Olodei ni Kirisimasi kei na Vakatawase​—O na Lomavakacegu Beka Kina?

“A vakarota o Tui Pita [na Ka Levu] me vakayacori na lotu ni vakatawase ena veivalenilotu kece ena 1 Janueri. Kuria oya ena nona vakarota me ukutaki na matanikatuba ni veirumu ni vale ena tabanikau drokadroka. A vakarota tale ga vei ira kece na lewenivanua e Moscow mera ‘vakaraitaka na nodra mamarau ena nodra kacivaka ena domoilevu na nodra vakanuinui vinaka’ ni sa tawase na yabaki.”​—Peter the Great—⁠His Life and World.

NA CAVA o namaka ena olodei ni Kirisimasi kei na vakatawase? Nodra rai e lewe vuqa e veiyasa i vuravura ni vakabibitaki ena olodei oqo na siga ni sucu i Karisito, kei na kena marautaki na yabaki vou. Ra nanuma ni gauna vinaka ni gade ni balavu toka na gauna ni olodei. Era na cegu tu na itubutubu mai na nodra cakacaka ra qai sereki na gonevuli, e sega gona ni vakabekataki ni oqo e dua na gauna vinaka mera veimaliwai kina vakavuvale. Ia, e so era raica na olodei oqo me “gauna ni Kirisimasi,” nira vinakata me vakabibitaki ga kina na sucu i Karisito. De vakatale ga oqori na nomu rai me baleta na bibi ni olodei oqo.

Ia, se mani vakarokorokotaki kina o Karisito, se gauna ni veimaliwai vakavuvale, se vakayacori ruarua kina na ka oqo, e macala ni vica vata na milioni na tagane vakawati, na yalewa vakawati, kei ira na gone era dau nanamaki kina. Vakacava ena yabaki oqo? Ena yaco beka me gauna lavotaki ina matavuvale, se lavotaki vua na Kalou? Ke mani dou soqo vakaveiwekani, o na lomavakacegu beka kina se na vakatuburarawa vei iko?

E levu era namaka me vakayacori ena solevu oqo na veika vakalotu, ia era raica ni sala e marautaki kina na Kirisimasi kei na vakatawase e sa yawakalia dina mai na yalo i Karisito. Sa olodei ga me caka kina na soli iloloma, e ulubale vinaka me ia kina na caka soqo e salavata kei na itovo e beci kina o Karisito, se rawa kina na soqovata vakaveiwekani. Ia, vakavuqa me dau tini ca, ni dua se vica na lewenivuvale oqo era na kana se gunu vakasivia qai rawa ni tekivu kina na veileti, e dau lai tini sara ina nodra veivala vakaveiwekani. De dua o sa raica, se yaco sara ga ena nomu bula.

Ke vaka kina, o na rairai nanuma ni se tautauvata vinaka sara tu ga na gauna i Pita na Ka Levu, na tui kei Rusia e cavuti ena imatai ni parakaravu ni ulutaga oqo, kei na noda gauna. Ia, e levu e votivoti vei ira na iwalewale ni kena marautaki na olodei ni Kirisimasi kei na vakatawase nira vinakata me gauna ni vakasama titobu vakalotu kei na veimaliwai e yaga vakavuvale. E so gona era sasagataka vakaukaua me veisautaki na ivalavala ni kena marautaki vakalialia na gauna ni solevu oqo, ena nodra kacivaka tiko na vakasama me nanumi o Jisu ena gauna ni marau oqo. Ia, e rawa beka na veisau? E rawa beka ni rokovi kina o Karisito? E tiko beka e so tale na vuna vinaka me duidui kina na noda rai me baleta na gauna ni marau oqo?

Meda kunea na isaunitaro e rawa ni vakaceguya na yaloda, da dikeva mada na nodra rai na lewe ni dua na matanitu me baleta na vuna era marautaka kina na olodei ni Kirisimasi kei na vakatawase.