iTukutuku Vinaka Mera Rogoca na Leweniveivanua Kece

“Dou na qai dautukuni au . . . ka yacova nai yalayala kei vuravura.”​—CAKACAKA 1:8.

1. Nida qasenivuli ni iVolatabu, na cava eda kauaitaka, na cava na vuna?

NA QASENIVULI vinaka ena sega wale ga ni kauaitaka mera vakavulici nona gonevuli, ena kauaitaka tale ga na iwalewale ni nona veivakavulici. Nida qasenivuli ni ka dina ena iVolatabu, oya tale ga na ka eda na vakayacora. Eda kauaitaka na itukutuku eda vunautaka kei na iwalewale eda vakayagataka. E sega ni veisau na itukutuku vinaka ni Matanitu ni Kalou eda vunautaka, e veisau ga na iwalewale ni noda vunau. Na cava na vuna? Me rawa nida vunau kina vei ira e levu.

2. Eda sa vakatotomuri cei tiko nida veiveisautaka na noda iwalewale ni vunau?

² Na noda veiveisautaka noda iwalewale ni vunau, eda sa vakatotomuri ira tiko kina na tamata ni Kalou ena gauna makawa. Raica mada me kena ivakaraitaki na yapositolo o Paula. E kaya: “Ka’u sa yaco me’u vaka e dua na Jiu vei ira na Jiu, . . . vei ira sa sega kina na vunau, me’u vaka e dua sa sega vua na vunau, . . . vei ira era sa malumalumu ka’u sa yaco me’u vaka e dua sa malumalumu, me’u rawai ira kina era sa malumalumu: au sa yaco me’u ka kecega vei ira kecega na tamata, me’u vakabula eso e na ka kecega.” (1 Korinica 9:​19-​23) A vuavuaivinaka nona vunau o Paula ni veiveisautaka na nona iwalewale ni vunau. Ena vuavuaivinaka tale ga na noda vunau ke da veiveisautaka na noda iwalewale me ganiti ira eda veivosaki vata.

Ina ‘iYalayala kei Vuravura’

3. (a) Na cava e ka ni bolebole kina na noda cakacaka vakavunau? (b) Sa vakayacori tiko vakacava ena gauna oqo na ka e tukuni ena Aisea 45:22?

³ Na raba ni yalava e dua na ka ni bolebole levu vei ira era vunautaka tiko na itukutuku vinaka, baleta na itukutuku oqo me na roboti “vuravura taucoko.” (Maciu 24:​14, VV) Ena loma ni senitiuri sa oti, era cakacaka vakaukaua e levu na dauveiqaravi i Jiova mera vakatetea yani na itukutuku vinaka ina so na vanua vou. Na cava e yaco? E veivakurabuitaki na levu ni vanua e sa teteva na itukutuku vinaka. Ni tekivu na ika20 ni senitiuri, se vunautaki ga na itukutuku vinaka ena vica na vanua, ia ena gauna oqo, sa ra veiqaravi tiko na iVakadinadina i Jiova ena 235 na vanua! Sa vunautaki dina tiko na itukutuku vinaka ni Matanitu ni Kalou ina ‘iyalayala kei vuravura.’​—Aisea 45:22.

4, 5. (a) O cei era vakaitavi vakalevu ena vakatetei ni itukutuku vinaka? (b) Na cava era tukuna e so na valenivolavola ni tabana me baleti ira na gole mai vanuatani mera veiqaravi ena nodra yalava?

⁴ Na cava e vakavuna na tete ni cakacaka? E levu na ka e vakavuna. Era veivuke sara vakalevu na daukaulotu era vuli ena Watchtower Bible School of Gilead kei na sivia na le 20,000 era vuli oti ena Koronivuli ni Vuli Veiqaravi Vakaitalatala. E levu tale ga na iVakadinadina era sauma vakataki ira na nodra lako ina vanua e gadrevi kina vakalevu na dautukutuku ni Matanitu ni Kalou. Na nodra vakuai ira na lotu Vakarisito vaka oqo​—na tagane kei na yalewa, gone kei na qase, vakawati kei na dawai​—era vakaitavi vakalevu kina ena vunautaki ni itukutuku ni Matanitu ni Kalou ena veiyasa i vuravura. (Same 110:3; Roma 10:18) Era vakavinavinakataki vakalevu. Raica mada na veika era vola e so na valenivolavola ni tabana me baleti ira na gole mai vanuatani mera lai veiqaravi ena nodra yalava e gadrevi vakalevu kina na cakacaka.

⁵ “O ira na iVakadinadina oqo era liutaka na vunau ena yalava ribayawa, era veivuke ena tauyavu ni ivavakoso vovou, ra qai veitokoni ena nodra tubu vakayalo na mataveitacini.” (Ecuador) “Kevaka era biubiu na le vica na drau mai vanuatani era veiqaravi tiko e ke, ena vakilai sara ga ena ivavakoso. E ka ni veivakalougatataki dina na nodra maliwai keimami tiko.” (Dominican Republic) “Ena levu na neimami ivavakoso e levu kina na tacida yalewa, ena so na gauna e dau yacova sara na 70 na pasede. (Same 68:​11, NW) Levu vei ira oqo era vou ena dina, ia era vukei vakalevu vei ira na tacida yalewa painia dawai era gole mai na so tale na vanua. O ira na tacida yalewa oqo era isolisoli talei dina vei keimami!” (Dua na vanua mai na Tokalau kei Urope) O bau vakasamataka mo na veiqaravi ena dua tale na vanua?a​—Cakacaka 16:​9, 10.

“Tini na Tamata Era Duivosavosa”

6. E vakamacalataka vakacava na Sakaraia 8:​23 na vuna e ka ni bolebole kina na noda cakacaka vakavunau?

⁶ E dua tale na ka ni bolebole levu oya na duidui vosa e veiyasa i vuravura. E parofisaitaka na Vosa ni Kalou: “E na gauna ko ya, era na mai taura na tutu ni nonai sulu e dua na Jiu, e lewe tini na tamata era duivosavosa mai na veivanua kecega, ka kaya, Keitou na lako vata kei kemudou: ni keitou sa rogoca sa tiko vata kei kemudou na Kalou.” (Sakaraia 8:​23) Na kena vakayacori na parofisai oqo ena noda itabagauna, na tini na tamata e vakatakarakarataka na isoqosoqo levu e parofisaitaki ena Vakatakila 7:9. Ia, dikeva ni tukuna na parofisai i Sakaraia ni “lewe tini na tamata” era sega wale ga ni lako mai na veivanua, ia era “duivosavosa mai na veivanua kecega.” Sa vakayacori tiko beka na tiki bibi ni parofisai oqo? Io, sa yaco dina tiko.

7. Na itukutuku cava e vakaraitaka nira sa rogoca na itukutuku vinaka na tamata era “duivosavosa”?

⁷ Vakasamataka mada e so na itukutuku oqo. Ena 50 na yabaki sa oti, e tabaki na noda ivola ena 90 na vosa. Nikua, sa taba ena sivia na 400 na vosa. E sasaga “na dauveiqaravi yalo dina ka vuku” me vakarautaka na ivola ena vosa era sega ni vosataka e levu. (Maciu 24:​45, VV) Kena ivakaraitaki, ena gauna oqo sa tabaki na ivola vakaivolatabu ena vosa vaka Greenland (47,000 era vosataka), vaka Palau (15,000 era vosataka), kei na vosa vaka Yap (e sega ni yacova na 7,000 o ira era vosataka).

“Na Katuba Levu” ni Veiqaravi

8, 9. Na cava e yaco e tadola kina e dua “na katuba levu” ni veiqaravi vei keda, na cava era sa cakava kina e vica na udolu na iVakadinadina?

⁸ Nikua, eda sa sega tale ni lako vakayawa meda lai vota na itukutuku vinaka vei ira na duikaikai. Ena veiyabaki wale tiko ga oqo, na nodra toki e vica na milioni na curuvanua kei ira na isenivalu ina veivanua sa vakatorocaketaki oti, e sa tauyavu kina e levu sara na itikotiko ni curuvanua e duidui nodra vosa. Me kena ivakaraitaki e Parisi, mai Varanise, e vosataki kina e rauta ni 100 na vosa. E vosataki e 125 na vosa e Toronto, mai Kenada; qai 300 vakacaca na vosa e vosataki e Lodoni mai Igiladi! Na nodra tiko ena yalava ni ivavakoso o ira era lako mai na so tale na vanua, e tadola kina e dua “na katuba levu” ni veiqaravi me wasei yani kina na itukutuku vinaka vei ira na tamata ena veivanua kece ga.​—1 Korinica 16:9.

⁹ E vica na udolu na iVakadinadina sa ra bole mera colata na itavi oqo ena nodra vulica na vosa vou. E dina ni dredre vei ira e levu, ia era vakalougatataki ena nodra vakavulici ira na curuvanua kei na isenivalu mera kila na ka dina ena Vosa ni Kalou. Ena dua na yabaki se qai oti ga oqo, voleka ni 40 na pasede vei ira na papitaiso ena soqo ni tikina ena dua na vanua ena Ra kei Urope, era lako mai vanuatani.

10. O sa vakayagataka tiko vakacava na ivola na Good News for People of All Nations? (Raica na kato “Veika e Baleta na iVola na Good News for People of All Nations,” ena tabana e 26.)

¹⁰ Levu vei keda ena sega ni rawa ni vulica na vosa vou. Ia se rawa tiko ga nida vakaitavi ena nodra vukei na curuvanua ena noda vakayagataka vinaka na ivola vou na Good News for People of All Nations,b e tiko kina na itukutuku veivakauqeti ena iVolatabu ena levu na vosa. (Joni 4:​37) O sa vakayagataka tiko beka na ivola oqo ena cakacaka vakavunau?

Nira Sega ni Vakarorogo na Lewenivanua

11. Na cava e dua tale na ka ni bolebole e sotavi ena so na yalava?

¹¹ Ni tete na nona sasaga o Setani e vuravura, e dua tale na ka ni bolebole e dau sotavi​—ena so na yalava era sega so ni dau vakarorogo na lewena. Ia eda sega ni kurabui kina baleta ni parofisaitaka o Jisu ni na yaco na ituvaki vaka oqori. E kaya me baleta na noda itabagauna: “Ena batabata mai na nodra loloma na lewe vuqa.” (Maciu 24:12) Sa rauta me levu e luluqa na nodra vakabauta na Kalou kei na nodra doka na iVolatabu. (2 Pita 3:​3, 4) Ena so gona na vanua, e lailai wale ga era yaco mera tisaipeli vou i Karisito. Ia e sega ni kena ibalebale oqori ni sa tawayaga na nodra sasaga na tacida lomani lotu Vakarisito era yalodina ni vunau ena yalava era sega ni dau vakarorogo na lewena. (Iperiu 6:​10) Na cava na vuna? Vakasamataka mada oqo.

12. Na cava e rua na inaki ni noda cakacaka vakavunau?

¹² Na Kosipeli i Maciu e kauta cake mai e rua na inaki bibi ni noda cakacaka vakavunau. Dua oya na noda ‘qisi ira mera tisaipeli na leweniveivanua kece ga.’ (Maciu 28:​19, VV) E dua tale oya ni itukutuku ni Matanitu ni Kalou e “i vakadinadina.” (Maciu 24:​14, VV) E bibi na inaki ruarua oqo, ia e bibi cake sara na kena ikarua. Na cava na vuna?

13, 14. (a) Na cava e dua na ivakatakilakila levu ni nona sa tiko o Karisito? (b) Na cava meda nanuma tiko, vakauasivi nida vunau ena yalava era sega ni dau vakarorogo na lewena?

¹³ E vola na dauvolaivolatabu o Maciu ni ratou tarogi Jisu na nona yapositolo: “Na cava na ivakatakilakila ni nomuni tiko, kei na iotioti ni veisiga ni ituvaki kei vuravura?” (Maciu 24:​3, NW) Sa qai sauma o Jisu, ni dua vei ira na ivakatakilakila levu, na kena vakayacori e vuravura taucoko na cakacaka vakavunau. A tukuna tiko beka o Jisu na nodra vukei e so tale mera tisaipeli? Sega. E kaya: “[E]na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kece ga, sa na qai yaco mai na i vakataotioti.” (Maciu 24:​14, VV) E vakaraitaka e ke o Jisu ni kena vunautaki sara ga na Matanitu ni Kalou e tiki bibi ni ivakatakilakila.

¹⁴ Koya gona, nida vunautaka na itukutuku vinaka ni Matanitu ni Kalou, meda nanuma tiko ni kevaka mada ga eda sega ni rawa ni vukei ira e so mera tisaipeli, eda sa “vakadinadina” tiko. Se ra mani vakarorogo na tamata se sega, era sa kila tiko na veika eda cakava, eda sa vakayacora tale tiko ga kina na parofisai i Jisu. (Aisea 52:7; Vakatakila 14:​6, 7) E kaya o Jordy e dua na gonetagane iVakadinadina mai na Ra kei Urope: “E vakamarautaki au vakalevu na noqu kila ni vakayagataki au tiko o Jiova ena vakayacori ni parofisai ena Maciu 24:14.” (2 Korinica 2:​15-​17) Sega ni vakabekataki ni vakatale ga oya na noda rai.

Ni Saqati Noda iTukutuku

15. (a) Na cava a vakasalataki iratou kina vakailiu nona imuri o Jisu? (b)  E rawa vakacava nida vunau tiko ga, dina nida tusaqati?

¹⁵ Na veitusaqati e dua tale na vuna e ka ni bolebole kina na kena vunautaki na itukutuku vinaka ni Matanitu ni Kalou. A vakasalataki iratou vakailiu nona imuri o Jisu: “Dou na cati vei ira na lewe ni veivanua kecega e na vuku ni yacaqu.” (Maciu 24:9) Me vakataki ira na lotu Vakarisito taumada, o ira tale ga na imuri i Jisu nikua era cati, tusaqati, ra qai vakacacani. (Cakacaka 5:​17, 18, 40; 2 Timoci 3:​12; Vakatakila 12:​12, 17) Ena so na vanua ena gauna oqo, e se vakatabuya tu na matanitu na nodra cakacaka. Ia, na nodra talairawarawa vua na Kalou na lotu Vakarisito dina ena veivanua vaka oqori, era vunautaka tiko ga kina na itukutuku vinaka ni Matanitu ni Kalou. (Emosi 3:8; Cakacaka 5:​29; 1 Pita 2:​21) E rawa vakacava nira cakava oqo kei ira kece tale ga na iVakadinadina e veiyasa i vuravura? O Jiova e vakaukauataki ira ena yalona tabu.​—Sakaraia 4:6; Efeso 3:​16; 2 Timoci 4:​17.

16. E vakaraitaka vakacava o Jisu ni rau veisemati na cakacaka vakavunau kei na yalo ni Kalou?

¹⁶ E vakabibitaka o Jisu na nodrau veisemati voleka na yalo ni Kalou kei na cakacaka vakavunau ni kaya vei iratou nona imuri: “Dou na rawata na kaukauwa, ni sa lako mai vei kemudou na Yalo Tabu; dou na qai dautukuni au, . . . ka yacova nai yalayala kei vuravura.” (Cakacaka 1:8; Vakatakila 22:17) E bibi na ituvatuva ni veika e yaco ena tikinivolatabu oqo. Taumada, e sobuti ira na tisaipeli na yalo tabu, sa qai rawa nira vakadinadina kina e vuravura taucoko. Na veivuke wale ga ni yalo ni Kalou e rawa kina nira “vakadinadina ki na veivanua kece ga.” (Maciu 24:​13, 14, VV; Aisea 61:​1, 2) E donu kina na nona tukuna o Jisu ni yalo tabu e “Dauveivuke.” (Joni 15:​26, VV) E kaya tale ga ni yalo ni Kalou ena vakavulici ira qai tuberi ira nona tisaipeli.​—Joni 14:​16, 26; 16:13.

17. E vukei keda vakacava na yalo tabu nida tusaqati vakaca?

¹⁷ E vukei keda vakacava nikua na yalo ni Kalou nida tusaqati vakaca ena noda vunautaka na itukutuku vinaka? Na yalo ni Kalou ena vakaukauataki keda, qai saqati ira era vakacacani keda. Me kena ivakaraitaki, dikeva mada na ka a yaco ena bula nei Tui Saula.

Veisaqati na Yalo ni Kalou

18. (a) A veisau vakacava o Saula me lai ca sara? (b) Na cava a cakava o Saula me vakacacani Tevita kina?

¹⁸ A tekivu vinaka nona yaco o Saula me imatai ni tui e Isireli, ia a qai talaidredre vei Jiova. (1 Samuela 10:​1, 24; 11:​14, 15; 15:​17-​23) Oya na vuna sa sega kina ni qai tokoni koya na yalo ni Kalou. Sa qai kaukaua ga na nona cudruvaki Tevita o Saula, ni sa lumuti o Tevita me tui qai tokoni koya na yalo ni Kalou. (1 Samuela 16:​1, 13, 14) E nanuma o Saula ni na rawarawa na nona vakamatei Tevita ni dua tiko ga na api i Tevita, ia o Saula e tauri moto. Dua gona na siga ni qiria tiko o Tevita na nona api, e “cokataka na moto ko Saula; ni sa kaya, Au na cokai Tevita me veituituitaki kei na lalaga. A sa leve vakarua ko Tevita ka dro tani vua.” (1 Samuela 18:​10, 11) E muri, a qai vakarorogo o Saula vei luvena o Jonacani, na itokani i Tevita, qai bubuluitaka: “Me vaka sa bula ko Jiova, ena sega ni vakamatei ko koya [Tevita].” A mani saga tale o Saula “me cokai Tevita me veituituitaki kei na lalaga e na moto.” Ia o Tevita “sa lako lo yani . . . mai vei Saula, a sa cokataka na moto ki na lalaga ko koya.” A dro o Tevita, ia a vaqarai koya yani o Saula. Na gauna sara ga oya sa tekivu saqati Saula kina na yalo ni Kalou. Ena sala cava?​—1 Samuela 19:​6, 10.

19. E taqomaki Tevita vakacava na yalo ni Kalou?

¹⁹ A mani dro sara o Tevita vei Samuela na parofita, ia e talai iratou yani na nona tamata o Saula me ratou lai vesuki koya. Ni ratou yaco yani ena vanua a vuni koto kina o Tevita, “sa curumi iratou na tamata i Saula na Yalo ni Kalou, a ratou sa parofisai talega ko iratou.” Ena cakacaka ni yalo ni Kalou eratou guilecava kina na inaki ni nodratou ilakolako. E vakarua tale na nona talai iratou na nona tamata o Saula me ratou lai kauti Tevita mai, ia na ka vata ga a yaco taumada, a mani yaco tale vei iratou. E muri, a mani lako sara ga o Tui Saula, ia a sega ni vorata rawa o Saula na kaukaua ni yalo ni Kalou. A vakamalumalumutaki koya na yalo tabu “e na siga taucoko ko ya kei na bogi taucoko ko ya”​—e rawa kina vei Tevita me dro.​—1 Samuela 19:​20-​24.

20. Na cava eda rawa ni vulica mai na itukutuku ni nona vakacacani Tevita o Saula?

²⁰ E dua na ka ni vuli bibi e laurai ena itukutuku oqo me baleti Saula kei Tevita: Ena tawayaga wale na nodra sasaga o ira era dau vakacacani ira na tamata ni Kalou ni na saqati ira na yalo ni Kalou. (Same 46:11; 125:2) A nakita o Jiova me tui kei Isireli o Tevita. E sega ni dua e rawa ni veisautaka. Ena noda gauna oqo, sa nakita o Jiova me ‘vunautaki na itukutuku vinaka ni matanitu.’ Ena sega ni dua e tarova rawa.​—Cakacaka 5:​40, 42.

21. (a) Me vakataki Saula ena gauna makawa, era vakataki koya vakacava e so na dauveitusaqati nikua? (b) Na cava eda nuitaka ni na yaco?

²¹ E so na matalotu kei na iliuliu vakapolitiki era dau vakaucacataki keda se ra vakayacora na itovo voravora me tarova noda veiqaravi. Ia, me vaka ga nona taqomaki Tevita vakayalo o Jiova, ena taqomaki ira vaka kina na nona tamata nikua. (Malakai 3:6) Oya na vuna, eda vakataki Tevita kina ena noda kaya ena nuidei: “Au sa vakararavi vua na Kalou: au na sega ni rerevaka na ka era cakava rawa vei au na tamata.” (Same 56:11; 121:​1-8; Roma 8:​31) Ena veivuke i Jiova, meda vosota tiko mada ga na ka ni bolebole kece eda sotava nida vakayacora na ilesilesi soli vakalou ena noda vunautaka na itukutuku vinaka ni Matanitu ni Kalou ina veivanua kece ga.

[iVakamacala e ra]

O se Nanuma Tiko?

• Na cava eda veiveisautaka kina na iwalewale ni noda vunau?

• “Na katuba levu” cava ni veiqaravi e sa tadola tu?

• Na cava sa rawati ena noda cakacaka vakavunau, ena yalava sara mada ga era sega so ni dau vakarorogo na lewena?

• Na cava na vuna ena sega ni dua e tarova rawa kina na vunautaki ni itukutuku vinaka ni Matanitu ni Kalou?

[Kato ena tabana e 22]

Marautaki Dina

“Eratou marautaka tiko na nodratou duavata ni qaravi Jiova.” Oqori na ka eratou vakila na vuvale mai Sipeni eratou toki i Bolivia. A gole i Bolivia e dua vei iratou na gonetagane me lai tokona e dua na iwasewase lailai ribayawa. Na nona marautaka na veiqaravi e kea e uqeti rau nona itubutubu. Sega ni dede o iratou na vuvale kece, okati kina e va na gonetagane e tiko nodratou yabaki ni bula mai na 14 ina 25 eratou sa veiqaravi kece tiko e Bolivia. Eratou sa painia tiko e tolu na gonetagane, ia o koya a liu duadua vei iratou se qai vuli oti ga mai na Koronivuli ni Vuli Veiqaravi Vakaitalatala.

“E levu na ka ni bolebole,” e kaya o Angelica, e yabaki 30, mai Kenada, e veiqaravi tiko ena Tokalau kei Urope, “ia e vakacegui au noqu vukei ira na tamata ena cakacaka vakavunau. E vakauqeti au tale ga na nodra dau vakavinavinakataki au na iVakadinadina e kea ena noqu lai vukei ira.”

“E levu na ivakarau vakavanua me keirau vakamatauni keirau kina,” erau kaya e rua na yalewa erau veitacini mai Mereke erau sa yabaki 20 vakacaca, erau veiqaravi tiko ena Dominican Republic. “Ia, na neirau dei tiko ga ena neirau ilesilesi, sa ra mai tiko kina ena soqoni e vitu vei ira na neirau vuli iVolatabu.” Erau veivuke na veitacini oqo ena tauyavutaki ni dua na iwasewase lailai ni dautukutuku ni Matanitu ni Kalou ena dua na tauni e sega kina na ivavakoso.

O Laura, na tacida yalewa sa yabaki 20 vakacaca, e sa sivia e va na yabaki na nona veiqaravi e vanuatani. E kaya: “Au nakita me rawarawa noqu bula. Na ka oqo e vukei ira na dautukutuku mera kila ni kena taukeni e vica wale na ka e vakatau vei keda yadua kei na noda yalomatua, e sega ni ivakaraitaki ni dravudravua. Na noqu vukei ira, vakauasivi o ira na itabagone, e vakamarautaki au, e sega ni vakilai kina na dredre ni veiqaravi e vanuatani. E sega tale ni dua na cakacaka e uasivia na cakacaka oqo, au na tiko ga e ke ni se vakatara tiko o Jiova.”

[Kato ena tabana e 26]

Veika e Baleta na iVola na Good News for People of All Nations

E tiko ena tabana yadua ni ivola na Good News for People of All Nations, na itukutuku ena 92 na vosa. Na itukutuku e vakamuai sara ga vakatabakidua vei koya e wilika. Ni wilika gona na itukutuku o itaukeinivale, ena vaka sara ga o vosa tiko vua.

Na waqana e loma e tiko kina na mape kei vuravura. Vakayagataka na mape oqo mo drau veikilai kina kei itaukeinivale. Ke veiganiti, o rawa ni dusia na vanua o cavutu mai kina o qai matanataka vua se cavutu mai vei o koya. De dua ena toso vinaka sara nomu sasaga, drau marautaka tale ga.

Na ivakamacala taumada ni ivola oqo e volai kina e vica na ka meda cakava meda vukei ira kina era vosataka na vosa eda sega ni kila. Wilika vinaka sara na ka me vakayacori, qai vakamuria ena nomu vinaka kece.

Sa ra volai tu ena lewenivola na vosa yadua kei na kedra ivakatakilakila. Ena vukei keda oqo meda kila na ivakatakilakila ni vosa yadua e tabaki ena noda ivolacebaceba kei na so tale na ivola, ena vosa eda sega ni kila.

[iYaloyalo]

O sa vakayagataka tiko beka na ivola oqo ena cakacaka vakavunau?

[iYaloyalo ena tabana e 23]

Sa tabaki na noda ivola vakaivolatabu ena sivia na 400 na vosa ena gauna oqo

GHANA

YATU FILIPAINI

LAPLAND (SUWITENI)

[iYaloyalo ena tabana e 24, 25]

E rawa beka ni o veiqaravi ena vanua e gadrevi kina vakalevu na dautukutuku ni Matanitu ni Kalou?

ECUADOR

DOMINICAN REPUBLIC