E Kalou Beka se Tamata Ga?

“OI AU na rarama kei vuravura: ko koya sa muri au ena sega ni lako e na butobuto, ena tu ga vei koya na rarama ni bula.” (Joni 8:12) Oqori na veivosa i Jisu Karisito. Ena imatai ni senitiuri, a kaya e dua na turaga vuli me baleti Jisu: “Sa vunitaki tu vua na i yau talei kece ga ni vuku kei na kila ka.” (Kolosa 2:3, VV) Na iVolatabu e kaya tale ga: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) E bibi gona meda rawata na kilaka dodonu me baleti Jisu me rawa ni vakacegui kina na noda gagadre vakayalo.

Ia, vuqa na tamata e vuravura era sa rogoca na itukutuku kei Jisu Karisito. E sega ni vakamelei rawa na cakayaco ni nona bula ena ivolatukutuku ni kawatamata. Na ivolanivula mada ga e vakayagataki ena levu na vanua e veiyasa i vuravura, e yavutaki ena yabaki a nanumi ni a sucu kina o Jisu. “Vuqa era vakatoka na veiyabaki ni bera oya me B.S.K., se bera ni sucu na Karisito,” e vakamacalataka na World Book Encyclopedia. “Ia, era vakatoka na veiyabaki e muri me S.K., se (sucu na Karisito).”

E laurai ni levu tale tu na vakasama cala me baleti Jisu. Vei ira e so, o Jisu e dua ga na turaga e kilai levu ena vuku ni veika e cakava ena nona gauna. So tale, era sokaloutaki koya me Kalou Kaukaua Duadua. So na imuri ni lotu Idu era vakatauvatani Jisu Karisito kei na nodra kalou o Krishna, era vakabauta e levu ni a liatamata mai. A dua beka ga na tamata o Jisu, se dua e dodonu me sokaloutaki? O cei dina o Jisu? A lako mai vei? Cava soti na itovo e kilai kina? Sa tu e vei edaidai? Ena sauma vakadodonu na veitaro oqori na ivola e vutucoqa kina na ivakamacala me baleti Jisu, me vaka eda na wilika ena ulutaga e tarava.