Vukei Ira Mera Muria na Ka e Kaya na iVolatabu

“Ko ira e na qele vinaka, sa i ira era sa rogoca na vosa, ka ra sa taura matua sara e na lomadina ka vinaka, ka ra sa vuataka mai na vuadra e na nodra dau vosota.”​—LUKE 8:​15, VV.

1, 2. (a) Na cava na inaki ni kena tabaki na ivola Na Cava Sara Mada e Kaya na iVolatabu? (b) E vakalougatataka vakacava o Jiova na nodra sasaga ni veivakatisaipelitaki na nona tamata ena vica na yabaki sa oti?

“E IVOLA totoka dina. E taleitaka sara ga o koya keirau vuli iVolatabu tiko. Au taleitaka tale ga. Na ivola oqo e rawa sara ga ni vakayagataki mera tekivu vuli iVolatabu kina na itaukeinivale ena nodra matanivale.” Oqori na ka e kaya e dua na iVakadinadina i Jiova e nona cakacaka tudei na cakacaka vakavunau me baleta na ivola Na Cava Sara Mada e Kaya na iVolatabu?  a E kaya e dua na daukacivaka na Matanitu ni Kalou sa kena turaga me baleta na ivola oqori: “Au sa vukei ira tale ga e levu na tamata mera mai kilai Jiova ena 50 na yabaki au vunau voli kina. Ia au via vakaraitaka ni duatani na ivola ni vuli oqo. Au marautaka na vosa vakatakarakara kei na iyaloyalo era tabaki tu kina.” E vakatale beka ga oqori na nomu taleitaka na ivola Kaya na iVolatabu? E tabaki na ivola oqo me vukei iko mo vakayacora na ivakaro i Jisu: “Dou lako yani ka qisi ira me ra noqu tisaipeli na lewe ni veivanua kece ga, . . . vakavulici ira me ra muria na veika kece ga au sa vakarota tu vei kemudou.”​—Maciu 28:​19, 20, VV.

² E sega ni vakabekataki ni marau na loma i Jiova ni raici ira e rauta na 6.6 na milioni na nona iVakadinadina nira talairawarawa tiko ena ivakaro i Jisu mera veivakatisaipelitaki. (Vosa Vakaibalebale 27:11) E vakilai na nona vakalougatataki ira tiko o Jiova. E laurai oqo ena 2005, ni a vunautaki na itukutuku vinaka ena 235 na vanua, qai vakayacori kina ena kena ivakatautauvata, e 6,061,500 na vuli iVolatabu. Oqo e lai vakavuna me levu sara na tamata era ‘rogoca na vosa ni Kalou ra qai vakabauta, sega ni baleta ni vosa ni tamata, ia me vaka ga e vosa ni Kalou.’ (1 Cesalonaika 2:​13) E sivia na veimama na milioni na tisaipeli vou era sa muria na ivakatagedegede i Jiova ra qai yalataki ira vua na Kalou ena loma ga ni rua na yabaki sa oti.

3. Na taro cava so me baleta na vakayagataki ni ivola Kaya na iVolatabu ena dikevi ena ulutaga oqo?

³ O bau marautaka ena dua na gauna lekaleka sa oti na nomu vakavulica e dua ena iVolatabu? Era se tu e veiyasa i vuravura na ‘tamata lomadina’ era “vuataka mai na vuadra e na nodra dau vosota” nira rogoca na vosa ni Kalou. (Luke 8:​11-​15, VV) Meda raica mada se o rawa ni vakayagataka vakacava na ivola Kaya na iVolatabu ena cakacaka ni veivakatisaipelitaki. Eda na dikeva tiko e tolu na taro oqo: (1) O na tekivutaka vakacava na vuli iVolatabu? (2) Na iwalewale ni veivakavulici cava e vinaka duadua? (3) O na vukea vakacava e dua me sega wale ga ni vuli iVolatabu ia me dua tale ga e dauvakavuvulitaka na Vosa ni Kalou na iVolatabu?

Nomu Tekivutaka na Vuli iVolatabu

4. Na cava ena dredre kina vei ira e so mera vulica na iVolatabu, o na vukei ira vakacava e vaka oya na nodra rai?

⁴ Ke o kerei mo lade kosova e dua na uciwai o na rairai sega ni cakava na ka e tukuni vei iko. Ia ke ra tuva kosova tiko na uciwai oqori na vatu me idawadawa, o na rairai kosova na uciwai. E rawa tale ga vua e dua e rui osooso me sega ni via vulica na iVolatabu. Ena nanuma ni rui sasaga levu qai kania tale ga vakalevu na gauna ke vuli iVolatabu. O na vukea vakacava e dua e vaka oqori na nona rai? O rawa ni vakayagataka na ivola Kaya na iVolatabu ena nomu vakamacala vakaleleka toka ga vua mo uqeti koya me vulica na Vosa ni Kalou. Ke o vakavakarau vinaka, na nomu sikova lesu tiko ena rawa ni idawadawa ni nona mai veikilai kei Jiova.

5. Na cava e gadrevi kina mo wilika na ivola Kaya na iVolatabu?

⁵ Ia, ni bera nomu qai vukea e dua ena ivola Kaya na iVolatabu, ena vinakati mo kila vinaka na lewenivola. O sa bau wilika tasevu na ivola? Rau kauta na ivola ena nodrau gade e dua na veiwatini rau qai lai wilika toka ena nodrau vakacegu tiko e baravi. Ni volitaki iyaya tiko mai vei ira na saravanua e dua na marama ni vanua oya, e raica sara na nodrau wilika toka na ivola Na Cava Sara Mada e Kaya na iVolatabu? E tukuna vei rau na veiwatini ni se qai masulaka ga ena vica na aua sa oti na taro e tarogi tiko ena ivola qai kerea na Kalou me sauma mai. Rau solia vua ena marau na veiwatini e dua na ivola. O sa ‘volia na gauna’ mo wilika tasevu kina na ivola oqo, ke mani vakarua sara, ena veigauna o wawa tiko kina se ena gauna ni vakacegu mai na cakacaka se vuli? (Efeso 5:​15, 16) Ke o cakava oqori, o na kila vinaka na lewenivola qai rawarawa tale ga na nomu vakamacalataka vei ira e so tale.

6, 7. O na vakayagataka vakacava na ivola Kaya na iVolatabu mo tekivutaka kina na vuli iVolatabu?

⁶ Ni o veisoliyaka na ivola ena cakacaka vakavunau, vakayagataka vinaka na iyaloyalo, na veitikinivolatabu, kei na taro ena tabana e 4, 5, kei na 6. Me kena ivakaraitaki, e rawa mo tekivutaka na veitalanoa ena nomu taroga, “Na cava oni nanuma e idusidusi vinaka duadua vei keda me baleta na leqa eda sotava tiko na kawatamata?” Ni oti nomu rogoca vinaka na ka e kaya, wilika na 2 Timoci 3:​16, 17, qai vakamacalataka ni vakaraitaka na iVolatabu na iwali dina ni noda leqa na kawatamata. Cega vua na tabana e 4 kei na 5, qai tarogi koya: “E vei vei ira na ituvaki ena tabana oqo e vakaleqai iko tiko vakalevu?” Ni dusia na itaukeinivale e dua vei ira, solia vua na ivola me raica tiko ni o wilika mai na nomu iVolatabu na kena tikinivolatabu. Oti oya, wilika vua na tabana e 6, qai tarogi koya, “E vei vei iratou na ono na taro e tarogi tiko oqo o na vinakata me saumi?” Ni sa digitaka e dua na taro, cega vua na wase e sauma na taro, solia tiko vua na ivola, qai tukuna vua na gauna o na lesu mai kina mo drau veitalanoataka na taro oya.

⁷ Na ivakamacala kece oya ena taura beka ga e lima na miniti. Ena vica ga na miniti oqori o sa taura rawa kina na ka e kauaitaka o itaukeinivale, o wilika qai vakamacalataka e rua na tikinivolatabu, o tauyavutaka tale ga na yavu ni veisikovi lesu. De dua na nomu veitalanoa lekaleka oya kei itaukeinivale e se qai bau dua na gauna veivakauqeti vua. Oqo ena rawa sara ga ni vakavuna vua e dua e dau osooso me namaka na gauna drau dau veitalanoa kina ena vica na miniti ena nomu vukei koya tiko me taura na ikalawa e tarava ena ‘sala e basika ina bula.’ (Maciu 7:​14) Ni sa tataleitaki tiko o itaukeinivale, me qai vakabalavutaki na gauna ni vuli. E rawa ni caka oqo ena nomu sureti koya mo drau dabe me rawa kina ni dede cake na vuli.

Na iWalewale ni Veivakavulici Vinaka

8, 9. (a) O rawa ni vakarautaki koya vakacava drau vuli iVolatabu tiko me vosota na veivakatovolei ena rawa ni sotava? (b) E kunei e vei na iyaya ena dredre ni kama yavu?

⁸ Ni sa tekivu talairawarawa ina veika e kaya na iVolatabu e dua, ena rawa ni sotava e so na ka ena vakaleqa na nona toso. E kaya na yapositolo o Paula: “Ko ira kecega era na via lotu dina vei Karisito Jisu, era na vakacacataki.” (2 Timoci 3:​12) E vakatauvatana o Paula na veivakatovolei vaka oqo kei na kama ni iyayanivale e rawarawa na kena kama ni vakatauvatani kei na iyaya me vaka na koula, siliva, kei na vatu talei tale e so e dredre na kena kama yavu. (1 Korinica 3:​10-​13; 1 Pita 1:​6, 7) Mo vukei koya drau vuli iVolatabu tiko me rawa ni tudei ena veivakatovolei ena sotava, ena vinakati mo vukei koya qai tarai koya cake ena iyaya e sega ni rawarawa na kena kama yavu.

⁹ E vakatauvatana na daunisame na “vosa i Jiova” me vaka “na siliva sa vakatovolei e na kuro qele, sa vakasavasavataki vakavitu.” (Same 12:6) E tu ena iVolatabu na iyaya e rawa ni vakayagataki me tarai cake kina na vakabauta e kaukaua vinaka. (Same 19:​7-​11; Vosa Vakaibalebale 2:​1-6) Ena vukei iko tale ga na ivola Kaya na iVolatabu mo maqosa ena nomu vakayagataka na iVolatabu.

10. O rawa ni vukei koya vakacava e vuli iVolatabu tiko me kauaitaka na iVolatabu?

¹⁰ Ni drau vuli tiko, vakamuai koya ina veitikinivolatabu era volai ena veiwase drau vulica tiko. Vakayagataka na taro mo vukei koya me kila na ibalebale ni tikinivolatabu bibi, me qai bulataka tale ga. Kua ni tukuna vua na ka e dodonu me cakava. Muria ga na ivakaraitaki i Jisu. Ni tarogi koya e dua e kila vinaka na Lawa, e sauma o Jisu: “Na cava so era volai tu e na lawa? Ka cava na kedra i balebale ko kila rawa?” E sauma mai na iVolatabu na turaga oya qai vukei koya o Jisu me vakayagataka na ivakavuvuli e vulica kina. E vukei koya tale ga o Jisu me raica se ganiti koya vakacava na ivakavuvuli oya ena nona vakayagataka e dua na vosa vakatautauvata. (Luke 10:​25-​37, VV) E levu sara na vosa vakatautauvata rawarawa ena ivola Kaya na iVolatabu ena vukei iko mo vukei koya e vuli tiko me vakayagataka na ivakavuvuli vakaivolatabu ina nona bula.

11. Me vakacava na levu ni ka drau vulica ena dua na gauna ni vuli?

¹¹ E vakayagataka na ivola Kaya na iVolatabu na vosa e rawarawa na kena kilai me vakamacalataka na Vosa ni Kalou me vaka ga nona vakamacalataka o Jisu na veika titobu ena vosa e rawarawa na kena kilai. (Maciu 7:​28, 29) Vakatotomuri koya. Tukuna ga vakarawarawa na itukutuku me matata qai dodonu. Kua ni vakatotolotaka na vuli. Me vakatau ga ina ivakatagedegede nei koya e vuli tiko na levu ni parakaravu drau vulica ena dua na vuli. A kila o Jisu na levu ni ka eratou rawa ni ciqoma na nona tisaipeli. E sega ni vakacolati iratou ena itukutuku e se sega ni yaga vei iratou ena gauna oya.​—Joni 16:12.

12. Mo vakayagataka vakacava na ikuri?

¹² E tiko ena ivola Kaya na iVolatabu e 14 na ulutaga era vakatokai me ikuri. Me vakatau ina ka e gadreva o koya drau vuli iVolatabu tiko, qai lewa se e rawa ni o vakayagataka vakacava e so na ulutaga ena iwasewase oqori me yaga vua. Me kena ivakaraitaki, ke sega ni matata tiko vua e vuli tiko e dua na ulutaga se taroga e dua na taro e baleta na ka e vakabauta tu e liu qai vakamacalataki ena ikuri na kena isau, de vinaka mo dusia ga vua na vanua e vakamacalataki kina ena ikuri me qai wilika ga o koya. Se ena vuku ni nona ivakatagedegede ni kilaka o koya e vuli tiko ena rairai gadrevi mo drau raica vata. E tiko ena ikuri e so na ulutaga bibi me vaka: “E Bula Tale Tiko Beka e Dua na Ka e Tawarairai ni Mate na Tamata?” kei na “O Cei o ‘Papiloni na Ka Levu’?” O na rairai via vakamacalataka na ulutaga oqori vei koya drau vuli tiko. Ni sega na kena taro na ulutaga ena ikuri, ena vinakati mo kila vinaka na veika e tukuni kina mo rawa ni qai bulia e so na kena taro.

13. E veivuke vakacava na masu ena kena vakaukauataki na vakabauta?

¹³ “Kevaka sa sega ni tara na vale ko Jiova, era sa oca wale ko ira era sa tara,” e kaya na Same 127:1. Masuti Jiova me vukei iko ni o vakarautaka tiko na vuli iVolatabu. Me vakilai na vinaka ni nomudrau veiwekani kei Jiova ena nomu masu ni tekivu na vuli kei na gauna e cava kina. Uqeti koya e vuli tiko me dau masuti Jiova me vukei koya me kila na Nona Vosa, me rawa tale ga ni bulataka na kena ivakavuvuli. (Jemesa 1:5) Ke cakava oqori ena uqeti koya e vuli tiko me vosota na veivakatovolei, ena kaukaua tale tiko ga na nona vakabauta.

Vukei Ira na Vulica na iVolatabu Mera Veivakavulici

14. Na toso cava e vinakati mera cakava na vulica tiko na iVolatabu?

¹⁴ Me rawa vei ira na vulica tiko na iVolatabu mera muria “na veika kece” e vakarota o Jisu vei ira na nona tisaipeli, ena vinakati mera toso, mera kua ni vulica tiko ga na Vosa ni Kalou ia mera vakavuvulitaka tale ga. (Maciu 28:​19, 20 VV; Cakacaka 1:​6-8) O na vukei koya vakacava e vuli tiko me toso vakayalo vaka oya?

15. Na cava mo uqeti koya kina e vuli iVolatabu tiko me dau tiko ena soqoni?

¹⁵ Sureti koya ena imatai sara ga ni nomudrau vuli me lakova na soqoni vakaivavakoso. Vakamacalataka vua ni oqo na vanua e rawa ni vulica kina me ivakavuvuli ni Vosa ni Kalou. Ni cava na vuli ena imatai ni vica na macawa, vakamacalataka tiko vua na veika e dau vulici ena soqoni kei na soqo lelevu. Me bulabula na nomu vakamacalataka na kena yaga vei iko na veisoqoni oqori. (Iperiu 10:​24, 25) Ni sa tekivu tiko ena soqoni o koya e vuli tiko, sa na rawa me vakavuvulitaka tale ga na Vosa ni Kalou.

16, 17. Na cava e so na isausau e rawa ni tekia qai sauva o koya e vuli tiko?

¹⁶ Vukei koya e vuli tiko me tekia e so na isausau e rawa ni sauva. Me kena ivakaraitaki, e rawa mo uqeti koya me wasea na veika e vulica tiko vei ira na nona itokani se na wekana. Vakatura tale ga me nona isausau me wilika tasevu na iVolatabu. Ke o vukei koya me wilika wasoma na iVolatabu, ena tomana tiko ena gauna sa papitaiso kina. Kuria oqori, vakacava mo tukuna vua me nona isausau me dau nanuma tiko e dua na tikinivolatabu e sauma na taro bibi ena veiwase yadua ni ivola Kaya na iVolatabu? Ke cakava oqori, ena yaco me “tamata cakacaka sa sega ni dua na ka me madua kina; ka dau tukuna vakadodonu sara na ka dina baleta na Kalou.”​—2 Timoci 2:​15, VV.

¹⁷ Vakavulici koya e vuli tiko me kua wale ga ni cavuta na tikinivolatabu vei ira era taroga na yavu ni nona vakabauta, ia uqeti koya me vakamacalataka se tokona vakacava na nona vakabauta na tikinivolatabu oya. Ena veivuke ke drau vakatovotovo, mo vaka e dua na nona itokani vakacakacaka se wekana me qai vakamacalataka o koya na nona vakabauta. Ni sa cakava rawa oqori, vakaraitaka vua ni dodonu me vakamacala “e na yalomalumalumu kei na rere.”​—1 Pita 3:​15.

18. Ni sa vakadonui me dautukutuku bera ni papitaiso e dua drau vuli iVolatabu tiko, o na rawa ni vukei koya tale tiko vakacava?

¹⁸ Ni toso na gauna sa na rawata na ivakatagedegede ni cakacaka vakavunau o koya e vuli iVolatabu tiko. Vakabibitaka vua ni noda vakatarai meda vakaitavi ena cakacaka oqo e isolisoli. (2 Korinica 4:​1, 7) Ni ratou sa vakadonuya na qase ni ivavakoso me dautukutuku bera ni papitaiso, vukei koya me solia e dua na ivakamacala rawarawa ga qai tomani koya ena cakacaka vakavunau. Tomani koya tiko ena nomudrau vakaitavi vata ena veibasoga ni cakacaka vakavunau, vukei koya tale ga ena nona vakavakarau kei na nona vakaitavi ena cakacaka ni veisikovi lesu. Ena vukei koya vakalevu na nomu ivakaraitaki vinaka.​—Luke 6:40.

“Vakabulai Iko kei Ira Talega Era Rogoci Iko”

19, 20. Na cava me noda isausau, ena vuku ni cava?

¹⁹ E taura dina e dua na sasaga kaukaua na noda vukei ira na tamata mera “mai kila sara nai vakavuvuli dina.” (1 Timoci 2:4) Ia, e sega ni levu na ka e rawa ni vakatauvatani kei na noda marautaka na noda vukea e dua me talairawarawa ena ka e kaya na iVolatabu. (1 Cesalonaika 2:​19, 20) Io, eda kalougata ni bau rawa meda ‘cakacaka vata kei koya na Kalou’ ena cakacaka ni veivakavulici e vakayacori tiko oqo e veiyasa i vuravura!​—1 Korinica 3:9.

²⁰ Sa voleka sara oqo na gauna ena lewai ira kina o Jiova o ira na “sega ni vakabauta nai tukutuku-vinaka ni noda Turaga ko Jisu Karisito” ni vakayagataki Jisu kei ira na agilosi kaukaua. (2 Cesalonaika 1:​6-8) Sa leqataki tiko na bula ni tamata. E rawa beka me nomu isausau mo vakavulica mada ga e dua ena iVolatabu ni o vakayagataka na ivola Na Cava Sara Mada e Kaya na iVolatabu? Ni o vakaitavi ena cakacaka oqo, de dua o na “vakabulai iko kei ira tale ga era rogoci iko.” (1 Timoci 4:​16, VV) Sa qai vinakati vakalevu ga ena gauna oqo meda vukei ira e so tale mera talairawarawa ina veika e kaya na iVolatabu.

[iVakamacala e ra]

Na Cava o Vulica?

• Na cava na inaki ni kena tabaki na ivola Kaya na iVolatabu?

• O rawa ni tekivutaka vakacava na vuli iVolatabu ni o vakayagataka na ivola Kaya na iVolatabu?

• Na iwalewale cava ni veivakavulici e yaga?

• O na vukea vakacava e dua e vuli iVolatabu tiko me vakavuvulitaka na Vosa ni Kalou?

[iYaloyalo ena tabana e 26]

O sa vakayagataka vinaka tiko na ivola oqo?

[iYaloyalo ena tabana e 27]

Ena dua ga na veitalanoa lekaleka e rawa ni vakavuna me taleitaka e dua na ka e kaya na iVolatabu

[iYaloyalo ena tabana e 29]

Na cava o rawa ni cakava mo dusimaki koya kina e vuli tiko ina iVolatabu?

[iYaloyalo ena tabana e 30]

Vukei koya e vuli iVolatabu tiko me toso