Taro na Dauwiliwili
Ena vakacegui vakacava e dua era sagai koya na timoni?
E vakaraitaka na Vosa ni Kalou ni rawa nira vakacegui o ira e sagai ira tu na timoni. Dua na ikalawa bibi ni veivakacegui na daumasu. (Marika 9:25-29) Ia, e macala ni na gadrevi vua era dau sagai koya na timoni me cakava e so tale na ka. Na veika era a cakava na lotu Vakarisito ena imatai ni senitiuri e vakaraitaka na ikuri ni ka e rawa ni vakayacora.
E so e Efeso makawa era a dau vakatevoro ni bera nira imuri i Karisito. Ia, nira sa vakadeitaka mera qarava na Kalou “[o] ira era daukitaka eliu nai lawaki vakatevoro eso, era sa kumuna vata na nodrai vola, ka visa e na matadra kecega.” (Cakacaka 19:19) Na nodra vakarusa oya na nodra ivola ni vakatevoro o ira na vakabauta vou mai Efeso, era sa kotora kina e dua na ivakaraitaki vei ira era gadreva mera sereki mai na nodra veisagai na timoni nikua. Io, sa dodonu ga mera na vakarusa na iyaya kece e semati ena vakatevoro. Rawa ni okati e ke e so na noda iyau vakaviti e rawa ni idewadewa mai ni tevoro, ivola, ivoladraudrau, iyaloyalo, itukutuku era tu ena kompiuta, ivakatagi e curu tu kina na vakasama vakatevoro, vaka tale ga kina na qato se so tale na iyaya e dau tokari me itataqomaki se na kena e dau vakayagataki ena vakatevoro.—Vakarua 7:25, 26; 1 Korinica 10:21.
Ni oti e vica na yabaki nodra a vakarusa na nodra ivola ni vakatevoro na lotu Vakarisito mai Efeso, a vola na yapositolo o Paula: “[E]da sa . . . veivala . . . kei ira na veivavakoso yalo ca.” (Efeso 6:12) A uqeti ira gona na lotu Vakarisito, ena nona kaya: “Dou vakaiyaragi e nai yaragi kecega ni Kalou mo dou tu dei rawa ka vorata nai lawaki ni tevoro.” (Efeso 6:11) Na ivakaro oya e se yaga tiko ga me yacova mai nikua. Dodonu kina mera saga na lotu Vakarisito mera vaqaqacotaka na nodra isasabai vakayalo me rawa ni na taqomaki ira mai vei ira na yalo velavela. “Kenai ikuri,” e vakabibitaka o Paula, “dou kauta na vakabauta mei sasabai dou na bokoca rawa kina na gasau vidi kecega ni tevoro.” (Efeso 6:16) Ena vaqaqacotaka na nona vakabauta e dua ke vulica na iVolatabu. (Roma 10:17; Kolosa 2:6, 7) O koya gona, na vulici wasoma ni iVolatabu ena vukei keda meda bucina na vakabauta e vaka na isasabai ena viribaiti keda mai na nodra veivakasagai na yalo velavela.—Same 91:4; 1 Joni 5:5.
Ia, e dua tale na ikalawa bibi a vinakati mera cakava na lotu Vakarisito mai Efeso. E kaya vei ira o Paula: “Dou masu tikoga e na masumasu kecega kei na daukerekere e na Yalo Tabu.” (Efeso 6:18) Io, ena gauna oqo e bibi vei ira era vinakata mera galala mai na nodra veisagai na timoni, mera masulaka vagumatua na veitaqomaki i Jiova. (Vosa Vakaibalebale 18:10; Maciu 6:13; 1 Joni 5:18, 19) E veiganiti sara ga ni kaya na iVolatabu: “O koya mo dou qai vakamalumalumutaki kemudou vua na Kalou. Vorata na tevoro, ena dro tani kina vei kemudou ko koya.”—Jemesa 4:7.
E dodonu vua e dua era sagai koya na timoni, me masuta vagumatua na veivakacegui. Ia, o ira tale ga na lotu dina Vakarisito e dodonu mera masu ena vukudra era vinakata mera qaravi Jiova, ra qai sasaga tiko vakaukaua mera vorati ira na yalo velavela. O ira na lotu Vakarisito e rawa nira kerea na Kalou, mera vakaukauataki vakayalo o ira e vakararawataki ira tu na timoni, me rawa nira vorata kina na nona veivakasagai. Me vaka e kaya na Vosa ni Kalou ni “sa yaga vakalevu na nona masu gumatua na tamata yalododonu.” Na masu gona era cabora na tamata ni Kalou ena yaga vakalevu sara vei ira e vakararawataki ira tu na tevoro, ra qai saga tiko ena nodra igu mera ‘vorati’ koya.—Jemesa 5:16.
[iYaloyalo ena tabana e 31]
O ira na vakabauta mai Efeso era a vakarusa na nodra ivola ni vakatevoro