Na Rai ni iVolatabu

Na Cava na Domodomoiyau?

E DA sucukaya mai na kawatamata meda galeleta na veika vakayalo kei na qaravi Kalou. Ia, nida a buli mai na veika vakayago, e sa macala ga nida na galeleta na veika vakayago. E so gona na lotu Vakarisito era vakavatu. Oqo beka e ivakaraitaki ni domodomoiyau kei na lekati ni veika vakayalo? Ena yasana kadua, e kena ibalebale beka oqo nira sega ni domodomoiyau o ira na dravudravua qai rawarawa cake mera kauaitaka vakalevu na veika vakayalo?

Sega ni vakabekataki ni o na duavata kei na vakasama ni domodomoiyau e sega ni levu ga ni iyau se veika vakayago e taukena e dua. Dikeva sara mada e so na ivakaraitaki vakaivolatabu e vakamacalataka se cava na domodomoiyau kei na sala e rawa ni valuti kina me kua ni vakaleqa na bula vakayalo.

Era Taukena na iYau kei na Vakarokoroko

Ena gauna vakaivolatabu e so na dauveiqaravi yalodina ni Kalou era a taukena na iyau kei na vakarokoroko. Me kena ivakaraitaki, o Eparama a turaga vutuniyau “e na manumanu e yavai va, e na siliva, kei na koula.” (Vakatekivu 13:2) O Jope tale ga e dua a kilai ni uasivi cake “mai vei ira kecega na lewe ni vanua mai na tu-i-cake” baleta ni levu na nona qelenimanumanu kei na nona ilawalawa dauveiqaravi. (Jope 1:3) O ira na tui kei Isireli, me vakataki Tevita kei Solomoni, e vakaitamera na nodrau iyau.​—1 Veigauna 29:1-5; 2 Veigauna 1:11, 12; Dauvunau 2:4-9.

Era a lewe tale ga ni ivavakoso ena imatai ni senitiuri o ira na lotu Vakarisito vutuniyau. (1 Timoci 6:17) A vakatokai o Litia na marama “ni koro ko Ceataira . . . e dua na dau volitaki i sulu lokaloka, ka dau qarava na Kalou.” (Cakacaka 16:14, VV) E dau saulevu na iboro lokaloka kei na isulu e rokataki kina, qai daumaroroi ga vakalevu me nodra na vakaitutu cecere se vutuniyau. O koya gona, e kena irairai ni o Litia a bau dua toka na marama vutuniyau.

Me kena veibasai, ena gauna vakaivolatabu e so vei ira na dauveiqaravi yalodina i Jiova era dravudravua sara. E so na vuvale era dravudravua baleta nira vakaleqai ena leqa tubukoso, vakacalaka, kei na mate. (Dauvunau 9:11, 12) Ena rairai dredre toka vei ira era gadreva tu na veika vakayago mera raica ni so era marautaka na iyau se na veika vakayago era taukena! Ia, e cala ke da via lai lewa da qai kaya nira domodomoiyau o ira e levu nodra iyau se da kaya ni o ira e sega soti na nodra iyau era qarava tiko na Kalou mai vu ni lomadra. Cava na vuna? Dikeva mada se cava e vu dina ni domodomoiyau.

Lomana na iLavo

E vakamacalataka e dua na ivolavosa ni domodomoiyau “na kena vakaliuci se vakabibitaki na ka vakayago mai na ka vakayalo.” Oya, me yaco na domodomoiyau me sa uto sara ga ni noda gagadre, na veika eda vakaliuca, kei na veika eda vakabibitaka ena noda bula. Ena vakamatatataki vinaka oqo ena rua na ivakaraitaki vakaivolatabu e tarava.

O Jiova a vakasalataka vakaukaua na vunivola i Jeremaia, o Peruki. E rairai a dravudravua o Peruki ena vuku ni ituvaki e Jerusalemi kei na nona veiwekani voleka kei Jeremaia, na turaga e sega ni dau taleitaki vakalevu. Dina ni vaka oya, e se kaya ga o Jiova: “Ko iko ko sa dauqara beka eso na ka levu me nomu? mo kakua ni dauqara.” Rairai sa tekivu bucina na domodomoiyau o Peruki ni sa lai kauai vakalevu ina nodra iyau se na veika vakayago era taukena na tani. E mani kaya kina vei Peruki o Jiova ni na vakabulai koya mai na veivakarusai sa vakarau yacovi Jerusalemi, ia ena sega ga ni taqomaka na nona iyau.​—Jeremaia 45:4, 5.

A cavuta o Jisu e dua na vosa vakatautauvata me baleta e dua na turaga a kauaitaka tale ga vakalevu na qarai ni veika vakayago. A bibi vua na turaga oqo na nona iyau, sega ni nona vakayagataka na veika e taukena me vakalevutaka kina na nona veiqaravi vua na Kalou. A kaya na turaga vutuniyau: “Au sa basuka na noqu lololo, ka tara tale eso e lelevu . . . au na qai kaya ki na yaloqu, Yaloqu, sa levu na nomui yau sa bini tu ena rauta na yabaki e vuqa; mo vakacegu mada, mo kana, mo gunu, mo marau tiko.” E tomana o Jisu: “Ia sa kaya vei koya na Kalou, Ko iko na lialia! e na bogi ga oqo ena tarogi tale vei iko na yalomu: ena qai nei cei na veika ko sa vakarautaka? Sa vakakina ko koya sa daubinia nai yau me nona, a sa sega ni vutuniyau e na ka ni Kalou.”​—Luke 12:16-21.

Na cava na inaki ni rua na ivakaraitaki oqo? E vukei keda meda raica ni dua e yaco me domodomoiyau e sega ni baleta ni levu na ka e taukena, ia baleta ga na nona vakaliuca na veika vakayago. E kaya na yapositolo o Paula: “Ko ira era sa gadreva me ra vutuniyau, era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa. Ni sa vu ni ka ca kecega na daulomana nai lavo: era sa daukocova eso, a ra sa vakacalai kina e na vakabauta, a ra sa cokai ira sara vakai ira e na yaluma vakavuqa.” (1 Timoci 6:9, 10) Na vu ni leqa oya na kena qarai na vutuniyau kei na lomani vakasivia ni veika vakayago.

Meda Dui Dikevi Keda

Meda qarauna na lotu Vakarisito meda kua ni coriti ena dai ni domodomoiyau se mani vakacava na ituvaki ni noda bula vakailavo. Na iyau e rawa ni dauveivakaisini qai vakaruguta tale ga na veika vakayalo. (Maciu 13:22) Nida sa vakabibitaka na veika vakayago mai na veika vakayalo, eda na sega ni vakila nida sa coriti, da mani tini sara ena leqa.​—Vosa Vakaibalebale 28:20; Dauvunau 5:10.

O koya gona, e ka vakavuku vei ira na lotu Vakarisito mera dikeva se cava era vakaliuca qai vakabibitaka ena nodra bula. Se mani lailai se levu na veika vakayago era taukena, era na saga na tamata matua vakayalo mera muria na veivakadreti i Paula mera kua ni vakararavi “e nai yau sa sega ni tu dei, vua ga na Kalou bula, o koya sa solia vakalevu vei keda na ka kecega eda marau kina.”​—1 Timoci 6:17-19.