Doka na Noda Soqoni Baleta ni Ka Tabu

“Ka’u na kauti ira mai ki na noqu ulu-ni-vanua tabu, ka vakamarautaki ira e na noqu vale ni masu.”​—AISEA 56:7.

1. Na yavu cava vakaivolatabu eda raica kina ni dodonu meda doka na soqoni?

SA KUMUNI ira tiko nona tamata o Jiova, o ira na lumuti kei ira na nodra itokani mera qaravi koya ena nona “ulu-ni-vanua tabu.” E sa vakamarautaki ira tiko ena nona “vale ni masu,” na nona valenisoro vakayalo, e “nodra vale ni masu na tamata kecega.” (Aisea 56:7; Marika 11:17) Na ka e cakava oqo o Jiova e dusia ni ka tabu na noda veiqaravi, e savasava, e dodonu, e cecere tale ga. Ena noda raica vakabibi na soqoni e dau vakayacori kina na vuli kei na sokalou, eda sa vakaraitaka nida doka na veika e okata na Kalou me ka tabu.

2. Eda kila vakacava ni dau ka tabu vei Jiova na vanua e digia me sokaloutaki kina, eda kila vakacava ni a tiko tale ga vei Jisu na rai oqo?

² E Isireli makawa, e dau vakatabuya o Jiova na vanua e digia me sokaloutaki kina. Na valeniveitavaki kei na kena iyaya kece e dodonu me lumuti, ‘me vakatabui.’ (Lako Yani 30:​26-​29) Na tikina tabu ena valeniveitavaki a wasei rua, dua na yasana e vakatokai “na Loqi Tabu” dua tale “na Loqi Tabu Sara.” (Iperiu 9:​2, 3, VV) E muri a qai sosomitaka na valeniveitavaki na valenisoro e Jerusalemi. Mani vakatokai o Jerusalemi me “koro tabu” me vaka ni vanua sara ga e liutaki yani kina na veiqaravi tabu vei Jiova. (Niemaia 11:1; Maciu 27:53) E dau doka na valenisoro o Jisu ni se bula voli e vuravura. Dua na ka nona sega ni taleitaka na ka era cakava na lewenivanua ena nodra dau vakayagataka na valenisoro me vanua ni veivoli, se me itatakoso.​​—Marika 11:​15, 16.

3. Eda kila vakacava ni dau soqo tabu qai bibi na nodra solevu na Isireli?

³ Era dau soqo vata vakawasoma na Isireli mera qaravi Jiova, mera rogoca tale ga na wiliki ni nona Lawa. E dau gauna tabu vei ira na gauna vaka oqo. Eda kila oqo baleta ni so na nodra soqoni e dau vakatokai sara ga me solevu se soqoni tabu. (Vunau ni Soro 23:​2, 3, 36, 37) Dua na nodra soqo levu na Isireli a vakayacori ena gauna i Esera kei Niemaia, ra mani vakaitavi sara tiko na Livai ena ‘vakamacalataki ni vunau vei ira na tamata.’ Ia, me vaka “ni ra sa tagi ko ira kecega na tamata, ni ra sa rogoca na vosa ni vunau,” sa ra qai vakaroti ira na lewenivanua na Livai, ena nodra kaya: “A siga oqo sa tabu me nei Jiova na nomuni Kalou; ni kakua ni loma bibi, se tagi.” Ra mani vakacavara vinaka na Isireli na siga vitu ni solevu ni veivale tabanikau ena “marau levu sara.” Kena ikuri, “e na veisiga, mai nai matai ni siga ka yacova na siga sa kenai tinitini, sa wilika tiko ko koya nai vola ni vunau ni Kalou. A ra sa ia tiko na so levu ka bogi vitu, ia e nai kawalu ni siga, sa caka e dua nai soqosoqo tabu, me vaka na kenai valavala.” (Niemaia 8:​7-​11, 17, 18) Oqo era gauna bibi dina, qai dodonu mera vakatudaliga vinaka sara na tiko ena soqo.

E Ka Tabu na Noda Soqoni

4, 5. Na cava e vakaraitaka ni noda soqoni e ka tabu?

⁴ E sega ni dua na vanua e vuravura nikua e vakatoka o Jiova me koro tabu, me tiko kina e dua na valenisoro e vakarautaka me qaravi kina vakatabakidua. Ia, meda kua ni nanuma ni sega ni okati me soqoni tabu na noda dau sota vata meda qaravi Jiova. Eda dau sota vata vakatolu ena dua na macawa meda wilika da vulica tale ga na iVolatabu. E dau ‘vakamacalataki’ kina na Vosa i Jiova, ‘vakatakilai tale ga na kena ibalebale’ me vaka ga ena gauna i Niemaia. (Niemaia 8:8) Na noda soqoni kece e dau tekivu, e tini tale ga ena masu, qai levu na soqoni oqo eda dau vakaitavi vata kina meda laga na sere ni veivakacaucautaki vei Jiova. (Same 26:12) Na noda soqoni gona vakaivavakoso e tiki ni noda veiqaravi tabu, e dodonu meda qarauna sara noda itovo nida tiko kina, meda vakarorogo tale ga ena veidokai.

⁵ E dau vakalougatataki ira nona tamata o Jiova nira soqoni vata mera qaravi koya, vulica nona Vosa, ra qai marautaka tale ga na veimaliwai vinaka Vakarisito. Ni sa kena gauna me vakayacori na soqoni, eda kila deivaki ni oya na vanua e cavuta o Jiova me “yaco maikina na ka ni veivakalougatataki.” (Same 133:​1, 3) Eda na vakaivotavota ena ka ni veivakalougatataki oya kevaka eda tiko kina, eda vakatudaliga tale ga ena porokaramu vakayalo e vakarautaki. Kena ikuri, a kaya o Jisu: “E na tikina sa soqoni vata kina e lewe rua, se lewe tolu, e na yacaqu, au sa tiko kina e na kedratou maliwa.” Na itukutuku oqo e vakaibalebaletaki vei ira na qase ni ivavakoso era bose vata mera walia e so na leqa bibi e basika ena kedra maliwa na lewe ni ivavakoso, ia na kena vakasama e rawa ni taurivaki tale ga ena noda soqoni. (Maciu 18:20) Ke tiko o Karisito ena gauna era soqoni vata kina ena vuku ni yacana na lotu Vakarisito, sega li ni dodonu me okati na soqoni vaka oqo me ka tabu?

6. Na cava eda rawa ni kaya me baleta na vanua eda dau soqoni vata kina​—vanua lelevu se vanua lalai?

⁶ E dina ni sega ni tiko o Jiova ena vale e tara ena liga. Ia, na Kingdom Hall e vanua ni sokalou savasava. (Cakacaka 7:​48; 17:24) Eda lai sota e kea meda vulica na Vosa i Jiova, meda masu vua, meda vakacaucautaki koya ena sere. Oqo tale ga na ka eda lai cakava ena noda Assembly Hall. Sa ra na okati tale ga na rara lelevu ni qito se vale lelevu ni sarasara era saumi me vakayacori kina noda soqo ni tikina mera vanua ni sokalou ena gauna eda vakayagataka kina ena veiqaravi tabu. Na noda sokalou ena gauna vaka oqo, se vakayacori ena vanua lelevu se vanua lalai, e dodonu meda doka, me laurai tale ga na veidokai oqo ena noda itovo kei na ka eda cakava.

Sala Eda Vakaraitaka Kina Nida Doka Noda Soqoni

7. Sala cava e rawa nida vakaraitaka kina nida doka na soqoni?

⁷ Tiko e so na sala e rawa nida vakaraitaka kina nida doka na soqoni. Dua, na noda tiko ena gauna e lagati kina na sere. Levu na sere oqo era sere ni vakamamasu, kena ibalebale ni dodonu me lagati ena yalo e vakarokoroko. E lavetaka o Paula na qaqa ni Same 22, qai vola me baleti Jisu: “Au na tukuna na yacamuni vei ira na taciqu; e na kedra maliwa nai soqosoqo lewe ni lotu ka’u na vakarokorokotaki kemuni e na sere.” (Iperiu 2:​12) Meda saga gona me noda ivakarau meda dau dabe rawa ni bera ni cavuta na jeameni na sere, da qai vakasamataka vinaka na ibalebale ni qaqana nida laga tiko. Me vakilai mada ga ena noda lagasere na nona rai na daunisame ni a vola: “Au na vakavinavinaka vei Jiova e na yaloqu taucoko, e na nodra bose na yalododonu, kei nai soqosoqo lewe ni lotu.” (Same 111:1) Io, na noda lagata na sere ni veivakacaucautaki vei Jiova e dua vei ira na vuna vinaka meda dau yaco totolo kina ina soqoni, da qai tiko me yacova ni suka.

8. Na masu cava ena iVolatabu e vakaraitaka ni dodonu meda vakaraitaka noda veidokai ni cabori na masu ena noda soqoni?

⁸ E dua tale na tiki bibi ni noda soqoni kece na masu e cabora ena vukuda o koya e matataka na ivavakoso. Ena dua na gauna, era a sota vata na lotu Vakarisito mai Jerusalemi ena imatai ni senitiuri ra qai “lomavata ka tabalaka cake na domodra vua na Kalou” ena masu. Na nodra masu oqo e vukei ira sara ga mera ‘doudou ena nodra tukuna na vosa ni Kalou,’ e dina nira vakacacani kina. (Cakacaka 4:​24-​31) A tu tani beka na nodra vakasama e so vei ira oya ena gauna era masu kina? Sega, era masu sara ga ena “lomavata.” Na masu e cavuti ena noda soqoni e dau vakaraitaka na lomadra na lewe ni soqoni kece. O koya gona, e dodonu meda vakaraitaka noda veidokai ni cabori na masu vaka oqo.

9. Eda na vakaraitaka vakacava nida doka na soqoni ena noda isulusulu kei na ka eda cakava?

⁹ Kena ikuri, e rawa tale ga nida vakaraitaka nida doka na soqoni ena isulu eda tokara. Io, e rawa ni kuria na dokai ni soqoni na noda isulusulu kei na icakacaka ni drauniuluda. E veivakasalataki na yapositolo o Paula: “Ka’u sa vinakata kina me masu ko ira na tagane e na yasana kecega, ni ra sa dodoka cake na liga savasava, ka me sega na cudru kei na veiba. Me vakaisulu vaka talega kina ko ira na yalewa e nai sulu e kilikili, ni ra sa lokomi ka yalomatua: me kakua ni tali na drau ni uludra, me kakua ni vakoula, se vakamata-ni-civa, se vakai sulu talei: ia me vaka ga sa kilikili kei ira na yalewa era kaya era sa lotu.” (1 Timoci 2:​8-​10) Nida tiko ena soqo ni tikina e vakayacori ena raraniqito lelevu, se rawa tiko ga nida tokara na isulu e veiganiti, veitalia mada ga kevaka e katakata na draki. Kena ikuri, noda veidokai eda na sega kina ni kana se mama drega ni vakacagau tiko na soqo. Noda tokara na isulu rakorako ena gauna ni soqoni e vakalagilagi kina na Kalou o Jiova, e vakaraitaka tale ga noda dokai ira na tacida vakayalo.

iTovo e Kilikili kei Ira na Lewenivuvale ni Kalou

10. E vakaraitaka vakacava o Paula ni gadrevi e dua na ivakatagedegede cecere ni itovo vei ira na tiko ena soqoni Vakarisito?

¹⁰ Eda raica ena 1 Korinica wase 14, na nona ivakasala momona na yapositolo o Paula me baleta na ivakarau ni kena vakayacori na soqoni. E qai tinia ena nona kaya: “Na ka kece ga me caka sara vaka vinaka ka tuvalaki vakamatau.” (1 Korinica 14:​40, VV) E dua sara ga na ituvatuva bibi ni ivavakoso na soqoni, qai dodonu vei ira na tiko kina mera vakaitovotaki ira ena ivakatagedegede cecere ni itovo e kilikili kei ira na lewenivuvale ni Kalou.

11, 12. (a) Na cava e dodonu me matata vei ira na gone era dau tiko ena soqoni? (b) Ena soqoni, na sala veiganiti cava e rawa nira vakatusa kina na gone na nodra vakabauta?

¹¹ O ira na gone e gadrevi vakabibi mera vakavulici mera dau vakaitovo ena soqoni. Na itubutubu lotu Vakarisito e dodonu me vakamacalataka vei luvena ni Kingdom Hall, vaka kina na vanua ni Vulivola ni iVavakoso, e sega ni vanua ni qito. Baleta oya na vanua eda qaravi Jiova kina, da vulica tale ga kina nona Vosa. A vola na tui vuku o Solomoni: “Lewa vinaka na yavamu ni ko sa lako ki na vale ni Kalou, ia mo kusarawa mo vakarorogo.” (Dauvunau 5:1) A vakavulici ira na Isireli o Mosese mera dau soqoni vata, na qase kei na “gone lalai.” A kaya: “Vakasoqoni ira na tamata . . . me ra rogoca, ka me ra vuli kina, ka rerevaki Jiova na nomuni Kalou, ka vakabauta me ra cakava na vosa kecega ni vunau oqo: ka me ra rogoca ko ira na luvedra era sa sega ni kila eliu, ka me ra vuli me ra rerevaki Jiova.”​​—Vakarua 31:​12, 13.

¹² Nikua, na vuna levu sara ga era tomani ira kina nodra itubutubu ina soqoni na gonelalai mera lai vakarorogo, mera vuli. Ena gauna ga era sa vakarorogo rawa kina, era sa kila tale ga na ivakavuvuli rawarawa e so ena iVolatabu, sa na rawa nira “vakatusa” na nodra vakabauta ena nodra vakamacala vakalekaleka ena soqoni. (Roma 10:10) E rawa ni tekivu e dua na gone ena nona sauma vakalekaleka na taro e kila na kena ibalebale. Rawa ni tekivu ena nona wilika mai na isaunitaro, ia ni toso na gauna, me na vulica me vakamacala ena nona vosa ga. Oqo e dua na ka totoka, e ka marautaki tale ga vei ira na itabaqase mera rogoci ira na gone mera talaucaka na lomadra nira vakamacalataka nodra vakabauta ena nodra vosa ga. Era ivakaraitaki ena tikina oqo na itubutubu ena nodra dau vakamacala sara mada ga o ira. Ena vinaka tale ga me tiko na nodra iVolatabu na gone, nodra ivolanisere, kei na ivola e vulici kevaka e sa rawa nira wilika. Dodonu mera vulica mera dau doka nodra ivola ni soqoni. Oqo era na kila kina na gone ni soqoni e ka tabu.

13. Na cava eda nuitaka vei ira era se qai butuka mai vakadua na vanua ni noda soqoni?

¹³ Eda sega ni vinakata na noda soqoni me vaka na nodra lotu na lotu ni Veivanua Vakarisito. Na nodra veivanua ni lotu e rawa ni vagagalu sivia me vaka na vanua ni somate, se rui kosakosa tale me vaka beka na valenidanisi. Eda vinakata na noda soqoni ena Kingdom Hall me veivakacegui, ra mamarau tale ga na tiko kina, ia me kua ni rui kosakosa tale vakasivia. Eda lako yani ina soqoni meda lai qaravi Jiova, o koya gona e dodonu me kilikili qai rakorako na noda soqoni ena veigauna kece. Eda nuitaka vei ira era se qai butuka mai vakadua na vanua ni soqoni mera taleitaka na ka era rogoca, mera drukataka tale ga na vinaka ni nodra itovo na luveda me rawa kina nira kaya: “Sa dina sa tiko vei kemudou na Kalou.”​​—1 Korinica 14:25.

Tiki Tudei ni Noda Sokalou

14, 15. (a) Cava meda cakava meda kua kina ni ‘vakawaletaka na vale ni noda Kalou’? (b) Sa vakayacori vakacava tiko nikua na Aisea 66:23?

¹⁴ Me vaka e sa cavuti oti, sa kumuni ira tiko na nona tamata o Jiova, sa vakamarautaki ira tale tiko ga ena nona “vale ni masu,” na nona valenisoro vakayalo. (Aisea 56:7) A uqeti ira na wekana Jiu na turaga yalodina o Niemaia mera vakaraitaka nodra doka na valenisoro ena nodra soli ka. A kaya: “Me da kakua ni biuta [“vakawaletaka,” NW] na vale ni noda Kalou.” (Niemaia 10:39) Meda kua tale ga ni vakawaletaka na veisureti i Jiova meda mai qaravi koya ena nona “vale ni masu.”

¹⁵ Ena nona vakaraitaka na bibi ni noda tiko wasoma ena soqoni, a parofisaitaka kina o Aisea: “Mai na vula e dua ka yacova na vula kadua, ka mai na siga tabu e dua ka yacova na siga tabu kadua, era na lako mai na tamata kecega me ra mai cuva e mataqu, sa kaya ko Jiova.” (Aisea 66:23) Sa yaco sara tiko ga nikua na veika oqo. Ena veimacawa kece ena loma ni dua na vula, era dau soqoni vata na lotu Vakarisito mera qaravi Jiova. Era vakayacora vata oqo ena nodra tiko ena soqoni, vakaitavi ena cakacaka vakaitalatala, kei na so tale. O dua beka vei ira na ‘lako mai mera mai cuva wasoma vei Jiova’?

16. Cava e dodonu me tiki tudei kina ni noda bula ena gauna oqo na noda dau tiko ena soqoni?

¹⁶ Sa na qai taucoko na vakayacori ni Aisea 66:23 ena vuravura vou e yalataka tu o Jiova. Ena gauna oya, era sa na qai ‘lako mai mera mai cuva’ vei Jiova “na tamata kecega” mera qaravi koya, e veimacawa, e veivula, me tawamudu. Ena vuravura vou, ena tiki tudei ni noda bula vakayalo na noda dau soqoni vata meda sokaloutaki Jiova. O koya gona, sega li ni veiganiti meda okata me tiki tudei ni noda bula ena gauna sara ga oqo na noda dau soqoni vata meda sokalou?

17. Na cava e bibi kina vei keda na soqoni nida “sa raica sa toro voleka mai na siga”?

¹⁷ Me vaka ni sa qai voleka ga mai na icavacava, meda segata meda tiko ena soqoni kece Vakarisito. Ena noda doka na noda soqoni baleta ni ka tabu, eda na sega ni vakalaiva na cakacaka saumi, lesoni mai koronivuli, se vuli bogi me vakavuna na noda sega ni tiko vata kei ira na tacida vakayalo ena soqoni. E bibi meda vakaukauataki tiko mai na kaukaua e rawa duadua ga ena noda dau tiko ena soqoni. Na soqoni gona vakaivavakoso e gauna vinaka meda veikilai kina kei ira na tacida, meda veivakayaloqaqataki, meda veiuqeti tale ga ena ‘loloma kei na ivalavala vinaka.’ Meda qacoya na noda dau tiko ena soqoni, “me vakalevu, [nida] sa raica sa toro voleka mai na siga.” (Iperiu 10:​24, 25) O koya gona, meda vakaraitaka mada ga nida okata na noda soqoni me ka tabu ena noda sega ni calata, noda tokara na isulu e veiganiti, kei na noda qarauna na noda itovo me rakorako. Nida vakayacora oqo, eda sa vakaraitaka tiko nida doka na veika e okata na Kalou me ka tabu.

Railesuvi

• Eda kila vakacava ni dodonu me ka vakamareqeti na nodra soqoni na tamata i Jiova?

• Na cava e vakaraitaka ni noda soqoni e ka tabu?

• Era na vakaraitaka vakacava na gone nira doka na noda soqoni?

• Cava meda saga kina me tiki tudei ni noda bula na noda dau tiko ena soqoni?

[iYaloyalo ena tabana e 28]

Na soqoni e qaravi kina o Jiova e ka tabu, e dina ni na duidui na vanua e vakayacori kina

[iYaloyalo ena tabana e 31]

Era tiko ena soqoni na noda lalai mera vakarorogo, mera vuli