Lotu​—E Tiko Beka na Kena Yaga?

“DINA niu sega ni daulotu, ia au tamata vinaka!” Vuqa era duavata kei na vakasama oqori. E lewe levu sara era dau dina, dau yalololoma, ra dau nuitaki, ia era sega ni galeleta na lotu. Me kena ivakaraitaki, e levu mai valagi era sega ni daulotu, dina ga nira kaya nira vakabauta na Kalou.a Ena vanua mada ga o Sauca Amerika, e rauta ni 15 ina 20 wale ga na pasede vei ira na lotu Katolika era dau lai lotu wasoma.

De dua o duavata kei ira e lewe levu ni o nanuma ni lotu ena sega ni rawa ni vukea e dua me vakavinakataka cake na nona bula. Rairai o na kila tale ga ena veiyabaki sa sivi, ena nodra gauna na tubuda, ni levu cake na tamata era daulotu ni vakatauvatani kei na gauna oqo. Na cava e vakaseavutaka na talei ni lotu? E rawa beka nida tamata vinaka ke da sega ni daulotu? E tiko beka e dua na lotu ena rawa ni yaga vei keda?

Era Vakanadakuya na Lotu na Lewe Vuqa​​—Na Vuna?

Sa vica na senitiuri na nodra vakabauta voli mai e levu vei ira era vakacavutaka nira lotu Vakarisito, ni vinakata na Kalou na talairawarawa. Era lako gona i lotu ena nodra saga vagumatua me vakadonui ira na Kalou, era taurivaka kina na ivalavala ni sokalou e liutaka na bete, se ra muria na veidusimaki ni dua na italatala. E dina ga ni levu era kila na veivakaisini e yaco tiko ena lotu. Kilai levu tale tu ga na nona vakaitavi na lotu ena ivalu, vaka kina na nodra itovo vakasisila e so na italatala. Ia, e levu era vakabauta ni vinaka na lotu, e ca ga na tamata. So tale e dreta na yalodra na lotu baleta ni ka tabu qai rokovi, ra taleitaka na kena ivakarau makawa kei na ivakatagi; so era lai lotu ga nira rerevaka na lai kama tawamudu i eli, na ivakavuvuli e sega ni bau kune ena iVolatabu. E muri, a yaco e vica na ka e veisautaka sara ga na nodra rai e lewe vuqa me baleta na lotu.

E dua na ka e yaco, oya na kena sa tekivu ciqomi raraba na ivakavuvuli ni bula vakaidewadewa. Ra vakabauta gona kina e so ni vu vakacalaka na noda bula​​—e sega ni vu mai vua na Kalou. Vuqa na lotu era sega ni solia rawa e dua na ivakamacala dei me vakadinadinataka ni Kalou na iVurevure ni bula. (Same 36:9) Kuria oqori, na kena sa toso na vuku, sa levu na ka e rawati ena tabana vakavuniwai, veilakoyaki, veitaratara, ra lai nanuma kina e lewe levu ni saenisi e rawa ni walia na leqa kece. Sa bau lai nanumi sara mada ga ni vinaka cake na nodra veidusimaki o ira na kenadau ni ivakarau ni bula ni tamata, kei ira na dau dikeva na vakasama ni vakatauvatani kei ira na veimatalotu. Sa qai kuria ga oqo na nona sega ni vakavotuya vakamatata o lotu ni sala uasivi duadua ena noda bula oya na bulataki ni lawa ni Kalou.​​—Jemesa 1:​25.

Na cava e cakava o lotu ena veiveisau sa vure mai oqo? E sa veisautaka na itukutuku e vunautaka. O ira na bete kei ira na italatala era sa muduka na nodra vakavuvulitaka ni vinakata na Kalou na talairawarawa. Ra sa lai vakavulica ni dodonu me lewa ga na tamata yadua na ka e vinaka kei na ka e ca. Nodra vinakata e so na iliuliu ni lotu na veivakadonui mai vei ira na lewe vuqa, era sa lai kaya kina ni ciqomi keda na Kalou ena ivakarau ni bula cava ga eda taurivaka. Ia, na ivakavuvuli vaka oqo e vakavotuya ga na ka sa tukuna oti tu mai na iVolatabu: “E na yaco mai na gauna era na bese kina na tamata ni rogoca na i vakavuvuli vinaka, era sa na muria ga na nodra gagadre. Ia era na tauri ira ga na qasenivuli e na veidonui kei na ka era gadreva.”​​—2 Timoci 4:​3, VV.

Na ivakavuvuli vaka oqori ena sega ni dreta na lomadra na tamata, ia ena vakayawaki ira ga. Nira na vakasamataka: ‘Ke sa vakatitiqataka tu mada ga o lotu na kaukaua ni Kalou me bulia kina na ka, vaka kina na nona vuku me kotora na lawa, me icavai vei au na lotu? Me icavai meu vakavulica kina vei ratou na luvequ na lotu?’ O ira era saga mera vakavinakataka na nodra bula era raica rawa ni sa tawayaga na lotu. Sa ra sega gona ni lai lotu baleta sa sega ni bibi vei ira. Na cava sa tawayaga kina na ka e dodonu me yaga? Na iVolatabu e vakamacalataka vakamatata na tikina oqo.

Vakayagataki o Lotu me Rawa ga Kina na Lomadra

Na yapositolo o Paula a vakaroti ira na lotu Vakarisito taumada ni so ena vakayagataka na lotu Vakarisito mera rawata ga kina na lomadra. A kaya: “Ena qai curu mai vei kemudou eso na wolifa ca sara; era na sega ni lomani ira na qele-ni-sipi. Ena tubu cake talega eso na tamata vei kemudou, era na vosataka na ka e veivakacalai, me mari ira kina era sa lotu me ra muri ira.” (Cakacaka 20:​29, 30) Dua gona a “vosataka na ka e veivakacalai” o Augustine, na daunicioloji ni lotu Katolika mai Roma. O Jisu a vakavulica vei ira na nona imuri mera rawai ira na tani ena nodra yavutaka nodra ivakamacala ena iVolatabu. Ia, o Augustine a vakatanitaka na ibalebale ni vosa i Jisu ena Luke 14:​23, oya na matavosa, “Cikevi ira me ra lako mai.” A vakaibalebaletaka o Augustine ni dodonu mera vakasaurarataki na tamata mera tavuki. (Maciu 28:​19, 20; Cakacaka 28:​23, 24) A vakayagataka o Augustine na lotu me lewai ira kina na tamata.

O Setani, na agilosi talaidredre e vakavuna tiko na veivakacalai kei na veidabui e kune ena lotu. A vakauqeti ira gona na tamata lotu ena imatai ni senitiuri mera vakacaraka na ivavakoso lotu Vakarisito. Na iVolatabu e tukuni ira vaka oqo: “Era sa i apositolo vakailasu ko ira era vakaoqo, era sa tamata dauveivakaisini ka lasutaka ni ra i apositolo i Karisito. Sa sega ni ka veivakurabuitaki oqo. Ko Setani sara mada ga e rawa me vukici koya me vaka e dua na agilosi ni rarama. Sa sega kina ni ka veivakurabuitaki ke ra vukici ira na nona dauveiqaravi me ra vaka na i talatala ni i valavala dodonu.”​​—2 Korinica 11:​13-​15, VV.

E se vakayagataka tiko ga o Setani na lotu e vakacavutaka ni lotu Vakarisito, e tukuna voli ni savasava, e veivakararamataki, me rawa nira bulataka kina na tamata na nona ivakatagedegede, sega ni nona na Kalou. (Luke 4:​5-7) O sa rairai raica tale ga ni levu na italatala nikua era vakayagataka na lotu mera rawata kina e so na icavuti mera vakacerecerei kina, ra qai rawailavo vei ira na nodra lewenilotu. Na veimatanitu tale ga era vakayagataka na lotu me vakamuai ira na nodra dui lewenivanua mera solia nodra bula ina ivalu.

E lewe levu era lecava ni vuqa sara na sala e vakayagataka tiko kina na lotu na Tevoro. De dua eda nanuma ni o Setani e vakayagataki ira voli ga e vica era dau yaloduataka nodra lotu mera cakava kina na lomana. Ia, na iVolatabu e kaya, ni o koya “na Tevoro se ko Setani . . . sa dau vakaisina na vuravura taucoko.” Na iVolatabu e kaya tale ga: “A sa koto ga vua na vu-ni-ca ko ira kecega na kai vuravura.” (Vakatakila 12:​9, VV; 1 Joni 5:​19) E raica vakacava na Kalou na lotu era vakayagataka na veiliutaki ena tabana ni lotu se politiki me rawai ira na tamata mera muri ira?

‘Na Cava na Betena Vei Au?’

Ke o kidroataka na nodra ivalavala e so na lotu ni Veivanua Vakarisito, ia mo kila deivaki ni Kalou Cecere Duadua e sega sara ga ni bau taleitaki ira vakalailai. E kaya o lotu ni Veivanua Vakarisito nira cakava e dua na veiyalayalati kei na Kalou; oqori sara tale ga na ka a kaya o Isireli makawa. Ia, e laurai ni rau tawayalodina ruarua. Na lewa a vakatauca o Jiova vei Isireli e ganita tale ga me tau ena gauna oqo vei lotu ni Veivanua Vakarisito. A kaya o Jiova: “Ni ra sa sega ni rogoca na noqu vosa, se na noqu vunau; era sa biuta ga. A cava na betena ni sa kau mai vei au na ka boi vinaka mai Sipa? . . . na nomudoui madrali sa sega ni kamikamica vei au.” (Jeremaia 6:​19, 20) Na Kalou e sega ni kauaitaka na nodra sokalou na dau veivakaisini. E sega tale ga ni kauaitaka na nodra vakacaboisoro kei na nodra masu. Ni kaya na Kalou vei Isireli: “Na nomudou so levu tabu sa cata na yaloqu: Au sa bitaki kina; Sa ka ni oca na vosota. Ia ni dou sa dodoka mai na ligamudou, Ka’u na tabonaka na mataqu maivei kemudou: io, ni dou sa masu vakavuqa, ka’u na sega ni rogoca.”​​—Aisea 1:​14, 15.

E taleitaka beka o Jiova na solevu era kaya na veimatalotu ni soqo vakarisito, ia na kena dina e vakacerecerei kina na veikalou lasu? E dau vakatudaliga beka ina nodra masu na italatala era vakatanitaka na ivakavuvuli i Karisito? E vakadonuya beka na Kalou na lotu e beca na nona lawa? Matata tu gona vakasigalevu ni tautauvata vinaka na sala e raica kina na Kalou na veisoqo ni lotu nikua kei na nona rai me baleta na nodra vakacaboisoro na Isireli makawa. A kaya na Kalou me baleta na vakacaboisoro oya: ‘Na cava na betena vei au?’

Ia, ena yasana kadua, o Jiova e dau kauaitaka vakatitobu na sokalou dina era vakayacora vua o ira na nona tamata yalodina. Na Kalou e marautaka nira vakaraitaka na tamata yadua na nodra vakavinavinakataka na veika kece era rawata mai vua. (Malakai 3:​16, 17) O koya gona, e rawa beka ni o tamata vinaka ke o sega ni sokalou? Taura mada, ke dua e sega vakadua ni bau caka vinaka vei rau na nona itubutubu, e rawa beka ni tukuna ni tamata vinaka? Ena vakasama vata oqori, e rawa beka ni vakatokai e dua me tamata vinaka ke sega ni bau cakava e dua na ka vua na Kalou? Macala e ke, ni dodonu meda kauaitaki koya na Kalou dina, ni koya ga na ivurevure ni bula. Eda na dikeva ena ulutaga e tarava, ni sokalou dina e sega wale ga ni dokai kina na Kalou, ena vakamacalataka tale ga na kena yaga vei keda.

[iVakamacala e ra]

[iYaloyalo ena tabana e 4]

Era dusia beka na veimatalotu na ivakadinadina ni bulia na veika kece na Kalou?

[iYaloyalo ena tabana e 5]

E dodonu beka me oka ena ituvaki oqo e dua e matataka na Kalou?

[iYaloyalo ena tabana e 5]

Na cava na rai ni Kalou me baleta na mataqali soqo oqo?

[Credit Line]

AP Photo/Georgy Abdaladze