Na Sokalou E Yaga Vei Keda
“E YAGA vei au me’u toro vua na Kalou,” e kaya na daunisame o Esafa. A vure e lomana me vakatotomuri ira era sega ni kauaitaka na Kalou ena nodra vakaliuca ga na veika ni nodra bula. Ia, a mani vakasamataka tale o Esafa na vinaka ni nona toro voleka vua na Kalou qai vakadeitaka ni na yaga vua. (Same 73:2, 3, 12, 28) E yaga beka vei keda ena gauna oqo na sokalou dina? Na cava sara mada na kena yaga?
Nida sokaloutaka na Kalou dina, ena vukei keda meda toroya cake na ivakarau ni noda rai meda kua kina ni vakaliuca ga na noda bula. O ira era vakaliuca ga na veika era vinakata era na sega vakadua ni na kunea na marau. E vu oqo ena sala sara ga a buli keda kina “na Kalou ni loloma.” (2 Korinica 13:11) O Jisu a vakavulica e dua na uto ni vakasama bibi me baleta na noda bula na tamata ena nona kaya: “A ka ni veivakalougatataki vakalevu me soli ka, ka vakalailai ga me taura na ka.” (Cakacaka 20:35) Oqori na vuna eda dau taleitaka kina meda cakava na ka vei ira na noda itokani se vuvale. Ia, na ka e vakavuna na marau dina, oya na noda cakava na ka vua na Kalou. E sega tale ni dua e ganita na noda loloma, na Kalou duadua ga. Sa ra vakadinadinataka gona e vica na milioni na tamata e duidui na ivakatagedegede ni nodra bula, nira kunea na vakacegu dina ena nodra sokalou vua na Kalou ra qai muria na nona ivakaro.—1 Joni 5:3, VV.
Me Vakainaki Noda Bula
E yaga tale ga vei keda na sokalou dina baleta e vakainaki kina na noda bula. Sega li ni o vakila ni dau semati vakavuqa na marau kei na kena rawati e dua na ka yaga? Levu era kotora na isausau ena nodra bula, se mani veika e vauca na nodra vuvale, itokani, bisinisi, se ka ni veivakalasai. Ni dau yacovi keda na ituvaki tawanamaki, vuqa na gauna na veika oqori ena sega ni kunei kina na marau. (Dauvunau 9:11, NW) Ia, na sokalou dina ena vukei keda meda kunea e dua na inaki ni bula e cecere sara, na kena ena vakilai kina na lomavakacegu ke o mani sotava sara mada ga e so na ka rarawa.
E vauci ena sokalou dina na noda kilai Jiova da qai qaravi koya ena yalodina. O ira era cakava oqori era na vakila nira veiwekani voleka sara kei na Kalou. (Dauvunau 12:13; Joni 4:23; Jemesa 4:8) Ena rairai dredre mo vakabauta ni rawa ni drau veikilai kei na Kalou, qai rawa tale ga ni o vakatokai koya me nomu itokani. Na nomu vakadeuca na itukutuku ni veika e dau cakava vei ira na tamata kei na veika e bulia, o na rawa ni kila vinaka kina na nona veitovo qoroi. (Roma 1:20) Kuria oqori, na nomu wilika na Vosa ni Kalou ena rawa ni o kila na vuna eda bula tiko kina, na cava e vakatara kina na Kalou na rarawa, na sala ena qai vakaotia kina, kei na kena e talei sara, oya ni rawa tale ga ni o vakaitavi ena kena vakayacori na inaki ni Kalou. (Aisea 43:10; 1 Korinica 3:9) Na noda kila na veika oqori ena rawa ni vakainaki sara kina na noda bula!
Eda na Tamata Vinaka Cake
Na sokalou dina e yaga baleta ena rawa ni vukea e dua me tamata vinaka cake. Ni o bulataka e veisiga na sokalou dina, o sa na bucina sara tiko ga na itovo ena vinaka kina na nomu veimaliwai kei ira na tani. O na vulica vua na Kalou kei na Luvena mo tamata dau dina, dau vosa vakayalovinaka, o qai nuitaki. (Efeso 4:20–5:5) Ni o sa kila vinaka na Kalou, ena yaco mo lomani koya, o na uqeti tale ga mo vakatotomuri koya. E kaya na iVolatabu: “Mo dou qai vakadamurimuria na Kalou, me vakataki ira na gone ni toko; ka dou ia tikoga nai valavala ni loloma.”—Efeso 5:1, 2.
Sega li ni ka marautaki meda bula maliwai ira na tamata era vakatotomuria na loloma ni Kalou? E totoka nida vakasamataka ni sokalou vua na Kalou dina e sega ni ka meda cakava taudua voli ga. Na sokalou oqo e vauci keda vata kei ira e lomadra mera cakava na ka e dodonu qai yaga. E so ena rairai sega ni taleitaka na vakasama ni lotu e dodonu me caka vakaisoqosoqo. Ia, me vaka eda sa raica oti mai ena imatai ni ulutaga, na leqa e kune ni levu na isoqosoqo ni lotu e sega ni dodonu na sala era kumukumuni vata kina qai cala tale ga na inaki era cakava kina. Levu gona na isoqosoqo lotu e sega ni vakarisito na nodra inaki. Ia o ira na tamata ni Kalou e kumuni ira sara ga o Jiova ena dua na inaki cecere. E kaya na iVolatabu: “Sa sega ni vu ni veisei na Kalou, sa vu ni vakacegu ga.” (1 Korinica 14:33) Rairai o na vakila tale ga, me vakataki ira ga e vica vata na milioni, ni vakavinakataka na ivakarau ni noda rai na noda veimaliwai kei ira na matailawalawa lotu Vakarisito era tuvanaki vinaka.
iNuinui ni Veisiga Nimataka
Na iVolatabu e vakamacalataka ni Kalou e sa kumuni ira tiko na sokalou dina mera na bulata na ivakataotioti ni ituvaki kei vuravura oqo, ra qai taukena na vuravura vou era na bula ga “kina nai valavala dodonu.” (2 Pita 3:13; Vakatakila 7:9-17) Na sokalou gona e yaga vei keda e solia na inuinui, oqo e dua na ka bibi me qai rawa kina na marau dina. So era yavutaka na nodra inuinui ni veisiga nimataka ena cici vinaka ni nodra matanitu, na lalawa e so vakabisinisi, se na nodra namaka mera na bulabula vinaka kei na nodra lomavakacegu nira sa na cegu mai na nodra cakacaka saumi. Ia, e laurai ni vica wale sara, se sega sara ga, vei ira na ka oqori ena solia na yavu dei me nuitaki kina ni na marautaki na veisiga nimataka. Ena yasana kadua, a vola na yapositolo o Paula: “Ni keitou sa vakararavi ki na Kalou bula.”—1 Timoci 4:10.
Ke o vaqara vagumatua, o na kunei ira era sokalou dina. Ena vuravura talawasewase oqo, era kilaitani duadua na iVakadinadina i Jiova ena vuku ni nodra dau veilomani kei na nodra duavata. Voleka nira cavutu mai na veimatanitu kece qai duidui nodra isususu; ia, era duavata ena vuku ni nodra veilomani kei na nodra lomani Jiova. (Joni 13:35) Era sureti kemuni gona mo ni vakila tale ga na ka era sa sotava. Oqori na ka a vola o Esafa: “E yaga vei au me’u toro vua na Kalou.”—Same 73:28.
[iYaloyalo ena tabana e 7]
E rawa mo itokani ni Kalou