Vakavulici Luvemu me Dau Vakamacala

A NANUMA vinaka tiko ga o Perla mai Mexico na gauna e se goneyalewa lailai kina ni a dau vukei koya o tinana me dau vakarautaka e so na ivakamacala leleka ena Vuli Vale ni Vakatawa. Ena gauna oqo sa dua tiko kina na luvenatagane yabaki lima o Perla. E dau vukei koya vakacava? “Na imatai ni ka, au na vakavakarau. Niu sa cakava oqori, au na vaqara na parakaravu ena matata vei luvequ, o koya ena rawarawa vua me vakamacala kina ena nona vosa ga. Keirau qai dau raica vata na kena e vakatoka o koya me ‘noqu parakaravu.’ Au tarogi koya me vakamacalataka ni taurivaka e so na ivakaraitaki rawarawa e dau vakayagataki e veisiga. Keirau sa qai dau vakatovotovotaka vakavica na ivakamacala. Keirau dau taurivaka e dua na ka me vaka na levu ni gusunivosa me na kila kina na kena ivakavakayagataki ena gauna e saumitaro kina. Au marautaka dina ni dau vakamacala se laveliga ena veigauna kece ni soqoni. Ena vuqa na gauna, ni bera ni tekivu na soqoni, ena lai tukuna vua na tacida e dauveitauri ena vuli na parakaravu me nona.”

O Jens, e qase ni ivavakoso ena dua na iwasewase lailai ni vosa vakaIdia, e rua na luvenatagane, dua e yabaki rua ka dua e yabaki va. Ni rau dau vakavakarau vakaveiwatini ena soqoni vata kei rau na luvedrau, erau dau vakayagataka na iwalewale a vulica o Jens vei rau na nona itubutubu. E kaya: “Keirau na vakatulewataka na tikina ena rawarawa vei rau na gone. Keirau sa qai vakamacalataka vakalekaleka vei rau na usutu ni vuli ena iulutaga e veivosakitaki tiko, oti oqori keirau sa qai taroga e so na taro keirau vinakata me rau na sauma ena gauna ni soqoni. Keirau dau kurabuitaka ena vuqa na gauna na nodrau dau sauma na taro ena nodrau vosa ga. Na nodrau tukuna na veika e tu e lomadrau e vakaraitaka tiko na veika erau sa kila. Na nodrau isaunitaro e vakacaucautaki Jiova dina qai vakaraitaka na nodrau vakabauta.”