Taro na Dauwiliwili

Eda kila vakacava ni ivakamacala ni vuku ena Vosa Vakaibalebale 8:22-31 e tukuni Jisu Karisito tiko ni bera ni mai bula vakatamata?

Na ivakamacala vakauqeti ni vuku e kune ena ivola na Vosa Vakaibalebale e kaya: “Sa buli au ko Jiova ni sa vakatekivu na nona cakacaka, sa liu koi au ka muri na nona cakacaka eliu. . . . Ni sa sega ni tauyavutaki na veiulu-ni-vanua, ni sa sega na veiulu-ni-koro ka’u a sucu: . . . Ni sa vakarautaka na lomalagi, ka’u a tiko maikina: . . . Au a qai tiko kaya me matai daucakacaka: ka’u a nona ka e daurekitaki e na veisiga, ka’u a marau tiko e matana; . . . Ia ka’u a daumarautaki ira na luve ni tamata.”

E sega wale ga ni vakamacalataka tiko na veitikina oqo na vuku vakalou se na vakasama. Na cava na vuna? Na vuku e vakamacalataki tiko e ke e “buli,” na ivakatekivu ni nona cakacaka o Jiova. E sega na nona ivakatekivu na Kalou o Jiova, e sega ni yalani na nona vuku. (Same 90:1, 2) E sega na itekitekivu ni nona vuku; a sega tale ga ni buli. A sega ni “sucu.” Kena ikuri, ni vuku e tukuni tiko oqo e rawa ni vosa qai cakacaka, e dusia tiko e dua na tamata.​—Vosa Vakaibalebale 8:1.

E kaya na ivola na Vosa Vakaibalebale ni dua na gauna sara e liu a tiko o koya na vuku oqo ena yasa i Jiova, na Dauveibuli, me nona “matai daucakacaka.” Oqo e vakaibalebaletaki Jisu sara tiko ga. Ni se bera ni mai bula vakatamata, a cakacaka vakavoleka o Jisu kei Jiova, a rawa gona ni kaya na Vosa ni Kalou: “Sa bula eliu ko koya sa muri na ka kecega, ka sa vakataudeitaka na ka kecega ko koya.”​—Kolosa 1:17; Vakatakila 3:14.

E veiganiti me vakatakarakarataki na Luve ni Kalou me vuku, me vaka ni a vakatakila sara ga o koya na inaki kei na ivakaro i Jiova. Ni se bera ni mai bula vakatamata, e vakatokai o Jisu me Vosa ni Kalou, se nona Matanivanua. (Joni 1:1) E vakamacalataki koya ni “kaukauwa ni Kalou, kei na vuku ni Kalou.” (1 Korinica 1:24, 30) Sa ivakamacala totoka dina me baleti koya na Luve ni Kalou, ena levu ni nona dau marautaki keda na kawatamata a solia kina na nona bula ena vukuda!​—Joni 3:16.

[iYaloyalo ena tabana e 31]

“Ni sa sega ni tauyavutaki na veiulu-ni-vanua, . . . ka’u a sucu”