E Vu ni Veivinakati Vakacava na Sucu i Jisu?

NA KENA vakarogoi “sa lomani ko ira na tamata” e sega ni parofisai duadua ga a tukuni me baleta na sucu i Jisu. Me ikuri ni ka era tukuna na agilosi vei ira na ivakatawanisipi era a kidroa oya, era a mai vakasavuya tale ga e so na italai mai lomalagi vei Meri kei na watina o Josefa, na itukutuku uqeti vakalou me baleta na gone e se qai sucu, o Jisu. Kevaka eda dikeva vinaka na itukutuku oqo ena vakarabailevutaka noda kila na sucu i Jisu, vaka kina na ibalebale ni nodra yalataka na agilosi nira na lomani na tamata.

Ni se bera mada ga ni buketetaki Jisu o Meri, sa mai sikovi koya e dua na agilosi e vakatokai koya na iVolatabu me o Keperieli. “Sa loloma, ko iko sa daulomani! sa tiko vei iko na Turaga [Jiova],” e kidavaki Meri kina na agilosi oqo. Ena rairai kidroataka o Meri na itukutuku oqo, de dua a rere vakalailai. Na cava mada na ibalebale ni nona kidavaki vaka oya?

Sa qai vakamacalataka o Keperieli: “Raica, ko na kunekune, ko na vakasucuma talega e dua na gonetagane; ia mo vakayacani koya ko JISU. Ena levu ko koya, ka na vakatokai na Luve i Koya sa cecere sara; ia na Turaga na Kalou ena solia vua nai tikotiko vakaturaga nei tamana ko Tevita: ia ena lewa ko koya na mataqali i Jekope ka sega ni mudu; ena sega talega ni oti na nona matanitu.” E vakatitiqataka o Meri na tikina oqo, ni se sega mada ni bau veiyacovi kei na dua na tagane. Sa qai sauma o Keperieli ni na kunekunetaki na gone oqo ena yalo tabu ni Kalou. Ena duatani sara ga na gone oqo.​—Luke 1:28-35.

Tui Yalataki

A rairai vukei Meri na vosa i Keperieli me kila kina ni gone ena kunekunetaka oqo a parofisaitaki tu mai ena gauna makawa. Nona tukuna na agilosi ni na solia o Jiova vua na luve i Meri “nai tikotiko vakaturaga nei tamana ko Tevita” sa na kila kina o Meri, vaka kina o ira na Jiu era kila vinaka na iVolatabu, ni oqo sara ga na nona yalayala na Kalou vei Tui Tevita.

O Jiova a vakayagataka na parofita o Necani me tukuna vei Tevita: “Na nomu mataqali, kei na nomu matanitu, ena vakataudeitaki e matamu, ka sega ni oti: ena vakataudeitaki ka tawa mudu na nomui tikotiko vakaturaga.” (2 Samuela 7:​4, 16) E kaya o Jiova me baleti Tevita: “Au na vakataudeitaka na nona kawa me sega ni mudu, ena vaka talega na gauna ni lomalagi na nonai tikotiko vakaturaga. Ena sega sara ni mudu na nona kawa, ena vaka na mata-ni-siga e mataqu na nonai tikotiko vakaturaga.” (Same 89:​20, 29, 35, 36) E sega gona ni yaco tu vakacalaka ni o Meri vaka kina o Josefa erau cadra mai na iyatukawa i Tevita .

Oqori e sega wale ga ni parofisai ena iVolatabu vakaIperiu me cavuti kina na veika me baleta na gone ena sucu mai ena kawa vakatui i Tevita. A rairai kila tale ga o Meri na parofisai i Aisea: “Ni sa sucu mai e dua na gone me noda, sa soli mai vei keda e dua na gonetagane: ena vakatau kivei koya na lewa; ena vakatokai na yacana ko Veivakurabuitaki, nai Vakavuvuli, na Kalou kaukauwa, na Tama ni gauna tawa mudu, na Tui ni Sautu. Ena sega ni oti na kena tubu na nona lewa kei na sautu, e nai tikotiko vakaturaga i Tevita, kei na nona matanitu, me vakataudeitaka, ka vakaukauwataka e na lewa dodonu kei nai valavala dodonu mai na gauna oqo ka yacova na gauna kecega. A lomakatakata i Jiova ni lewe vuqa ena vakayacora na ka oqo.”​—Aisea 9:​6, 7.

Na itukutuku gona i Keperieli vei Meri, e sega wale ga ni baleta na nona sucu vakacakamana e dua na gonetagane. O koya e sucu oqo e cadra mai na iyatukawa i Tui Tevita​​—⁠e lesi vakalou na nona matanitu, ena tu ga me tawamudu. E bibi kina vei keda kece na parofisai i Keperieli me baleta na nona itavi o Jisu ena dua na gauna mai muri.

Ni sa kila o Josefa na bukete i koya me na qai watina, a via tinia sara ga nodrau veimusumusuki. E kila ni sega ni luvena oya baleta ni rau sega ni bau veiyacovi kei na yalewa erau sa veimusumusuki. Sa na bau dredre dina vei Josefa me vakabauta na ivakamacala i Meri me baleta na nona bukete. E volaitukutukutaka na Kosipeli: “Sa qai dua na agilose ni Turaga [Kalou] sa rairai mai vua e na tadra, ka kaya, I Josefa, na luve i Tevita, kakua ni rere ni kauta vei iko na watimu ko Meri: ka ni sa tubu mai vua na Yalo Tabu na ka sa kunekunetaka: ia ena vakasucuma ko koya e dua na gonetagane; ia mo vakayacani koya ko JISU; ka ni sai koya ga ena vakabulai ira na nona tamata mai na nodrai valavala ca.”​​—⁠Maciu 1:​20, 21.

E sega ni tukuni ena iVolatabu na levu ni ka e sa kila rawa tu o Josefa me baleta na gone oqo ena “vakabulai ira na nona tamata mai na nodrai valavala ca.” Ia, na itukutuku oqori sa rawa ga ni lomavakacegu kina o Josefa ni a sega ni cala o Meri. A muria ga na ka e kaya vua na agilosi me cakava qai kauti Meri ina nona vale, e tautauvata ga ni sa vakamautaki koya.

Ena vuku ni so tale na itukutuku era kune ena iVolatabu, e kilai rawa kina na ibalebale ni ka a vakarogoya na agilosi. Ena itekitekivu ni bula ni kawatamata, a saqata e dua na agilosi na nona veiliutaki cecere o Jiova. E vakaraitaka na iVolatabu VakaIperiu ni kaya na agilosi oqo, me ikuri ni so tale na ka e cakava, ni sega ni dau lewa vinaka na Kalou, ena sega tale ga ni dua na tamata e yalodina vua ni vakatovolei. (Vakatekivu 3:​2-5; Jope 1:​6-​12) Dua sara ga vei ira o Atama. Na nona ivalavala ca gona sa dewavi ira kece tu na tamata, qai kena isau ga na mate. (Roma 5:​12; 6:​23) Ia, o Jisu e sega ni sucu kaya mai na ivalavala ca, ni sega ni vu vakatamata na nona kunekunetaki. E lomasoli ga me cabora na nona bula uasivi e veirauti vinaka kei na bula sa vakayalia o Atama, me keda ivoli, rawa gona ni vakabula o Jisu na kawatamata mai na nodra ivalavala ca, qai dulaka vei ira na inuinui ni bula tawamudu.​​—⁠1 Timoci 2:​3-6; Taito 3:​6, 7; 1 Joni 2:​25.

Na gauna e veiqaravi voli kina vakaitalatala e vuravura, a vakaraitaka o Jisu na ka ena qai yaco ena dua na gauna mai muri ni sa bokoci na ivalavala ca. A vakabulai ira na tamata mai na tauvimate kece vakayago, vakaturi ira sara mada ga na mate. (Maciu 4:​23; Joni 11:​1-​44) Na cakamana kece oqori era ivakaraitaki lailai wale sara ni ka ena qai vakayacora ena dua na gauna mai muri. E kaya sara ga o Jisu, ‘Sa lako mai na gauna era na rogoca kina na domoqu o ira kece ga ena ibulubulu, era na lako cake mai kina.’​​—⁠Joni 5:​28, 29.

E vakavotui gona ena yalayala ni veivakaturi ena dua na gauna mai muri, na vuna e bibi kina vei keda nona sucu o Jisu, vakauasivi na nona mate. E kaya na Joni 3:​17 ni a tala mai na Luvena na Kalou ina vuravura “me bula ga ko ira na kai vuravura e na vukuna.” Na itukutuku marautaki oqo eda lai nanuma tale kina na itukutuku a vakarogoi vei ira na ivakatawanisipi era a vakaraica tiko na nodra manumanu ena bogi a sucu kina o Jisu.

“Nai Tukutuku Vinaka Mo Dou Reki Vakalevu”

E sa bau ‘itukutuku vinaka dina meda reki kina’ na kawatamata na nodra vakarogoya na agilosi na nona sucu “nai Vakabula, ko koya na Karisito na Turaga.” (Luke 2:​10, 11) Na gone oqo ena yaco me Mesaia, na Parofita levu, qai iLiuliu era a waraka balavu tu mai na tamata ni Kalou. (Vakarua 18:18; Maika 5:⁠2) Na nona bula kei na nona mate e vuravura e bibi sara ga ena kena vakarokorokotaki na veiliutaki cecere i Jiova e vuravura vaka kina e lomalagi, rawa kina nira kaya na agilosi: “Sa nona na Kalou na vakarokoroko e na veiyasana ecake sara!”​​—⁠Luke 2:​14.

E vakaraitaka o Jisu, o koya e vakatoka tale ga na iVolatabu me “i otioti ni Atama,” nira rawa ni yalodina vei Jiova na tamata, se mani vakacava na kaukaua ni nodra vakatovolei. (1 Korinica 15:​45, VV) E vakadinadinataki ga kina ni dau lasulasu o Setani. E vu ni marau oqo vei ira na agilosi yalodina mai lomalagi.

Ia, meda lesuva tale na taro, “E tiko beka na inuinui ni na yaco dina na itukutuku a vakarogoya na agilosi ena bogi a sucu kina o Jisu?” Io! E bibi na veivinakati me vakayacori kina na loma ni Kalou me baleta na vuravura, okati kina na kena yaco me parataisi tale. Ni sa vakayacori oqori e vuravura taucoko, sa na qai uqeti ira na tamata na nodra loloma kei na nodra yalodina. Koya gona, na vakayacori ni inaki i Jiova, sa kena ibalebale tale ga na nodra vakawabokotaki kece na saqata tiko na nona veiliutaki cecere. Oqo e sega ni itukutuku vinaka vei ira na tokoni Setani ena nodra kaya ni ca na ivakatagedegede i Jiova. Era na tini rusa ga o ira vaka oqori.​​—⁠Same 37:11; Vosa Vakaibalebale 2:​21, 22.

Dikeva nira a sega ni kaya vei ira na ivakatawanisipi na agilosi nira na veivinakati ra qai lomani na tamata kece. Ia era kaya ga ‘sa vinakati, sa lomani ko ira ga sa vakadonuya na Kalou.’ E tukuni tiko kina ni o ira oqo e vakadonui ira na Kalou, e lomani ira tale ga. O ira na vakaraitaka nira vakabauti Jiova era imuri yalodina i Jisu, ra qai vakatotomuri koya tale ga. O ira na tagane kei na yalewa vaka oqori era dau veikauaitaki ra qai dau veinanumi, sega ni vica wale ga na siga ena veiyabaki, ia e sa ivakarau sara tu ga ni nodra bula ena veisiga.

Era Dau Veilomani Beka na Lotu Vakarisito ena Gauna Kece Ga?

E tara na nodra bula e levu na tamata na itukutuku vinaka a vunautaka o Jisu. Levu sa ra bulataka dina na ivakavuvuli ni lotu Vakarisito. So era a dau vakaliuci ira ga era sa tekivu vaqaqa se cava ena cakava o Jisu ke donuya o koya na ituvaki era sotava. So tale era a dau vakaliuca na iyau kei na ka ni veivakamarautaki era sa kila na bibi ni veika vakayalo kei na kena wasei yani vei ira e so tale. O ira oqo era saga mera dau veikauaitaki ra qai yalovinaka ena veisiga kece. Sa dodonu ga me nodra ivakarau na lotu Vakarisito dina oqo, se vakacava?

Kevaka era vakasamataka na tamata kece e vinaka na inaki lomadra na bibi ni itukutuku e vakarogoya na agilosi kei na kena ibalebale me baleta na bula veiyaloni ra qai muria, sega ni vakabekataki ni na vinaka na bula ena vuravura.

Na parofisai me baleta na sucu i Jisu e vakadeitaka vei ira na kune loloma vua na Kalou, ni rawa nira veivinakati me tawamudu. Sega li ni o diva tu na veika oqori? Sega tale ni vakatitiqataki ni na vakayacori dina na parofisai lagilagi ni veivinakati a vakarogoya na agilosi ena gauna e sucu kina o Jisu. Sa na vakarau oqo me ivalavala tudei ni bula ena gauna kece na veivinakati, sega ni ka e dau rogoci wale tu ga ena Kirisimasi.

[iYaloyalo ena tabana e 7]

Mera dau loloma ena gauna kece ga na lotu Vakarisito