Taro na Dauwiliwili
Ni cavuti ena Sefanaia 2:3 na vosa “beka,” e vakaraitaka li oya nira sega ni vakadeitaka na tamata ni Kalou nodra na bula tawamudu?
E kaya na tikinivolatabu oqo: “Dou vakasaqarai Jiova, oi kemudou kece sa yalomalumalumu ena vanua, oi kemudou sa cakava na nona lewa; dou qara mada na yalododonu, vakasaqara na yalomalumalumu: dou na vuni beka kina e na siga ni cudru i Jiova.” Cava na vuna e cavuti kina na “beka”?
Meda kila na ka ena cakava o Jiova vei ira na nona tamata yalodina ena Amaketoni, ena vukei keda noda nanuma na ka e kaya na iVolatabu ni na cakava na Kalou vei ira era mate ni bera na siga ni veilewai. E so era na vakaturi ina bula tawamate rawa mera ka bula vakayalo e lomalagi, qai so tale era na vakaturi e vuravura mera bula tawamudu ena Parataisi. (Joni 5:28, 29; 1 Korinica 15:53, 54) Ke sa nanumi ira qai vakaicovitaki ira na nona tamata yalodina era mate ni bera na Amaketoni o Jiova, sega ni vakataratutu ni na nanumi ira tale ga na nona tamata era na bula tiko ena siga ni nona cudru.
E veivakayaloqaqataki tale ga na nona vosa uqeti vakalou na yapositolo o Pita. E vola: “[Na Kalou] sa vakabulai Noa ka lewe vitu tale, o koya ka dauvunautaka nai valavala dodonu, ka sa luvuci ira na kai vuravura era sa sega ni lotu: a sa vakamai rau na koro ko Sotoma kei Komora me dravusa, ka sa vaqeavutaka ni sa cudruva, . . . a sa vakabulai Loti na tamata yalododonu, . . . sa kila kina na Turaga [o Jiova] me vakabulai ira era sa daulotu mai na veivakatovolei, me maroroi ira talega na tawa yalododonu me yaco mada na siga ni lewa me ra qai cudruvi.” (2 Pita 2:5-9) Dina ni a vakarusai ira na tamata ca o Jiova ena veigauna sa oti, a vakabulai Noa kei Loti ni rau qaravi koya ena yalodina. Ena vakabulai ira tale ga na tamata era sokalou vua o Jiova ena gauna e vakarusai ira kina na tamata ca ena Amaketoni. E “dua nai soqosoqo levu” ni tamata yalododonu era na vakabulai.—Vakatakila 7:9, 14.
O koya gona, e kena irairai ni kena vakayagataki na vosa “beka” ena Sefanaia 2:3 e sega ni kena ibalebale ni sega ni vakadeitaki nona rawa ni vakabulai ira na tamata e vakadonui ira na Kalou. Sa na rawa me taqomaki e dua ena siga ni cudru i Jiova ni se qai tekivu vakasaqara na yalododonu kei na yalomalumalumu. Ia ena vakadeitaki oqo ena nodra vakasaqara tiko ga na tamata yadua na yalododonu kei na yalomalumalumu.—Sefanaia 2:3.
[iYaloyalo ena tabana e 31]
“Sa kila na Turaga [o Jiova] me vakabulai ira era sa daulotu mai na veivakatovolei”