Amaketoni​—E iTinitini Vakadomobula Beka?

AMAKETONI! Na cava e votu ena nomu vakasama ni o rogoca na vosa oqo? Ena vakarusai beka kina na ka kece, se na kamayavu na noda vuravura? Vei ira na vosa ni iVolatabu era sa vakayagataki tu nikua, e dau vakayagataki vakalevu duadua ena vuqa na vanua na vosa “Amaketoni.” E vakayagataki vakalevu na vosa oqo me vakamacalataka na ituvaki vakaloloma e nanumi ni sa na vakarau sotava na kawatamata. O ira na dau caka iyaloyalo era sa vakavuna mera nanuma e levu ni “Amaketoni” sa roro voleka mai, ena yaco kina na veika vakarisekete qai vakadomobula. Sa sega ni matata na ibalebale dina ni vosa oqo ena levu ni kena itukutuku veivakacalai kei na vakasama cala. Dina ni levu vaka oqori na ka e nanumi me baleta na Amaketoni, ia e levu vei ira na nanuma oqo e veisaqasaqa kei na ka e vakatavuvulitaka na iVolatabu​— na vanua e vu mai kina na vosa oqo.

Na iVolatabu e dau cavuta vata na Amaketoni kei “nai vakataotioti kei vuravura.” Ke sa vakaoqori, sega li ni bibi meda kila na cava na ibalebale dina ni vosa oya? (Maciu 24:3) Sega beka ni ka vakayalomatua meda rai ga ina Vosa ni Kalou, na ivurevure ni ka dina, meda kila kina na ibalebale dina ni Amaketoni? Ena tarai iko vakacava kei na nomu vuvale na nomu kila na veika oqo?

Ke o dikeva na Vosa ni Kalou o na raica ni vosa Amaketoni e sega ni vakaibalebaletaka na itinitini vakadomobula, ia e dusia na itekitekivu ni gauna marautaki vei ira era gadreva mera bula ena vuravura vou ni yalododonu. O na kila vakamatata na ka dina bibi oqo mai na iVolatabu ke o dikeva na ibalebale dina ni vosa na Amaketoni ena ulutaga e tarava.

[Kato/iYaloyalo ena tabana e 3]

CAVA O NANUMA ME BALETA NA AMAKETONI?

• E ivalu vakaniukilia

• Leqa vakaitamera e kawaboko kina na iyaubula kece

• Coqa ni vuravura kei na dua tale na kalokalo mai lomalagi

• Nona vakarusai ira na tamata ca na Kalou