Taro na Dauwiliwili

E kaya na Vakarua 14:21: “E tabu ni kemuni kania e dua na ka sa mate loa.” E veicoqacoqa beka oqo kei na Vunau ni Soro 11:​40, e kaya: “Ko koya sa kania e dua na tiki ni yagona ni sa mate, me sava nonai sulu, ia ena sega ni savasava ka yacova na yakavi”?

Erau sega ni veicoqacoqa na rua na tikinivolatabu oqo. Na imatai ni tikinivolatabu e tokaruataka ga na vakatatabu me kua ni laukana e dua na manumanu mate e kune, era a vakamatea beka na manumanu kila. (Lako Yani 22:31; Vunau ni Soro 22:⁠8) Na ikarua ni tikinivolatabu e vakamacalataka na ka e rawa ni cakava e dua na Isireli e vakacalaka nona voroka na vakatatabu oya.

Ni vakatatabutaka na Lawa e dua na ka, e sega ni kena ibalebale ni na sega ni voroki ena dua na gauna. Me kena ivakaraitaki, e tiko na lawa e vakatabuya na butako, na laba, na ivakadinadina vakailasu, kei na so tale. Ena gauna vata oya, e tiko na itotogi ni voroki na veilawa soli vakalou oqori. Era vakaukauataka na lawa na itotogi oqori, me raici kina na kena bibi.

O koya e voroka na vakatatabu ni kania na lewenimanumanu e mate loa ena sega ni savasava ena mata i Jiova, ena gadrevi gona kina me cakava na ivalavala dodonu ni veivakasavasavataki. Kevaka e sega ni vakasavasavataki koya vakavinaka, ena qai “cudruvi e na nona caka ca.”​​—⁠Vunau ni Soro 17:​15, 16.