“E Dau Vukei Au o Jiova”

Era sa Mai Sokaloutaki Jiova na Lewe Vuqa

E TUKUNI ena veiparofisai vakaivolatabu e dusia na noda gauna, nira na gole mai na tamata mai na veimatanitu kece ina sokalou cecere i Jiova. Me kena ivakaraitaki, ena gusu i Akeai na parofita, e tukuna na Kalou o Jiova: “Ia ka’u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka’u na vakasinaita na vale oqo e nai ukuuku.” (Akeai 2:7) Erau parofisaitaka o Aisea kei Maika ni donuya na noda gauna​—“na gauna maimuri”​—era na sokaloutaki Jiova na veimatanitu kei ira na veimatatamata ena sala e vakadonuya.​—Aisea 2:2-4; Maika 4:1-4.

Vakaevei, e sa vakayacori dina tiko nikua na veiparofisai oqori? Meda raica ga na kena ivakadinadina. Ena loma ni tini na yabaki sa oti, e sivia ni 3,110,000 na tisaipeli vovou era yalataki ira vei Jiova era cavutu mai na 230 vakacaca na vanua. Kena ibalebale, ena veiya10 kece na iVakadinadina i Jiova era sokalou tiko nikua, e 6 era a papitaiso ena loma ni tini na yabaki sa oti. Ena 2004, me kena ivakatautauvata, e papitaiso e dua na dauveiqaravi vou ni Kalou me lewe ni ivavakoso vakarisito ena veiyarua na miniti!a

Nikua, me vaka ga ena imatai ni senitiuri, ‘era sa lewe vuqa sa ra vakabauta, a ra sa saumaki vua na Turaga.’ E dina ni sega ni rawa ni tukuni ni tubu wale ga ni iwiliwili e vakadinadinataka na veivakalougatataki i Jiova, ia e vakadeitaka mada ga ni tiko vata kei ira na nona tamata “na liga ni Turaga [o Jiova].” (Cakacaka 11:21) O cei e kumuni ira vata mai na vica na milioni oqo mera sokaloutaki Jiova? E tarai iko vakacava na tubu oqo?

Era Tataleitaki na Lomadina

E tukuna vakamatata o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” (Joni 6:44) Koya gona, o Jiova ga e vakayarayarataki ira mai na tamata era “sa vakarau tu me vinakata na bula tawa mudu.” (Cakacaka 13:48) Na yalo ni Kalou e rawa ni veiuqeti ina tamata mera kauaitaka na nodra gagadre vakayalo. (Maciu 5:3, NW) Na leqa ni lewaeloma, na vakasaqarai ni bula vakainaki, se na tatara ni leqa tubukoso, ena rawa ni uqeta e so mera vakasaqara na Kalou, era tini vulica kina na nona inaki me baleta na kawatamata.​—Marika 7:26-30; Luke 19:2-10.

Levu era taleitaka na sokaloutaki Jiova, baleta e vukei ira na porokaramu ni veivakavulici ena iVolatabu e dau vakayacori ena loma ni ivavakoso vakarisito me sauma na nodra lomatarotaro.

“Ke tiko dina na Kalou, na cava eda sotava tiko ga kina na veika tawadodonu?” Oqo na taro e vakavure vakasama vakalevu vei Davide, e dauvolitaki wainimate gaga mai Itali. E sega ni dau kauaitaka o Davide na veika vakayalo, ia a taroga na taro dredre oqori me vakavu veiba kina. “Au a sega ni namaka me na saumi vakavinaka na noqu taro, qai matata tale ga,” e kaya. “Ia, a yalovosovoso na iVakadinadina a vosa vei au qai yavutaka na nona ivakamacala ena nona wilika na kena veitikinivolatabu. E tarai au sara ga vakabibi na neirau veitalanoa.” Nikua, e sa veisautaka o Davide na nona bula qai qaravi Jiova tale ga.

So era vakayarayarataki mai ina isoqosoqo i Jiova baleta nira vinakata me vakainaki na nodra bula. E dua na marama e vuniwai ni vakasama e Zagreb, mai Croatia, a lai sikovi nona itokani rogo e vuniwai tale ga, me lai qara kina na iwali ni veilecayaki ni nona bula. Kurabui na marama oqo ni solia vua o nona itokani na naba ni talevoni ena valenivolavola ni tabana ni iVakadinadina i Jiova e Zagreb, vaka kina na yaca ni dua na iVakadinadina e kila o nona itokani. “Raica,” e kaya o nona itokani, “Au vakabauta nira na rawa ni vukei iko. Kevaka au talai iko e valenilotu, o na raica ga kina na matakau​—era vakadigagalu tu, qai butobuto na ka kece. Au sega ni vakabauta ni rawa nira vukei iko. Au sa tala oti e so na tauvimate vei ira na iVakadinadina i Jiova, au kila ni na vinaka tale ga vei iko.” Erau a marau me rau sikova na marama oqo e dua na veiwatini iVakadinadina, sega ni dede sa tekivu sara me vuli iVolatabu. Ni oti ga e vica na macawa, e marau na marama oqo me tukuna ni nona mai kila na loma ni Kalou e sa mai vakainaki kina na nona bula.​—Dauvunau 12:13.

Ena gauna e tatara kina na leqa tubukoso, e levu era kunea ni vakacegui ira dina na nodra mai vulica na ka dina ena iVolatabu. Mai Kirisi, a lutu mai na delavuvu ni nona koronivuli e dua na gonetagane yabaki vitu, e mate sara kina. Ni oti e vica na vula, erau a sotavi tinana e rua na iVakadinadina rau qai wasea vua na inuinui ni veivakaturi ena nodrau vinakata me rau vakacegui koya. (Joni 5:28, 29) A sega ni tarova rawa na marama oqo na nona tagi. Rau mani tarogi koya na tacida yalewa: “Ke oni via kila e so tale na ka mai na iVolatabu, na gauna cava me keirau sikovi kemuni tale mai kina?” “Gauna sara ga oqo,” a sauma o koya. Sa qai kauti rau ina nona vale, qai tekivu sara na vuli iVolatabu. Nikua, eratou sa qaravi Jiova kece tiko na nona vuvale.

O sa Vakaitavi Tiko?

Na ivakaraitaki vaka oqo e dusia na ka e yaco tiko e veiyasa i vuravura. O Jiova e sa kumuni ira tiko na dauveiqaravi dina era gole mai na veimatanitu, qai vakavulici ira tale tiko ga. Era nuitaka na ilawalawa levu oqo mera na bulata yani na icavacava ni ituvaki ca kei vuravura oqo, ra qai bula ena vuravura vou ni yalododonu.​—2 Pita 3:13.

Ena veivakalougatataki ga i Jiova, e sa voleka ni vakacavari vinaka kina na cakacaka levu oqo ni kumukumuni. (Aisea 55:10, 11; Maciu 24:3, 14) O sa vakaitavi tiko vagumatua ena kena kacivaki na itukutuku vinaka ni Matanitu ni Kalou? Ke vaka kina, o rawa ni nuitaka na veivuke ni Kalou qai cavuta na nona vosa na daunisame: “E dau vukei au o Jiova.”​—Same 121:2, NW.

[iVakamacala e ra]

[Tikina bibi ena tabana e 9]

“E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.”​—JONI 6:44

[Kato ena tabana e 8]

O CEI E VAKAVUNA TIKO NA TUBU OQO?

“Kevaka sa sega ni tara na vale ko Jiova, era sa oca wale ko ira era sa tara.” ​—Same 127:1.

“Na Kalou ga sa vakatubura. Sa qai ka wale kina ko koya sa tea, kei koya sa vakasuasuataka; ia sa levu duaduaga na Kalou, o koya sa vakatubura.”​—1 Korinica 3:6, 7.