Bula Sautu ena Vuravura Vou ni Kalou

O TEVITAa e dua na tama lotu Vakarisito. A lako i Mereke ena nona nuidei ni oqo na sala vinaka ena vukei iratou kina na nona vuvale. A sega ni vinakata o Tevita me biuti iratou tu mai na nona veitinani, ia a vakadeitaka o koya ke levu nona ilavo ena rawa ni toroya cake na ivakatagedegede ni nodratou bula vakavuvale. Mani lako o Tevita i Niu Yoka ena nodra veisureti na wekana, qai sega ni dede sa kunea sara e dua na nona cakacaka.

Ia, ni toso na gauna sa vaka me seavu na nona vakanuinui o Tevita. Sa lailai na gauna me cakava kina na veika e vauca na nona bula vakayalo. A voleka sara mada ga ni kasa na nona vakabauta na Kalou. A qai kidava o Tevita na ituvaki leqataki sa tu kina ni sa rawai ena itovo vakasisila. Nona vakaliuca na qarai ni bula vutuniyau e sa vakamuai koya tani mai na veika e bibi dina ena nona bula. E sa dodonu vua me cakava e so na veisau.

Me vakataki Tevita, e levu era biuta na nodra vanua dravudravua e veiyabaki mera lako ina dua tale na vanua ena nodra nuitaka ni na vinaka cake kina na nodra bula vakailavo. Ia, vuqa na gauna ena tini vakaleqai ga kina na nodra bula vakayalo. So gona era na rairai taroga, ‘E rawa beka vua e dua na lotu Vakarisito me vakaliuca na qarai ni iyau, ia, ena gauna vata oya me vutuniyau tale ga ena ka ni Kalou?’ Era kaya na dauvolaivola kilailevu kei ira na italatala ni rawa nida cakava vaka kina. Ia e vakadinadinataka o Tevita kei ira e lewe vuqa tale ni rawa nida vakaliuca ga e dua na ka, na qarai ni iyau se na noda saga meda vutuniyau ena ka ni Kalou.​​—Luke 18:24.

Sega ni Ca na iLavo

Na ilavo e dua na ka e bulia ga na tamata. Ia, me vaka na veika tale e so e bulia na tamata, e tu na kedra yaga. Na ilavo e rawa kina na veivoli. Ni vakayagataki gona vakadodonu ena yaga ena noda bula. Me kena ivakaraitaki, na iVolatabu e tukuna ni “sai vakaruru nai lavo,” vakauasivi ni rawa ni walia na veileqa e vu ena vuku ni dravudravua. (Dauvunau 7:​12) Vei ira e so na tamata, e sega ni vakabekataki nira raica ni “[i]lavo ga sa rawa kina na ka kecega.”​​—Dauvunau 10:19.

Na iVolatabu e cata na vucesa, ia e uqeta na cakacaka vakaukaua. E dodonu gona meda cakacakataka na veika mera bula kina na noda vuvale yadua, ke levu na ka eda sa rawata, e rawa nida “soli[a] vei koya sa dravudravua.” (Efeso 4:​28; 1 Timoci 5:8) Kuria, na iVolatabu tale ga e sega ni tukuna meda vakuai keda mai na veika kece, ia e vakauqeti keda meda rekitaka na veika eda taukena. E tukuna vei keda meda ‘taura na noda ivotavota’ qai rekitaka na vua ni noda cakacaka. (Dauvunau 5:​18-​20) E koto ena iVolatabu e vica na ivakaraitaki ni turaga kei na marama yalodina era a vutuniyau.

O Ira na Turaga Yalodina Era Vutuniyau

E dua na turaga yalodina ni Kalou o Eparama. A vutuniyau ena manumanu yavaiva, siliva, koula, ra qai le vica na drau na nona dauveiqaravi. (Vakatekivu 12:5; 13:​2, 6, 7) A vutuniyau tale ga na turaga yalodina o Jope. Levu na ka e taukena​​—era tu na nona dauveiqaravi, bini nona manumanu yavaiva, na koula, kei na siliva. (Jope 1:3; 42:​11, 12) Erau turaga vakavatu ena nodra rai sara mada ga na tamata ena gauna oqo, ia erau a vutuniyau tale ga ena ka ni Kalou.

Na yapositolo o Paula a vakatokai Eparama “me tamadra kecega era sa vakabauta.” A sega ni turaga mamaqi o Eparama qai sega tale ga ni lomana vakalevu na veika vakayago e taukena. (Roma 4:​11; Vakatekivu 13:9; 18:1-8) Na Kalou e vakamacalataki Jope me “tamata yalododonu ka daucaka dodonu.” (Jope 1:8) E dau tu vakarau o Jope me vukei ira na dravudravua kei ira na vakaloloma. (Jope 29:​12-​16) Erau a vakararavi o Eparama kei Jope vua na Kalou, rau a sega ni vakararavi ina nodrau iyau.​​—Vakatekivu 14:​22-​24; Jope 1:​21, 22; Roma 4:​9-​12.

E dua tale na kena ivakaraitaki o Tui Solomoni. Ni taura tiko o koya na itutu ni veiliutaki ni Kalou e Jerusalemi, a vakalougatataki koya kina na Kalou ena vuku, iyau kei na lagilagi. (1 Tui 3:​4-​14) A yalodina tu o Solomoni vua na Kalou ena dua na iwase levu ni nona bula. Ia ni sa qase, a “sega ni dodonu na yalona vei Jiova na nona Kalou.” (1 Tui 11:​1-8) Na veika rarawa a qai sotava e vakaraitaka ni tiko e so na ka e rawa ni veicoriti kina na vutuniyau. Dikeva mada e vica.

Rawa ni Veicoriti na Vutuniyau

Na leqa rerevaki e rawa ni yaco, oya na kena lomani na ilavo kei na veika e rawa ni volia. Na vutuniyau e rawa ni vakavuna vei ira e so me sega ni mamau na yalodra. O Solomoni a siqema na leqa oqo vei ira na tani ni se qai tekivu veiliutaki. A vola: “O koya sa lomana na siliva ena sega ni mamau e na siliva; se ko koya sa lomana nai yau e na kenai kuri: oqo talega na ka wale.” (Dauvunau 5:​10) E muri o rau tale ga o Jisu kei Paula erau a vakaroti ira na lotu Vakarisito ena ca ni noda lomana na ilavo.​​—Marika 4:​18, 19; 2 Timoci 3:2.

Kevaka eda sa tekivu lomana na ilavo, da sega ni raica me ka e rawa ga kina na toso, ena rawarawa sara nida rawai ena so na ivalavala me vaka na lasu, butako, kei na veivakaisini. A rawai o Jutasa Isikarioti, e dua na yapositolo i Karisito, ni a volitaki nona turaga ena 30 wale ga na tiki ni siliva. (Marika 14:11; Joni 12:6) Vei ira e so na tamata, na nodra lomana vakasivia na ilavo era sa lai tini sokaloutaka kina, sa sega nira sokaloutaka na Kalou. (1 Timoci 6:​10) E dodonu gona vei ira na lotu Vakarisito me dau donu na inaki ni nodra qarai ilavo.​​—Iperiu 13:5.

Na sagai ni vutuniyau e vakavurea tale ga e so na leqa e sega soti ni laurai levu. iMatai, ni dua e levu na nona iyau ena uqeti koya me nuitaki koya ga. A okata oqori o Jisu ena nona tukuna “nai yau e dauveivakaisini.” (Maciu 13:22) Na dauvola iVolatabu o Jemesa, a vakaroti ira na lotu Vakarisito mera kua ni guilecava na Kalou ena gauna mada ga era lalawataka kina nodra veika vakabisinisi. (Jemesa 4:​13-​16) Ni dua e vakailavo e macala ni sega ni dau vakararavitaka na nona bula vua e dua tale. O koya gona, vei ira era vakailavo, e dodonu mera qaqarauni ni rawa nira nuitaka ga na nodra ilavo, ra sega ni nuitaka na Kalou.​​—Vosa Vakaibalebale 30:​7-9; Cakacaka 8:​18-​24.

Kena ikarua, me vaka e vakadinadinataka o Tevita, na turaga a cavuti ena itekivu ni ulutaga oqo, ni vakavuqa na qarai ni iyau e kania vakalevu na nona gauna kei na nona kaukaua e dua, qai yaco me vakamuai koya tani vakamalua mai na nona saga na veika vakayalo. (Luke 12:​13-​21) Ia vei ira na vutuniyau, e rawa ni temaki ira ga na nodra iyau ena nodra vakayagataka me vakaliuci kina na ka ni veivakamarautaki se na veika era dau taleitaka.

De dua e rawa ni tukuni ni dua na ka e rairai vakavuna na nona mate vakayalo o Solomoni, oya na nona bula vutuniyau, e lai tini sosovu kina vakayalo. (Luke 21:34) A kila vinaka tu o koya ni vakatabuya na Kalou na vakawati kei ira na kai matanitu tani. Ia, a yaco me vakawatitaka e le duanaudolu vakacaca na yalewa. (Vakarua 7:3) Nona vinakata me vakalomavinakataki ira na watina era kai tani, sa qai saga o Solomoni me tuvanaki na ivalavala ni lotu veicurumaki ena vukudra. Me vaka sa cavuti oti mai, ni toso na gauna a goletani mai vei Jiova na yalo i Solomoni.

E macala gona ena veivakaraitaki oqori ni dina sara ga na ivakasala i Jisu: “Dou sa sega ni qarava rawa na Kalou kei nai yau.” (Maciu 6:​24) Era na walia rawa vakacava na lotu Vakarisito na leqa ni bula vakailavo e sotavi tu vakalevu nikua? O koya e bibi sara, na inuinui cava sa tu oqo e liu me baleta e dua na bula e vinaka cake?

Sa Voleka na Bula Sautu

Erau a sega ni vakataki ira na imuri i Jisu na peteriaki o Eparama kei Jope, vaka tale ga kina na matanitu o Isireli. Nira a vakaroti mera ‘qisi ira mera nona tisaipeli na leweniveivanua kece ga.’ (Maciu 28:​19, 20, VV) Mera vakayacora na ivakaro oqori ena gadrevi kina na gauna kei na igu, o koya e rawa nira lai vakamaumautaka tu ena qarai ni veika ga vakayago. Ia, na ka bibi taudua e rawa nida cakava me yaga kina na noda bula, oya na noda muria na ka e tukuna o Jisu: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo.”​​—Maciu 6:​33.

A voleka sara ga ni kavoro na vuvale i Tevita, voleka tale ga ni leqa na nona bula vakayalo, ia a vuli mai na nona malumalumu qai vakadodonutaka na nona ilakolako. Me vaka ga e yalataka o Jisu, ni vakaliuca tale o Tevita ena nona bula na vulici ni iVolatabu, masu, kei na cakacaka vakaitalatala, a vakila ni sa muadonu tale na nona bula. Yaco na gauna me vinaka tale na nodratou veimaliwai vakavuvale. A vakila tale o koya na marau kei na lomavakacegu. Dina ni a sega ni yaco me vutuniyau o Tevita, ia e se cakacaka tiko ga vakaukaua me qarava na nona vuvale. A vulica kina e so na lesoni bibi ena vuku ni veika rarawa a sotava.

A vakatitiqataka o Tevita na yaga ni nona vakatulewataka me lako i Mereke, mani vakadeitaka e lomana ni na sega vakadua ni laiva na vakaliuci ni ilavo me lewa na nona vakatulewa. Sa qai kidava ni veika bibi duadua ena nona bula​​—na vuvale veilomani, itokani vinaka, vaka kina nona veiwekani kei na Kalou​​—ena sega ni volia rawa na ilavo. (Vosa Vakaibalebale 17:17; 24:27; Aisea 55:​1, 2) Io, e talei cake na itovo vakalou mai na vakaiyau. (Vosa Vakaibalebale 19:1; 22:1) A vakadeitaka gona o Tevita kei na nona vuvale me ratou vakaliuca ga ena nodratou bula na ka e dodonu me liu.​​—Filipai 1:​10.

E dreve na nodra sasaga na tamata mera tauyavutaka na ivakarau ni bula era na vakila kina na lewe i vuravura na bula vutuniyau, ia me vakalou tale ga na nodra itovo. E yalataka na Kalou ni nona Matanitu ga ena qai vakarautaka vei keda e levu sara na veika vakayago kei na veika vakayalo ena gadrevi meda bula vinaka kina. (Same 72:16; Aisea 65:​21-​23) O Jisu a vakavulica ni dodonu meda kauaitaka noda bula vakayalo ke da vinakata meda bula marau dina. (Maciu 5:​3, NW) Se o mani vutuniyau se o dravudravua, nomu vakaliuca ena gauna oqo na veika vakayalo e sala uasivi duadua eda vakarautaki keda kina ina vuravura vou ni Kalou sa roro voleka mai. (1 Timoci 6:​17-​19) Era na vakila o ira na bula kina na bula sautu vakayago, vakayalo tale ga.

[iVakamacala e ra]

[iYaloyalo ena tabana e 5]

O Jope a vakararavi vua na Kalou, a sega ni vakararavi ina nona iyau

[iYaloyalo ena tabana e 7]

Na ilavo ena sega ni volia rawa na veika bibi duadua ena noda bula