Eda Rawa ni Vosota na Veivakatovolei Kece!
E DUA beka na ka ni veivakatovolei o sotava tiko ena gauna oqo? O yalolailai beka ni o na sega ni vosota rawa? Ena so beka na gauna o nanuma ni duatani na leqa o sotava tiko qai sega na kena iwali? Ke vaka kina, kua ni yalolailai! Se mani veivakatovolei cava eda sotava, e vakadeitaka na iVolatabu ni na rawa ni vukei keda na Kalou meda vosota.
E kaya na iVolatabu nira na “sota kaya na veimataqali veivakatovolei” na dauveiqaravi ni Kalou. (Jemesa 1:2, VV) Dikeva mada na vosa “veimataqali” (ena vosa vakirisi na poi·kiʹlos). Ena kena ivakavakayagataki makawa, na kena vosa taumada e kena ibalebale “levu” se “duidui” qai dusia tiko ga ni “sega ni tautauvata na veivakatovolei.” O koya gona, na “veimataqali veivakatovolei” era duidui me vaka ga na veimataqali roka. Ia, e vakaukauataki keda o Jiova meda vosota na veimataqali veivakatovolei. Eda vakadeitaka vakacava oqori?
“Vakavotui ena Veimataqali Sala na Loloma ni Kalou”
E vola na yapositolo o Pita nira “rarawa” na lotu Vakarisito “e na vuku ni veimataqali veivakatovolei.” (1 Pita 1:6, VV) E vola tale ga ena nona ivola uqeti vakalou ni “vakavotui ena veimataqali sala na loloma ni Kalou.” (1 Pita 4:10, NW) Na matavosa “veimataqali sala” e tautauvata kei na vosa taumada vakirisi a vakadewataki kina. E kaya e dua na dauvakadidike ni iVolatabu ena nona vakamacalataka na ivosavosa oqo: “Sa bau dua na vakasama vakatubuqoroqoro oqo. . . . Ni vakamacalataki na loloma ni Kalou ena vosa poikilos, e kena ibalebale ni ituvaki cava ga eda sotava, sa tiko tale ga na veimataqali sala ena walia kina na Kalou.” Sa qai kuria: “Se ituvaki cava eda sotava, se leqa, se ka eda gadreva vakatotolo eda vukei ga ena vuku ni loloma ni Kalou. Na nona loloma gona eda na rawa ni vosota kina se walia na leqa cava ga e basika. Na ivakamacala ni vosa oqo na poikilos eda lai nanuma kina na veimataqali sala e vakaraitaka kina na nona loloma na Kalou, e sa bau veiganiti dina kei na veika kece eda gadreva.”
Vosoti na Veivakatovolei ena Loloma ni Kalou
Me vaka e kaya o Pita, e kune na loloma ni Kalou vei ira na lewe ni ivavakoso vakarisito yadua. (1 Pita 4:11) E tu vei ira na dauveiqaravi ni Kalou yadua na isolisoli vakayalo, se ka era rawa ni cakava, mera vu ni veivakaukauataki vei ira era sotava na veivakatovolei. (Roma 12:6-8) Kena ivakaraitaki, e so na lewe ni ivavakoso era qasenivuli maqosa ni iVolatabu. Na nodra dau vosa vakayalomatua e veivakaukauataki qai uqeti ira e so tale mera vosota. (Niemaia 8:1-4, 8, 12) So tale era cakava na cakacaka ni veivakatawani vei ira era gadreva tu na veivakacegui. Na veisiko vaka oqori e dau veivakaukauataki dina ni ‘vakaceguya na yalo.’ (Kolosa 2:2) Nira veisiko na ivakatawa mera vakaukauataka na nodra vakabauta na tacidra, era sa vota tiko kina vei ira na isolisoli vakayalo. (Joni 21:16) Era tu sara mada ga e so ena ivavakoso era dau veikauaitaki, ra veinanumi ra qai dau lomani ira na tacidra lotu Vakarisito era rarawa tu ena vuku ni veivakatovolei. (Cakacaka 4:36; Roma 12:10; Kolosa 3:10) Na nodra veinanumi kei na nodra dau veivukei na mataveitacini oqori e ivakaraitaki vakasakiti ni loloma ni Kalou.—Vosa Vakaibalebale 12:25; 17:17.
“Na Kalou ni Veivakacegui Kecega”
Kena ilutua, o Jiova e dau veivakacegui. E ‘Kalou ni veivakacegui kecega, sa vakacegui keda ena noda rarawa kecega.’ (2 Korinica 1:3, 4) Koya gona, na vuku e kune ena Vosa uqeti ni Kalou kei na veivakaukauataki ni yalona tabu, e sala sara ga ni nona dau sauma o Jiova na noda masu ni kere veivuke. (Aisea 30:18, 21; Luke 11:13; Joni 14:16) E rawa ni vakaukauataki keda na vosa ni yalayala uqeti vakalou e cavuta o Paula: “Sa yalo dina na Kalou, ka na sega ni laiva me sivia na nomuni kaukauwa na ka ko ni vakatovolei kina; e na solia ko koya e na gauna ni veivakatovolei na sala mo ni dro bula rawa kina kei na kaukauwa mo ni vosota kina.”—1 Korinica 10:13, VV.
Io, se mataqali veivakatovolei cava ga eda sotava, sa tu tale ga na veimataqali sala ena vukei keda kina na loloma ni Kalou meda vosota da qai walia na leqa oqori. (Jemesa 1:17) Na nona vakacegui ira na nona dauveiqaravi o Jiova ena kena gauna dodonu kei na sala e veiganiti—se mani vakacava na levu ni veitemaki se ka ni bolebole era sotava—e vakadinadinataka “na vuku ni Kalou e na kena veivatukana kece e vuqa.” (Efeso 3:10, VV) Vakacava, o vakadinata na ka oqori?
[iYaloyalo ena tabana e 31]
Dau vukei keda o Jiova meda vosota na veivakatovolei