Solia o Jiova na ‘Yalo Tabu Vei Ira na Kerea Vua’

“Kevaka dou sa kila, ko i kemudou na tamata ca, mo dou solia na ka vinaka vei ira na luvemudou, sa na qai wacava sara na levu ni nona via solia na Yalo Tabu na Tamamudou vakalomalagi vei ira era kerea vua!”​—LUKE 11:13, VV.

1. Ena gauna cava eda dau vinakata dina kina na veivuke ni yalo tabu?

‘AU SEGA ni rawa ni vosota vakataki au. Au na rawa ga ni vosota kevaka e vukei au na yalo tabu!’ E bau vakatale beka ga oqori na nomu vakamamasu? Era cavuta tale ga na vosa oqori e levu na lotu Vakarisito. De o cavuta na vosa oqori ena gauna e tauvi iko kina e dua na mate levu. Se gauna beka e vakacegu kina na watimu drau sa veiwatini dede voli mai. Se gauna beka sa mai veisautaka kina na nomu dau mamarau na yalolailai se rarawa o sotava. Ena gauna dredre vaka oqori, o rairai vakila kina ni o vosota rawa tiko baleta ni solia na yalo tabu i Jiova na “kaukauwa mana levu.”​—2 Korinica 4:​7-9; Same 40:​1, 2.

2. (a) Na veika dredre cava era sotava tiko na lotu Vakarisito dina? (b) Na taro cava soti ena saumi ena ulutaga oqo?

² Nida lotu Vakarisito, ena levu sara na veika dredre kei na veitusaqati eda na sotava tiko ena vuravura ca oqo. (1 Joni 5:​19) Kuria oqori, e valuti keda tale tiko ga o Setani na Tevoro, ni veivala tiko kei keda na “vakabauta na vosa ni Kalou, ka taura tikoga nai tukutuku kei Jisu.” (Vakatakila 12:​12, 17) Oya na vuna eda gadreva vakalevu sara kina ena gauna oqo na veitokoni ni yalona tabu na Kalou. Na cava e rawa nida cakava me sobuti keda vakalevu kina na yalo tabu ni Kalou? Eda vakadeitaka vakacava ni tu vakarau o Jiova me vakaukauataki keda ena gauna eda vakatovolei kina? Na isaunitaro oqori ena laurai ena rua na vosa vakatautauvata i Jisu.

Cikecike ena Masu

3, 4. Na vosa vakatautauvata cava e tukuna o Jisu, e vakayagataka vakacava ina masu?

³ A kerei Jisu e dua na nona tisaipeli: “Turaga, ni vakavulici keitou mada me keitou masu.” (Luke 11:​1, VV) E sauma o Jisu ena nona vakaraitaka vei iratou na nona tisaipeli e rua na vosa vakatautauvata erau veiwekani. Na kena imatai e baleta nona vakarautaka e dua na turaga na kena na nona vulagi, kei na kena ikarua e baleta na nona rogoci luvena e dua na tama. Meda dikeva yadudua mada na rua na vosa vakatautauvata oqo.

⁴ E kaya o Jisu: “O cei mada vei kemudou me na lako vua e dua na wekana e na lomaloma ni bogi ka kaya vua, ‘Na wekaqu, au kerea mo solia mada la vei au e tolu na i buli madrai. E sa qai yaco wale ga mai oqo e dua na noqu i tokani e na nona i lakolako, ka sega sara ga na ka e tu vei au me’u tauca e matana.’ Ka me na qai sauma mai loma ko koya, ‘Kakua ni mai vakaogai au! Sa sogo tu na katuba, ka keitou sa davo tu kei iratou na luvequ. Sa sega ni rawa me’u tucake tale ka solia vei iko e dua na ka!’ Au sa tukuna vei kemudou, e dina beka ni na sega ni via tucake ka solia vua e dua na ka na tamata ko ya e na vuku ni nodrau veiwekani, ia e na nona cikecike ga, e na tucake kina ko koya ka solia vua na ka e rauti koya.” E qai vakamacalataka o Jisu ni vosa vakatautauvata oya e baleta na masu, e kaya: “Ka’u sa tukuna vei kemudou, Dou kerekere ka na soli vei kemudou; dou vakasaqara ka dou na kunea; dou tukituki ka na dolavi vei kemudou. Ni sa dau rawata ko koya yadua sa dau kerekere, ka dau kunea ko koya yadua sa dau vakasaqara, ka na dolavi vua sa dau tukituki.”​​—Luke 11:​5-​10, VV.

5. Na cava eda vulica ena vosa vakatautauvata ni turaga cikecike me baleta na noda masu?

⁵ Na vosa vakatautauvata ni turaga cikecike oya e vakaraitaka na ka meda cakava ena gauna eda masu kina. E tukuna o Jisu ni rawata na ka e vinakata na turaga oya “e na nona cikecike.” (Luke 11:​8, VV) Na vosa vaKirisi e vakadewataki oqo me “cikecike” e kunei vakadua ga ena iVolatabu, e kena ibalebale na “sega ni madua.” E dau vakalevu me kainaki ni itovo ca na sega ni madua. Ia ni vakayagataki na sega ni madua ena vakasama e vinaka, e rawa ni veisau me itovo vinaka. E vaka kina vua na turaga ena vosa vakatautauvata oqo. A sega ni madua me cikeva na ka e vinakata. E dodonu meda cikecike tale ga ena noda masu baleta ni tukuna o Jisu ni ivakaraitaki vinaka vei keda na turaga oya. E vinakata o Jiova meda ‘kerekere tiko ga, meda vakasaqaqara tiko ga, meda tukituki tiko ga.’ Ena qai ‘solia na yalo tabu vei ira na kerea vua.’

6. E dau raici vakacava ena gauna i Jisu na nodra vakacegui na vulagi?

⁶ E sega ni vakaraitaka ga o Jisu ni dodonu meda cikecike ena noda masu, e tukuna tale ga na vuna meda cikecike kina. Me matata vei keda na tikina oqori, meda raica mada na ivalavala ni nodra dau ciqomi ira na vulagi o ira e tukuna vei ira o Jisu na vosa vakatautauvata. Era vakaraitaka e levu na tikinivolatabu nira dau raica vakabibi sara na tamata era bula ena gauna e volai kina na iVolatabu, vakauasivi o ira na tamata ni Kalou, na nodra vakacegui na vulagi. (Vakatekivu 18:​2-5; Iperiu 13:2) E ka vakamadua ke dua e sega ni vakaceguya na vulagi. (Luke 7:​36-​38, 44-​46) Nida vakasamataka tiko oqori, meda raica tale mada na vosa vakatautauvata i Jisu.

7. Na cava a sega ni madua kina na itaukeinivale oya me vakayadrati nona itokani?

⁷ E yaco mai na vulagi oya ena lomalomanibogi. E vinakata sara ga o itaukeinivale me vakani koya ia e ‘sega sara ga na ka e tu vua me tauca e matana.’ E raica oqo me vaka e dua na leqa tubukoso! Ena vinakata ga me rawata mai e so na madrai, veitalia na kena dredre. E lako vua e dua na nona itokani qai sega ni madua me vakayadrati koya. ‘Na wekaqu, au kerea mo solia mada la vei au e tolu na ibuli madrai’ e kacivaka yani. E cikecike toka ga me yacova ni rawata na ka e vinakata. Ke sa tiko vua na madrai, sa na qai rawa ni vakatokai me itaukeinivale vinaka.

Na Levu ni Ka Eda Gadreva, na Levu ni Ka Meda Kerea

8. Na cava ena uqeti keda meda kerea tiko ga na yalo tabu?

⁸ Na cava e vakaraitaka na vosa vakatautauvata oqo me baleta na vu ni noda cikecike ena masu? E kerea tiko ga na madrai na turaga oya baleta ni na sega ni rawa ni itaukeinivale vinaka vakavo ga ke sa tiko vua na madrai. (Aisea 58:​5-7) Ena sega ni rawa ni cakava vinaka na nona itavi kevaka e sega na madrai. Nida kila tale ga na lotu Vakarisito dina nida vinakata na yalo tabu ni Kalou me rawa kina nida cakava na noda cakacaka vakaitalatala, eda na kerea tiko ga na Kalou me solia vei keda na yalona tabu. (Sakaraia 4:6) Eda na guce kevaka e sega vei keda na yalo tabu oqori. (Maciu 26:41) O sa raica beka na ka bibi eda vulica ena vosa vakatautauvata oqo? Kevaka e bibi vei keda na yalo tabu ni Kalou, eda na cikecike tiko ga ena noda kerea.

9, 10. (a) Vakatautauvatataka na kena gadrevi meda cikecike tiko ga ena noda kerea na yalona tabu na Kalou. (b) Na cava meda dui tarogi keda kina, ena vuku ni cava?

⁹ Me rawa ni matata na ka eda vulica oqo, kaya mada ke tauvimate e dua na lewe ni nomu vuvale ena lomalomanibogi. O na vakayadrata beka na vuniwai me vukei iko? Ena rairai sega kevaka e sega ni mate bibi. Ia, kevaka e tauvi mateniuto, o na sega ni madua mo tarai vuniwai. Baleta? Ni oqo e dua na mate bibi. Ni gadrevi sara ga kina na nona veiqaravi maqosa. E rawa ni yaco na leqa kevaka o sega ni qara na veiqaravi oya. Era sotava tale tiko ga vaka kina na lotu Vakarisito dina e dua na leqa bibi. E veilakoyaki voli o Setani me vaka e dua na “laioni sa tagi,” ena nona saga me tilomi keda. (1 Pita 5:8) Me rawa nida bula tiko vakayalo, eda na vinakata sara ga na veivuke ni yalona tabu na Kalou. Eda na sotava na leqa kevaka eda sega ni kerea na veivuke ni Kalou. (Efeso 3:​14-​16) Kevaka ga eda kerea na veivuke oqori eda na kaukaua tiko ga me ‘yacova na ivakataotioti.’​—Maciu 10:22; 24:13.

¹⁰ E bibi kina meda dau tarogi keda ena so na gauna, ‘Au dau cikecike beka ena noqu masu?’ Meda nanuma tiko ni kevaka wale ga eda vakila nida gadreva dina na veivuke ni Kalou, eda na dau cikeva vakalevu me sobuti keda na yalo tabu.

Cava e Uqeti Keda Meda Masu ena Nuidei?

11. E vakaibalebaletaka vakacava o Jisu na vosa vakatautauvata me baleta na tama kei luvena ina masu?

¹¹ Na vosa vakatautauvata i Jisu me baleta na turaga cikecike e vakaraitaka na ka me cakava na tamata vakabauta e masu. Na ikarua ni vosa vakatautauvata e vakaraitaka na ka ena cakava o koya e rogoca na masu, na Kalou o Jiova. E taroga o Jisu: “O cei li vei kemudou na tama kevaka e kere ika vua na luvena, me na solia vua e dua na gata, se kevaka e kere yaloka, me na solia vua e dua na pi [batibasaga]?” E qai vakaraitaka o Jisu na ibalebale ni vosa vakatautauvata ena nona kaya: “O koya gona kevaka dou sa kila, ko i kemudou na tamata ca, mo dou solia na ka vinaka vei ira na luvemudou, sa na qai wacava sara na levu ni nona via solia na Yalo Tabu na Tamamudou vakalomalagi vei ira era kerea vua.”​​—Luke 11:​11-​13, VV.

12. E vakaraitaka vakacava na vosa vakatautauvata ni nona rogoci luvena o tama na nona tu vakarau o Jiova me rogoca noda masu?

¹² Ena ivakaraitaki oqo ni nona rogoci luvena o tama, e vakaraitaka kina o Jisu na nona dau rogoci ira na masu vua o Jiova. (Luke 10:22) Ia, raica mada na kedrau duidui na vosa vakatautauvata e rua oqo. Me duidui mai vua na tamata ena imatai ni vosa vakatautauvata a sega ni via veivuke, na Kalou o Jiova e vaka e dua na tama vakayago e cakava na ka e kerea na luvena. (Same 50:15) E vakaraitaka tale ga o Jisu na lomarawarawa i Jiova ena nona vakatauvatani koya kei na tama vakayago. E kaya o koya ni kevaka e rawa vua na tama vakayago e “tamata ca” baleta ni sucukaya mai na ivalavala ca, me solia vei luvena na veika vinaka, e dodonu meda namaka na Tamada vakalomalagi e uasivi cake me solia na yalona tabu vei ira na qaravi koya!​​—Jemesa 1:​17.

13. Na cava eda nuidei ni na solia vei keda o Jiova nida masuta vua?

¹³ Na cava eda vulica kina? Meda nuidei ni gauna eda kerea kina na yalona tabu na Tamada vakalomalagi, ena rogoci keda o koya. (1 Joni 5:​14) Nida masu vakawasoma vua, ena sega ni bau tukuna o Jiova: “Kakua ni mai vakaogai au! Sa sogo tu na katuba.” (Luke 11:​7, VV) Me kena veibasai, e tukuna o Jisu: “Dou kerekere ka na soli vei kemudou; dou vakasaqara ka dou na kunea; dou tukituki ka na dolavi vei kemudou.” (Luke 11:​9, 10, VV) Io, o Jiova ena ‘rogoci keda ena siga eda masu kina vua.’​​—Same 20:9; 145:18.

14. (a) Na rai cala cava e rawa ni tu vei ira e so era vakatovolei? (b) Na cava meda masu kina ena nuidei vei Jiova nida vakatovolei?

¹⁴ Na vosa vakatautauvata i Jisu me baleta na tama e dauvakarorogo e vakaraitaka ni uasivi sara na vinaka i Jiova ni vakatauvatani kei na itubutubu vakayago. Meda kua gona ni nanuma ni veivakatovolei eda sotava tiko e vakaraitaka na nona sega ni taleitaki keda na Kalou. Na noda meca levu ga o Setani, e vinakata me vaka oqori na noda rai. (Jope 4:​1, 7, 8; Joni 8:​44) E sega ni yavutaki vakaivolatabu na rai vaka oqori. E sega ni dau veretaki keda e “na ka ca” o Jiova. (Jemesa 1:​13) E sega ni solia vei keda na veivakatovolei e vaka na gata se na veivakararawataki e vaka na batibasaga. E dau solia ga na ‘veika vinaka vei ira na kerekere vua’ na Tamada vakalomalagi. (Maciu 7:​11; Luke 11:13) Io, na levu ga ni noda kila na vinaka i Jiova kei na nona tu vakarau me vukei keda, na levu tale ga ni noda via masu vua nida nuidei ni na rogoci keda. Nida cakava oqori, eda na cavuta tale ga na vosa e vola na daunisame: “Sa rogoci au vakaidina na Kalou; sa vakarorogo ki na domo ni noqu masu.”​—Same 10:17; 66:19.

Vukei Keda Vakacava na Yalo Tabu

15. (a) Na cava e yalataka o Jisu me baleta na yalo tabu? (b) Na cava e dua na sala e vukei keda kina na yalo tabu?

¹⁵ Ni bera toka ga ni mate, e vakadeitaka tale o Jisu na ka e tukuna ena nona vosa vakatautauvata. Me baleta na yalo tabu, e tukuna vei iratou na nona yapositolo: “Au na qai masuti Tamaqu, me na solia vei kemudou e dua tale na Dauveivuke, me tiko vata kei kemudou ka tawa mudu.” (Joni 14:​16, VV) E yalataka e keri o Jisu ni dauveivuke oya, se yalo tabu, ena tiko vata kei ira na nona imuri me yacova sara mai nikua. Na cava e dua na sala bibi eda vakila kina na veitokoni oqori nikua? E vukei keda na yalo tabu meda vosota na veivakatovolei e caka vei keda. E vukei keda vakacava? E vakaraitaka na yapositolo o Paula ena nona ivola vei ira na lotu Vakarisito mai Korinica ni a vukei koya na yalona tabu na Kalou ena gauna e vakatovolei kina. Meda dikeva mada na veika e vola.

16. E via tautauvata vakacava na ka eda sotava kei na ka e sotava o Paula?

¹⁶ E vakamacalataka taumada o Paula vei ira na nona itokani ena vakabauta ni vakaleqai koya tiko me vaka e dua na veivakatovolei e “dua na voto ni kau.” E qai kuria: “Ka’u a masu vakatolu vua na Turaga [o Jiova], me kau tani vei au.” (2 Korinica 12:​7, 8) Dina ga ni a kerea o Paula me kauta tani na Kalou na ka e vakararawataki koya tiko oya, ia e sega ni yaco vaka kina. De sa yacovi iko tale ga na ka vata oqori. Me vakataki Paula, o sa rairai cikevi Jiova ena nomu masu ena nuidei me kauta tani na veivakatovolei o sotava tiko. Ia e se tiko ga na leqa, dina ga ni o sa masulaka vakawasoma. E kena ibalebale beka oqo ni sega ni rogoca na nomu masu o Jiova qai sega ni vukei iko na yalona tabu? Sega! (Same 10:​1, 17) Vakasamataka na ka e qai tukuna tarava na yapositolo o Paula.

17. E sauma vakacava o Jiova na masu i Paula?

¹⁷ Me isau ni nona masu o Paula, e tukuna vua na Kalou: “Sa rauti iko na noqu loloma; ni sa dau yaco me ka taucoko na noqu kaukauwa e na vanua e tu kina na malumalumu.” E qai kaya o Paula: “O koya oqo au na dau boletaka kina e na marau noqu malumalumu me tiko ga kina vei au na kaukauwa i Karisito e vaka na valelaca.” (2 Korinica 12:​9, NW; Same 147:5) E vakila sara ga kina o Paula ena vuku i Karisito na veitaqomaki ni Kalou me vaka e vakarurugi ena valelaca. E sauma tale ga vaka oqori o Jiova na noda masu nikua. E vakarurugi keda tale ga na nona tamata na nona veitaqomaki.

18. Eda vosota rawa vakacava na veivakatovolei?

¹⁸ Na valelaca e sega ni tarova na kena tau na uca se liwa na cagi, ia e bau itataqomaki toka. E vaka kina na veitaqomaki e solia “na kaukauwa i Karisito,” e sega ni tarova na noda vakatovolei se na veika dredre eda sotava. Ia, e taqomaki keda ga vakayalo mai na veika e vuravura e rawa ni vakaleqai keda kei na nona valuti keda na kena iliuliu, o Setani. (Vakatakila 7:​9, 15, 16) O koya gona, kevaka o sotava tiko e dua na veivakatovolei e ‘sega ni lako tani,’ mo nanuma ni raica tiko o Jiova na veika dredre o sotava tiko, ni sa rogoca tale ga “na domo ni nomu tagi.” (Aisea 30:19; 2 Korinica 1:​3, 4) E vola o Paula: “Sa yalo dina na Kalou, ka na sega ni laiva me sivia na nomuni kaukauwa na ka ko ni vakatovolei kina; e na solia ko koya e na gauna ni veivakatovolei na sala mo ni dro bula rawa kina kei na kaukauwa mo ni vosota kina.”​—1 Korinica 10:​13, VV; Filipai 4:​6, 7.

19. Na cava o na cakava, ena vuku ni cava?

¹⁹ E kilai tani na “iotioti ni veisiga” ni vuravura tawavakalou oqo me “gauna cacamatua, lewalewai dredre.” (2 Timoci 3:​1, NW) Ia vei ira na tamata ni Kalou, e sega ni kena ibalebale me sa sega ni lewai rawa. Baleta? Ni tokoni ira qai taqomaki ira tiko na yalo tabu e solia ena marau qai solia tale ga vakalevu o Jiova vei ira era cikeva ra qai masuta ena nuidei. Meda masuta tiko mada ga na yalo tabu ena veisiga.​—Same 34:6; 1 Joni 5:14, 15.

O na Sauma Vakacava?

• Na cava meda cakava me sobuti keda kina na yalo tabu ni Kalou?

• Eda nuidei vakacava ni na rogoca o Jiova na noda kerea na yalona tabu?

• E vukei keda vakacava na yalo tabu meda vosota na veivakatovolei?

[iYaloyalo ena tabana e 21]

Na cava eda vulica vua na turaga cikecike ena vosa vakatautauvata i Jisu?

[iYaloyalo ena tabana e 22]

O dau cikecike ni o masuta na yalo tabu ni Kalou?

[iYaloyalo ena tabana e 23]

Na cava eda vulica me baleti Jiova ena vosa vakatautauvata ni tama e dauvakarorogo?