E Marautaka na Vunau i Jiova

O ALBERT D. SCHROEDER, e dua na lewe ni iLawalawa Dauvakatulewa ni iVakadinadina i Jiova, e vakaotia na nona veiqaravi e vuravura ena 8 Maji, 2006, ni sa yabaki 94. E vakayagataka e sivia e 73 na yabaki ena cakacaka vakaitalatala.

A sucu o Brother Schroeder mai Saginaw, Michigan, Mereke, ena 1911.a Ni se gone sa vulica e levu na ka mai na iVolatabu vei buna, e vukei koya tale ga me taleitaka na wili iVolatabu. E vulica na vosa vakaLatina kei na vosa vakaJamani kei na veika vakalivaliva ena University of Michigan. Ni tubu cake na nona taleitaka na iVolatabu, e biuta na nona vuli me rawa kina ni vunautaka vakatabakidua na Matanitu ni Kalou. Ena 1932 sa mai lewe ni vuvale e Peceli e Brooklyn, Niu Yoka.

Ena 1937, ni se qai yabaki 26, sa lesi o Brother Schroeder me lai liutaka na nodra cakacaka na iVakadinadina i Jiova e Peritania. E uqeti ira e lewe levu mera cakacaka vakavunau vakatabakidua na nona lomakatakata ena cakacaka vakavunau. Rau cakacaka vata ena Peceli e Lodoni e dua na cauravou e yacana o John E. Barr. E muri erau qai mai veiqaravi vata tale me vica vata na yabaki ni rau sa lewe ni iLawalawa Dauvakatulewa.

E vakilai levu na nona cakacaka o Brother Schroeder ena vukudra na iVakadinadina i Jiova ena gauna ni ivalu levu. E vakatalai tani mai Peritania ena Okosita 1942. Ni oti e dua na soko voravora ni sokota na wasa na Atalanitika ena gauna ni ivalu oya, e yaco yani i Brooklyn ena vula o Sepiteba.

Ena gauna oya era sa namaka tiko na tamata i Jiova me vakayacori e dua na cakacaka levu ni oti na iKarua ni iValu Levu. E kurabuitaka qai marautaka tale ga o Brother Schroeder na nona ilesilesi e tarava, oya me veivuke ena kena cokonaki na lesoni me vulici ena Watchtower Bible School of Gilead. E vica na yabaki na nona vakavulici ira tiko na daukaulotu ena koronivuli oya. Era se nanuma vinaka tiko ga na vuli oti mai Kiliati kei na Koronivuli ni Cakacaka Vakaitalatala na nona dau veivakavulici. E dau marautaka na nona vakatavuvulitaka na ivunau ni Kalou vei ira na nona gonevuli qai dau vakabibitaka na veikilai vinaka kei Jiova.

Rau vakamau kei Charlotte Bowin ena 1956. E sucu na luvedrau tagane o Judah Ben ena 1958. O Brother Schroeder e tama qai tagane vakawati vinaka dina. E tekivu veiqaravi ena iLawalawa Dauvakatulewa ena 1974 qai lai yaga sara kina vakalevu. E turaga yalovinaka qai yalomalumalumu o koya qai dau vakaliuca tu ga na kena vakalagilagi na yaca ni Kalou. Eda vakadeitaka ni sa taura o Brother Schroeder na nona icovi ni bula i lomalagi ni a dua o koya na lotu Vakarisito lumuti e dau ‘marautaka dina na vunau i Jiova.’​​—Same 1:2.

[iVakamacala e ra]