O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Na cava a digitaki kina na 25 Tiseba me solevutaki kina na sucu i Jisu?

Na Vosa ni Kalou e sega ni tukuna na tikinisiga e sucu kina o Jisu. E kaya na Enciclopedia Hispánica: “Na solevutaki ni Kirisimasi ena 25 Tiseba e sega ni yavutaki ena kena cakacakataki na siga a sucu kina o Jisu, ia ena nona ciqoma na lotu Vakarisito na siga ni soqo ni vulaililiwa.” Era dau solevutaka na kai Roma makawa na sucu ni matanisiga ena vulaililiwa, ena nodra marau vakalialia, kana magiti, ra qai dau soli iloloma.​—12/15, tabana e 4-5.

• E vakaraitaka beka na Cakacaka 7:59 ni a masu vei Jisu o Sitiveni?

Sega. Na iVolatabu e vakaraitaka ni masu ena vakamuai duadua ga vua na Kalou o Jiova. Na nona raici Jisu sa vakaturi oti ena raivotu o Sitiveni, e kena irairai ni oya na vuna sa kerekere ga kina vakadodonu vua, ena nona kaya: “Turaga Jisu, ni taura yani na yaloqu.” Matata vinaka tale tu ga vei Sitiveni ni sa soli vei Jisu na lewa me vakaturi ira na mate. (Joni 5:27-29) A mani kerei Jisu kina o Sitiveni se vakamasuti koya me maroroya na yalona se nona bula, me yacova na siga ena qai vakaturi koya kina.​—1/1, tabana e 31.

• Eda kila vakacava ni sega ni lewai oti tu na bula ni tamata yadua?

Na Kalou e solia vei keda na galala ni vakatulewa, ena cala gona ke sa lewa oti tu na noda bula. E tawadodonu qai sega ni loloma na Kalou o Jiova ke sa lewa oti tu na sala meda muria, ni oti oya ena qai totogitaki keda tale ena vuku ni noda ivalavala. (Vakarua 32:4; 1 Joni 4:8)​​—1/15, tabana e 4-5.

• Na cava e cala kina me tukuni ni sega ni rawa ni yaco na cakamana?

Nodra ciqoma gona e so na saenitisi ni vakaiyalayala ga na veika era kila me baleta na vakatubuqoroqoro ni ibulibuli ni Kalou, era kaya kina nira sa sega ni rawa ni tukuna ena nuidei ni na sega ni yaco e dua na ka. Era na kaya ga ni rairai ena sega ni yaco.​​—2/15, tabana e 5-6.

• Na cava a kaya kina na dauveilewai o Samisoni vei rau nona itubutubu ni via vakawatitaka e dua na yalewa ni Filisitia? (Dauveilewai 14:2)

E cala ena Lawa ni Kalou ke dua e vakawatitaka e dua e qarava na kalou lasu. (Lako Yani 34:​11-​16) Ia, a “vinakati koya sara” na yalewa ni Filisitia o Samisoni. A “vakananuma ko koya e dua na ka me ra cudruvi kina ko ira na kai Filisitia,” oqori sara ga na inaki ni nona taleitaka na yalewa oya. Na yalo tabu ni Kalou sa qai tokoni Samisoni. (Dauveilewai 13:25; 14:​3, 4, 6)​​—3/15, tabana e 25-26.

• E dodonu beka me soli ilavo se iloloma na lotu Vakarisito vua e dua e cakacaka vakamatanitu ena vuku ni nona veiqaravi?

E cala me vaqumi e dua na vakailesilesi, ni soli vua e dua na iyau talei me cakava kina na ka e tabu, vakatanitaka na lawa, se me veitovaki kina. Ia e sega ni wili me veivaqumi na soli iloloma se ilavo vua e dua na vakailesilesi ni qarava dina tiko ga na nona itavi, nida vinakata ga meda qaravi vakavinaka, vakadodonu tale ga.​—4/1, tabana e 29.