E Vakavu Marau Nida Rerevaki Jiova!

“E marau o koya e rerevaki Jiova.”​—SAME 112:​1, NW.

1, 2. Na cava ena yaco kevaka eda rerevaki Jiova?

E SEGA ni rawarawa na kunei ni marau. Na noda vakila na marau dina e vakatau ena noda vakatulewa vinaka, noda cakava na ka e dodonu, kei na noda gole tani mai na ca. Na Kalou o Jiova, o koya e buli keda, e sa solia vei keda na nona Vosa na iVolatabu me dusimaki keda ena sala meda marautaka kina na noda bula. Eda na marau dina, da lomavakacegu tale ga kevaka eda vakasaqara na veidusimaki ni Kalou, ni oqo dina na sala eda na vakaraitaka kina noda rerevaki koya.​​—Same 23:1; Vosa Vakaibalebale 14:26.

² Eda na dikeva ena ulutaga oqo e so na ivakaraitaki ena gauna vakaivolatabu kei na ivakaraitaki ena gauna oqo e dusia ni kevaka e dua e rerevaka dina na Kalou, ena tu vua na kaukaua me sabaya kina na veika ca, ena yaloqaqa tale ga me cakava na ka dodonu. Eda na raica ni noda rerevaka na Kalou ena vakavu marau vei keda ni na uqeti keda meda vakadodonutaka na noda cala, me vaka a vakayacora o Tevita. Eda na raica tale ga ni rerevaki Jiova e dua na isolisoli talei e rawa nira vakadewataka na itubutubu vei ira na luvedra. Io, e vakadeitaka vei keda na Vosa ni Kalou ni na “marau o koya e rerevaki Jiova.”​​—Same 112:​1, NW.

Vakavinakataki Tale ni Veiwekani kei na Kalou

3. Na cava a rawa kina vei Tevita me vakavinakataka tale nona veiwekani kei na Kalou?

³ Eda sa dikeva ena ulutaga sa oti e tolu na gauna a sega ni vakaraitaka kina o Tevita ni rerevaka na Kalou, lai cakava sara kina na ka ca. Ia, na nona ciqoma na veivakadodonutaki i Jiova e dusia ni a sega ni yali vakadua vua na nona rerevaka na Kalou. Nona doka na Kalou kei na nona rokovi koya e tusanaka kina nona cala, vakadodonutaka nona ilakolako, vakavinakataka tale nona veiwekani kei na Kalou. E levu sara na ka rarawa a vakila o koya kei ira na nona itokani ena vuku ni nona cala, ia e qai ciqomi koya lesu o Jiova, vakalougatataki koya tale ga ena vuku ni nona veivutuni dina. Na ivakaraitaki i Tevita ena vakayaloqaqataki ira na lotu Vakarisito era sikalutu ena ivalavala ca bibi ena gauna oqo.

4. Ena yaga vakacava vua e dua na nona rerevaka na Kalou me marautaka tale kina na nona bula?

⁴ Dua tale na ivakaraitaki o Silina.a E dauveiqaravi vakatabakidua ia e qai coko ena vakailala ca, vakayacora sara e so na ivalavala sega ni vakarisito, vakasivoi kina mai na ivavakoso. Ni sa kilai yalona tale, sa qai saga o Silina ena nona igu kece me vakavinakataka na nona veiwekani kei Jiova. Oti sa qai vakalesui tale ena ivavakoso. Ena loma ni gauna kece oqo, a sega ni bau datuvu o Silina, e vinakata tiko ga mai vu ni lomana me qaravi Jiova. Toso na gauna sa qai vakaitavi tale ena cakacaka vakapainia. E muri, e sa qai vakamau kei na dua na qase ni ivavakoso matua, marautaka tiko kina ena gauna oqo na nodrau veiqaravi ena ivavakoso. E rarawataka o Silina nona a gole tani vakalailai mai na sala vakarisito, ia e marau ga baleta ni nona rerevaka na Kalou a vakavuna me lesu tale mai.

Bolea na Veika Dredre me Kua ga ni iValavala Ca

5, 6. Vakamacalataka na rua na gauna kei na vuna a vakabulai Saula kina o Tevita.

⁵ E vinaka cake me tarovi keda na noda rerevaka na Kalou ni se bera nida caka ca. Oqo sara ga na ka a yaco vei Tevita. Dua na siga ni vakasasataki Tevita tiko o Saula, e qai curuma e dua na qaravatu e sa vuni rawa tiko mai loma o Tevita kei ira nona tamata. Era uqeti Tevita na nona tamata me vakamatei Saula. Sega beka ni sa mai solia tiko oqo vei Tevita o Jiova na kena meca? E yaqa lo yani o Tevita qai seleta na bele ni isulu nei Saula. E lailai sara na ka e cakava oya, ia ni rerevaka na Kalou o Tevita, oya na vuna e qai lai ca tu kina na nona lewaeloma. E tarovi ira nona tamata o Tevita ena nona kaya: “E na vuku i Jiova, me’u kakua sara ni kitaka na ka oqo vua na noqu turaga, o koya ka lumuta ko Jiova.”b​​—1 Samuela 24:​1-7.

⁶ Ena dua tale na gauna nira keba toka na sotia nei Saula ena dua na bogi, e qai “biti ira na moce lutu maivei Jiova.” Erau qai curuma lo na nodra keba o Tevita kei na vugona yaloqaqa o Apisai, rau lai duri sara tu e yasa i Saula ni moce lutu koto. Vinakata sara ga o Apisai me sa vakacavara e kea na bula i Saula. E qai tarovi koya o Tevita ena nona taroga: “O cei me dodoka na ligana vua ka lumuta ko Jiova, ka sega ni cala kina?”​​—1 Samuela 26:​9, 12.

7. Na cava e tarovi Tevita voli e sega kina ni ivalavala ca?

⁷ Cava a sega ni vakamatei Saula kina o Tevita ena rua na gauna oya? Baleta ni rerevaki Jiova cake vakalevu, vakalailai o Saula. Ni rerevaka dina na Kalou, e bolea o koya me sotava na veika rarawa, me kua ga ni ivalavala ca. (Iperiu 11:25) E nuitaki Jiova ni na taqomaki ira na nona tamata, taqomaki koya tale ga. E kila o Tevita ni nona vakararavi vua na Kalou ena vakavu marau vua, ena vakalougatataki tale ga kina. Ena yasana kadua, e kila ni na sega ni vakadonui koya na Kalou ke vakalecalecavi koya. (Same 65:4) E kila tale ga o Tevita ni na qai vakayacora ga o Jiova nona vosa ni yalayala. Oya ena nona biuti koya ena itutu vakatui, kei na nona vakasivoi Saula ena nona gauna lokuci.​​—1 Samuela 26:10.

E Vakavu Marau na Noda Rerevaka na Kalou

8. E yaga vakacava vei keda na ivakaraitaki i Tevita ni sotava na ka dredre?

⁸ Nida lotu Vakarisito, eda kila nida na vakalialiai, vakacacani, se sotava e so tale na ka dredre. (Maciu 24:9; 2 Pita 3:3) So tale beka na gauna eda na sega ni veimaliwai vinaka kei na so na tacida vakayalo. Ia, eda kila ni raica tu o Jiova na ka kece, e dau rogoca noda masu, ena qai vakadodonutaka tale ga na ka kece ena kena gauna veiganiti, me salavata kei na nona inaki. (Roma 12:​17-​21; Iperiu 4:​16) O koya gona, eda na sega ni rerevaki ira na keda meca, eda rerevaki Jiova ga da qai waraki koya me vakabulai keda. Vakataki Tevita, eda na sega ni via sauma na ca, eda na sega tale ga ni via beca na ivakatagedegede i Jiova ena noda vinakata ga me kua ni yaco vei keda e so na ka dredre. Baleta e muri, eda na qai marau ga. E rawa vakacava oqo?

9. Vakamacalataka na marau e vakilai ena rerevaki ni Kalou, e dina ni yaco kina na veivakacacani.

⁹ E kaya e dua e sa kaulotu dede tu mai Aferika: “Au dau vakasamataka e dua na tina kei na luvena goneyalewa erau a sega ni via voli ivakatakilakila ni isoqosoqo vakapolitiki ena nodrau sega ni via to ena dua na yasana. Era qai mokulaki rau vakaca sara e dua na ilala tagane, oti erau sa qai vakatalai me rau suka i nodrau vale. Ena nodrau ilakolako lesu, dua na ka nona saga o tina me vakacegui luvena ena levu ni nona tagi, ni sega ni taura rawa na vuna erau mokulaki kina. Erau sega ni marau ena gauna oya ena vuku ni rarawa erau sotava, ia e vinaka nodrau lewaeloma. Dua na ka nodrau marau e muri ena nodrau kila ni rau a talairawarawa vua na Kalou. Ke rau a volia na ivakatakilakila vakapolitiki, ke ra a marau na ilala tagane oya. Ke ra saute wainigunu batabata vei rau, ra lagalaga sere tale ga e yasadrau ena nodrau ilakolako lesu i vale. Ia, erau kila na veitinani oqo ni kevaka erau sa na soro, ena sega ni tukuni rawa na rarawa ena kauta mai vei rau.” Ia, a sega ni yaco oya ena vuku ni nodrau rerevaka na Kalou.

10, 11. Na ka vinaka cava e yaco ena nona rerevaka na Kalou e dua na tina?

¹⁰ Na rerevaki ni Kalou ni sotavi na veivakatovolei me baleta na dokai ni bula ena kauta tale ga mai na marau. Dua na kena ivakaraitaki o Mary. Ena gauna sa buketetaka tiko kina na ikatolu ni luvena, e qai vakauqeti koya na vuniwai me vakalutuma na gone. “E leqataki dina na nomu bula,” e kaya o vuniwai. “Rawa ni yacovi iko na leqa ena loma ga ni 24 na aua oqo. E rawa ni mate tale ga na gone. Ia, ke sega mada ga ni mate, e kena irairai tiko ni na rawa ni bulicaki vakatani na yagona.” E vuli iVolatabu tiko o Mary kei na dua na iVakadinadina i Jiova, se sega ga ni papitaiso. “Ia,” e kaya o Mary, “sa noqu vakatulewa meu na qaravi Jiova, au na talairawarawa tiko ga vua se mani cava e yaco.”​​—Lako Yani 21:​22, 23.

¹¹ Ena gauna e bukete voli kina o Mary, e sega ni cegu nona vuli iVolatabu kei na nona qarava nona vuvale. Sa qai sucu na gone. E kaya o Mary: “E vakaocai au vakalevu na vakasucu oqo ni vakatauvatani kei na rua e liu, ia e sega ni dua na leqa levu e yaco.” Nona rerevaka na Kalou o Mary e vukei koya me vinaka tiko ga nona lewaeloma, sega ni dede sa papitaiso. Ni tubu cake na gone, e vulica tale ga me rerevaki Jiova, nikua sa veiqaravi tiko ena valenivolavola ni tabana ni iVakadinadina i Jiova.

‘Vakaukauataki Iko ena Vuku i Jiova’

12. E vakaukauataki Tevita vakacava na nona rerevaka na Kalou?

¹² Nona rerevaki Jiova o Tevita e sega ni tarovi koya wale ga mai na nona cakava na ka ca. E vakaukauataki koya tale ga me yalodei me rawa ni vakatulewa kina vakayalomatua ni sotava na ituvaki dredre. Yabaki dua vula va nona vunitaki Saula voli o Tevita kei ira nona tamata e Sikilaki, e dua na nodra koro na kai Filisitia. (1 Samuela 27:​5-7) Dua na gauna ni lako tu o Tevita kei ira nona tamata, era qai lako mai na Amalekaiti ra vakama na koro, ra qai kauti ira na yalewa, gone, kei na manumanu me tokinivalu. Dua na ka na tagi nei Tevita kei ira na nona tamata nira raica na ka sa yaco ena gauna era suka mai kina. Lakolako na nodra tagi sa ra lai tini rarawa, yaco sara mera sa via vakaviriki Tevita ena vatu na nona tamata. E rarawa na yalo i Tevita, ia e sega ni lai veilecayaki kina nona vakatulewa. (Vosa Vakaibalebale 24:10) Nona rerevaka na Kalou e uqeti koya me torovi Jiova, sa qai “vakaukauwataki . . . ko Tevita e na vuku i Jiova na nona Kalou.” Ena veivuke i Jiova, e tagavi ira kina na Amalekaiti o Tevita kei ira nona tamata, vakasukai tale mai na veika kece.​​—1 Samuela 30:​1-​20.

13, 14. E yaga vakacava vua e dua na lotu Vakarisito na nona rerevaka na Kalou me vakatulewa vinaka kina?

¹³ Eda sotava tale ga na tamata ni Kalou ena gauna oqo e so na ituvaki e gadrevi kina meda vakararavi vei Jiova, meda yalodei tale ga ena noda vakatulewa. Kena ivakaraitaki o Kristina. E vuli iVolatabu kei ira na iVakadinadina i Jiova ni se goneyalewa lailai. Ia, a lomana voli me na yaco me dua na dautaba piano rogo. Mani toso vinaka nona sasaga ena tikina oqo. Ia, e maduataka o koya na cakacaka vakavunau, mani sega kina ni lomana me papitaiso ni sega ni via colata na kena itavi. Ni toso na vuli iVolatabu nei Kristina, sa vaka e tarai koya na ka e vulica. Sa tekivu vakila na rerevaki Jiova, siqema rawa tale ga ni o Jiova e vinakati ira nona tamata mera lomani koya ena lomadra taucoko, yalodra taucoko, nodra nanuma kece, kei na nodra kaukaua kece. (Marika 12:30) Oqo e uqeti koya sara ga me yalataki koya vei Jiova, papitaiso sara.

¹⁴ E kerei Jiova o Kristina me vukei koya me rawa ni toso vakayalo. E kaya o Kristina: “Keu sa na dua na dautaba piano rogo, au kila ni na kania vakalevu na noqu gauna, levu tale ga noqu lako niu na vakaitavi tiko ena rauta ni 400 na vakatasuasua lelevu e veiyabaki. Au mani nanuma meu sa saga ga meu qasenivuli me rawa kina niu qaravi au, me vukei au tale ga ena noqu cakacaka vakavunau vakatabakidua.” Gauna oya sa vakarautaki tiko kina o Kristina ena imatai ni gauna me vakaitavi ena vanua ni vakatasuasua rogo levu duadua ena nona vanua. “A yaco na imatai ni gauna oya me sa kena iotioti tale ga,” e kaya o koya. Vakamau o Kristina kei na dua na qase ni ivavakoso. Nikua, erau sa veiqaravi ruarua tiko ena valenivolavola ni tabana ni iVakadinadina i Jiova. E marau o koya ni solia vua o Jiova na kaukaua me vakatulewa vinaka kina, vaka kina ni sa rawa ni vakayagataka oqo na nona gauna kei na nona kaukaua ena cakacaka vakatabakidua.

iSolisoli Talei

15. Na cava e vinakata o Tevita me vakadewa vei ira na luvena, e vakayacora vakacava oqo?

¹⁵ “Dou lako mai, ragone, vakarorogo mai vei au,” e vola o Tevita. “Ka’u na vakavulici kemudou mo dou rerevaki Jiova.” (Same 34:11) Ni vakaluveni o Tevita, sega ni vakabekataki ni na vinakata me vakadewa vei ira na luvena e dua na isolisoli talei, oya mera rerevaki Jiova dina mai vu ni lomadra. Ena vosa e tauca o Tevita kei na ka e cakava, e vakaraitaka kina ni o Jiova e sega ni Kalou yalodredre se yalodua, me sa dau wawa tu ga me totogitaki keda nida beca nona lewa. Ia, e Kalou yalololoma, dauveinanumi, qai dau vosoti ira na luvena e vuravura. “O cei me vakananuma tiko na noda cala?” e taroga o Tevita. Ena nona kila ni o Jiova e sega ni dau vakalewa vakamatailalai na noda cala, sa qai tomana: “Ni vakasavasavataki au mai na cala au cakava vakavuni!” E vakabauta dei o Tevita ni kevaka e solia nona vinaka kece, ena vinaka vei Jiova na ka e tukuna kei na nona vakanananu.​​—Same 19:​12, 14, Byington.

16, 17. Era na vakavulici luvedra vakacava na itubutubu mera rerevaki Jiova?

¹⁶ E ivakaraitaki vinaka vei ira na itubutubu nikua o Tevita. E kaya o Ralph, e dua na cauravou: “Keirau taleitaka vakaveitacini na neirau tiko ena dina ena ivakarau ni nodrau veituberi na neirau itubutubu.” O Ralph kei na tacina erau sa veiqaravi tiko nikua ena valenivolavola ni tabana ni iVakadinadina i Jiova. “Ni keirau se gone, erau dau okati keirau ena nodrau dau veivosakitaka na veika e baleta na ivavakoso, lai curumi keirau tale ga na yalo ni kena tokoni na dina. Erau vakavulica vei keirau ni rawa ni yaga sara vakalevu na neirau qaravi Jiova. Vakabibi ni vica na yabaki keitou lai lewe tu ni dua na ivavakoso ena dua na matanitu e gadrevi kina vakalevu na veivuke. Keitou vakaitavi ena tauyavu ni so na ivavakoso vou.

¹⁷ “Keirau dei tiko ga ena sala dodonu ena neirau raica nodrau vakabauta dei ni bula tiko o Jiova, e Kalou vinaka dina qai dau veinanumi. Erau dau saga me rau kilai Jiova vinaka me rau vakamarautaki koya tale ga, o koya gona keirau vuli vakalevu ena nodrau rerevaka dina na Kalou kei na nodrau lomani koya. Ni keirau vuki baleca mada ga, erau sega ni kaya ni sa sega ni qai lomani keirau o Jiova; erau sega tale ga ni bulia vei keirau e so na lawa kaukaua e dredre ni muri. Levu na gauna keitou dabe me keitou veitalanoa. So na gauna e tonawanawa sara na mata i Nau ena nona saga me tara na loma i keirau na nona veituberi. E mana dina na nodrau sasaga. Keirau vulica ena nodrau vosa kei na ka erau cakava ni ka totoka dina meda rerevaki Jiova, e ka marautaki, e ka dokai tale ga meda nona iVakadinadina, e sega ni icolacola bibi.”​​—1 Joni 5:3.

18. Na cava eda na vakila kevaka eda rerevaka na Kalou dina?

¹⁸ E okati ena “otioti ni vosa i Tevita” na veivosa oqo: “Ke lewa na kawatamata e dua e yalododonu, e rerevaka na Kalou, ena vaka na kida ni mataka ni cila mai na siga.” (2 Samuela 23:​1, 3, 4, NW) Kena irairai ni a taura rawa o Solomoni, na luve i Tevita, na dina ni veivosa oqo. Eda siqema oqo baleta ni a kerei Jiova me solia vua “na yalo sa vuku,” me vukei koya tale ga me rawa ni vakaduiduitaka “na ka vinaka” mai “na ka ca.” (1 Tui 3:9) E kila o Solomoni ni ka vakavuku, e vakavu marau tale ga me rerevaki Jiova. E qai umana e muri na ivola na Dauvunau ena veivosa oqo: “Nai tinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata. Ni na lewa na cakacaka kecega na Kalou, kei na ka vuni kecega, se vinaka, se ca.” (Dauvunau 12:​13, 14) Ke da muria na ivakasala oya, eda na qai vakadinata ni sega ni ‘isau ga ni yalomalumalumu kei na rerevaki Jiova’ na vuku kei na marau. Ena kena isau tale ga “nai yau, kei na vakarokoroko, kei na bula.”​​—Vosa Vakaibalebale 22:4.

19. Eda na kila vakacava “na rerevaki Jiova”?

¹⁹ Eda vulica ena ivakaraitaki ena iVolatabu kei na ivakaraitaki ena gauna oqo ni nona rerevaki dina na Kalou e yaga vei ira era qaravi Jiova. Ni tiko vei keda na rere vaka oya, eda na sega ni cakava e dua na ka me rarawa kina na Tamada vakalomalagi, ena solia tale ga vei keda na kaukaua meda vorati ira kina na keda meca, meda vosota rawa tale ga na veika mosimosi kei na veika dredre eda sotava. O koya gona, se da qase se gone, meda gumatua mada ga ena noda vulica na Vosa ni Kalou, noda vakananuma, kei na noda toro voleka vei Jiova ena noda dau masu. Nida vakayacora oqo, eda na qai “kunea na Kalou,” da kila tale ga “na rerevaki Jiova.”​​—Vosa Vakaibalebale 2:​1-5.

[iVakamacala e ra]

Rawa Mo Vakamacalataka?

Ena yaga vakacava noda rerevaka na Kalou

• kevaka eda cala bibi?

• meda marau tiko ga kina nida vakacacani?

• ena noda saga meda cakava na lomana?

• Na rerevaki ni Kalou e dua na isolisoli talei e rawa ni vakadewa na itubutubu vua na luvena. Ia ena vakayacora vakacava?

[iYaloyalo ena tabana e 26]

Sega ni yaviti Tui Saula o Tevita baleta ni rerevaki Jiova

[iYaloyalo ena tabana e 29]

Na rerevaki ni Kalou e dua na isolisoli talei e rawa ni vakadewataka na itubutubu vua na luvena