E Bibi Beka na Lotu o Lewena?

NIDA lai volivoli eda dau vinakata meda digia na ivoli vinaka mai na kena era volitaki tu. Kevaka era volitaki tu ena makete na veimataqali vuata kei na kakanadraudrau, eda rawa ni digia ga na kena eda taleitaka, e vinaka tale ga vei ira na noda lewenivuvale. Ena vakatale ga kina na sitoa ni volitaki isulu, ke ra duidui na iculacula ni isulu qai duiroka, eda na rawa ni digia ga na kena e ganiti keda. So na ka eda dau digitaka ena vakatau sara tiko ga ena ka eda dau taleitaka. So tale noda digidigi e tara na noda bula, me vaka beka na kakana bulabula se na itokani vinaka. Ia, vakacava noda digia na lotu meda lewena? Me na vakatau beka ena ka ga eda dau taleitaka? Se da digia na kena ena tara vakalevu na noda bula?

Sa levu tu na lotu meda na digidigi mai kina. Levu tale ga na vanua era sa solia tu na galala ni lotu vei ira na lewena, era galala gona kina e le levu mera biuta na lotu era susugi kina. Kune ena dua na vakatataro mai Mereke ni 80 na pasede na lewenivanua era “vakabauta ni na sega ni kune ena dua wale ga na lotu na sala ni bula.” E tukuni tale ga ena vakatataro oqori, “ni dua mai na veiyalima na tamata era vakatarogi era veisautaka nodra lotu nira sa uabula.” Tukuni ena dua na vakadidike mai Brazil ni voleka ni 25 na pasede na lewenivanua e kea era sa veisautaka na nodra lotu.

Ena gauna e liu, era dau veiletitaka na tamata na ivakavuvuli e vakaduiduitaki ira na veilotu. Ia, sa ciqomi raraba tu nikua na rai, ‘E sega ni bibi na lotu o lewena.’ E dina beka oya? Ena tara beka na nomu bula na lotu o digia?

Me vaka ga nodra dau taroga na dauvolivoli yalomatua na veika me baleta na vanua e caka mai kina na ivoli, ena ka vakayalomatua tale ga mo taroga, ‘Era a tekivu vakacava na duidui lotu, cava na vuna era tauyavu kina?’ Ena sauma ga na iVolatabu.

Era a Tekivutaki Vakacava na Lotu?

A tauyavutaka e Isireli makawa o Tui Jeropoami e dua na lotu vou ni se vo tu e voleka ni duanaudolu na yabaki me tadu mai vuravura o Jisu. O Jeropoami e imatai ni tui ena matanitu tu vakataki koya ena vualiku kei Isireli. E ka ni bolebole toka vua me vakaduavatataki ira na tamata me vakayacori kina na ka e vinakata tiko. “Sa qai bose mada na tui, ka cakava kina e rua na luve ni pulumokau koula, a sa kaya vei ira, Sa rui dredre vei kemudou mo dou lako cake ki Jerusalemi: raica, koi rau na nomudou kalou, io kemudou na Isireli.” (1 Tui 12:28) E matata ni via vakayagataka na lotu na tui me vagolea tani nodra yalodina na tamata mera kua ni lako i Jerusalemi, era dau lai sokalou tiko kina. A qai duri tu me vica na senitiuri na lotu e tauyavutaka oqo o Jeropoami, ra tini vakarusai kina e vica na milioni ni sa vakatauca na Kalou nona lewa vua na matanitu vukitani o Isireli. E tauyavutaki ga na lotu i Jeropoami me rawaka kina vakapolitiki. So tale ga na lotu ni vanua era sa tu nikua era tauyavutaki ena inaki me rawati kina na kaukaua vakapolitiki.

E vakaraitaka na yapositolo o Paula e dua tale na inaki ni nodra dau tauyavutaka na tamata na lotu vou, ni kaya: “Ni’u sa kila oqo, ni’u sa lako tani eke ena qai curu mai vei kemudou eso na wolifa ca sara; era na sega ni lomani ira na qele-ni-sipi. Ena tubu cake talega eso na tamata vei kemudou, era na vosataka na ka e veivakacalai, me mari ira kina era sa lotu me ra muri ira.” (Cakacaka 20:​29, 30) So na iliuliu dokadoka era dau tauyavutaka na isoqosoqo ni lotu mera rogo ga kina. O ira era lasutaka tiko nira lotu Vakarisito era sa qai tatawasewase tiko ga vakalevu.

Era Via Vakamarautaki Cei na Lotu?

So era dau tauyavutaka na lotu vou baleta nira taleitaka e le levu. Vakadinadinataki oqo ena ka e volaitukutukutaka na ivola na Economist me baleti ira na lotu lelevu e Mereke. E tukuni kina ni vu ni nodra tubu tiko ga na veilotu oqo nira “yavutaki ena ivakavuvuli vata ga era dau vakayagataka na daunibisinisi rawaka: oya me vakaliuci ga na veika era taleitaka na dauvolivoli.” So vei ira na lotu oqo era vakayagataka ena “nodra veiqaravi vakalotu na ka ni veivakamarautaki bulabula ena vidio, drama kei na ivakatagi.” So na iliuliu ena veilotu oqo era kaya nira sa vakavulici ira tiko na lewe ni nodra lotu mera “vutuniyau, ra bulabula vinaka qai sega ni lomaocaoca.” Dina nira vakalewai na lotu oqori ena nodra sa dau vakaitavi tiko ena buturara ni veivakamarautaki se “nodra rawaka ga vakataki ira,” ia e kaya na ivola tiko ga oya, “nira cakava ga na ka era taleitaka e le levu.” Sa qai tinia na kena itukutuku: “Nodrau mai cokovata oqo o lotu kei na veika vakabisinisi, e vakilai kina na rawaka levu.”

So na lotu era sega soti beka ni cicivaki me vaka na bisinisi, ia na lotu era kauaitaka na ka era “taleitaka e le levu,” e kauta lesu noda vakasama ina ivakasala i Paula ni vola: “[E]na yaco na gauna era na sega ni vosota kina nai vakavuvuli dodonu; ia ena vaka na nodra gagadre ca, era na vakalewevuqataki ira kina na nodrai vakavuvuli, ni sa qasikanunu na daligadra; a ra na vagolea tani na daligadra mai na ka dina, ka lesu ki nai tukutuku wale.”​—2 Timoci 4:3, 4.

Me vaka nira tauyavu e levu na lotu me rawati ga kina na kaukaua vakapolitiki, rogo, mera taleitaki kina, ia sega mai na nodra via vakamarautaka na Kalou, sa rauta mera dau coko na lotu ena so na itovo ca me vaka na nodra via vakacacani na gone, veidabui, ivalu, se vakacaca ni batikadi. Dau levu sara ga na lasu e kune ena lotu. Ia, o na taqomaki iko vakacava mo kua ni vakacalai kina?

[Tikina bibi ena tabana e 4]

Era a tauyavu e levu na lotu me rawati ga kina na kaukaua vakapolitiki, rogo, se mera taleitaki kina, ia sega mai na nodra via vakamarautaka na Kalou