sa volia na ka ko ya.” (Maciu 13:46) Na yalo vaka oqori e laurai tale ga vei ira era vakamareqeta na Matanitu ni Kalou, era biuta tani na veika kece ga. E kaya kina na yapositolo o Paula, ena vakaivotavota kei Karisito ena lagilagi ni Matanitu ni Kalou: “Au sa okata me sega ni yaga na ka kece ga e na kena talei na kilai Karisito Jisu na noqu Turaga. Au sa biuta tani na ka kece ga e na vukuna; au sa okati ira kece ga me ra de ni manumanu, me noqu kina na Karisito.”—Filipai 3:8, VV.
13. E vakaraitaka vakacava e dua mai na Czech Republic na nona taleitaka na Matanitu ni Kalou?
13 E vakatale ga oya nikua, ni vuqa era bolea mera veisautaka nodra bula mera tauca kina na veika vinaka e dulaka na Matanitu ni Kalou. Kena ivakaraitaki, ena Okotova 2003, na qasenivuli liu ni dua na koronivuli mai na Czech Republic, sa yabaki 60, a wilika na ivola ni vuli iVolatabu Na Ka Mo Kila Mo Bula Tawamudu Kina. Ni sa wilika oti, e veitaratara sara kei ira na iVakadinadina i Jiova ena nona yasayasa me rawa ni vuli iVolatabu. E toso vinaka sara vakayalo, qai sega ni dede sa tekivu lako ina soqoni. Ia, sa na vakacava na nona inakinaki me turaganikoro kei na nona tovolea me digitaki me lewe ni seneti? A veisautaka na nona inakinaki me dua e daukacivaka na Matanitu ni Kalou. E kaya, “Levu sara na ivola vakaivolatabu au solia vei ira noqu gonevuli.” E yalataka nona bula vei Jiova ena nona tabadromuci ena wai ena soqo ni tikina ena Julai 2004.
14. (a) E uqeti ira vakacava e vica na milioni na itukutuku vinaka ni Matanitu ni Kalou? (b) Na taro vakavure vakasama cava meda dui tarogi keda kina?
14 E vakatale ga oya na veika era cakava e vica na milioni e veiyasa i vuravura me baleta na itukutuku vinaka ni Matanitu ni Kalou. Era dro tani mai na vuravura ca, veisautaka nodra itovo makawa, biuta nodra ilala makawa, qai muduka nodra guta na veika vakavuravura. (Joni 15:19; Efeso 4:22-24; Jemesa 4:4; 1 Joni 2:15-17) Na cava era biuta kece kina oqo? Baleta nira raica na veika vinaka e dulaka na Matanitu ni Kalou me uasivia na veika cava ga e solia o vuravura ena gauna oqo. E vakatale beka ga oya na nomu rai me baleta na itukutuku vinaka ni Matanitu ni Kalou? E uqeti iko beka oqo mo veisautaka nomu ivakarau ni bula, na veika o vakabibitaka, kei na nomu isausau, mera salavata kei na veika e vinakata o Jiova? Na nomu cakava oqori o na kalougata kina nikua vaka kina ena gauna mai muri.
iOtioti ni Tatamusuki
15. Na cava e parofisaitaki nira na cakava na tamata ni Kalou ena iotioti ni veisiga oqo?
15 E vola na daunisame: “O ira na nomuni tamata era na via vakacabori ira mei madrali . . . e na siga ni nomuni kaukauwa.” Era okati e ke e “lewe vuqa na . . . cauravou ka lailai na mata ni tegu,” kei ira “na yalewa sa tukuna na itukutuku vinaka” era vaka na “mataivalu levu.” (Same 68:11, NW; 110:3) Na cava e yaco ena nodra gugumatua kei na nodra vakuai ira na tamata i Jiova, na tagane, yalewa, gone kei na qase ena iotioti ni veisiga oqo?
16. Tukuna na ivakaraitaki ni nodra sasaga na dauveiqaravi ni Kalou mera vukea e so mera kila na veika me baleta na Matanitu ni Kalou.
16 E veinanuyaka voli e dua na painia, se cakacaka vakaitalatala vakatabakidua mai Idia mera na vukei vakacava na le ruanamilioni na didivara e kea mera kila na veika me baleta na Matanitu ni Kalou. (Aisea 35:5) Mani lai vuli sara ena koronivuli ni vosa vagalu. Rawa kina ni wasea vei ira e levu na didivara na inuinui ni Matanitu ni Kalou, mani tauyavutaki na iwasewase lalai ni vuli iVolatabu. Ena loma ga ni vica na macawa, sa ra mai soqoni ena Kingdom Hall e sivia e le 12. E muri, ena dua na soqo ni vakamau, rau mani sota kina na painia oqo kei na dua na cauravou didivara mai Calcutta e levu nona vakatataro qai taleitaka me levu na ka e kila me baleti Jiova. Ia, e dua tiko na leqa. Na cauravou oqo e sa na lesu i Calcutta, e rauta toka ni 1,600 na kilomita na kena yawa, me lai vuli ena koronivuli torocake, qai sega ni dua na iVakadinadina e kea e kila na vosa vagalu. Sa qai vakamasuti tamana na cauravou oqo me lai vuli ga e Bangalore me rawa ni tomana kina nona vuli iVolatabu. E toso vinaka vakayalo, qai yalataka nona bula vei Jiova ni oti e rauta ni dua na yabaki. Sa qai vakavulici ira tale e so na didivara ena iVolatabu, wili kina e dua nona itokani erau se veikilai ni rau se gone. Ena gauna oqo, sa tuvanaka tiko na valenivolavola ni tabana mai Idia mera vulica na painia na vosa vagalu me rawa nira veivuke ena nodra vakavulici ena iVolatabu.
17. Tukuna na veika e vakayaloqaqataki iko ena ripote ni yabaki vakacakacaka ni 2004 ena tabana e 19 ina 22.
17 Ena tabana e 19 ina 22 ni ivoladraudrau oqo, e tiko kina na ripote ni cakacaka vakavunau ni iVakadinadina i Jiova e vuravura ena yabaki vakacakacaka ni 2004. Dikeva mada vakalekaleka, mo vakadeitaka kina ni o ira na tamata i Jiova e veiyasa i vuravura ena gauna oqo era guta mera vakasaqara na “mata-ni-civa talei sara.”
“Vakasaqara Taumada na Matanitu ni Kalou”
18. Na tikina cava a sega ni cavuta o Jisu ena nona vosa vakatautauvata ni dauveivoli? Na cava na vuna?
18 Nida lesu ina vosa vakatautauvata i Jisu me baleta na dauveivoli, eda dikeva ni sega ni cavuta o Jisu na veika e sa na bula kina na dauveivoli ni oti nona volitaka na ka kece e taukena. E so era na rairai taroga: ‘Ena qai rawata vakacava na kena kakana na dauveivoli, nona isulu, kei na vale me tiko kina ni sa sega na ka e vo? Na cava beka na kena yaga vua na mataniciva talei oya?’ Ena rai vakatamata, na taro oqo ena vakavure vakasama toka. Ia a sega beka ni vakauqeti iratou nona tisaipeli o Jisu: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo”? (Maciu 6:31-33) E vakabibitaki ena vosa vakatautauvata oqo na nona qaravi ena yalodina na Kalou kei na gumatuataki ni veika e vauca na Matanitu ni Kalou. E tiko beka na ka eda vulica kina?
19. Na ka bibi cava eda vulica ena vosa vakatautauvata i Jisu ni mataniciva talei sara?
19 Kevaka eda se qai vulica wale ga na itukutuku vinaka se sa dede na noda vakasaqara na Matanitu ni Kalou kei na noda kacivaka vei ira tale e so na veika vinaka ena kauta mai, e se dodonu tiko ga meda vakaliuca na Matanitu ni Kalou. Eda bula tu oqo ena gauna dredre, ia e tu na vuna vinaka meda vakabauta kina ni veika eda sasagataka ena yaco dina qai talei sara, me vaka na mataniciva a kunea na dauveivoli. Na veika lelevu e yaco e vuravura kei na vakayacori ni parofisai ena iVolatabu e vakadinadinataka nida sa bula tu oqo ena ‘iotioti ni veisiga ni ituvaki kei vuravura.’ (Maciu 24:3) Me vakataki koya na dauveivoli, meda gumatua da qai marau ni kacivaka na itukutuku vinaka ni Matanitu ni Kalou.—Same 9:1, 2.
O Se Nanuma Tiko?
• Na cava e vakavuna nodra tubu na dausokalou dina ena veiyabaki?
• Na yalo cava e laurai vei ira na daukaulotu?
• Na veiveisau cava era vakayacora e so me baleta na itukutuku vinaka ni Matanitu ni Kalou?
• Na ka bibi cava eda vulica ena vosa vakatautauvata i Jisu ni mataniciva talei sara?
[Chart ena tabana e 19-22]
2004 RIPOTE NI YABAKI VAKACAKACAKA NI IVAKADINADINA I JIOVA E VURAVURA
(Raica na bound volume)
[iYaloyalo ena tabana e 14]
“Na ka dina . . . e vakayarayarataki ira mai na tamata kece ga.”—A. H. Macmillan
[iYaloyalo ena tabana e 15]
Erau vunau o Daniela kei Helmut ena yalava e Vienna e duatani na kena vosa
[iYaloyalo ena tabana e 16, 17]
Me vakataki koya na dauveivoli, o ira na daukaulotu nikua era vakalougatataki vakalevu
[iYaloyalo ena tabana e 17]
“O ira na nomuni tamata era na via vakacabori ira”