E iVukevuke Yaga ni Vakadewa Vosa

E VINAKATA na Kalou o Jiova, o koya e vakavuna na iVolatabu, me vunautaki na itukutuku vinaka ni nona Matanitu “vei ira kece ga na veimatanitu kei na veiyavusa, kei na veimataqali vosa kei na veimataqali tamata.” (Vakatakila 14:6, VV) E vinakata tale ga me tu vakarawarawa na nona Vosa volai vei ira na kawatamata kece. Oqori gona na vuna sa vakadewataki kina na iVolatabu ena levu sara na vosa, ni vakatauvatani kei ira na vo tale ni ivola era tu nikua. Sega ni tukuni rawa na levu ni gauna era vakayagataka e udolu vakacaca na dauvakadewa, vaka kina na nodra igu, mera vakadewataka na vakasama ni Kalou ina dua tale na vosa.

Ia, na sasaga e sega ni vakatabakidua ga ena kena vakadewataki na iVolatabu. Levu na gauna e vakayagataki sara ga na iVolatabu me ivukevuke ni kena vakadewataki e so tale na ivola. E levu na daunivakadewa era kunea e so na vosa vivinaka me vakayagataki ena cakacaka ni vakadewa mai na nodra veidutaitaka vata ga e so na ivakadewa ni iVolatabu era tabaki ena duidui vosa. Ni raici gona ni ivukevuke yaga na iVolatabu ena vakadewa vosa, sa lai sagai me vakayagataki ena vakavakadewa e cakava na kompiuta.

Ia, sa bau dua toka na ka dredre me vakadewa vosa na kompiuta. Era kaya e so na kenadau ni oya e dua na ka e sega ni cakava rawa na kompiuta. Baleta? Ni matailalai sara na veika e vauci ena noda dui vosa na veimatatamata. Na vosa kece e duidui na kedra ituvatuva, na lawa ni vosa, kedra ivakavakayagataki, na ivosavosa, vaka kina na kedra dui ibalebale. Sagai me porokaramutaki na kompiuta me vakaduiduitaka rawa na veika oqo, ia e dredre sara ni toboka. E levu gona na ka e vakadewataka na kompiuta e sega ni matata.

Ia, nikua, era sa ogaoga sara tiko na saenitisi ni kompiuta ena nodra qara na sala vovou me caka kina na vakadewa vosa ena kompiuta. Me vaka e kaya o Franz Josef, e kenadau ena vakadewataki vosa ena kompiuta: “Dua na iwalewale sa vakatovolei tiko, oya ni sa sega ni porokaramutaki ina kompiuta na vosa me vakayagataka ena vakavakadewa, ia sa sagai me vakavulici na kompiuta me lewa na vosa e vakayagataka ena vakadewa vosa.” Me vaka beka oqo, o via vakadewataka na vosa vakaidia ina vosa vakavalagi. O na vakavulica mada e liu na kompiuta ena nomu digitaka e dua na ulutaga sa vakadewataki oti tu ena vosa vakaidia kei na vosa vakavalagi, tugana ruarua oqo ina kompiuta. Ena veidutaitaka na vosa yadua e lewe ni ulutaga ruarua. Ke raica gona na kompiuta e dua na vosa vakaidia e vakayagataki ena veigauna taucoko e laurai kina na vosa vakavalagi na “house” (vale), sa na tautauri sara ga e keri ni vosa vakaidia e vakayagataki vakalevu tiko oqori e ivakadewa ni vosa vakavalagi na “house.” E nanumi ni na taura rawa tale ga ni tiko na vosa veimuri me vaka na “levu,” “lailai,” “makawa,” se “vou,” e vakamacalataka se vale vakacava. Ena sala oqo e sega wale ga ni tekivu tugana kina na kompiuta ena nona tobu ni vosa na levu ni vosa vakaidia sa taura rawa kei na kena ivakadewa vakavalagi, e rawa tale ga ni biubiuti ira vata e so na vosa veimuri. De na taura e vica vata na siga se macawa me vulica tiko oqo na kompiuta, ia ni oti oya, sa na rawa ni o tugana kina na ulutaga vou vakaidia o vinakata me vakadewataka ina vosa vakavalagi. Dina beka ni na sega sara ni tuva vakamatau na vosa, ia ena wiliki rawa na vakadewa oqori qai kilai na kena ibalebale kei na veitikina bibi.

Ia, e vakatau vakalevu na vinaka ni vakadewa ena cakava na kompiuta ke levu na vosa e tugani taumada ena kena tobu ni vosa, qai vakayagataki ga na vosa vivinaka. Sega gona ni uasiviti na iVolatabu ena tikina oqo. Ni sa vakadewataki sara vakavinaka ena levu na vosa na iVolatabu, sa tu tale ga vakarawarawa, qai sega ni tukuni rawa na levu ni matavosa e lewena tu. Sega tale ni qai vakataratutu na nodra digitaka ga na iVolatabu na saenitisi ni kompiuta mera vakayagataka me vakavulici kina na kompiuta ena dua na vosa vou.