O Rawa ni Kunea na Marau Dina

ERA kaya e so ni dau kunekunei dredre na marau dina. Na vuna ni levu era rai ina vanua ena sega ni kune dina kina. Era diva me dua na nodra itokani nuitaki ena rawa ni dusimaki ira!

Na iVolatabu gona e ivurevure nuitaki ni veidusimaki oya. Dikeva mada na ivola na Same. Na ivola oqo era tu kina e 150 na sere e vakalagilagia na Kalou o Jiova, rauta ni veimama a bulia o Tevita, na tui e Isireli makawa. E sega ni bibi meda kila se o cei soti era vola na ivola oqo, e bibi ga meda kila ni o Jiova​​—na iTokani vinaka duadua ni kawatamata​​—a vakavuna na kena volai. Eda nuidei ni tiko kina na ivakasala vakalou e yaga vei keda, qai dusimaki keda tale ga ina bula marau.

Era kila deivaki o ira na vola na Same ni noda veiwekani vinaka kei na Kalou ena kauta mai na marau dina. A vola na daunisame: “Sa kalougata [“marau,” NW] na tamata sa rerevaki Jiova.” (Same 112:1) Na marau e kune ena noda veimaliwai kei ira na noda itokani, se na kena taukeni na iyau, se na veika eda dui rawata, e sega ni vakatauvatani rawa kei na marau dina e vu mai na noda okati kei ira “sa nodra Kalou ko Jiova.” (Same 144:15) E levu nikua era sa vakadinadinataka na tikina oqo.

Dua na kena ivakaraitaki o Susanne, sa yabaki 40 vakacaca.a E kaya: “Nikua, e levu era lewena e so na isoqosoqo baleta ni tautauvata na ka era taleitaka se na nodra tokona e dua na sasaga. Ia era sega ni dau okati ira kece ena isoqosoqo oya mera itokani. E duidui o keda na tamata i Jiova. Na noda lomani Jiova e vakavuna tale ga na noda veilomani. Ena vanua cava ga eda tiko kina eda vakila na vakacegu nida maliwai ira na tamata ni Kalou. Na noda duavata e vakavinakataka sara ga na noda bula. E rawa kina meda veitokani kei ira e duidui na ivakatagedegede ni nodra bula, e duidui na nodra isususu, e duidui tale ga na vanua era cavutu mai kina. Au vakabauta dei nida na kunea na marau dina nida yaco meda tamata i Jiova.”

A vulica tale ga o Maree, a sucu e Sikoteladi, ni bibi me vinaka na noda veiwekani kei na Kalou kevaka meda na kunea na marau dina. E kaya: “Ni se bera niu vulica na ka dina ena iVolatabu au dau taleitaka na sarava na iyaloyalo rerevaki. Ia au na moce rawa ga ena bogi keu taura tiko na kauveilatai me taqomaki au mai vei ira na yalovelavela kei na ka lasutaki na vampire, era dau vakaraitaki ena levu na iyaloyalo au sarava. Ia, ena gauna au vulica kina na dina, au sa sega tale ni qai sarava na mataqali iyaloyalo vaka oya, e vukei au na noqu veiwekani kei Jiova meu moce ena vakacegu, au marau niu qarava na Kalou e kaukaua cake sara vei ira na timoni se vei ira na vampire.”

Tini ena Marau na Nuitaki Jiova

Eda sega ni lomalomaruataka ni tu vua na Dauveibuli na kaukaua kei na vuku tawavakaiyalayala. Nona kila o Tevita ni rawa ni nuitaki Jiova vakaoti, e rawa tale ga ni vakararavi vua, a vola kina: “Sa kalougata [“marau”] na tamata sa dauvakararavi vei Jiova.”​​—Same 40:4.

E kaya o Maria: “Au raica ena veika au sotava mai Sipeni kei na veivanua tale e so ni dau vuavuaivinaka sara na ka eda cakava nida muria na sala i Jiova, dina ga ni duatani na ka eda nanuma meda cakava. Oqo e kune kina na marau baleta na sala i Jiova e vinaka duadua.”

O Andreas, e dua na qase ni ivavakoso sa veiqaravi ena vica na vanua e Urope, e kila tale ga mai na veika e sotava ni rawa nida vakararavi vei Jiova. E kaya: “Keirau sega ni vakabauta vata kei tuakaqu. Niu se cauravou a dau vakauqeti au meu qara na cakacaka e rawati kina e levu na ilavo. Dua na ka nona rarawa niu sa cakacaka vakaitalatala vakatabakidua, de dua e nanuma niu na calata e levu na ka vinaka e dau rawati ena cakacaka saumi. Ena noqu veiqaravi tiko vakatabakidua, se sega vakadua meu leqataka na veika vakailavo, au vakila ga na veivakalougatataki era diva tu e levu.”

Ena 1993, a sureti o Felix me veivuke ena kena vakalevutaki na valenivolavola ni tabana ni iVakadinadina i Jiova e Selters, Jamani. Ni sa oti na tarataravaki, a sureti sara me lai lewenivuvale e Peceli. A vakacava beka nona rai? E tukuna: “Au ciqoma, dina ga niu lomalomarua vakalailai. Ia, sa voleka oqo ni tini na yabaki na noqu tiko e ke, au kila ni sauma noqu masu o Jiova. E kila o koya na ka e vinaka vei au. Niu vakararavi vakatabakidua vua qai muria nona veidusimaki, sa vakaraitaka sara tiko ga vei au na ka e vinakata meu cakava.”

O Susanne, na marama sa cavuti oti mai, a vinakata me cakacaka vakaitalatala vakatabakidua, oya me painia, ia e dredre me kunea na cakacaka vagauna. Ni sega ni kunea e dua na cakacaka me dua na yabaki, a vakararavi ga vei Jiova. E kaya: “Au vakalewena sara na fomu ni cakacaka vakapainia tudei. Na ilavo au a maroroi tu ena tauri au toka me dua na vula. E ka ni bolebole toka na vula oya! Dina niu marautaka na noqu cakacaka vakavunau, ia au se sega ga ni kunea e dua na cakacaka. Me vaka ga a yalataka o Jiova, a sega ni biuti au. Ena iotioti sara ga ni siga ni vula oya, au sa qai kunea e dua na cakacaka. Au sa qai nuidei ga ni rawa niu vakararavi vakatabakidua vei Jiova! Oqo na imatai ni ka au sotava ena noqu veiqaravi vakatabakidua, e tini ina veivakalougatataki kei na marau.”

iKuri ni Marau na Ciqoma na iVakasala Vakalou

A cakava e so na cala bibi o Tui Tevita. So na gauna a gadrevi me vakasalataki. Eda na vakataki koya beka, meda tu vakarau ni ciqoma na veivakasalataki kei na veivakavulici?

A vakayacora e dua na cala bibi o Aida, e dua na marama ni Varanise. E kaya: “Au leqataka ga vakalevu na noqu veiwekani kei Jiova. Sega tale ni dua na ka au kauaitaka.” A mani kere veivuke vei ratou na qase ni ivavakoso. Sa oti oqo e 14 na yabaki nona cakacaka vakaitalatala vakatabakidua, e tomana: “Au lomavakacegu dina niu kila ni a vosoti au o Jiova!”

Nida tu vakarau meda muria na ivakasala ni Kalou ena taqomaki keda mai na caka cala. E vakamacalataka o Judith: “Niu se yabaki 20, au mateca e dua na turaga ni Jamani keirau cakacaka vata, a saga tale ga o koya me rawai au. E turaga dokai qai toso vinaka na nona cakacaka, e vakawati tale ga! Au kila ni dodonu meu sa na vakatulewa​​—meu muria na lawa i Jiova se meu vakanadakui koya. Au mani talaucaka na lomaqu vei rau na noqu itubutubu. Sega tale ni qai wereubiubi o tamaqu ena nona tukuna na ka e namaka vei au o Jiova. Oqo sara ga na ka au gadreva. Ia, au vaqara ulubale. E vica vata na macawa nona vosa tiko vei au o tinaqu me baleta na bibi ni lawa ni Kalou kei na kena yaga ina noqu bula. Au marau sara ga ni a vakamuai vakamalua na lomaqu vei Jiova. Nona veivakadodonutaki kei na nona veivakavulici au vakila kina na marau dina​​—oya na noqu rawa ni cakacaka tiko vakaitalatala vakatabakidua me vica vata na yabaki, qai dua tale ga na kequ isa lotu Vakarisito e lomani au qai lomani Jiova tale ga mai vu ni lomana.”

Era vakavotuya na ivakaraitaki vaka oqo na bibi kei na dina ni vosa i Tevita: “Sa kalougata [“marau”] ko koya sa bokoci na nonai valavala ca, ka sa buluti na nona caka cala. Sa kalougata [“marau”] na tamata sa sega ni wilika vua ko Jiova nai valavala ca.”​​—Same 32:​1, 2.

Marau ni O Vukei Ira Tale e So

E vola o Tevita ni na marau e dua ke dau nanumi ira na vakaloloma. E tomana: “Ena vakabulai koya ko Jiova e na siga ni rarawa. Ena maroroi koya ko Jiova, ka vakabulai koya tiko: ena vakalougatataki.” (Same 41:​1, 2) Na nona yalololoma o Tevita vei Mefiposece, na luvena tagane lokiloki o Jonacani na itokani dredre i Tevita, e vakaraitaka na rai dodonu me baleti ira na vakaloloma.​​—2 Samuela 9:​1-​13.

O Marlies, e dua na marama sa 47 na yabaki na nona cakacaka vakadaukaulotu, e marautaka na vunau vei ira na isenivalu era dro mai na so na vanua e Aferika, Esia, kei na Tokalau kei Urope. E kaya: “E levu na leqa era sotava, ra vakasamataka nira sega ni dau ciqomi, ra qai vakila tale ga nira vakaduiduitaki. Au marau sara ga na vukei ira oqo.”

A vola o Marina, e dua na marama sa yabaki 40 vakacaca: “Niu dawai, e dau vakacegui au noqu kila nira tiko na noqu itokani mera vukei au. Oqo e vakavuna meu vakauqeti ira tale e so ena noqu dau qiri se volavola vei ira. Levu era vakavinavinakataki au. E vakavu marau noqu dau vukei ira tale e so.”

E kaya o Dimitar, e dua na cauravou yabaki 20 vakacaca: “A susugi au duadua o tinaqu. Niu se itabagone, au marau ni dau kauti au e veimacawa e dua na ivakatawa ni Vulivola ni iVavakoso me vakavulici au ena cakacaka vakavunau. Au se marautaka tiko ga oqo na nona sasaga. Au kila ni a sega ni rawarawa me dau uqeti au.” Ena levu ni nona vakavinavinaka ena veivuke a caka vua, sa vukei ira tale e so o Dimitar: “Au dau tovolea me vakadua mada ga ena dua na vula meu cakacaka vata kei na dua na itabagone vaka kina e dua na itabaqase ena cakacaka vakavunau.”

E vakamacalataka tale ga na Same e so na ka e dau vakavuna na marau. Dua, na kena bibi meda vakararavi ina kaukaua i Jiova, sega ena noda kaukaua ga: “Sa kalougata [“marau”] na tamata ko ni [Jiova] sa vu ni nona kaukauwa.”​​—Same 84:5.

E vakadinadinataka na tikina oqo e dua na marama na yacana o Corinna. A toki ina dua na vanua tani a gadrevi vakalevu kina na dautukutuku. “Au sotava e dua na vosa vou, na itovo vakavanua vou, kei na dua na ivakarau ni vakasama vou. Au nanuma ga niu tiko ena dua tani tale na vuravura. Au lomaleqa niu vakasamataka niu na lai vunau ena vanua au vulagi kina. Au kerea na veivuke i Jiova, a qai solia vei au na kaukaua meu vunau ena yalava ribayawa ena siga taucoko. Ni toso na gauna, au sa matau sara kina. Levu sara noqu vuli iVolatabu, au se vakila tiko ga oqo na kena yaga. Au vulica se mani leqa levu cava eda sotava, eda rawa ni walia ena kaukaua e solia o Jiova.”

Io, e levu na ka e vakavuna na marau, me vaka na noda veiwekani kei na Kalou kei ira na nona tamata, noda nuitaki Jiova vakatabakidua, noda ciqoma nona ivakasala, kei na noda dau veivukei. Nida lako voli ena sala i Jiova kei na noda muria na nona lawa, eda na marautaka na nona veivakalougatataki.​​—Same 89:15; 106:3; 112:1; 128:​1, 2.

[iVakamacala e ra]

[iYaloyalo ena tabana e 12]

Maria

[iYaloyalo ena tabana e 13]

Maree

[iYaloyalo ena tabana e 13]

Susanne kei Andreas

[iYaloyalo ena tabana e 15]

Corinna

[iYaloyalo ena tabana e 15]

Dimitar