Yaga na iTovo Vinaka

ENA dua na yanuyanu lailai volekata na baravi ni ceva kei Japani, ratou sa vuli iVolatabu tiko kei ira na iVakadinadina i Jiova e dua na tina kei na tolu na luvena lalai. O ira na tiko tikivi iratou ena vanua ribayawa oqo era dau cata na veisau, era dau galuvi tinadratou ena gauna era raici koya kina nira kila ni sa vuli iVolatabu tiko. “Na ka e mositi au na nodra dau raimatalevutaki watiqu kei ratou na gone,” e kaya. Ia, e tukuna ga vei iratou na luvena: “Tou na dau kidavaki ira tiko ga na tiko tikivi kedatou baleta ni datou qaravi Jiova tiko.”​—Maciu 5:47, 48.

E dau vakavulici iratou na gone e vale me ratou itovo vinaka, dina ga ni ratou na sega ni taleitaki. Ratou dau gade ina vanua ni tobu waikatakata. Dua gona na gauna ratou se baci gade kina ratou sa vakatovotovotaka sara na gone ena loma ni motoka na nodratou vosa ni veikidavaki. Ni ratou se qai curu ga yani ena vanua oqo ratou sa kaya na gone ena marau, “Konnichiwa!”—⁠“Bula vinaka!” Eratou sega ni cegu na kidavaki ira kece eratou sota kaya, dina ga nira sega ni dau kauai kina o ira na tiko tikivi iratou. Ia, e so era raica rawa na nodratou itovo vinaka na gone.

Kena itinitini ga, e dua ratou tiko veitikivi kei na dua tale erau sauma mai “Konnichiwa.” Ni oti e rua na yabaki, era sa dau sauma mai na veikidavaki o ira na tiko tikivi iratou. Sa bau yaco tale ga na gauna mera sa dau veikidavaki vakataki ira, ra qai veikauaitaki sara. E via vakacaucautaki iratou sara ga na gone na ivukevuke ni turaganikoro baleta ni ratou vakavuna na veisau oqori. Ia, e qai vakaraitaka vua o tinadratou ni oqori e nodra itovo ga na lotu Vakarisito. E muri, ena dua na veisisivi vosa ena yanuyanu oya, a qai vakamacalataka kina e dua vei iratou na gone ni tuberi iratou o tinadratou me ratou dau kidavaki ira tiko ga na tamata veitalia ke ra sega ni kauai. E nona kina na imatai ni icovi qai tabaki ena niusiveva na nona vosa. Nikua, eratou marau vakavuvale ni yaga dina na nodratou muria na ivakavuvuli vakarisito me vaka a yaco oya. Io, e dau rawarawa sara na tukuna na itukutuku vinaka kevaka era dau veikauaitaki na tamata.