“Vakatovolei Kemudou”

“Dou dikevi kemudou, se dou tu e na vakabauta, se segai; vakatovolei kemudou.”​—2 KORINICA 13:5.

1, 2. (a) E rawa ni tarai keda vakacava na noda vakatitiqataka na noda vakabauta? (b) Na cava e yaco ena imatai ni senitiuri e rairai vakavuna mera sega ni vakadeitaka na nodra ilakolako e so?

A YACO yani e dua ina vanua e basoga kina na gaunisala. Ni sega ni matata vua na gaunisala e basika ina vanua e via lakova, e vakatataro vei ira e so era sota, ia e duidui na nodra ivakamacala. Sa mani sega ni tomana rawa na nona ilakolako baleta ni sa veilecayaki. Eda rawa ni vakatale ga oqori kevaka eda vakatitiqataka na noda vakabauta. Ke da veilecayaki tale ga, ena rawa ni leqa noda vakatulewa, e rawa tale ga ni vakavuna meda sega ni vakadeitaka na noda ilakolako.

² Na ka e yaco oqori e via tautauvata kei na dua na ka e yaco ena ivavakoso vakarisito e Korinica, mai Kirisi, ena imatai ni senitiuri. Era a vakalewa na yapositolo o Paula na ‘yapositolo lasu’ nira kaya: “Sa rui bibi ka kaukauwa na vei i vola i Paula, ia ni sa mai tiko sara vei keda sa malumalumu, ka sa sega ni laulau na nona vosa.” (2 Korinica 10:​7-​12, VV; 11:​5, 6, VV) Na rai vaka oqori e rairai vakavuna mera sega ni vakadeitaka na nodra ilakolako e so na lewe ni ivavakoso e Korinica.

3, 4. Na cava e yaga kina vei keda na ivakasala i Paula vei ira mai Korinica?

³ A tauyavutaka na ivavakoso e Korinica o Paula ena imatai ni gauna e sikova kina na koro oqori ena 50 S.K. A tiko e kea “me dua veimama na yabaki, ka vakatavulici ira tiko e na vosa ni Kalou.” Era “vakabauta ka papitaisotaki tale ga e lewe vuqa na kai Korinica.” (Cakacaka 18:​5-​11, VV) A kauaitaka dina o Paula na nodra bula vakayalo na wekana vakayalo e Korinica. Kuria oqori, era volavola vei Paula na kai Korinica me vakasalataki ira ena so na ka. (1 Korinica 7:⁠1) E momona dina na ivakasala e solia vei ira.

⁴ A vola o Paula: “Dou dikevi kemudou, se dou tu e na vakabauta, se segai; vakatovolei kemudou.” (2 Korinica 13:⁠5) Ke ra muria na tacida mai Korinica na ivakasala oya, ke ra vakadeitaka na nodra ilakolako. E yaga tale ga na ivakasala oqori vei keda nikua. Ia, eda na muria vakacava na ivakasala i Paula? Eda na dikevi keda vakacava se eda tiko ena vakabauta se sega? Eda na vakatovolei keda vakacava?

“Dou Dikevi Kemudou, se Dou Tu e na Vakabauta, se Segai”

5, 6. Na cava na ivakatagedegede eda dikeva kina se eda tiko ena vakabauta se sega? Na cava e ivakatagedegede vinaka kina?

⁵ Ni dikevi e dua na ka, ena tiko na ka e dikevi, kei na ivakatagedegede e dikevi kina. Me baleta na noda dikevi keda, ena sega ni dikevi na vakabauta se na veivakavuvuli eda sa mai vakabauta. Eda na dikevi keda sara ga. E tiko e dua na ivakatagedegede uasivi meda vakadikevi keda kina. E kaya e dua na qaqanisere e vola na daunisame o Tevita: “Sa vinaka sara na vunau i Jiova, ka sa saumaka na yalo: sa dina nai tukutuku i Jiova, ka sa vakavukui ira era sa sega ni vuku. Sa dodonu nai lesilesi i Jiova, ka sa vakamarautaka na yalo: sa savasava nai vakaro i Jiova, ka sa vakararamataka na matada.” (Same 19:​7, 8) E volai tu ena iVolatabu na ivunau vinaka sara kei na ilesilesi i Jiova, vaka kina na nona ivakasala kei na nona ivakaro savasava. E tu gona ena iVolatabu na ivakatagedegede uasivi duadua meda dikevi keda kina.

⁶ E kaya na yapositolo o Paula me baleta na itukutuku e vakavuna na Kalou me volai: “Ni sa bula ka kaukauwa na vosa ni Kalou, ka sa gata cake mai na i seleiwau batirua. Sa suwaka rawa na vanua e rau sota kina na lomada kei na yaloda, na i sema ni yago kei na uto ni sui, ka sa dau vakalewa rawa na nanuma kei na i naki ni lomadra na tamata.” (Iperiu 4:​12, VV) Io, e rawa ni dikeva na lomada na Vosa ni Kalou. E rawa vakacava meda vakayagataka na itukutuku gata qai kaukaua oqori? E vakamatatataka na daunisame na ka e gadrevi meda cakava. E lagata: “Sa kalougata na tamata . . . sa marau tiko e na vunau i Jiova; a sa vakananuma [“wilika,” NW] tiko na nona vunau e na siga kei na bogi.” (Same 1:​1, 2) E laurai “na vunau i Jiova” ena Vosa volai ni Kalou, na iVolatabu. E dodonu gona meda marautaka na dau wilika na Vosa i Jiova. Meda biuta vakatikitiki na gauna meda dau wilika kina da qai vakasamataka tale ga. Nida sa cakava oqori, meda qai dikevi keda vata kei na veika e volai kina.

7. Na cava na sala vinaka duadua e rawa nida dikeva kina se eda tiko ena vakabauta se sega?

⁷ Na sala vinaka duadua ga e rawa meda dikevi keda kina se eda tiko ena vakabauta se sega, oya meda wilika da qai vakasamataka vinaka na Vosa ni Kalou da qai veidutaitaka vata kei na noda itovo. Eda marau ni levu sara tu ga na ivukevuke ni noda kila vinaka na Vosa ni Kalou.

8. E vukei keda vakacava na ivola e tabaka “na dauveiqaravi yalo dina ka vuku” meda dikevi keda se eda tiko ena vakabauta se sega?

⁸ E vakavulici keda qai vakaroti keda tiko o Jiova ena ivola e tabaka “na dauveiqaravi yalo dina ka vuku,” e vakamacalataki kina na iVolatabu. (Maciu 24:​45, VV) Me kena ivakaraitaki, raica na kato e kena ulutaga “Taro me Vakananumi” ena levu na wase ni ivola na Toro Voleka Vei Jiova.a E totoka dina na iwasewase ni ivola oqori baleta e vukei keda meda vakasamataki keda kina. E levu tale ga na ulutaga era tabaki ena noda ivoladraudrau Na Vale ni Vakatawa kei na Yadra!, e vukei keda meda dikevi keda se eda tiko ena vakabauta se sega. E kaya e dua na yalewa lotu Vakarisito me baleta na veiulutaga e se qai tabaki ga ena Vale ni Vakatawa era yavutaki ena ivola na Vosa Vakaibalebale: “Era yaga dina vei au na veiulutaga oya. Era vukei au meu dikeva se e salavata tiko kei na ivakatagedegede uasivi nei Jiova na noqu vosa, noqu itovo, kei na ivakarau ni noqu rai.”

9, 10. Na isolisoli cava so i Jiova e vukei keda meda dikevi keda tiko se eda tiko ena vakabauta se sega?

⁹ Eda dau vakasalataki da qai vakauqeti tale ga vakalevu ena veisoqoni ni ivavakoso, soqo ni tabacakacaka, kei na soqo ni tikina. Oqori e vica na isolisoli vakayalo e vakarautaka na Kalou me baleti ira e parofisaitaki ira o Aisea: “Sa na yaco e na gauna maimuri, ni na vakataudeitaki na ulu-ni-vanua ni vale i Jiova me sivia na veiulu-ni-vanua, ena vakaceceretaki ka me lolovira na veiulu-ni-koro; ka ra na drodro kina na veimatanitu kecega. A ra na lako na tamata e lewe vuqa, ka kaya, Me da mai la’ki cabe cake ki na ulu-ni-vanua i Jiova, . . . ena vakavulica vei keda ko koya na nonai valavala, ia eda na muria na nona sala.” (Aisea 2:​2, 3) Eda kalougata dina nida vakavulici tiko vaka oqo ena sala i Jiova.

¹⁰ E dua tale na sala eda dikevi keda kina oya na nodra vakasalataki keda o ira era tu vinaka vakayalo, okati kina o ira na qase ni ivavakoso lotu Vakarisito. E kaya na iVolatabu me baleti ira: “Oi kemuni na wekaqu, kevaka sa kunei ni cala e dua na tamata, mo ni vakadodonutaki koya e na yalo malumalumu ko i kemuni sa tu vinaka vakayalo. Ia mo ni vakaraici kemuni de ko ni mani veretaki tale ga.” (Kalatia 6:​1, VV) Meda vakamuduo vei Jiova ena nona vakarautaka na sala meda vakadikevi keda tiko kina!

11. Na cava e okati ena noda dikeva se eda tiko ena vakabauta se sega?

¹¹ Era isolisoli uasivi dina i Jiova na veisoqoni vakarisito, na noda ivola, kei ira na tacida era lesi mera qaravi keda. E vinakati gona meda dui vakasamataki keda ena gauna eda dikevi keda tiko kina se da tiko ena vakabauta se sega. Nida wilika tiko na noda ivola se rogoca na ivunau vakaivolatabu, meda dui tarogi keda: ‘E tukuni au tiko beka oqo? Au dau cakava beka na ka oya? Au muria tiko beka na vakabauta ni lotu Vakarisito?’ Na ivakarau tale ga ni noda ciqoma na veisolisoli oya ena tukuna se vaka tu e vei na keda ituvaki vakayalo. “Sa sega ni rawa ni ciqoma na tamata vakayago na veika ni Yalo ni Kalou, ni ra sa ka lialia vua,” e kaya na iVolatabu. “Ia na tamata sa tiko vua na Yalo Tabu sa dikeva ka vakalewa na yaga ni veika kece.” (1 Korinica 2:​14, 15, VV) Eda sega beka ni vakavinavinakataka na veika eda wilika ena noda ivola, ivoladraudrau, kei na vo ni ivola tale e so, na veika eda rogoca ena soqoni, kei na veika eda rogoca vei ira na qase ni ivavakoso?

“Vakatovolei Kemudou”

12. Na cava e okati ena noda vakatovolei keda?

¹² Noda vakatovolei keda e okati kina na noda vakasamataki keda vinaka. E rawa meda tiko ena dina, ia e vakacava na ivakatagedegede ni noda bula vakayalo? Io, e okati ena noda vakatovolei keda na noda vakadinadinataka nida matua vakayalo kei na noda vakavinavinakataka na veisolisoli vakayalo.

13. Me vaka e tukuni ena Iperiu 5:​14, eda vakadinadinataka vakacava na noda matua?

¹³ Eda na vakadinadinataka vakacava nida lotu Vakarisito matua? A vola na yapositolo o Paula: “Na kakana dina sa ganiti ira sa qase [“matua,” NW], ko ira era sa vakavulica na lomadra ka sa rawa me ra vakaduiduitaka na vinaka mai na ca.” (Iperiu 5:​14, VV) Eda vakadinadinataka na noda matua ena noda vakavulica na lomada. E vinakati vua na dauqito me yavalata e so nona masela ena nona vakayagataka wasoma me qai rawa kina ni qaqa ena qito e vakaitavi kina. E vinakati vaka kina meda vakavulica na lomada ena noda dau vakayagataka na ivakavuvuli vakaivolatabu.

14, 15. Na cava meda sasagataka kina vakaukaua meda vulica na veika titobu ena Vosa ni Kalou?

¹⁴ Me rawa nida qai vakavulica na lomada, ena vinakati meda rawata na kilaka. E vinakati kina meda vuli vakataki keda vagumatua. Ni wasoma noda vuli vakataki keda, vakauasivi nida vulica na veika titobu ni Kalou, sa na levu cake sara na veika eda tawana e lomada. E levu sara na ulutaga titobu sa tabaki oti ena Vale ni Vakatawa. Eda raica vakacava na veiulutaga e vakamacalataka na veika dina e titobu? Eda dau levea beka baleta ni “tu kina na ka eso e dredre me kilai”? (2 Pita 3:​16) Sega, e dodonu ga meda saga vakaukaua meda kila na veika e vakamacalataki oya.​​—⁠Efeso 3:​18.

¹⁵ Vakacava ke dau dredre na noda vuli vakataki keda? E dodonu meda saga meda taleitaka.b (1 Pita 2:⁠2) Me rawa nida tubu cake meda matua, ena vinakati meda kania na kakana dina, oya na veika dina e titobu mai na Vosa ni Kalou. Ke sega, ena vakaiyalayala ga na veika e tu e lomada. Ia e vinakati e so tale na ka me ikuri ni noda dau vakania ga na lomada. E dodonu meda vakayagataka tale ga ena noda bula e veisiga na veika eda vulica ena noda vuli vakataki keda.

16, 17. Na ivakasala cava e solia na tisaipeli o Jemesa me baleta na noda “muria na vosa”?

¹⁶ E vakadinadinataki tale ga na noda sa vakatovolei keda tiko na noda vakavinavinakataka na ka dina ena noda cakava na cakacaka ni vakabauta. Ni vakayagataka e dua na vosa vakatautauvata sa bau sota vinaka, e kaya na tisaipeli o Jemesa: “Mo ni dau muria na vosa, ka kakua ni dau rogoca wale ga, ka vakaisini kemuni kina. Kevaka e rogoca wale ga na vosa e dua na tamata, ka sega ni muria, sa tautauvata kei na tamata ka ilova na matana e na iloilo; ia ni sa ilovi koya oti sa mai lako sara yani, ka sa guilecava sara na kena i rairai. Ia e na vakalougatataki e na nona cakacaka ko koya sa dikeva matua na lawa, na lawa uasivi ka dau veisereki, ka sa tu dei kina; ni sa sega ni rogoca wale ga ka guilecava, ia sa rogoca ga ka vakayacora.”​​—⁠Jemesa 1:​22-​25, VV.

¹⁷ E tukuna tiko o Jemesa: ‘Ilovi iko ena iloilo ni Vosa ni Kalou. Cakava tiko ga oqori ni o dikevi iko vata kei na ka o vulica ena Vosa ni Kalou. Me kua ni totolo nomu guilecava na veika o raica. Qai vakadodonutaki iko.’ E ka ni bolebole toka na noda muria na ivakasala oqori.

18. Na cava e ka ni bolebole kina na noda muria na ivakasala i Jemesa?

¹⁸ Taura mada me kena ivakaraitaki na noda vakaitavi ena kena vunautaki na Matanitu ni Kalou. “Sa vakadinata na tamata e na vu ni yalona me sa vakadonui kina,” e vola o Paula, “ia na gusuna sa vakatusa kina me bula.” (Roma 10:10) E gadrevi meda veisautaki keda me rawa kina nida vakatusa ena gusuda na ka meda bula kina. E sega ni ka rawarawa vei keda e lewe levu na cakacaka vakavunau. Nida gumatua kina da qai vakaliuca na cakacaka oqo ena noda bula ena vinakati kina na veiveisau kei na noda vakuai keda ena so na ka. (Maciu 6:​33) Ia kevaka eda sa muria se cakava rawa na cakacaka e lesi vakalou oqo, eda na marau baleta ni na vakacaucautaki kina o Jiova. Vakacava, eda gumatua tiko ena noda kacivaka na Matanitu ni Kalou?

19. Na cava soti e okati ena noda cakacaka ni vakabauta?

¹⁹ Na cava soti e okati ena noda cakacaka ni vakabauta? E kaya o Paula: “Ni vakayacora na veika ko ni sa vulica ka raica vei au, ko ya mai na ka au tukuna kei na ka au cakava, ka na tiko vata kei kemuni na Kalou dau veivakacegui.” (Filipai 4:​9, VV) Eda vakatovolei keda ena noda raica se da sa vakayacora tiko na veika eda vulica, vakabauta, rogoca, se raica, kei na veika kece e vauca na noda yalayala kei na noda mai dua na tisaipeli. “Oqo na sala, dou mai lako tu ga kina,” e vakarota o Jiova ena gusu i Aisea na parofita.​​—⁠Aisea 30:⁠21.

20. O cei era yaga vakalevu ina ivavakoso?

²⁰ Era yaga vakalevu ina ivavakoso o ira na tagane kei na yalewa era vulica vagumatua na Vosa ni Kalou, era gumatua ena vunautaka na itukutuku vinaka, e tawavakamelei na nodra yalodina, ra qai dau tokona ena yalodina na Matanitu ni Kalou. O ira oqo era vakaukauataka na ivavakoso era lewena. Era yaga sara vakalevu, vakauasivi ni vinakati mera qaravi e levu sara na tacida vou. Nida muria na ivakasala i Paula meda ‘dikevi keda tiko se da tu ena vakabauta se sega da qai vakatovolei keda tiko,’ eda ivakaraitaki vinaka kina vei ira tale e so.

Rekitaka Nomu Cakava na Loma ni Kalou

21, 22. E rawa vakacava meda rekitaka na noda cakava na loma ni Kalou?

²¹ “Au sa reki me’u kitaka na ka ko ni sa vinakata, noqu Kalou,” e lagata o Tui Tevita e Isireli makawa, “io, na nomuni vunau sa tu e na vu ni yaloqu.” (Same 40:⁠8) A rekitaka o Tevita na nona cakava na loma ni Kalou. Baleta? Ni a tu sara ga ena loma i Tevita na lawa i Jiova. A matata vinaka vei Tevita na sala me muria.

²² Ni tiko tale ga ena vu ni yaloda se lomada na lawa ni Kalou, ena matata vinaka vei keda na sala meda muria. Eda na rekitaka tale ga na noda cakava na loma ni Kalou. O koya gona, meda “gumatua sara” ni qaravi Jiova mai vu ni lomada.​​—⁠Luke 13:⁠24.

[iVakamacala e ra]

O se Nanuma Tiko?

• Eda na dikevi keda vakacava se eda tiko ena vakabauta se sega?

• Na cava e okati ena noda vakatovolei keda?

• Eda na vakadinadinataka vakacava nida lotu Vakarisito matua?

• E vukei keda vakacava na noda cakacaka ni vakabauta nida vakatovolei keda?

[iYaloyalo ena tabana e 23]

O kila se cava na sala vinaka duadua e rawa nida dikeva kina se eda tiko ena vakabauta se sega?

[iYaloyalo ena tabana e 24]

Eda vakadinadinataka nida lotu Vakarisito matua ena noda vakaraitaka na ka e tu e lomada

[iYaloyalo ena tabana e 25]

Eda vakatovolei keda ena noda ‘sega ni rogoca wale ga ka guilecava, ia eda vakayacora ga’