O “Dauniyau Beka ni Loloma ni Kalou”?

“Dou veilomani sara e na veilomani ni veitacini; dou veiuasiviti e na veivakarokorokotaki.”​—ROMA 12:10.

1. Na cava e vakadeitaka vei keda na Vosa ni Kalou?

E DAU vakadeitaka vei keda na Vosa ni Kalou ni o Jiova ena tu vakarau me tokoni keda ena gauna eda yalolailai kina se da lomabibi. Vakasamataka mada na vosa ni veivakacegui qo: “Sa tokoni ira kecega era sa bale ko Jiova, ka sa vakatudonutaki ira kecega era sa vakalairoro.” “Sa vakabulai ira sa ramusu na yalodra, ka sa vauca na nodra vue.” (Same 145:14; 147:3) Kena ikuri, e tukuna sara ga na Tamada vakalomalagi: “Ni sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.”​—Aisea 41:13.

2. E dau tokoni ira vakacava nona dauveiqaravi o Jiova?

² E ‘taura tiko’ vakacava na ‘ligada’ o Jiova, ni tiko mai lomalagi? E ‘vakatudonutaki keda’ vakacava ‘nida vakalairoro’ ena yalolailai? Levu sara na ka e dau cakava o Jiova me tokoni keda kina. Me kena ivakaraitaki, e vakarautaka vei ira nona tamata na yalo tabu—“na kaukaua e uasivia na kaukaua ni tamata.” (2 Kor. 4:7, NW; Joni 14:16, 17) Era vakila tale ga na dauveiqaravi ni Kalou na kaukaua ni nona Vosa uqeti, na iVolatabu. (Iper. 4:12) Vakacava, sa o koya beka ga qori na veika e vakarautaka o Jiova meda vakaukauataki kina? Eda na raica na isaunitaro qori ena imatai ni ivola i Pita.

‘E Vuqa na Loloma ni Kalou’

3. (a) Na cava a tukuna o Pita me baleta na veivakatovolei? (b) Na cava e vakamacalataka o Pita ni vakarau tinia na imatai ni nona ivola?

³ Ni volavola vei ira na lotu vaKarisito lumuti, e vola na yapositolo Pita ni tiko na vuna vinaka mera marau kina ni sa waraki ira tu na icovi lagilagi. E kuria: “E na gauna lekaleka oqo, ke sa yaga, dou sa vakararawataki e na dauvere e vuqa.” (1 Pita 1:1-6) Vakasamataka mada na vosa “vuqa.” E tukuna tiko ni na levu na veivakatovolei. A sega ni yala ga e kea na ka e tukuna o Pita, mera veilecayaki kina na tacina ena nodra rawa ni vosota na veivakatovolei se sega. Ia, a vakadeitaka ga vei ira na lotu vaKarisito ni o Jiova ena vakayaloqaqataki ira mera vosota na veivakatovolei kece. A cakava qori ni vakarau tinia na nona ivola o Pita, e vakamacalataka kina ni “sa voleka nai vakataotioti ni ka kecega.”​—1 Pita 4:7.

4. E veivakacegui vakacava na 1 Pita 4:10?

⁴ E kaya o Pita: “Me vaka dou sa dui rawata nai solisoli, mo dou dui solia vakakina vakai kemudou, me vaka na dauniyau vakayalo e na loloma e vakavuqa ni Kalou.” (1 Pita 4:10) A vakayagataka tale e ke o Pita na vosa “vakavuqa.” E vaka me tukuna tiko, ‘E vuqa na veivakatovolei e dau yacovi keda me vaka ga na nona dau vakaraitaka vakavuqa na loloma na Kalou.’ Na cava e veivakacegui kina na itukutuku qo? Kena ibalebale se mani ituvaki cava ga eda na vakatovolei kina, macala ga ni na vakaraitaka o Jiova na nona loloma me na vakayaloqaqataki keda meda vosota. O bau vakasamataka na veika a tukuna o Pita, ena ka e cakava o Jiova me vakaraitaka kina nona lomani keda? Oya na nona vakayagataki ira na tacida lotu vaKarisito.

“Mo ni Veiqaraqaravi Kina”

5. (a) Na cava mera cakava na lotu vaKarisito yadua? (b) Na taro cava e basika?

⁵ E tukuna o Pita vei ira na lewe kece ni ivavakoso lotu vaKarisito: “Me kena i lutua, me kakua ni luluqa na nomuni veilomalomani vaka i kemuni.” E kuria: “Me vaka ni sa solia vei kemuni na Kalou e yadua na i solisoli, ni vakayagataka mo ni veiqaraqaravi kina.” (1 Pita 4:8, 10, VV) Koya gona, e dodonu meda vakayaloqaqataki ira na tacida lotu vaKarisito ena ivavakoso. E vakacolati keda o Jiova ena dua na ilesilesi talei meda cakava, qai noda itavi meda lai wasea yani vei ira na so tale. Na cava beka na ka talei qo? E kaya o Pita ni qo e dua na “isolisoli.” Na cava beka na isolisoli qori? Eda na vakayagataka vakacava meda “veiqaraqaravi kina”?

6. Na isolisoli cava e soli tu vei ira na lotu vaKarisito?

⁶ E kaya na Vosa ni Kalou: “Sa lako maicake nai solisoli vinaka kecega kei nai solisoli kecega e yaga sara.” (Jeme. 1:17) Koya gona, na isolisoli kece e vakarautaka o Jiova vei ira nona tamata e ivakaraitaki ni nona loloma. Dua na isolisoli duatani taudua e vakarautaka vei keda o Jiova oya na yalo tabu. Na isolisoli qori eda rawa kina ni vakaitovotaka na loloma, yalovinaka kei na yalomalua. Na itovo qori e uqeti keda meda dau yalololoma, da qai tokoni ira eda vakabauta vata. E so tale na isolisoli vinaka e vakarautaka vei keda ena veivuke ni yalo tabu, me vaka na vuku kei na kilaka dina. (1 Kor. 2:10-16; Kala. 5:22, 23) E macala ni rawa ni okati me isolisoli na noda kaukaua, noda kila, kei na noda taledi, e dodonu gona meda vakayagataka me vakalagilagi qai rokovi kina na Tamada vakalomalagi. E noda itavi vakalou meda vakayagataka noda kila kei noda vinaka meda vakaraitaka kina na loloma ni Kalou vei ira eda vakabauta vata.

Na Nomu ‘Vakayagataka ena Veiqaraqaravi’

7. (a) Na cava na ibalebale ni malanivosa “me vaka”? (b) Na taro cava meda taroga, ena vuku ni cava?

⁷ E kaya tale o Pita ena vuku ni isolisoli e soli vei keda: “Me vaka ni sa solia vei kemuni na Kalou e yadua na i solisoli, ni vakayagataka.” Na malanivosa “me vaka” e vakaraitaka ni na duidui na ka eda kila kei na ka eda rawa ni cakava, vaka kina na kena levu eda vakaraitaka. Eda uqeti yadudua gona meda ‘vakayagataka [na isolisoli cava ga e tiko vei keda] meda veiqaraqaravi kina.’ E ivakaro tale ga na malanivosa “vakayagataka . . . me vaka na dauniyau vinaka.” E vinaka meda taroga: ‘Au sa vakayagataka tiko vakavinaka na isolisoli qo meu vakayaloqaqataki ira kina na taciqu vakayalo?’ (Vakatauvatana 1 Timoci 5:9, 10.) ‘Seu vakayagataka na kilaka e vakarautaka o Jiova me yaga ga vei au—de dua meu vutuniyau se vakaitutu kina?’ (1 Kor. 4:7) Eda na vakamarautaki Jiova ke da vakayagataka na noda isolisoli meda “veiqaraqaravi kina.”​—Vkai. 19:17; wilika Iperiu 13:16.

8, 9. (a) Na cava era cakava na lotu vaKarisito e vuravura raraba mera vukei ira kina era vakabauta vata? (b) Era dau veivukei vakacava na mataveitacini ena nomu ivavakoso?

⁸ Na Vosa ni Kalou e vakamacalataka e vuqa na ka era dau cakava na lotu vaKarisito ena imatai ni senitiuri mera veiqaravi kina. (Wilika Roma 15:25, 26; 2 Timoci 1:16-18.) Era muria sara tiko ga na lotu vaKarisito dina ena gauna qo na ivakaro ni nona vakayagataka e dua na isolisoli vei ira na vakabauta vata. Vakasamataka na gauna e so e dau vakayacori kina qori.

⁹ Era vakayagataka e vica vata na aua e veivula na mataveitacini tagane nira vakarautaka nodra itavi ena soqoni. Nira vakamacalataka e so na ka talei vakayalo ra vulica ena iVolatabu, ra qai vakayagataka vakayalomatua na vosa, ena uqeti ira na lewe ni ivavakoso mera dau vosota na ituvaki dredre. (1 Tim. 5:17) E levu na mataveitacini era kilai ena nodra loloma kei na nodra dau kauaitaki ira era vakabauta vata. (Roma 12:15) So era dau sikovi ira na yalolailai qai dau masu kei ira. (1 Ces. 5:14) So tale e dau veivakayaloqaqataki na ivola era vola vei ira na tacidra lotu vaKarisito era vosota tiko na ituvaki dredre. E so tale era dau vukei ira na malumalumu vakayago mera lai tiko ena soqoni vakaivavakoso. Era veitokoni ena cakacaka ni vakacoko e udolu vakacaca na iVakadinadina, ena nodra tara tale na nodra vale na mataveitacini a vakacacani ena gauna ni leqa tubukoso. Na yalololoma kei na veivuke ra vakaraitaka na mataveitacini e vakavotuya ‘ni vuqa na loloma ni Kalou.’—Wilika 1 Pita 4:11.

Na Kena e Bibi Cake

10. (a) Na cava na rua na ka e kauaitaka vakabibi o Paula ena nona qarava na Kalou? (b) Eda na vakadamurimuri Paula vakacava nikua?

¹⁰ E sega wale ga ni vakarautaki vei ira na dauveiqaravi ni Kalou na isolisoli mera vakayagataka vei ira era vakabauta vata, ia era wasea tale ga yani na itukutuku vinaka. E kila vinaka na rua na ka qo na yapositolo o Paula ena nona veiqaravi vei Jiova. A vola kina vei ira ena ivavakoso e Efeso me baleta nona “itavi vakadauniyau e vakacolati au kina na Kalou ena nona loloma” me yaga vei ira. (Efeso 3:2, NW) Ia, e kuria: “Sa vinakati keitou na Kalou me keitou lesi me vunautaka nai tukutuku-vinaka.” (1 Ces. 2:4) Me vakataki Paula, eda kila tale ga nida lesi meda italatala ni Matanitu ni Kalou. Nida vunau vagumatua, eda sa saga sara tiko ga meda muria na ivakaraitaki i Paula ena nona sega ni oca na vunautaka na itukutuku vinaka. (Caka. 20:20, 21; 1 Kor. 11:1) Eda kila ni vunautaki ni Matanitu ni Kalou eda na bula kina. Ena gauna vata qori, eda na saga meda vakadamurimuri Paula ena noda qara na gauna veiganiti meda “solia .  . . nai solisoli vakayalo eso” vei ira eda vakabauta vata.​—Wilika Roma 1:11, 12; 10:13-15.

11. Na rai cava me tiko vei keda me baleta noda itavi meda vunau kei na noda dau veivakayaloqaqataki?

¹¹ Vakacava na rua na cakacaka vaKarisito qori, o cei vei rau e bibi cake? Na noda vaqaqa na taro va qo e vaka na noda vaqaqa tiko na yaga ni taba ni manumanu vuka. Na tabana cava e yaga cake? E yaga ruarua me rawa ni vuka kina. E vaka tale ga kina noda cakava na rua na itavi qori ena noda qaravi Kalou meda colata vinaka kina noda ilesilesi nida lotu vaKarisito. Koya gona, meda kua ni nanuma ni sega ni lakolakovata na noda ilesilesi meda vunautaka na itukutuku vinaka kei na noda dau vakayaloqaqataki ira eda vakabauta vata, ia me tiko vei keda na nodrau rai na yapositolo o Pita kei Paula—meda cakava ruarua na itavi qori. Meda na cakava vakacava?

12. E taurivaki keda vakacava o Jiova meda nona iyaya ni cakacaka?

¹² Nida dauvunau, eda na vakayagataka na iwalewale ni veivakavulici cava ga me rawa nida uqeta na lomadra na vakarorogo ena itukutuku veivauqeti ni Matanitu ni Kalou. Eda nuitaka nira na dua na tisaipeli i Karisito. Ia, eda na vakayagataka tale ga na kila kei na isolisoli kece eda vakalougatataki kina meda uqeti ira eda vakabauta vata, nida tukuna na vosa e veitaraicake kei na noda cakacaka vinaka—e ivakaraitaki ni loloma ni Kalou. (Vkai. 3:27; 12:25) Eda sa vakayaloqaqataki ira tiko kina mera na tisaipeli tiko ga i Karisito. E ka dokai nida vakaitavi ena vunau e matanalevu kei na noda “veiqaraqaravi” baleta ni dusia oya ni taurivaki keda tiko o Jiova meda nona iyaya ni cakacaka.​—Kala. 6:10.

“Dou Veilomani Sara e na Veilomani ni Veitacini”

13. Na cava ena rawa ni yaco ke da tu suka ena noda ‘veiqaravi’?

¹³ A uqeti ira na vakabauta vata o Paula: “Dou veilomani sara e na veilomani ni veitacini; dou veiuasiviti e na veivakarokorokotaki.” (Roma 12:10) Koya gona, nida lomani ira dina na tacida ena uqeti keda sara ga meda veiqaravi mai vu ni lomada me vaka na dauniyau vinaka ni isolisoli ni Kalou. Ke da vakarawarawataka vei Setani me tarova noda ‘veiqaravi,’ ena vakamalumalumutaka o koya na noda duavata. (Kolo. 3:14, VV) Koya gona, ni sega na duavata eda na sega ni gumatua ena cakacaka vakavunau. E kila vinaka tu o Setani ni na rawa ni tarova e dua ga na tiki ni noda veiqaravi meda kua kina ni vakayacora na noda ilesilesi, me vaka ga ni sega ni rawa ni vuka e dua na manumanu vuka ni mavoa toka e dua na tabana.

14. O cei e yaga vei ira noda “veiqaraqaravi”? Tukuna e dua na kena ivakaraitaki.

¹⁴ Na itavi ni “veiqaraqaravi” e sega ni yaga wale ga vei ira na ciqoma na loloma soli wale ni Kalou, e yaga tale ga vei ira na cakava. (Vkai. 11:25) E dua na kena ivakaraitaki, o rau na veiwatini o Ryan kei Roni mai Illinois, e Mereke. Ni rau rogoca ni a vakacacani e drau vakacaca na nodra vale na iVakadinadina ena cagilaba o Katrina, e uqeti rau sara ga nodrau lomani ira na mataveitacini me rau cegu mai nodrau cakacaka, rau biuta na rumu rau dau sauma tu, rau volia e dua na valeqiqi makawa, rau qai vakavinakataka me rau sa na tiko kina, oti rau sa qai gole i Louisiana e 1,400 na kilomita na kena yawa. Rau toka e kea me sivia e dua na yabaki ni rau vakayagataka nodrau gauna, kaukaua kei na iyau me rau veivuke kina vei ira na mataveitacini. “Na noqu vakaitavi ena cakacaka qo, au volekata kina na Kalou,” kaya o Ryan, e yabaki 29. “Au vakadinadinataka sara ga nona dau karoni ira nona tamata o Jiova.” E tomana: “Levu na ka au vulica ena noqu cakacaka kei ira na mataveitacini tagane itabaqase me baleta nodra vukei na tacida. Au kila tale ga ni levu sara na itavi e tu me keimami qarava na mataveitacini gone ena isoqosoqo i Jiova.” Kaya o Roni, e yabaki 25: “Au vakavinavinaka niu bau veivuke tale ga. Sega ni vakatauvatani rawa na marau au vakila kina. Au kila ni na yaga sara vei au ena veiyabaki se bera mai na ka au vulica kina.”

15. Na yavu cava meda tomana tiko kina noda veiqaravi me vaka na dauniyau vinaka ni isolisoli ni Kalou?

¹⁵ O koya gona, eda na vakalougatataki kece ena noda talairawarawa ena ivakaro ni Kalou ena vunautaki ni tukutuku vinaka kei na noda dau vakayaloqaqataki ira na tacida vakayalo. Era vakaukauataki kina vakayalo o ira eda vukea, eda vakila tale ga na marau dina nida solika. (Caka. 20:35) Era na vakila na yalololoma na lewe ni ivavakoso nira veikauaitaki na lewena. Kuria oya, e ivakatakilakila nida lotu vaKarisito dina na noda dau loloma kei na noda veikauaitaki. E kaya o Jisu: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” (Joni 13:35) Kena ilutua, ena rokovi ga kina na Tamada dauloloma o Jiova, ni laurai vei ira nona dauveiqaravi e vuravura na nona dau veivakayaloqaqataki. Qo era yavu vinaka meda vakayagataka kina vakamaqosa na noda isolisoli meda “veiqaraqaravi kina me vaka na dauniyau vinaka ni i solisoli ni Kalou”! Vakacava, o na cakava tiko ga qori?​—Wilika Iperiu 6:10.

O se Nanuma Tiko?

• E vakayaloqaqataki ira vakacava nona dauveiqaravi o Jiova?

• Na isolisoli cava e vakarautaki tu vei keda?

• Na cava so eda rawa ni cakava meda qaravi ira kina eda vakabauta vata?

• Na cava ena uqeti keda meda vakayagataka tiko ga na isolisoli ni “veiqaraqaravi”?

[iYaloyalo ena tabana e 13]

O dau vakayagataka beka na “[i]solisoli” mo veiqaravi kina se me yaga ga vei iko?

[iYaloyalo ena tabana e 15]

Eda vunautaka na itukutuku vinaka vei ira na so tale da qai tokoni ira na tacida lotu vaKarisito

[iYaloyalo ena tabana e 16]

Mera vakavinavinakataki na dauveivukei nira vakuai ira mai na so na ka me rawa nira veiqaravi kina