Vakatotomuria na iVakaraitaki ni Parofita o Sefanaia
1. Vakamacalataka na ituvaki a sotava o Sefanaia ena nona cakacaka vakaparofita, na cava eda vulica kina?
1 E bulabula sara tu ga ena vanua o Juta na nona sokaloutaki o Peali, qori ena veimama ni ikavitu ni senitiuri B.S.K. Se qai labati oti ga na Tui ca o Emoni, ia sa veiliutaki tiko na Tui gone o Josaia. (2 Vei. 33:21–34:1) Qori na gauna e kauti Sefanaia mai kina o Jiova me vakarogoya na itukutuku ni nona veilewai. Kena irairai ni lewe ni vuvale vakatui e Juta o Sefanaia ia a sega ni vakalecalecava na itukutuku i Jiova me baleta na torosobu ni veiliutaki e Juta. (Sefa. 1:1; 3:1-4) Eda saga tale ga nikua meda vakatotomuria na yalodoudou i Sefanaia ena noda kua ni vakalaiva na veiwekani vakayago me vakaleqa noda qaravi Jiova. (Maciu 10:34-37) Na itukutuku cava a vakarogoya o Sefanaia, na cava e mani yaco?
2. Na cava meda cakava meda vuni kina ena siga ni cudru i Jiova?
2 Vakasaqarai Jiova: O Jiova ga e rawa ni veivakabulai ena nona siga ni cudru. Qori na vuna e uqeti ira kina na lewe i Juta o Sefanaia mera vakasaqarai Jiova, mera vakasaqara na yalododonu kei na yalomalumalumu ni se vo levu na gauna. (Sefa. 2:2, 3) Qori tale ga na ka e vinakati nikua. Me vakataki Sefanaia ga, eda uqeti ira na tamata nikua mera vakasaqarai Jiova, ia meda kua ni wele, meda vakadeitaka tiko ga nida na sega ni “vuki tani vei Jiova.” (Sefa. 1:6) Eda vakasaqarai Jiova nikua ena noda vulica vagumatua nona Vosa kei na noda masuta na nona veidusimaki. Eda vakasaqara na yalododonu ena noda muria na itovo savasava. Kena ikuri, eda vakasaqara na yalomalumalumu nida bucina na yalo ni talairawarawa da qai tu vakarau ni muria na veidusimaki ni isoqosoqo i Jiova.
3. Na cava me donu tiko ga kina na ivakarau ni noda raica na cakacaka vakaitalatala?
3 Veika Vinaka e Yaco: Na itukutuku ni veilewai e vakarogoya o Sefanaia e tarai ira dina eso e Juta, vakabibi na cauravou lailai o Josaia. A tekivu vakasaqarai Jiova o Josaia ni se gonetagane lailai. E liutaka sara na cakacaka vakaitamera me vakasavasavataki na vanua mai na qaravi matakau. (2 Vei. 34:2-5) Nikua, eso na sore ni ka dina ni Matanitu era lutu ena batinisala, so ena dela ni vatu, ena maliwa tale ga ni veiwavakavotona, so tale ga era lutu ena qele vinaka lai yaco sara mera vua. (Maciu 13:18-23) Eda nuidei ni na vakalougatataka o Jiova na noda sasaga nida ogaoga tiko ena kaburaki ni sore ni ka dina ni Matanitu ni Kalou.—Same 126:6.
4. Na cava ‘meda waraki Jiova tiko ga kina’?
4 Era nanuma eso na lewe i Juta ni na sega ni vakatauitotogi o Jiova. Ia sa vakadeitaka tu o Jiova ni sa voleka na nona siga levu. (Sefa. 1:12, 14) Era na vakabulai ga o ira era vakaruru vua. (Sefa. 3:12, 17) Nida ‘waraki Jiova tiko,’ meda marautaka mada ga kei ira na noda itokani vakabauta noda sokalou ena duavata vua na noda Kalou cecere!—Sefa. 3:8, 9.