Taro na Dauwiliwili

E dodonu beka me soli ilavo se iloloma na lotu Vakarisito vua e dua e cakacaka vakamatanitu ena vuku ni nona veiqaravi, se ena wili beka oqori me veivaqumi?

Se mani vanua cava era tiko kina na lotu Vakarisito, era dau saga mera yalomatuataka na ka era cakava me veiganiti kei na vanua era tiko kina, ra nanuma tale ga ni so na ka e vakadonui tu vakalawa se ciqomi ena dua na vanua, ena sega ni vaka kina ena so tale na vanua. (Vosa Vakaibalebale 2:​6-9) Mera nanuma matua na lotu Vakarisito ni o koya e via ‘tiko ena vale i Jiova’ me cata na tautauri se veivaqumi.​​—⁠Same 15:​1, 5; Vosa Vakaibalebale 17:⁠23.

Na cava na veivaqumi? E kaya na ivola The World Book Encyclopedia, “na veivaqumi oya na kena soli na iyau talei vua e . . . dua na vakailesilesi e nuitaki, ena vakatanitaka o koya na nona cakacaka me yaga vua e solia na iyau.” O koya gona, se mani vanua cava ga e tiko kina e dua, sa na okati tiko me veivaqumi na kena soli na ilavo se iloloma vua e dua na turaganilewa se ovisa me vakatanitaka kina na lawa, se ni soli vua e dua na dauveivaqaqai me vakalecalecava tu na ka ca e caka tiko, se ni beci na lawa. E okati tale ga me veivaqumi na soli ni iloloma me rawati kina na veiqaravi lavotaki, me vaka ni sudrai cake na yacamu se mera ulabaleti o ira na volai tu na yacadra mera qaravi e liu. E vakavotuya sara ga oqori na lailai ni loloma.​​—⁠Maciu 7:​12; 22:⁠39.

Ia, ena wili beka me veivaqumi ke da soli iloloma se ilavo vua e dua na vakailesilesi ni qarava dina tiko ga na nona itavi, se baleta wale ga nida sega ni vinakata meda lawakitaki? Kena ivakaraitaki, ena so na vanua o ira na vakailesilesi era sega ni dau vakacurumi ira na gone e koronivuli, vakacurumi ira na tauvimate e valenibula, se solia na ivola ni curuvanua, vakavo ga ke soli vei ira e dua na ka me vaka na ilavo se iloloma. Se ra rawa sara mada ga ni vakaberaberataka na soli ni laiseni se kena vakavoutaki.

Na ivakarau kei na rai me baleta na kena dau soli na ilavo se iloloma e duidui ena veivanua. Ke so na vanua e sa kena ivakarau ga se namaki me dau soli na ilavo, qai sega tale ga ni voroki kina e dua na lawa, era nanuma e so na lotu Vakarisito nira sega ni beca e dua na ivakavuvuli vakaivolatabu ke ra soli ilavo vua e dua na vakailesilesi me qarava nona itavi. Ena so na vanua, e dau raici na ka e soli oqori me iloloma, me ikuri ga ni isau lailai e taura tiko o koya e cakacaka. Ia, na ka bibi me nanumi oya ni tiko na duidui ni iloloma e soli me baleta na veiqaravi e dodonu vakalawa, kei na veivaqumi me vakatanitaki kina na lawa.

Ena yasana adua, nira kerea e so na iVakadinadina i Jiova na veiqaravi e dodonu vakalawa, era na sega ni solia vakailoloma e dua na ka vei ira na dauvakadidike, na vakailesilesi ena kasitaba, se vei ira e so tale ena so sara mada ga na vanua e sa kena ivakarau tu me dau soli na iloloma. Ia, nira kilai vinaka na iVakadinadina ena vanua era tu kina nira dau lewamatau ra qai daudina, so na gauna na veiqaravi era dau sauma e so tale, e dau caka wale vei ira.​​—⁠Vosa Vakaibalebale 10:9; Maciu 5:​16.

Kena isoqoni, ni na vakatulewataka ga vakataki koya na dauveiqaravi i Jiova yadua me solia na iloloma me baleta na veiqaravi e dodonu me caka vua se me kua ga kina ni lawakitaki. Ia, e bibi ga me muria na sala ena sega ni vakacaraka nona lewaeloma, sega ni vakamaduataka na yaca i Jiova, qai kua tale ga ni vakatarabetaki ira e so tale.​​—⁠Maciu 6:9; 1 Korinica 10:​31-​33; 2 Korinica 6:3; 1 Timoci 1:⁠5.