Taro na Dauwiliwili

Na cava eda vulica ena vakatatabu e kune ena Lako Yani 23:19: “Dou kakua ni vakasaqa na luve ni me e na wai-ni-sucu i tinana”?

Oqo e dua vei ira na ivakaro e koto ena Lawa a soli vei Mosese, e cavuti tale ga vakatolu ena iVolatabu. E vukei keda na ivakaro oqo meda kila na ka e raica o Jiova ni dodonu, nona dau veinanumi, kei na nona yalololoma. Laurai tale ga kina nona cata o Jiova na sokalou lasu.⁠​—⁠Lako Yani 34:26; Vakarua 14:⁠21.

Na vakasaqari ni dua na luve ni me se dua tale na manumanu ena wainisucu i tinana e sa vakatanitaki kina na inaki i Jiova. E vakarautaka na Kalou na wainisucu i tina me vakania kina na luvena, me vukea tale ga na nona tubu. E kaya kina e dua na dauvakadidike me baleta na vakasaqari ni luve ni me ena wainisucu i tinana, ni oqo e vakaraitaka “na kena vakawaletaki na ituvatuva ni Kalou me baleta na ka e dodonu me rokovi, oya na nodrau veiwekani o tina kei luvena.”

So tale era kaya ni nodra ivalavala na lotu butobuto mera vakasaqara na luve ni me ena wainisucu i tinana me rawa ni tau kina na uca. Ke dina na vakasama oqo, e sa veiganiti dina na vakatatabu e soli vei ira na Isireli, ni taqomaki ira mai na ivalavala torosobu ni nodra lotu butobuto na veimatanitu e wavoliti ira. E vakamatatataka sara ga na Lawa a soli vei Mosese ni tabu vei ira na Isireli mera muria na nodra ivalavala na veimatanitu oqori.​​—⁠Vunau ni Soro 20:⁠23.

Dua tale na ka e vakavotui ena ivakaro oqo, na yalololoma i Jiova. Ia e sega ni o koya ga oqo na ivakaro e tu ena Lawa e laurai kina na yalololoma i Jiova. E vica tale na ivakaro e vakatabui kina na nodra vakalolomataki na manumanu, vaka kina na ivalavala mera qarauna na Isireli mera kua ni vakatanitaka na inaki ni Kalou. Kena ivakaraitaki, e vakaroti ena Lawa ni tabu na sorovaki ni dua na manumanu vakavo ga ke sa tiko kei tinana me bogi vitu. E vakatabui tale ga me rau vakamatei vata ena dua na siga na bulumakau yalewa se sipi yalewa kei na luvena. Me kakua tale ga ni kau mai ena sova ena duavata ga na gauna na tinatina kei na nona yaloka, se na luvena.​​—⁠Vunau ni Soro 22:​27, 28; Vakarua 22:​6, 7.

Macala e ke ni a sega ni okati wale tu ga ena Lawa na ka e vakatarai mera cakava na Isireli kei na ka mera kua ni cakava. E idusidusi tale ga vei keda baleta eda rawa ni kila kina na itovo vinaka e dodonu meda vakaitovotaka kei na kena e dodonu meda cata, me salavata sara ga kei na ivakatagedegede uasivi i Jiova.​​—⁠Same 19:​7-​11.

[iTaba ni Credit Line ena tabana e 31]

© Timothy O’Keefe/Index Stock Imagery