‘Meda Talairawarawa Vua na Kalou, Me Kua Ga Vua na Tamata’

‘Na Neitou Kalou sa Rawa ni Vakabulai Keitou’

A TUVANAKA na tui kei Papiloni, o Nepukanesa, e dua na soqo vakatubuqoroqoro. E dua na matakau koula levu sa vakaduri tu ena bucabuca o Tura, na vanua e volekata na korolevu o Papiloni. Na soqo oqo ena vakatabui kina na matakau levu oya, era na tiko kina na vakailesilesi lelevu ni matanitu era vakaroti mera na cuva ina matakau nira rogoca na uvuci ni vica na mataqali iyaya ni ivakatagi. E vakarota o Tui Nepukanesa ni na kolotaki ena lovo bukawaqa o koya e sega ni vakarokoroko ina matakau. O cei ena via beca na ivakaro oqo?

Era kurabui na tiko ena siga oya ni ratou sega ni bau cuva o Setareki, Mesaki, kei Apetiniko​​—e tolu na dauveiqaravi i Jiova. Eratou kila ni na veisaqasaqa sara ga na ka e vakaroti oya, kei na nodratou yalodina vua na Kalou. (Vakarua 5:​8-​10) Ni vakaroti me ratou vakamacalataka na vuna eratou sega kina ni cuva, ratou kaya ena yalodoudou vei Nepukanesa: “Ke sa vakaoqori, ko koya na neitou Kalou o koya keitou sa qarava sa rawata me vakabulai keitou mai na lovo ni buka waqa, ia ena vakabulai keitou mai na ligamuni, na tui. Ia ke sega, mo ni kila, koi kemuni na tui, ni keitou sa bese ni qarava na nomuni kalou, keitou sa bese talega ni vakarokoroko ki na matakau koula ko ni sa vakaduria.”​​—Taniela 3:​17, 18.

Ratou mani kolotaki ina lovo bukawaqa na tolu na Iperiu, ia eratou a qai vakabulai vakacakamana. A tala e dua na agilosi na Kalou me vakabulai iratou, e dina ga ni ratou sa bolemate rawa tu na tolu na dauveiqaravi oqo, me kua ga ni ratou talaidredre vei Jiova.a A tautauvata na nodratou rai kei na rai a tiko vei iratou na yapositolo i Jisu Karisito ena ono na senitiuri e muri, eratou a kaya ena nodra mataveilewai cecere na Jiu: “Sa kilikili kei keitou me keitou talairawarawa vua na Kalou, me kakua ga vei ira na tamata.”​​—Cakacaka 5:​29.

Eda Vuli Mai na Nodratou iVakaraitaki

Eratou ivakaraitaki vinaka ena vakabauta, talairawarawa, kei na yalodina o Setareki, Mesaki, kei Apetiniko. Eratou vakabauta na Kalou o Jiova na tolu na Iperiu oqo. A sega ni vakatara na nodratou lewaeloma e vakavulici ena iVolatabu me ratou vakaitavi ena dua na ivakarau ni sokalou lasu se na boletaki vanua. O ira tale ga na lotu Vakarisito nikua era nuitaki Jiova vakatabakidua. E dusimaki ira na nodra lewaeloma e vakavulici ena iVolatabu, ra qai sega ni vakaitavi ena ivakarau ni sokalou lasu se ena soqo e beci kina na lawa ni Kalou kei na nona ivakavuvuli.

Eratou nuitaki Jiova na tolu na Iperiu yalodina oqo, ratou qai talairawarawa tiko ga vua, eratou cata na ka e vakarautaka na matanitu levu o Papiloni me vaka na rogo, iyau, se na veivakalagilagi. Ratou bolea na cauravou oqo me ratou sotava na veika dredre ena lai tini ena mate, ia me ratou kua ga ni vakaleqa na nodratou veiwekani kei na Kalou. Me vakataki Mosese ga ena gauna makawa, ratou “gumatua me vaka sa raici koya sa sega ni kune.” (Iperiu 11:27) Se na mani vakabulai iratou o Jiova se sega, e lomadratou me ratou yalodina tiko ga, me ratou kua ni soro. Kena irairai ni a vakaibalebaletaka tiko na yapositolo o Paula na nodratou ivakaraitaki vinaka na tolu oqo ena nona vakamacalataki iratou na tamata vakabauta “era[tou] sa bokoca na buka-waqa rerevaki.” (Iperiu 11:34) Era vakaraitaka tale ga na dauveiqaravi i Jiova ena gauna oqo na mataqali vakabauta kei na talairawarawa vaka oqori ni vakatovolei nodra yalodina.

Eda vulica tale ga mai na nodratou ivakaraitaki o Setareki, Mesaki, kei Apetiniko ni Kalou e vakaicocovitaki ira na yalodina vua. A lagata na daunisame: “Ko Jiova . . . sa sega ni biuti ira na nona tamata era yalosavasava.” (Same 37:28) Nikua, eda sega ni namaka me na vakabulai keda vakacakamana na Kalou, me vaka a cakava vei ratou na lewe tolu na Iperiu. Ia, eda rawa ni nuidei ni na vukei keda na Tamada vakalomalagi ena gauna eda sotava kina na ituvaki drakidrakita cava ga. E rawa vua na Kalou me kauta tani na leqa, solia vei keda na kaukaua meda vosota, se ena vakaturi keda kevaka eda yalodina me yacova na mate. (Same 37:​10, 11, 29; Joni 5:​28, 29) Ena rawa ni qaqa tiko ga na vakabauta, na talairawarawa, kei na yalodina, kevaka eda digia meda talairawarawa vua na Kalou ena veigauna kece eda vakatovolei kina.

[iVakamacala e ra]

[Kato/iYaloyalo ena tabana e 9]

O BAU KILA?

• Ratou a volekata tiko na yabaki 30 na tolu na cauravou Iperiu ena gauna e vakatovolei kina na nodratou yalodina.

• A sagai me vakatakatataki sara vakasivia na lovo bukawaqa.​—Taniela 3:​19.