Lako Vata kei na Kalou ena Gauna Veilecayaki Oqo

“Sa daulako vata kei na Kalou ko Inoki: a sa yali eke: ka ni sa kauti koya tani na Kalou.”​—⁠VAKATEKIVU 5:​24.

1. Na cava e so na ka e vakaleqa tiko na noda gauna oqo?

GAUNA veilecayaki! Na vosa oqori e vakamacalataka vinaka na tiko yavavala kei na itovo kaukaua e sotava tiko na tamata me tekivu mai na gauna e tauyavu kina na Matanitu ni Kalou e liutaka na Mesaia ena 1914. Me tekivu mai na gauna oqori, sa bula tiko na tamata ena “iotioti ni veisiga.” Sa qai tubu cake ga na veileqa lelevu me vaka na dausiga, tauvimate, uneune, kei na veivaluvaluti. (2 Timoci 3:​1, NW; Vakatakila 6:​1-8) Na veileqa oqo e tarai ira tale ga na qaravi Jiova tiko. Io e tarai keda kece na veileqa e sotavi tiko ena gauna oqo. E vakaleqa sara ga na noda bula na leqa vakailavo, na leqa e salavata mai kei na veiliutaki vakapolitiki, basulawa, kei na tauvimate.

2. Na cava era valuta na tamata i Jiova?

² Me kuria oqori, e levu na tamata i Jiova era vosota yarayara voli mai na veivakararawataki kaukaua baleta ni veivala tiko o Setani kei ira na “vakabauta na vosa ni Kalou, ka taura tikoga nai tukutuku kei Jisu.” (Vakatakila 12:17) Dina nida sega ni sotava kece tiko na veivakararawataki, ia ena vinakati vei keda kece na lotu Vakarisito meda tusaqati Setani na Tevoro kei na ivakarau ni yalo e vakavuna e laurai vua na kawatamata. (Efeso 2:2; 6:​12) E dodonu meda qaqarauni matua me kua ni takavi keda na yalo oqori baleta ni vakilai e vanua ni cakacaka, koronivuli, kei na veivanua kece eda veitaratara kina kei ira na sega ni taleitaka na sokalou savasava.

Lako Vata kei na Kalou, Sega ni Veimatanitu

3, 4. Era duidui vakacava na lotu Vakarisito mai na vuravura?

³ Era valuta tale ga na lotu Vakarisito ena imatai ni senitiuri na yalo ni vuravura, oqori e vakaduiduitaki ira vei ira na tiko ena saula ni ivavakoso vakarisito. E vakamacalataka o Paula na duidui oqori ni vola: “Au sa kaya kina e na yaca ni Turaga ka vakarota matua sara, mo ni kakua ni qai bula tale tiko me vakataki ira na tawa lotu e na nodra vakanananu tawa yaga. Ni sa vakabutobutotaki na nodra vakasama ka sa sega ni veiriti kei na bula ni Kalou e na vuku ni nodra lecaika kei na yalokaukauwa. Sa yali na nodra kila na madua, ka ra sa soli ira ki na i valavala vakasisila ka sega ni tarovi ira rawa, ni cakava na veika kece ga e tawa savasava.”​—⁠Efeso 4:​17-​19, VV.

⁴ E vakamacalataka vakavinaka sara na veivosa oya na torosobu ni ituvaki vakayalo kei na itovo ni vuravura ena gauna i Paula kei na gauna oqo. Me vaka ena imatai ni senitiuri, o ira tale ga na lotu Vakarisito nikua era sega “ni valavala tiko me vakataki ira na veimatanitu tani.” Ia era cibitaka ga na nodra lako vata tiko kei na Kalou. Era na taroga beka e so se rawa vakacava mera lako vata kei Jiova na tamata ivalavala ca. Ia e vakaraitaka na iVolatabu ni rawa. E namaka sara ga o Jiova mera cakava vaka kina na tamata. Ni se vo e walu na senitiuri me qai sucu na Karisito, a vola na parofita o Maika na vosa veiuqeti oqo: “Ia ka cava tale sa taroga maivei iko ko Jiova, mo caka dodonu ga, ka mo vinakata na yalololoma, ka mo yalomalumalumu talega ni drau lako vata kaya na nomu Kalou?”​—⁠Maika 6:⁠8.

Vuna kei na Sala Eda Lako Vata Kina kei na Kalou

5. E rawa vakacava vua na tamata ivalavala ca me lako vata kei na Kalou?

⁵ E rawa vakacava meda lako vata kei na Kalou kaukaua duadua e tawarairai? E macala ni na sega ni vaka na noda lako vata kei ira na tamata. E vakayagataki ena iVolatabu na vosa na “lako” me kena ibalebale tale ga na “muria e dua na ivakarau.”a Me salavata kei na kena ibalebale oqori, o koya e lako vata kei na Kalou e muria tiko na ivakarau ni bula e dusia qai vakadonuya na Kalou. Nida muria na ivakarau ni bula oqori eda na duatani kina vei ira eda bula vata tu. Ia, oqo ga na ivakarau ni bula e dodonu me muria na lotu Vakarisito. Baleta? E tiko e vica na vuna.

6, 7. Na cava e uasivi kina na lako vata kei na Kalou?

⁶ Kena imatai, e noda Dauveibuli o Jiova, e iVurevure ni noda bula, e vakarautaka tale ga na veika kece eda gadreva meda bula kina. (Vakatakila 4:​11) Oya na vuna e tu kina vua na dodonu me dusia na noda ilakolako. E yaga tale ga vakalevu vei keda na noda lako vata kei na Kalou. Sa nakita tale ga o Jiova me vosota na nodra ivalavala ca o ira na lako vata kei koya, e solia tale ga vei ira na inuinui ni bula tawamudu. E vakarautaka tale ga na Tamada vakalomalagi dauloloma na ivakasala momona e vukei keda meda marautaka na bula ena gauna oqo nida lako vata tiko kei koya, dina ga nida tamata ivalavala ca da qai bula tiko ena vuravura e lewa o Setani. (Joni 3:​16; 2 Timoci 3:​15, 16; 1 Joni 1:8; 2:​25; 5:​19) E dua tale na vuna eda lako vata kina kei na Kalou oya nida na vukea na kena vakilai na duavata kei na vakacegu ena ivavakoso.​—⁠Kolosa 3:​15, 16.

⁷ E kena iotioti ni vuna qai bibi duadua, oya ni noda lako vata kei na Kalou eda vakaraitaka kina se eda to e vei ena kena veiletitaki se o cei e dodonu me veiliutaki, na ka e se tarogi sara mai ena were o Iteni. (Vakatekivu 3:​1-6) Eda na vakaraitaka ena ivakarau ni noda bula nida tovaki Jiova tiko, da qai yaloqaqa tale ga ni kacivaka tiko ni o koya ga e dodonu me lewa se veiliutaki. (Same 83:18) Nida cakava oqori, ena salavata sara kei na noda masulaka na kena vakarokorokotaki na yaca ni Kalou kei na kena caka na lomana. (Maciu 6:​9, 10) Era yalomatua o ira na digitaka mera lako vata kei na Kalou! E rawa nira vakadeitaka ni sa mua donu tiko na nodra ilakolako baleta o Jiova e “vuku duaduaga.” E sega vakadua ni cala.​—⁠Roma 16:⁠27.

8. E via tautauvata vakacava na nodrau gauna o Inoki kei Noa kei na noda gauna?

⁸ E rawa vakacava meda bula tiko me vaka e dua na lotu Vakarisito ena gauna veilecayaki oqo, na gauna era sega ni taleitaka kina e levu na tamata mera qaravi Jiova? Eda raica na vuna nida vakasamataki ira na tamata yalodina ena gauna e liu era yalodina tiko ena gauna dredre era donuya. E rua vei ira o Inoki kei Noa. Rau bula tale ga ena gauna vata vaka oqo. A vakilai levu ena gauna oya na ca. A roboti vuravura tu ena gauna i Noa na itovo kaukaua kei na itovo vakasisila. Ia erau vorata rawa o Inoki kei Noa na yalo ni vuravura ena gauna oya ni rau lako vata tiko kei Jiova. Erau rawata vakacava? Me saumi na taro oqori, eda na veivosakitaka ena ulutaga oqo na ivakaraitaki i Inoki. Eda na dikeva na ivakaraitaki i Noa ena ulutaga e tarava.

Lako Vata kei na Kalou o Inoki ena Gauna Veilecayaki

9. Na itukutuku cava kei Inoki e tu vei keda?

⁹ O Inoki e imatai ni tamata e tukuna na iVolatabu ni rau lako vata kei na Kalou. E kaya na iVolatabu: “Rau sa daulako vata kei na Kalou ko Inoki, ni sa sucu ko Mecusela.” (Vakatekivu 5:​22) Ni vakamacalataka oti na dede ni bula i Inoki, e balavu sara vei keda, ia e lekaleka ni laurai vata kei na nodra yabaki ni bula ena gauna oya, e kaya na kena itukutuku: “Rau sa daulako vata kei na Kalou ko Inoki: a sa yali eke: ka ni sa kauti koya tani na Kalou.” (Vakatekivu 5:​24) O Jiova e kauti Inoki tani mai na vanua ni bula me moce ena mate ni bera nira qai saga na nona meca mera cakava vua e dua na ka. (Iperiu 11:​5, 13, NW) Na veitikina ga oqori e tukuni koya, e sega ni cavuti tale vakalevu ena iVolatabu o Inoki. Na itukutuku oqori kei na vanua tale e cavuti kina, era vakaraitaka ni a bula voli o Inoki ena gauna veilecayaki.

10, 11. (a) E dewa vakacava na ca ni oti nodrau talaidredre o Atama kei Ivi? (b) Na parofisai cava e vunautaka o Inoki, e vakacava na nodra rogoca na tamata?

¹⁰ Vakasamataka mada na kena torosobu totolo na ivakarau ni tamata ni oti na nona valavala ca o Atama. E tukuna vei keda na iVolatabu ni ulumatua i Atama o Keni, e imatai ni tamata e laba, ni a labati tacina o Epeli. (Vakatekivu 4:​8-​10) Ni oti nona mate vakaloloma o Epeli, e qai sucu tale e dua na luvedrau o Atama kei Ivi, rau vakayacani koya o Seci. Eda wilika me baleti koya: “A sa sucu e dua na luve i Seci ka tagane; a sa vakayacani koya ko Inosi: e na gauna ko ya, era qai vakatekivu kina na tamata me vakatokai ira e na yaca i Jiova.” (Vakatekivu 4:​25, 26) E rarawataki ni nodra “vakatokai ira e na yaca i Jiova” oqo e vakaraitaka na nodra vukitani.b Ni oti e vica vata na yabaki nona sucu o Inosi, e qai bulia e dua na sere e tukuni kina ni a vakamatea e dua na tamata e via vakamavoataki koya o Lemeki, e dua na kawa i Keni, me rau rogoca na rua na watina. E kaya tale ga: “Kevaka sa vakavitu na kenai sau e na vuku i Keni, Ena vakavitusagavulu ka vitu vakaidina e na vuku i Lemeki.”​—⁠Vakatekivu 4:​10, 19, 23, 24.

¹¹ E vakaraitaka na itukutuku lekaleka oqori ni nona veivakaisini o Setani ena were o Iteni e lai vakavuna sara me dewa totolo na ca vei ira na kawa i Atama. A parofita tiko i Jiova o Inoki ena gauna oqori, na veika a uqeti me tukuna ena gauna oya e baleta tale ga na gauna oqo. A vola o Juta na ka e parofisaitaka o Inoki: “Raica, ena lako mai na Turaga kei na le udolu vakaudolu na nona agilosi yalosavasava, me vakatauca na lewa vei ira na tamata kece ga, ka me vakarusai ko ira kece sa sega ni doka na Kalou e na vuku ni nodra i valavala ca kece ga era sa kitaka e na sala sa sega ni sala vakalou, kei na veika viavialevu kece ga era sa vosataka ko ira na i valavala ca me baleta na Kalou!” (Juta 14, 15, VV) Ena qai vakayacori vakaoti na veivosa oqori ena Amaketoni. (Vakatakila 16:​14, 16) Ia eda rawa ni vakadeitaka nira cudru o ira na “valavala ca” ena gauna i Inoki nira rogoca na nona parofisai. E ivakaraitaki ni nona loloma o Jiova na nona tokitaki koya na parofita oya.

Na Cava e Uqeti Inoki me Lako Vata kei na Kalou?

12. Na cava e duidui kina o Inoki vei ira era bula vata?

¹² Rau vakarorogo vei Setani o Atama kei Ivi ena were o Iteni, oqo e vakavuna me vorati Jiova o Atama. (Vakatekivu 3:​1-6) E duatani na sala e muria na luvedrau o Epeli, e vakadonui koya o Jiova. (Vakatekivu 4:​3, 4) E rarawataki nira sega ni vakataki Epeli e dua na iwase levu ni kawa i Atama. Ia o Inoki, e sucu ni oti e vica na drau na yabaki e muri, e vakataki Epeli. Na cava e duidui kina o Inoki vei ira e levu na kawa i Atama? E sauma na taro oqori na yapositolo o Paula ena nona vola: “Ni sa vakabauta sa kau yani kina ko Inoki ka sega ni mate; a ra sa sega ni kunei koya, ni sa kauti koya yani na Kalou: ia ni sa bera ni kau yani, sa tu ga vua nai vakadinadina ni sa vinakati koya na Kalou.” (Iperiu 11:⁠5) O Inoki e dua vei ira ‘na ilala iVakadinadina’ ni bera na gauna vakarisito era ivakaraitaki vinaka ni vakabauta. (Iperiu 12:​1, VV) Na vakabauta oqo e vukei Inoki me ivalavala dodonu tiko ga ena 300 vakacaca na yabaki e bula tiko kina, oqo e vakatolutaki na dede ni noda bula!

13. Na mataqali vakabauta cava e tu vei Inoki?

¹³ E vakamacalataka o Paula na vakabauta e tu vei Inoki kei ira na ivakadinadina tale e so ni vola: “Na vakabauta sa i koya na noda vakadinata ni na yaco na veika eda nuitaka, na noda kila ni ra tu dina na veika eda sega ni raica.” (Iperiu 11:​1, VV) Io, na vakabauta na noda vakadinata me yaco dina na veika eda nuitaka. Na kaukaua ni noda vakadinata na veika oya e lai vakavuna meda vakaliuca sara ga ena noda bula. Na vakabauta vaka oqo e vakavuna nona lako vata kei na Kalou o Inoki, dina ga ni sega ni cakava vaka kina na vuravura ena gauna oya.

14. Na kila cava e yavutaki kina na vakabauta i Inoki?

¹⁴ Na vakabauta e yavutaki ena kila na ka dina. Na ka dina cava e kila o Inoki? (Roma 10:​14, 17; 1 Timoci 2:⁠4) E sega ni vakabekataki ni a kila na veika e yaco mai Iteni. E rairai rogoca tale ga na ivakarau ni bula ena were o Iteni, ni a se tiko ena gauna oya, dina ga ni a sega ni vakatarai me curuma na tamata. (Vakatekivu 3:​23, 24) E kila tale ga na inaki ni Kalou mera vakasinaita na vuravura na kawa i Atama ra qai vukica tale me vaka na Parataisi taumada. (Vakatekivu 1:​28) E kila vinaka tale ga o Inoki nona yalataka o Jiova me vakatubura e dua na Kawa ena butuqaqia na ulu i Setani me qai vakadodonutaka tale ga na ca e revurevu ni nona veivakaisini o Setani. (Vakatekivu 3:​15) Na parofisai mada ga i Inoki ena ivola i Juta e vakaraitaka na nodra vakarusai na kawa i Setani. Ni tamata vakabauta o Inoki, eda kila ni a qaravi Jiova o koya e “dau saumi ira tale ga era vakasaqarai koya.” (Iperiu 11:​6, VV) O koya gona, dina ni sega ni kila o Inoki na ka dina kece eda kila ena gauna oqo, na kila mada ga e tu vua e yavutaki vinaka kina na nona vakabauta. Na vakabauta oqori e vukei koya me yalodina tiko ena gauna veilecayaki.

Vakatotomuri Inoki

15, 16. Eda na vakatotomuri Inoki vakacava?

¹⁵ E vinaka meda vakatotomuri Inoki kevaka eda vinakata meda vakamarautaki Jiova ena gauna veilecayaki oqo. E sega wale ga ni vinakati meda toroya cake na noda kilai Jiova kei na nona inaki, ia meda vakayagataka na kila oqori me lewa na noda ilakolako. (Same 119:101; 2 Pita 1:​19) Me lewai keda tale ga na ivakarau ni rai ni Kalou nida saga tiko meda vakamarautaki koya ena veika eda vakasamataka kei na veika kece eda cakava.

¹⁶ E sega ni tukuni se era vica tale era qaravi Jiova tiko ena gauna i Inoki, de a rairai o koya duadua ga se maliwai ira tiko e le vica ga. Eda lewe lailai tale ga, ia e sega ni vakayalolailaitaki keda oya. Ena tokoni keda o Jiova veitalia se o cei e tusaqati keda. (Roma 8:​31) E yaloqaqa o Inoki ena nona kacivaka na nodra vakarusai na tamata ca. Eda yaloqaqa tale ga ena noda vunautaka ‘na itukutuku vinaka ni matanitu ni Kalou’ dina ga nida vakalialiai, tusaqati, da qai vakacacani. (Maciu 24:14) E sega ni balavu na nona bula o Inoki ni vakatauvatani kei ira era bula vata. Ia, e sega ni vakanuinui ina vuravura ena gauna oya. A vakanamata tiko ina dua na ka e uasivi cake. (Iperiu 11:​10, 35) Eda namaka tale tiko ga na kena vakayacori na loma i Jiova. Oya na vuna eda sega ni vakayagataka vinaka sara kina na vuravura oqo. (1 Korinica 7:​31) Eda na vakayagataka vakalevu ga na noda kaukaua kei na veika eda taukena ena cakacaka i Jiova.

17. Na kila cava e tu vei keda a sega ni tiko vei Inoki, na cava gona e dodonu meda cakava?

¹⁷ A vakabauta o Inoki ni na yaco mai na Kawa e yalataka na Kalou ena gauna e lokuca o Jiova. Sa voleka tale ni 2,000 na yabaki na nona yaco mai na Kawa oya, o Jisu Karisito, ni mai voli keda qai dolava tale ga vei keda kei ira na ivakadinadina yalodina ena gauna sa oti me vakataki Inoki, na sala meda rawata kina na bula tawamudu. Na Kawa oya, o koya sa buli oti me Tui ni Matanitu ni Kalou, e kolotaki Setani laivi mai lomalagi ki vuravura, oya na vuna eda rarawa tu kina ena gauna oqo. (Vakatakila 12:12) Io, e levu cake sara na ka eda rawa ni kila vei Inoki. Me tiko mada ga vei keda na vakabauta e tu vua. Me lewa mada ga na veika kece eda cakava na noda vakabauta dina na vakayacori ni vosa ni yalayala ni Kalou. Me vakataki Inoki, meda lako vata tiko mada ga kei na Kalou, nida bula tiko ena gauna veilecayaki oqo.

[iVakamcala e ra]

O na Sauma Vakacava?

• Na cava e kena ibalebale na lako vata kei na Kalou?

• Na cava e uasivi kina na lako vata kei na Kalou?

• Na cava e vukei Inoki me lako vata kei na Kalou dina ga e gauna veilecayaki?

• Eda vakatotomuri Inoki vakacava?

[iYaloyalo ena tabana e 15]

E ‘lako vata kei na Kalou o Inoki’ ena vakabauta

[iYaloyalo ena tabana e 17]

Eda vakabauta ni na yaco dina na veika e yalataka o Jiova

[iTaba ni Credit Line ena tabana e 13]

iMatau, dua na marama: FAO photo/B. Imevbore; collapsing building: San Hong R-C Picture Company