E Yaga Vakacava Vei Iko na iNuinui ni Veivakaturi?

“O ni sa dedeka na ligamuni, ka vakamamautaka na ka bula kecega e na ka era gadreva.”—SAME 145:16.

1-3. Na cava era vakanuinui tu kina e so? Vakamacalataka.

ENA dua na mataka, eratou cakacaka vakavunau voli e veivale volekati Manchester mai Igiladi, o Christopher, e yabaki 9, kei tuakana, na nodrau momo, nei, kei na rua na tavaledrau. Na ivoladraudrau na Yadra!, e vakamacalataka na ka a qai yaco. “Ena yakavi, eratou mani lai sarasara i Blackpool, na otela voleka e koto e baravi. O iratou na le 6 oqo eratou wili kei ira na le 12 kece era mate ena coqa e gaunisala, era vakatoka na ovisa me vakacalaka ‘e sa bau vakaloloma dina.’”

² Na bogi ni bera na coqa vakaloloma oya, eratou a tiko na lewe ono oqo ena Vulivola ni iVavakoso, a veivosakitaki kina na mate. “O Christopher e dau vakasama vakatitobu,” e kaya o tamana. “Ena bogi oya, a vakamacalataka vakamatata na vuravura vou kei na nona inuinui. Ni toso na vuli, a vakamacala tale o Christopher: ‘E dina ni dau mosimosi toka ni dua e mate, ia e yaga vakalevu nida iVakadinadina i Jiova baleta nida kila nida na qai veisotari tale ena dua na siga.’ Keimami sega vakadua ni kila na tiko ena bogi oya ni na guiguilecavi dredre na vosa oqori.”a

³ Ena 1940, a kila o Franz, na iVakadinadina mai Austria ni na kena itotogi me musu na domona baleta nona yalodina tiko ga vei Jiova. Ena valeniveivesu e tiko kina mai Berlin, sa qai vola vei tinana: “Kevaka au bubului [me curu ena mataivalu], au vakabauta niu na vakayacora na ivalavala ca e ganita na mate. Sa na dua na ivalavala ca levu dina oya. Au na sega ni vakaturi. . . . Vei iko na tinaqu lomani kei ira kece sara na mataveitacini, e tukuni vei au nikua na kequ itotogi, ni kua ni taqaya, au na vakamatei, ena qai tau ena mataka ni mataka na kequ itotogi. E vakaukauataki au na Kalou, me vaka e dau cakava vei ira kece na lotu Vakarisito dina ena veigauna sa oti. . . . Ke oni tudei me yacova na mate, eda na sota tale ena siga ni veivakaturi. . . . Moce toka mada vakalailai.”b

4. E uqeti iko vakacava na veika a yaco vei rau oqo? Na cava eda na vakarau veivosakitaka?

⁴ Erau vakabauta deivaki o Christopher kei Franz na inuinui ni veivakaturi. Erau kila ni na yaco dina. Macala ni uqeti keda sara ga na veika e yaco vei rau! Me rawa nida vakatitobutaka noda lomani Jiova da qai vaqaqacotaka noda nuitaka na veivakaturi, meda veivosakitaka mada na vuna ena yaco kina na veivakaturi, qai uqeti keda vakacava oqori.

Raivotutaki na Veivakaturi e Vuravura

5, 6. Na cava e vakaraitaki ena raivotu e volatukutukutaka na yapositolo o Joni ena Vakatakila 20:12, 13?

⁵ Ni raivotutaka na yapositolo o Joni na veika ena yaco ena duanaudolu na yabaki ni veiliutaki i Karisito Jisu, e raica kina na veivakaturi e vuravura. E kaya: “Ka’u a raici ira era a mate, na tamata lalai kei na turaga, . . . Ia na wasawasa sa soli ira na mate era sa tiko kina, o mate talega kei bulu [“Etesi,” NW] erau sa soli ira na mate era sa tiko kina.” (Vakatakila 20:12, 13) Se mani vakacava na nodra itutu—era “turaga” se “tamata lalai”—era na vakabulai o ira kece era tu e Etesi (Seoli), na ibulubulu. Era na vakabulai tale ga ena gauna oya o ira na mate e wasawasa. Na veika totoka oqo e tiki ni nona inaki o Jiova.

⁶ E tekivu na duanaudolu na yabaki ni veiliutaki i Karisito ena nona vesu o Setani kei na nona biu ena qara sega ni vakabotona. Ni sa na vesu tu o Setani ena gauna ni veiliutaki oqori, ena sega ni rawa ni temaki ira na vakaturi mai se dua vei ira era bula sivia yani na veivakararawataki levu. (Vakatakila 20:1-3) De dua o na nanuma ni sa rui dede na duanaudolu na yabaki oqori, ia o Jiova e raica ga me “dua na siga.”—2 Pita 3:8.

7. E yavutaki ena cava na veilewai ena duanaudolu na yabaki ni veiliutaki i Karisito?

⁷ Me vaka e vakamacalataki ena raivotu, ena vakayacori na veilewai ena duanaudolu na yabaki ni veiliutaki i Karisito. E vola na yapositolo o Joni: “Ka’u a raici ira era a mate, na tamata lalai kei na turaga, era sa tu e na mata ni Kalou; a sa tevuki nai vola eso: e dua tani tale nai vola sa tevuki, ai vola ni bula: ia na mate era sa lewai mai na ka sa volai e nai vola, me vaka na nodrai valavala. . . . a sa lewai ko ira na tamata yadua me vaka na nodrai valavala.” (Vakatakila 20:12, 13) Dikeva ni sega ni yavutaki na veilewai oqo ena veika e cakava se sega ni cakava e dua ni bera na nona mate. (Roma 6:7) Ia, e cavuta ga “nai vola eso” era na qai tevuki. Na kena volai gona se sega na yacana e dua ena ‘ivola ni bula’ e vakatau tiko ena nona ivalavala se veika e cakava ni vulica na lewe ni ivola oya.

“Tu Cake Tale me ra Bula” se “tu Cake Tale me ra Cudruvi”

8. Na cava e rua na ka e rawa ni yaco vei ira na vakaturi?

⁸ Ena nona raivotu e liu o Joni, e tukuni kina ni tiko vei Jisu “nai dola kei etesi kei na mate.” (Vakatakila 1:18) E vakayagataki koya o Jiova me “Vu-ni-bula,” e solia vua na kaukaua me lewai “ira na bula kei ira na mate.” (Cakacaka 3:15; 2 Timoci 4:1) Ena cakava vakacava oqo? Ena nona vakaturi ira na mate. E kaya o Jisu vei ira na ilawalawa e vunau tiko kina: “Dou kakua ni kurabui e na ka oqo: ni sa lako mai na gauna era na rogoca kina na domona ko ira kecega e nai bulubulu, a ra na lako maikina.” Sa qai tomana: “Ko ira sai valavala vinaka, era na tu cake tale me ra bula; ia ko ira sai valavala ca, era na tu cake tale me ra cudruvi.” (Joni 5:28-30) Na cava gona era nuitaka na tagane kei na yalewa yalodina ena gauna makawa?

9. (a) Na cava na veika era na qai kila e levu era vakaturi mai na mate? (b) Na cakacaka levu cava ni veivakavulici ena vakayacori?

⁹ Nira sa na bula tale na tamata yalodina ena gauna makawa, era na qai liaca ni yaco dina na vosa ni yalayala era vakanuinui kina. Era na taleitaka sara ga mera kila na kawa ni yalewa e vaka voli na wati ni Kalou, e vakamacalataki ena imatai ni parofisai ena iVolatabu, ena Vakatekivu 3:15! Ena dua mada ga na ka nodra marau mera rogoca ni o Jisu na Mesaia yalataki, a yalodina tiko ga me yacova sara nona mate, me isoro ni veivoli! (Maciu 20:28) O ira tale ga era kidavaki ira na vakaturi mai oqo era na marau mera vukei ira mera kila ni kena vakarautaki na ivoli e ivakaraitaki ni nona loloma levu o Jiova. Macala nira na vakacaucautaki Jiova o ira oqo nira kila na veika sa cakava na Matanitu ni Kalou me vakayacori kina na inaki i Jiova e vuravura. Ena levu na gauna mera vakaraitaka kina nira tokona na Tamadra vakalomalagi kei na Luvena. O ira kece era bula era na marau mera vakaitavi ena cakacaka levu ni nodra vakavulici na vica vata na bilioni era tucake mai na ibulubulu. O ira tale ga oqo e dodonu mera ciqoma na ivoli e vakarautaka na Kalou.

10, 11. (a) Na cava era na vulica o ira kece na bula e vuravura ena duanaudolu na yabaki ni veiliutaki i Karisito? (b) Na cava meda cakava kina?

¹⁰ Ena marau vakalevu o Eparama me bula ena ruku ni veiliutaki ni “koro” a vakanuinui tiko kina. (Iperiu 11:10) Na turaga yalodina mada ga o Jope ena matalau me kila ni nona ivakaraitaki a vukei ira tale e so na tamata i Jiova e vakatovolei na nodra vakabauta! O Taniela ena via kila sara ga na kena vakayacori na parofisai a uqeti vakalou me vola!

¹¹ O ira kece na bula ena vuravura vou ni yalododonu, era vakaturi se ra bula sivia yani na veivakararawataki levu, era na vulica e levu sara na ka e nakita o Jiova me baleta na vuravura kei ira era tawana. Na kena nuitaki na bula tawamudu kei na nona vakacaucautaki o Jiova me tawamudu ena rekitaki kina na veivakavulici ena loma ni duanaudolu na yabaki ni veiliutaki i Karisito. Ia, e bibi duadua na veika eda cakava nida sa vulica tiko na ivola e tevuki ena gauna oya. Eda na bulataka beka na veika eda vulica? Eda na vakasamataka beka vakatitobu da qai katona na itukutuku yaga, ena vakaukauataki keda meda vorata kina na iotioti ni nona sasaga o Setani me vakamuai keda tani mai na ka dina?

12. Na cava ena vukea na tamata yadua me vakaitavi vakalevu ena veivakavulici kei na veisautaki ni vuravura me parataisi?

¹² Meda kua ni guilecava na veika vinaka ena kauta mai na yaga ni isoro ni veivoli i Karisito. O ira era vakaturi era na sega tale ni tauvimate se vakaleqai na yagodra me vaka e yaco tu nikua. (Aisea 33:24) Na bulabula vinaka ni yagodra kei na nodra nuitaka ni na uasivi sara, e vukei ira kece era bula ena vuravura vou mera vakaitavi vakalevu ena nodra vakavulici na vica vata na bilioni era vakaturi mai. Era na vakaitavi tale ga ena cakacaka levu duadua me bau vakayacori, oya me veisautaki na vuravura me parataisi ena vakalagilagi kina o Jiova.

13, 14. Na cava na inaki ni nona sereki o Setani ena iotioti ni veivakatovolei, na cava ena rawa ni yaco vei keda yadua?

¹³ Ni sereki mai o Setani ena qara sega ni vakabotona ena iotioti ni veivakatovolei, ena saga me temaki ira tale na kawatamata. E kaya na Vakatakila 20:7-9, ni o ira kece na ‘veivanua,’ se ilawalawa tamata, era rawai ena ilawaki i Setani era na vakarusai: ‘Ena lutu mai lomalagi na bukawaqa, qai kani ira.’ Na nodra vakarusai o ira era vakaturi ena duanaudolu na yabaki ni veiliutaki i Karisito, e tukuni kina nira vakaturi se tucake tale mera cudruvi. Ena dua tale na yasana, o ira era yalodina tiko ga nira vakaturi, era na bula tawamudu. E tukuni kina nira vakaturi se “tu cake tale me ra bula.”—Joni 5:29.

¹⁴ Ia ena gauna mada ga oqo, ena vakacegui keda vakacava na inuinui ni veivakaturi? Na cava e bibi meda cakava me vakadeitaki kina nida na vakila na kena yaga ena gauna mai muri?

Veika Eda Vulica Nikua

15. Ena vukei iko vakacava nikua nomu vakabauta na veivakaturi?

¹⁵ De dua, e se qai takali beka ga e dua na wekamu voleka, o saga tale tiko ga mo vosota na veisau levu e vakavuna. Na inuinui ni veivakaturi ena solia vei iko na vakacegu kei na kaukaua era sega ni vakila o ira era sega ni kila na ka dina. E vakacegui ira na kai Cesalonaika o Paula: “Ka’u sa vinakata . . . mo dou kakua ni lecava e na vukudra era sa moce tu, mo dou kakua kina ni yasovaka, me vakataki ira na tani sa sega na nodrai nuinui.” (1 Cesalonaika 4:13) O rawa beka ni raitayaloyalotaka ni o bula ena vuravura vou mo raica na veivakaturi? O na lomavakacegu ena gauna oqo ni o dau vakasamataka ni o na raici ira tale na wekamu voleka.

16. Ena vakacava tu beka na lomamu ni sa yaco na veivakaturi?

¹⁶ E rairai tauvi iko tiko beka ena gauna oqo na mate e vu mai na nona talaidredre o Atama. Kua ni vakalaiva na kena mosi mo guilecava kina na marau o na vakila ni o vakaturi mo bula tale ena vuravura vou ena yago e bulabula qai kaukaua cake. Na nomu veisotari kei ira era kidavaki iko ena marau ni o sa vakaturi, e sega ni vakabekataki ni o na vakavinavinakataka nona loloma na Kalou.

17, 18. Na cava e rua na ka ni vuli meda nanuma matua?

¹⁷ Meda dikeva mada e rua na ka ni vuli e dodonu meda nanuma matua. Kena imatai, na bibi ni noda qaravi Jiova mai vu ni lomada ena gauna oqo. Nida vakatotomuria na nona lomasoli na noda Turaga, o Jisu Karisito, e vakaraitaka nida lomani Jiova kei ira na wekada. Kevaka e kau tani na noda cakacaka se noda galala ena vuku ni veitusaqati kei na veivakacacani, eda na tudei tiko ga ena noda vakabauta, se mani vakacava na levu ni noda vakatovolei. Ke ra na mani tagutuva noda bula na dau veitusaqati, ena vakacegui keda na inuinui ni veivakaturi meda yalodina tiko ga vei Jiova kei na nona Matanitu. Io, na noda gumatua ena vunautaki ni Matanitu ni Kalou kei na noda vukei ira e so tale mera tisaipeli, e rawa nida taukena kina na veika vinaka e vakarautaka o Jiova vei ira na yalododonu.

¹⁸ Na ikarua ni ka eda vulica e baleta tiko na noda temaki ena yagoda ivalavala ca. Na noda kila na inuinui ni veivakaturi kei na noda vakavinavinakataka na loloma i Jiova ena vakaukauataki keda meda tudei tiko ga ena vakabauta. E vakasalataka na yapositolo o Joni: “Dou kakua ni lomani vuravura, se na veika sa vakavuravura. Kevaka sa lomani vuravura e dua, sa sega e na lomana na loloma vua na Tamada. Na ka kecega sa tu e vuravura, na gagadre ca ni yago, na gagadre ca ni mata, kei na dokadokai keda e na ka ni bula oqo, sa sega ni tubu maivei Tamada, mai vuravura ga. Ia ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.” (1 Joni 2:15-17) E tawayaga sara vei keda na iyau ni vuravura oqo nida vakatauvatana kei “na bula dina.” (1 Timoci 6:17-19) Eda na sega ni vakamalumalumu ke da temaki meda veidauci. Eda kila tale ga ni kevaka eda na mani mate ni bera na Amaketoni, na noda cakava tiko ga na veika e sega ni vakamarautaki Jiova, e rawa nida na wili kei ira era na sega ni vakaturi.

19. Na itavi dokai cava meda nanuma deivaki?

¹⁹ Koya e bibi sara oya na noda nanuma deivaki na itavi dokai duadua meda vakamarautaki Jiova nikua me tawamudu. (Vosa Vakaibalebale 27:11) Na noda yalodina me yacova na mate se yacova na ivakataotioti ni veika ca, e vakaraitaka nida tokoni Jiova ena kena vakalewai se o cei na iliuliu cecere duadua ni lomalagi kei na vuravura. Eda na marau dina meda bula ena parataisi e vuravura ena noda bula sivia yani na veivakararawataki levu se nida vakaturi vakacakamana!

Vakarautaki na Veika Eda Gadreva

20, 21. Na cava ena vukea meda yalodina tiko ga kevaka e sega ni saumi noda taro me baleta na veivakaturi? Vakamacalataka.

²⁰ Na noda veivosakitaka na veivakaturi e sega ni saumi kina e so na taro. Na cava ena cakava o Jiova me baleti ira era vakawati tu ena gauna era mate kina? (Luke 20:34, 35) Era na vakaturi beka na tamata ena vanua ga era mate kina? Era na lai bula tikivi ira beka nodra vuvale nira vakaturi? E levu tale na taro me baleta na veivakaturi e se bera ni saumi. Ia, meda kua ni guilecava na veika a kaya o Jeremaia: “Sa yalovinaka ko Jiova vei ira era sa waraki koya, io ki na yalo sa qarai koya. Sa kilikili kaya na tamata me nuitaka, ka me waraka vakayalomalua talega na veivakabulai maivei Jiova.” (Lele i Jeremaia 3:25, 26) Ena gauna lokuci i Jiova, ena qai saumi kece kina na noda taro. Eda vakadeitaka vakacava oqori?

²¹ Vakasamataka mada na vosa uqeti vakalou ni daunisame ni lagata me baleti Jiova: “O ni sa dedeka na ligamuni, ka vakamamautaka na ka bula kecega e na ka era gadreva.” (Same 145:16) Ni toso cake noda yabaki ni bula, e veisau na veika eda gadreva. Na veika eda nuitaka nida se gone sa sega nida gadreva nikua. Na ivakarau ni noda raica na bula e vakatau ena veika eda sotava kei na veika eda nuitaka. Ia, se mani cava na veika vinaka eda gadreva ena vuravura vou, o Jiova ena vakarautaka vakaidina vei keda.

22. Na cava e veiganiti kina meda vakacaucautaki Jiova?

²² E ka bibi duadua nikua na noda yalodina. “Sa kilikili kei ira na dauniyau me vakadinadinataki ni ra sa tamata yalo dina.” (1 Korinica 4:2, VV) Eda dauniyau ni itukutuku vinaka ni Matanitu ni Kalou. Na noda gumatua ni vunautaka na itukutuku vinaka vei ira kece eda sotava e vukea meda dei tiko ga ena sala e tini ena bula. Meda kua ni guilecava ni dau yacovi keda kece na “gauna kei na veika tawanamaki.” (Dauvunau 9:11, NW) Me vakamamadataka na nuiqawaqawa e vu mai na veilecayaki ni bula, meda vakabauta dei tiko ga na inuinui totoka ni veivakaturi. Mo kila tiko ni kevaka o mate ni bera na duanaudolu na yabaki ni veiliutaki i Karisito, mo nuidei ni na yaco dina na vakacegu. Ena nona gauna o Jiova o na rawa ni cavuta na vosa i Jope vua na Dauveibuli: “Ko ni na kaci mai, ka’u na rogo yani vei kemuni.” Me vakacaucautaki mada ga o Jiova, o koya e vinakata me vakabulai ira kece e nanuma!—Jope 14:15.

[iVakamacala e ra]

O se Nanuma Tiko?

• Na yavu cava era na lewai kina na tamata ena duanaudolu na yabaki ni veiliutaki i Karisito?

• Na cava na vuna era na ‘tucake tale e so mera bula,’ kei na so tale mera ‘tucake tale mera cudruvi’?

• Ena vakacegui keda vakacava nikua na inuinui ni veivakaturi?

• E yaga vakacava vei keda na Same 145:16 nida vakasamataka na veika e lomatarotarotaki tu me baleta na veivakaturi?

[iYaloyalo ena tabana e 21]

Ena yaga vakacava vei keda nikua na noda vakabauta na veivakaturi?