Ni Biuti Jiova e Dua na Wekada Voleka

ERAU iVakadinadina i Jiova o Marika kei Luisa.a Ena dela ni loloma kei na veikauaitaki erau vakavulici ratou na luvedrau ena iVolatabu, ni vakauqeta na iVolatabu mera cakava vaka kina na itubutubu lotu Vakarisito. (Vosa Vakaibalebale 22:6; 2 Timoci 3:​15) Ka ni rarawa ni so vei ratou na gone eratou biuti Jiova ni ratou sa uabula. “E mosi na yaloqu niu vakasamataki ratou na luvequ eratou sa biuti Jiova,” e kaya o Luisa. “Dau mositi au e veisiga. E ora na lomaqu niu rogoci ira e so na itubutubu nira talanoataki ira na luvedra, au dau kinokinoca dredre na wainimataqu.”

Io, ni dua e biuti Jiova kei na sala ni bula e volai tu ena iVolatabu, era dau rarawa vakalevu kina na wekana era yalodina tiko. “Au lomani tuakaqu vakalevu,” e kaya o Inise. “Au tu vakarau meu cakava na ka kece e rawa, me lesuvi Jiova tale mai kina o tuakaqu!” A biuti Jiova na gane i Maraia me bulataka na bula dukadukali, e kaya o Maraia: “E dredre dina, ni sa rui dau vinaka vei au o ganequ. Dua na ka noqu dau nanumi koya ena gauna keitou dau soqo kina vakavuvale.”

Na Cava e sa Rui Mosimosi Kina?

Na cava e sa rui mosimosi kina vei ira na lotu Vakarisito ni biuti Jiova e dua na luvedra se wekadra voleka? Baleta nira kila ni iVolatabu e yalataka na bula tawamudu ena parataisi e vuravura vei ira na yalodina tiko ga vei Jiova. (Same 37:29; 2 Pita 3:​13; Vakatakila 21:​3-5) Era rai vakanamata na lotu Vakarisito mera marautaka na veivakalougatataki oqo kei ira na watidra, luvedra, itubutubu, tacidra, kei na makubudra. E mositi ira dina na nodra vakasamataka ni rawa nira calata na veivakalougatataki oqori o ira na wekadra voleka era sa biuti Jiova! Era kila tale ga na lotu Vakarisito ni yaga vakalevu na lawa i Jiova kei na nona ivakavuvuli ena nodra bula mada ga ena gauna oqo. Ra dau rarawataka gona vakalevu na lotu Vakarisito nira raici ira na wekadra voleka nira muria tiko na sala era na tini tamusuka ga kina na leqa.​​—Aisea 48:​17, 18; Kalatia 6:​7, 8.

Vei ira era se bera ni sotava na kena yaco na ituvaki oqo ena nodra matavuvale, e macala ga nira na sega ni katuma rawa na rarawa levu e dau salavata kaya mai na leqa vaka oqo. E dau tara sara ga na basoga ni bula taucoko. “Sa qai dredre ga na noqu tiko ena soqoni vakarisito meu raici ira na itubutubu nira veidredrevaki qai veivosaki tiko kei ira na luvedra,” e kaya o Luisa. “Se mani cava e marautaki, ena sega ni taucoko sara ni dua e yali tiko.” E vakasamataka lesu e dua na qase ni ivavakoso na gauna ratou sega ni veimaliwai kina kei luvena yalewa vakacabecabe ena loma ni va na yabaki. E kaya: “Na veigauna vinaka mada ga a sega soti ni marautaki. Keu solia e dua na iloloma vei watiqu seu kauti koya ina dua na vanua ena muanimacawa, e dau tini tagi ga, ni vakasamataka ni sega ni tiko o luvena yalewa me keitou marautaka vata.”

Sa rui sivia tale beka na nodra rarawa na lotu Vakarisito oqo? Sega. Na kena dina nira vakavotuya tiko ga na itovo i Jiova, nida a buli ga meda ucui koya. (Vakatekivu 1:​26, 27) Na cava na kena ibalebale oqo? Vakasamataka mada, na cava na nona rai o Jiova nira vorati koya o ira na nona tamata, na Isireli? Eda vulica ena Same 78:​38-​41 ni a rarawa qai vakacudrui Jiova na ka era cakava. Ia, ena yalovosovoso a vunauci ira, vakadodonutaki ira, dau qai vosoti ira ena veigauna era veivutuni kina. Macala ga ni na volekati keda o Jiova baleta nida ‘cakacaka ni ligana,’ qai sega ni dau biuti keda vakarawarawa. (Jope 14:15; Jona 4:​10, 11) E biuta sara ga vei keda o Jiova na yalo ni veidredreti, qai kaukaua sara na yalo oqo ena loma ni matavuvale. Sega gona ni kurabuitaki nida na rarawataka ni sa sega ni qaravi Jiova e dua na wekada voleka.

Io, e bau dua toka na ka dredre vei ira na dausokalou dina na nodra sa sega ni qaravi Jiova na wekadra voleka. (Cakacaka 14:22) Sa kaya rawa tu ga mai o Jisu ni kena ciqomi na nona itukutuku ena vakavuna me tawase kina e so na vuvale. (Maciu 10:​34-​38) Ia, na itukutuku ena iVolatabu e sega ni vakavuna na tawase oqo. Era vakavuna ga na lewenivuvale era sega ni vakabauta se ra sa sega ni yalodina tiko, baleta nira sega ni ciqoma, era vakanadakuya, se ra tusaqata sara ga na sokalou vakarisito. Eda vakavinavinaka gona ni o Jiova e sega ni biuti ira na yalodina vua, e sa kotora tu e so na iwalewale mera muria na nona tamata me vukei ira nira sotava na ituvaki dredre. Ke o rarawataka tiko ena gauna oqo na nona sa sega ni qaravi Jiova e dua na wekamu voleka, na ivakavuvuli cava vakaivolatabu ena vukei iko mo vosota, mo qai vakila na marau kei na lomavakacegu?

Sala O Rawa ni Vosota Kina

“Dou veivakatataki kemudou cake vakai kemudou . . . , dou maroroi kemudou mo dou tu ga e na loloma ni Kalou.” (Juta 20, 21) Me vakatau ena ituvaki o tiko kina, de dua o sega ni rawa ni cakava e dua na ka ena gauna oqo mo vukea na wekamu e sa muduka na nona qaravi Jiova. Ia, o rawa ga ni vakaukauataki iko vakayalo kei ratou na vo ni lewenivuvale eratou yalodina tiko. O Veronika e tolu na luvena tagane, e rua rau sa biuta na dina, e kaya: “Keirau vakadreti vakaveiwatini me keirau kaukaua tiko ga vakayalo, ni na rawarawa kina me keirau ciqomi rau na luve i keirau ni rau sa na saumaki mai. Ena tini beka e vei na gone cidroi kevaka a sega ni tu vakarau na tamana me ciqoma koya?”

Mo vakaogai iko ena veika e vauca na sokalou dina mo rawa ni kaukaua tiko ga vakayalo. Okati e ke nomu muria e dua na ituvatuva mo vulica kina vakatitobu na iVolatabu, kei na nomu tiko ena veisoqoni vakarisito. Tu vakarau mo vukei ira tale e so ena loma ni ivavakoso kevaka o rawa ni veivuke. Ia ena via dredre toka ena imatai ni gauna mo cakava na veika oqo. E nanuma lesu o Veronika: “Taumada au nanuma meu tu taudua mada ga, via vaka na manumanu e sa mavoa tu. Ia, a cikeva o watiqu me keitou muria e dua na ituvatuva vinaka vakayalo. E raica me keitou kua ni calata na soqoni. Ena gauna a caka kina na soqo ni tikina, au saga me dei na yaloqu meu rawa ni lai veimaliwai kei ira na mataveitacini. Io, a vukei keitou vakaveitamani na porokaramu me keitou toro voleka vei Jiova. A vakaukauataki sara ga vakayalo ena soqo ni tikina oya na luve i keirau tagane se yalodina tiko.”

E raica o Maraia, sa vakamacalataki oti mai, ni veivuke sara vakalevu na nona dau ogaoga ena cakacaka vakavunau, ena gauna oqo sa le va e vakavulici iratou tiko ena iVolatabu. Tautauvata tale ga na ka e tukuna o Lavenia: “Dina niu se dau tagi ga e veisiga ni sega ni tini vinaka sara na noqu veisusu me vakataki ira e so na itubutubu, ia au vakavinavinakataki Jiova ni se maucokona tiko ga na noqu vakabauta na itukutuku uasivi ni iVolatabu, e rawa ni vukei ira na vuvale ena gauna ni ivakataotioti oqo.” Ena gauna erau biuta kina na ivavakoso na luvedrau o Keni kei Elenoa, erau sa tamatabula, rau mani veisautaka sara na veiwatini na nodrau bula me rau lako ina vanua e gadrevi vakalevu kina na dautukutuku ni Matanitu ni Kalou, me rau lai cakacaka vakaitalatala vakatabakidua kina. Oqo a vukei rau me dodonu tiko ga na nodrau rai, me rau kua ni lomoci ena rarawa.

Vakanuinui tiko ga. “Sa vakanuinuitaka na ka kecega” na loloma. (1 Korinica 13:7) E kaya o Keni, sa cavuti oti: “Ena gauna erau biuta kina na luvequ na dina, au nanuma ni vaka ga erau sa mate. Ia ni takali o noqu isa ni drua, keirau drua dadakulaci, a veisau sara ga na noqu rai. Au vakavinavinaka ni rau sega ni mate dina na luvequ, kei na nona se dolava tu o Jiova na sala me rau lesu tale mai kina.” Io, e laurai ni levu vei ira na biuta na dina era dau lesu tale mai.​​—Luke 15:​11-​24.

Kua ni beitaki iko. E dau matau vei ira na itubutubu mera vakananuma na veika sa oti ra qai veivutunitaka e so na ka era a cakava, se ra sega beka ni a cakava. Ia, na vakasama bibi e koto ena Isikeli 18:20 e dusia ni o Jiova ena lewai koya e cakacala, ena sega ni lewai rau nona itubutubu. E levu na ivakamacala e volai ena ivola na Vosa Vakaibalebale e baleta tiko na nodra itavi na itubutubu mera tuberi luvedra ena sala dodonu, ia e vakavure vakasama ni vakavataki na levu ni ivakasala vei ira na itabagone mera vakarorogo ra qai talairawarawa vei ira na itubutubu. O koya gona, e nodra itavi na gone mera muria na nodrau veivakavulici na itubutubu, e yavutaki ena iVolatabu, dina ga ni rau ivalavala ca. Kena irairai ni o cakava na ka o nanuma ni a dodonu ena gauna oya. Ia, kevaka mada ga o nanuma ni a cala e so na sala ni nomu veivakatavulici, mo tini beitaki iko ena ka sa yaco, e sega ni kena ibalebale ni nomu cala e vakavuna me biuta na dina na wekamu voleka. E sega gona na betena mo veivutunitaka na veika o a cakava, se sega ni o cakava. Vuli ga mai na cala o cakava, gumatua mo kua ni vakaruataka, qai masuti Jiova me vosoti iko. (Same 103:​8-​14; Aisea 55:7) Rai tiko ga i liu, kua ni rai i muri.

Dauvosovoso. Ena rairai dredre vei ira e so mera kila na sala mera vakauqeti se vakacegui iko kina, vakauasivi kevaka era se bera ni sotava na ituvaki oqo. Kena ikuri, ni duidui na tamata, e duidui tale ga na ka era nanuma ni na veivakauqeti se veivakacegui. Koya gona, kevaka e vakararawataki iko e dua ena ka e kaya, muria na ivakasala ni yapositolo o Paula ena Kolosa 3:​13: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua.”

Doka na ituvatuva ni veivakadodonutaki i Jiova. Kevaka e vakadodonutaki na wekamu ena ivavakoso, nanuma ni oqo e ituvatuvanaki i Jiova, ena vinaka vei koya e cala, vaka kina vei ira kece na lewe ni ivavakoso. (Iperiu 12:11) Mo kua gona ni vakalewai ira na qase ena vakatulewa sa caka. Nanuma tiko, ni na tini vinaka na kena muri na sala i Jiova, ia ena kuria ga na leqa kevaka eda tusaqata.

Nira vakabulai oti mai Ijipita na Isireli, a nodra turaganilewa o Mosese. (Lako Yani 18:​13-​16) E macala tu ga ni kena tau na lewa ena rawa ni vinaka vua e dua, ia ena ca vua e dua tale, e sega gona ni vakabekataki ni so era a rarawataka na lewa a tauca o Mosese. De dua na nodra vakacala na lewa i Mosese a lai vakavuna na nodra a vorata nona veiliutaki ena so na gauna. Ia, o Jiova a vakayagataki Mosese me liutaki ira na nona tamata, a sega gona ni totogitaki Mosese, a totogitaki ira ga na veivorati kei na nodra lewenivuvale era a veitokoni. (Tiko Voli mai na Lekutu 16:​31-​35) Eda vulica e ke meda dau doka da qai tokona na vakatulewa era cakava o ira na lesi vakalou ena gauna oqo.

Me baleta na tikina oqo, e vakasamataka o Daiana ni a dredre toka me tiko vua na rai dodonu ni vakadodonutaki ena ivavakoso na luvena yalewa. E kaya: “E vukei au na noqu wilika vakalevu na ulutaga e vauca na kena veirauti vinaka na ituvatuva e kotora o Jiova. Dua toka noqu ivola au dau vola kina e so na tikina au rogoca ena vunau se na ka au wilika ena ivolatabaki me vukei au meu vosota qai qaravi Jiova tiko ga.” Lai basika gona e ke e dua tale na sala eda rawa ni vosota kina.

Talaucaka na lomamu. O na raica ni veivuke sara vakalevu mo talaucaka na nomu leqa vua e dua se rua na nomu itokani o rawa ni nuitaka. Ena vinaka mo digia na itokani era na vukei iko me tiko ga vei iko na rai dodonu. Sa na qai veivuke sara vakalevu ke o ‘sova yani na lomamu’ vei Jiova ena masu.b (Same 62:​7, 8) Na vuna? Baleta ni kila vinaka o Jiova na ka o vakila tiko. Kena ivakaraitaki, o na rairai nanuma ni sega ni dodonu na nomu mai sotava wale na mosi ni yalo, ni o sega ni biuti Jiova. Talaucaka na lomamu vei Jiova, kerei koya me vukei iko mo kua ni yalocataka na ituvaki o sa mai sotava.​​—Same 37:5.

Ni toso na gauna, e sega ni vakataratutu ni o sa na vulica mo tauri iko vinaka. Ia ena gauna vata oqori, saga tiko ga mo vakamarautaka na Tamada vakalomalagi, kua ni nanuma ni matewale nomu sasaga oqori. (Kalatia 6:9) Nanuma tiko ni kevaka eda biuti Jiova, eda na sotava tiko ga na leqa. Ia ena yasana adua, kevaka eda yalodina tiko ga vua, ena vukei keda ena gauna eda sotava kina na leqa. Mo nuidei gona ni kila vinaka tu o Jiova na ituvaki mosimosi o sa sotava tiko, ena solia tiko ga vei iko na kaukaua ena gauna e yaga kina.​​—2 Korinica 4:7; Filipai 4:​13; Iperiu 4:​16.

[iVakamacala e ra]

[Kato ena tabana e 19]

Sala Rawa ni Vosota Kina

◆ “Dou veivakatataki kemudou cake vakai kemudou . . . , dou maroroi kemudou mo dou tu ga e na loloma ni Kalou.”​—Juta 20, 21.

◆ Vakanuinui tiko ga.​—1 Korinica 13:7.

◆ Kua ni beitaki iko.​—Isikeli 18:20.

◆ Dauvosovoso.​—Kolosa 3:​13.

◆ Doka na ituvatuva ni veivakadodonutaki i Jiova.​—Iperiu 12:11.

◆ Talaucaka na lomamu.​—Same 62:​7, 8.

[Kato/​iYaloyalo ena tabana e 21]

O sa Biuti Jiova Beka?

Ke vaka kina, se mani cava na vuna, e leqataki sara na nomu veiwekani kei Jiova vaka kina na nomu bula mai muri. De o nanuma tiko mo lesu tale vei Jiova. O sa saga vagumatua tiko beka oqori ena gauna oqo? Se, o lokuyara tiko me yacova na gauna e donu kina vei iko? Nanuma, ni sa uku vakatotolo sara tiko mai na o loaloa ni Amaketoni. Kena ikuri, e lekaleka wale na bula ena ituvaki kei vuravura oqo qai sega ni dei. Eda sega mada ga ni kila se da na bula tiko nimataka se sega. (Same 102:3; Jemesa 4:​13, 14) E kaya e dua na tacida vakayalo e laurai vua e dua na mate levu: “E laurai na kequ mate ni vakacagau sara tu ga na noqu cakacaka vakaitalatala vakatabakidua tiko vei Jiova, qai sega ni dua na ka meu madualaka. Au lomavakacegu kina.” Ia vakasamataka mada ke a kune vua na mate oya ena gauna e veinanuyaka voli kina, “Dua na siga au na qai lesu tale vei Jiova!” Kevaka o sa biuti Jiova, oqo sara ga na gauna mo lesu kina vua.

[iYaloyalo ena tabana e 18]

Na nomu vakaogai iko ena veika e vauca na sokalou dina ena vukei iko me dodonu tiko ga na nomu rai