Dau Vu ni Yaloqaqa na Loloma
“Sa sega ni solia vei keda na yalo ni rere na Kalou, ia sa solia mai na yalo me solia na kaukauwa, na loloma kei na noda lewai keda vakavinaka.”—2 TIMOCI 1:7, VV.
1, 2. (a) Na cava e rawa ni cakava e dua ni tuburi koya na loloma? (b) Na cava e duatani sara kina na yaloqaqa i Jisu?
ERAU a nunu voli e dua na veiwatini vou ena dua na baravi ena tokalau kei Ositerelia. Rau vakarau cabe sara ga i vanua qai basika mai vakasauri e dua na qio vula vakaitamera, lako vata kei na nona sa vakadodonu sara ga mai vei yalewa. E curumi tagane vakasauri na yaloqaqa lako vata kei na nona sa todo yani i liu, biligi watina tani, ena nona bolea me kati koya na qio, me kua ga ni kati watina. “E solia nona bula ena vukuqu,” e kaya o watina ni sa vakayacori na lotu ni veibulu.
2 Io, na loloma e rawa ni uqeta e dua me vakaraitaka na yaloqaqa ena kena ivakatagedegede e vakasakiti sara. A kaya o Jisu Karisito: “Sa sega na nona loloma e dua na tamata me uasivi cake e na ka oqo, me solia na nona bula e na vukudra na wekana.” (Joni 15:13) A solia nona bula o Jisu ni se bera ni sivi e 24 na aua mai na gauna e cavuta kina na veivosa oqo. Ia, e sega ni solia nona bula ena vukuna ga e dua, e solia ena vuku ni kawatamata kece. (Maciu 20:28) A sega tale ga ni solia vakasauri nona bula ena vuku ni dua na ka e yaco vakatotolo. Sa kila tu ni na vakalialiai, vakacacani, tau vua na lewa cala, kei na nona vakamatei ena kaunirarawa. A vakarautaki iratou sara mada ga nona tisaipeli ena nona kaya: “Raica, eda sa lako cake ki Jerusalemi; ka na soli yani na Luve ni tamata vei ira na bete levu, kei ira na vu-ni-vola; ka ra na lewai koya me mate, a ra na soli koya vei ira na veimatanitu tani: a ra na vakalialiai koya, ka vakanakuitataki koya, ka kasivita, ka vakamatea.”—Marika 10:33, 34.
3. E vakasakiti na yaloqaqa i Jisu, ia e vu mai vei?
3 E duatani sara na yaloqaqa i Jisu. Na cava e vakavuna? E vu vakalevu oqo ena nona vakabauta kei na nona rerevaka na Kalou. (Iperiu 5:7; 12:2) Ia, na yaloqaqa i Jisu e vu vakalevu duadua ena nona lomana na Kalou kei na nona lomani ira na wekana. (1 Joni 3:16) Ke da saga me tiko tale ga vei keda na loloma vaka oya me ikuri ni noda vakabauta kei na noda rerevaka na Kalou, ena rawa tale ga nida vakaraitaka na yaloqaqa e kilai tani kina na lotu Vakarisito. (Efeso 5:2) Na cava meda cakava me tiko kina vei keda na loloma vaka oqo? Dodonu meda kila na kena iVurevure dina.
“Sa Mai Vua na Kalou na Loloma”
4. Cava eda kaya kina ni o Jiova e iVurevure ni loloma?
4 E vatuka ni loloma o Jiova, e kena iVurevure tale ga. “Oi kemudou sa lomani,” e vola na yapositolo o Joni, “me da veilomani; ni sa mai vua na Kalou na loloma; ia ko koya yadua sa dauloloma, sa vakasucumi koya na Kalou, a sa kila na Kalou ko koya. O koya sa sega ni dauloloma sa sega ni kila na Kalou; ni sa loloma na Kalou.” (1 Joni 4:7, 8) E rawa ga ni qai vakaraitaka e dua na loloma dina vakalou kevaka e toro voleka vei Jiova. Oqo ena nona kila na ka dina me baleti koya kei na nona bulataka ena yalomaloku na kilaka oqori.—Filipai 1:9; Jemesa 4:8; 1 Joni 5:3.
5, 6. Na cava e vakarawarawataka na nodra vakaraitaka na imuri taumada i Jisu na loloma vakarisito?
5 Ena iotioti ni masu i Jisu vata kei ratou na 11 nona yapositolo yalodina, sa qai vakaraitaka ni salavata na noda kila na Kalou kei na noda loloma ena nona kaya: “Ka’u sa vakatakila vei ira na yacamuni, ia ka’u na vakatakila tiko: me tu vei ira na loloma ko ni a lomani au kina, me’u tiko talega kei ira.” (Joni 17:26) E vukei iratou nona tisaipeli o Jisu me ratou bucina na mataqali loloma e tiko vua kei Tamana, e vakaraitaka tale ga ena ka e tukuna kei na ka sara ga e cakava na ka e vakatakarakarataka na yaca ni Kalou—na nona itovo uasivi. E rawa kina vei Jisu me kaya: “Ko koya sa raici au, sa raici Tamaqu.”—Joni 14:9, 10; 17:8.
6 Eda na vakaraitaka na loloma vakarisito kevaka e tiko vei keda na yalo tabu ni Kalou. (Kalatia 5:22) Ena Penitiko 33 S.K. ni sobuti ira na lotu Vakarisito taumada na yalo tabu ni Kalou a yalataki vei ira, era nanuma rawa sara na veika e vuqa a vakavulica vei ira o Jisu, titobu cake tale ga na nodra kila na ka e kaya na iVolatabu. Na titobu ni nodra kilaka oqo e vakavuna mera lomani koya vakalevu sara na Kalou. (Joni 14:26; 15:26) Cava e yaco kina? Era vunautaka kina ena doudou na itukutuku vinaka, e dina nira sotava kina e levu sara na ka dredre.—Cakacaka 5:28, 29.
Laurai ni Yaloqaqa kei na Loloma
7. Cava e so na ka dredre erau vosota o Paula kei Panapasa ena nodrau ilakolako vakaulotu?
7 E vola na yapositolo o Paula: “Sa sega ni solia mai vei keda na Kalou na yalo ni rere: a yalo ni kaukauwa ga, kei na yalololoma, kei na yalomatua.” (2 Timoci 1:7) E vosa tiko o Paula mai na ka sara ga a sotava. Vakasamataka mada na ka erau sotava kei Panapasa ena nodrau ilakolako ni kaulotu. Erau vunau ena vica na koro, wili kina o Anitioki, Ikoniumi, kei Lisitira. Era yaco mera vakabauta e so mai na veikoro oqori, ia e so e kaukaua sara na nodra veitusaqati. (Cakacaka 13:2, 14, 45, 50; 14:1, 5) Virilaki kina ena vatu mai Lisitira o Paula, ra mani biuti koya ni sa davo cibaciba tu! “Ia ni ra sa mai tu vakavolivoliti koya na tisaipeli, sa qai tu cake mai ka lako sara ki na koro. E na siga ka tarava e rau sa lako sara [kei Panapasa] ki Tapi.”—Cakacaka 14:6, 19, 20, VV.
8. E laurai vakacava mai na loloma i Paula kei Panapasa na titobu ni nodrau lomani ira na wekadrau vakayalo?
8 Ia, vakacava na nodra via vakamatei Paula e so, e vakayalolailaitaki rau beka kei Panapasa me rau sa soro? Kena veibasai! “Ni rau sa rawa oti” e Tapi “e so na tisaipeli, e rau sa qai lesu yani ki Lisitira, kei Ikoniumi kei Anitioki” na turaga e rua oqo. Baleta? Me rau lai vakayaloqaqataki ira na ka vou mera dei tiko ga ena vakabauta. Erau kaya o Paula kei Panapasa: “Sa dodonu me da na sota kei na vuqa na ka rarawa e na noda curu ki na Matanitu ni Kalou.” E matata vakasigalevu ni vu sara ga ni nodrau yaloqaqa na titobu ni nodrau lomani ira na “sipi” i Karisito. (Cakacaka 14:21-23, VV; Joni 21:15-17) Ni rau sa lesi ira oti na qase mera qaravi ira na veivavakoso vou oya, “e rau sa qai tataunaki ira ki vua na Turaga [o Jiova], o koya era sa vakabauta.”
9. E tarai ira vakacava na qase ni ivavakoso e Efeso na nona dau lomani ira o Paula?
9 E turaga dauloloma o Paula, e dau veikauaitaki tale ga, era volekati koya kina e levu sara na lotu Vakarisito taumada. Vakasamataka na nona a bose vata na yapositolo o Paula kei ira na qase ena ivavakoso o Efeso, na vanua a tiko voli kina me yabaki tolu, qai tusaqati tale ga kina vakalevu. (Cakacaka 20:17-31) Taumada a vakauqeti ira mera vakatawa na qelenisipi ni Kalou sa lesi mera karona, oti sa qai tekiduru vata kei ira o Paula me masu. Sa ra qai “tagi sara kecega, ka mokoti Paula, ka reguci koya; a sa rarawa vakalevu na lomadra e na vuku ni vosa ka kaya ko koya, ni ra sa sega ni raici koya tale.” Dua na ka na veimositi e sa mai bucini ena kedra maliwa na mataveitacini oqo kei Paula! Ena gauna mada ga me sa biubiu kina o Paula kei iratou na nona lewenisala, era sa sega sara ga ni via biuti Paula na qase ni ivavakoso e kea.—Cakacaka 20:36–21:1.
10. Era vakaraitaka vakacava na iVakadinadina i Jiova ena gauna oqo na yalodoudou ena kaukaua ni nodra veilomani?
10 Nikua tale ga, era lomani vakalevu sara na ivakatawa dauveilakoyaki, qase ni ivavakoso, kei na levu tale, ena vuku ni nodra dau yaloqaqa ena nodra taqomaki ira na sipi i Jiova. Me kena ivakaraitaki, e so na ivakatawa dauveilakoyaki kei na dui watidra era bolea mera sotava na veika dredre ena nodra soli ira mera sikova na veivavakoso era tu ena veimatanitu e yaco voli kina na tiko yavavala qai vakatabui tu kina na noda cakacaka. E levu tale ga na iVakadinadina era vakararawataki vei ira na iliuliu voravora kei na nodra ivukevuke nira sega ni vakatakilai ira na vo ni tacidra, se vanua e kau tiko mai kina na kedra kakana vakayalo. Vica vata tale na udolu era vakacacani, vakararawataki, so era vakamatei sara nira sega ni muduka nodra vunautaka na itukutuku vinaka, kei na nodra tiko ena soqoni vakarisito. (Cakacaka 5:28, 29; Iperiu 10:24, 25) Meda vakatotomuria mada ga na nodra vakabauta kei na nodra loloma na tacida oqo!—1 Cesalonaika 1:6.
Me Kua ni Batabata na Nomu Loloma
11. Sala cava e dau saga kina o Setani me valuti ira na tamata i Jiova, na cava ena gadrevi kina vei ira?
11 Ni kolotaki mai vuravura o Setani, e vagolea sara ga na nona cudru vei ira na tamata i Jiova baleta nira “vakabauta na vosa ni Kalou, ka taura tikoga nai tukutuku kei Jisu.” (Vakatakila 12:9, 17) E dua na ivadi ni Tevoro na veivakacacani. Vakalevu ni dau lako vakaca tale vua na nona ivadi oqo baleta ni dau qai vaqaqacotaka ga na nodra veilomani na tamata ni Kalou, e dau vakayaloqaqataki ira tale ga mera vakaukaua tale. Dua tale na ivadi i Setani me vakauqeta na gagadre ni yagoda ivalavala ca. E duatani na mataqali yaloqaqa e gadrevi meda vorata rawa kina na ivadi oqo baleta ni ivalu oqo eda vala tiko ga kina kei keda, na noda gagadre ca e vu tiko ga mai na ‘yaloda e dau veivakaisini qai dredre ni kilai.’—Jeremaia 17:9; Jemesa 1:14, 15.
12. E taurivaka vakacava o Setani “na yalo ni vuravura” me via vakamalumalumutaka kina noda lomana na Kalou?
12 E tiko tale e dua na iyaragi kaukaua i Setani—“na yalo ni vuravura,” oqo e okati kina na kena gagadre kei na kena veirawai, e veisaqasaqa sara ga kei na yalo tabu ni Kalou. (1 Korinica 2:12) Na yalo ni vuravura e vakauqeta na kocokoco kei na domodomoiyau—“na gagadre ca ni yago.” (1 Joni 2:16; 1 Timoci 6:9, 10) E sega ni ca na iyau kei na ilavo, ia ena rawa ga ni qaqa o Setani kevaka e sa sivia na noda lomana na veika vaka oqo lailai na noda lomana na Kalou. E veirawai vakalevu na yalo ni vuravura, vakabibi ni salavata sara ga kei na ka e dau taleitaka na yagoda ivalavala ca, e dredre me siqemi, eda sega ni drotaka rawa, qai vaka na cagi ni rawarawa wale tu ga ni curumi keda. Ia, mo taqomaka vinaka sara na lomamu me kua ni curumi iko na yalo ni vuravura!—Efeso 2:2, 3; Vosa Vakaibalebale 4:23.
13. Gauna cava e rawa nida vakatovolei kina meda kua ni muria na ivalavala savasava?
13 E gadrevi dina na yaloqaqa me saqati rawa kina na yalo ni vuravura ena gauna oqo me kua ni vakacacana na noda ivalavala savasava. Me kena ivakaraitaki, e dodonu me tiko vei keda na yaloqaqa me rawa kina nida tucake da qai biubiu mai na valeniyaloyalo se bokoca na kompiuta se retioyaloyalo ke basika mai e so na iyaloyalo tawakilikili. E gadrevi na yaloqaqa mo kua kina ni vakatotomuri ira e so ena nodra cakava na ka ca, se nomu lako tani mai na ilala ca. E gadrevi tale ga na yaloqaqa mo muria tiko ga kina na lawa ni Kalou kei na nona veidusimaki e dina ni o vakalialiai vei ira nomu icaba e koronivuli, itokani vakacakacaka, ira oni tiko veitikivi, kei ira na wekamu.—1 Korinica 15:33; 1 Joni 5:19.
14. Cava meda cakava ke sa vaka me curumi keda tiko na yalo ni vuravura?
14 O koya gona, e bibi dina meda vaqaqacotaka tale na noda lomana na Kalou kei ira na tacida vakayalo! Dikevi iko mada kei na nomu isausau mo raica kina de tiko e so na sala e sa takavi iko tiko kina na yalo ni vuravura. Ke vaka kina—ke vakalailai mada ga—e bibi mo masuti Jiova me vukei iko mo cavuraka laivi na yalo oqori. Ena sega ni vakalecalecava o Jiova nomu kerekere ena tikina oqo. (Same 51:17) Kena ikuri, na yalona tabu e kaukaua cake sara mai na yalo ni vuravura.—1 Joni 4:4.
Meda Yaloqaqa Nida Sotava na Veika Dredre
15, 16. Ena vukei keda vakacava ena noda sotava na veika dredre na noda vakatotomuri Karisito ena nona dauloloma? Tukuna e dua na kena ivakaraitaki.
15 E tiki tale ga ni veika dredre e dodonu me vosota tiko na tamata i Jiova na revurevu ni ivalavala ca kei na qase, me vaka ni na salavata mai kei na tauvimate, bulicaki vakatani ni ituvaki ni yago, yalolailai, kei na so tale na leqa. (Roma 8:22) Ni tiko vei keda na loloma e dau vakaraitaka o Karisito, eda na tudei nida sotava na veika dredre vaka oqo. Dikeva mada na ivakaraitaki kei Namangolwa, a tuberi ena dua na vuvale lotu Vakarisito e Zambia. E lokiloki o Namangolwa ni se qai yabaki rua. “Dua na ka noqu dau lomalomani au,” e kaya o koya. “Au nanuma nira na sega ni via torovi au kina na tamata. Ia, era vukei au na taciqu vakayalo me tiko vei au na rai dodonu. Lakolako au sa sega tale ni qai dau lomalomani au, tini sara meu papitaiso.”
16 E tiko e dua na idabedabe qiqi e dau vodoka voli o Namangolwa, so na gauna ni ca na gaunisala, e dau qasi sara ga e delanisala qereqere. Ia, e dau saga ga me bau painia mada ga ena rua na vula e veiyabaki. E dua na itaukeinivale e tagi sara ga ena gauna e vakamacala kina vua o Namangolwa. Ena vuku ni cava? E tarai koya sara ga na vakabauta ni tacida yalewa oqo kei na nona yaloqaqa. E vakalougatataka dina o Jiova na cakacaka nei Namangolwa, ra sa papitaiso e lima nona vuli iVolatabu, e dua e sa qase tiko ena ivavakoso. “Dau kaukaua sara na momosi ni yavaqu,” e kaya o koya, “au sega ga ni vakalaiva me tarovi au.” Na tacida yalewa oqo e dua ga vei ira e levu sara na iVakadinadina e veiyasa i vuravura e malumalumu sara na yagodra, ia era yaloqaqa ena vuku ni nodra lomana na Kalou kei na nodra lomani ira na lewenivanua. Era ka talei dina ena mata i Jiova!—Akeai 2:7.
17, 18. Na cava e vukei ira e levu mera vosota rawa tu kina na nodra tauvimate kei na ka ni veivakatovolei tale e so? Tukuna e so na kena ivakaraitaki ena nomu itikotiko.
17 E rawa ni vakayalolailaitaki keda vakalevu ke tauvi keda e dua na mate bibi. E kaya e dua na qase ni ivavakoso: “Ena iwasewase ni vulivola au lewena, e tiko kina e dua na ganeda e tauvi koya na matenisuka kei na mateniivi, dua e tauvi kenisa, rua e sa tarai rau sara tu ga vaka ca na mate ni sasala na arthritis, kei na dua tale e tiko ruarua vua na matenikuli na lupus kei na mateniua na fibromyalgia. So na gauna eratou dau yalolailai. Ia, eratou qai dau vakalutu soqoni ga ke sa bibi sara ga na kedratou mate, se ratou curu e valenibula. Eratou dau vakaitavi wasoma kece ena cakacaka vakavunau. Na kedratou ituvaki au nanumi Paula sara kina ni kaya: ‘Ni’u sa malumalumu, au sa qai kaukauwa.’ Au drukataka na nodratou lomana na Kalou kei na nodratou yaloqaqa. Na kedratou ituvaki e rairai vukei iratou me ratou kauaitaka sara ga na ka e bibi duadua ena noda bula.”—2 Korinica 12:10.
18 Ke o dau vakila na bula dredre ena vuku ni ituvaki ni yagomu, nomu tauvimate, se leqa cava tale, “masu tikoga” vei Jiova me vukei iko me kua ni vakaleqai iko na yalolailai. (1 Cesalonaika 5:14, 17) Macala tu ga ni na vinaka na nomu bula ena so na gauna, so na gauna ena sega soti, ia saga tiko ga mo vakasamataka na veika vinaka vakayalo, vakabibi na inuinui ni Matanitu ni Kalou. E kaya e dua na tacida yalewa: “Sa tauri au sara tu ga ena gauna oqo na cakacaka vakaitalatala.” Na nona kacivaka yani na itukutuku vinaka e vukei koya sara ga me yaloqaqa, me kua ni yalolailai.
Era Lesuvi Jiova na Daucaka Cala Nira Vaqaqacotaka Tale Nodra Loloma
19, 20. (a) Na cava ena uqeti ira na sikalutu ena ivalavala ca mera yaloqaqa tale mera lesu vei Jiova? (b) Cava ena dikevi ena ulutaga e tarava?
19 E levu era sa malumalumu vakayalo ena vuku ni nodra ivalavala ca e sega ni dau rawarawa vei ira mera lesu vei Jiova. Ia, ena qai yaloqaqa e dua me lesu tale vei Jiova kevaka e veivutuni dina, qai saga me lomani Jiova tale me vaka ga e liu. Dikeva mada na ivakaraitaki kei Mario,a e vakaitikotiko mai Mereke. E biuta na ivavakoso vakarisito o Mario, yaco me sa nona cakacaka na mateni, kei na vakayagataki ni wainimate gaga. Oti e 20 na yabaki, e lai bala sara e valeniveivesu. “Au mani tekivu vakasamataka tale vakabibi na noqu bula, au wili iVolatabu tale ga,” e kaya o Mario. “Au sa qai tekivu vakila mai na itovo qoroi e vuqa i Jiova, vakabibi na nona loloma levu, o koya au dau masuta vakawasoma. Niu sere mai valeniveivesu, au sa yawaki ira sara ga na noqu ilala makawa, au lakova na soqoni vakarisito kece, yaco sara meu vakalesui mai na ivavakoso. Sa tekivu vakilai e yagoqu na ca ni veika au a cakava, ia au marau mada ga ni sa tiko e dua na inuinui vinaka au vakanamata kina. Au na sega ni dolea rawa vei Jiova na nona yalololoma kei na nona veivosoti.”—Same 103:9-13; 130:3, 4; Kalatia 6:7, 8.
20 Ena gadrevi dina na sasaga vei ira era vakataki Mario me rawa kina nira lesu tale vei Jiova. Ia, era na rawata kevaka era dau masu wasoma, ra vulica vagumatua na iVolatabu, ra qai vakananuma na ka era vulica, baleta ni na vakasuka tale mai vei ira na loloma a tu vei ira e liu, solia tale ga na igu kei na kaukau era gadreva mera veisau rawa kina. E vakaukauataki Mario tale ga na nona nuitaka na Matanitu ni Kalou. Io, na noda inuinui tale ga e rawa ni vu ni kaukaua levu ena noda bula me salavata kei na loloma, vakabauta, kei na noda rerevaka dina na Kalou. Eda na qai dikeva vinaka na isolisoli talei vakayalo oqo ena ulutaga e tarava.
[iVakamacala e ra]
a Sa veisau na yaca.
O Rawa ni Sauma?
• Dua na ka na yaloqaqa i Jisu, ia e uqeti koya vakacava ena tikina oqo na nona loloma?
• E vakayaloqaqataki rau vakacava o Paula kei Panapasa na nodrau lomani ira na mataveitacini?
• Cava e dau taurivaka o Setani me kauta laivi kina na noda loloma vakarisito?
• Noda lomani Jiova ena vakaukauataki keda meda vosota na veika dredre cava soti?
[iYaloyalo ena tabana e 23]
E sega ni soro koso o Paula ena levu ni nona lomani ira na lewenivanua
[iYaloyalo ena tabana e 24]
E gadrevi na yalodoudou meda muria tiko ga kina na ivakatagedegede cecere i Jiova
[iYaloyalo ena tabana e 24]
Namangolwa Sututu