Vakavuvulitaka na Ka Sara ga e Kaya na iVolatabu

“Qisi ira me ra noqu tisaipeli na lewe ni veivanua kece ga, . . . vakavulici ira.”​—MACIU 28:19, 20, VV.

1. Na cava e rawa ni kainaki me baleta na iVolatabu?

NA VOSA I JIOVA, na iVolatabu, e dua vei ira na ivola makawa qai ivola e veisoliyaki vakalevu duadua e vuravura. Sa vakadewataki kece se so na tikina ena sivia na 2,300 na vosa. Sa tabaki ena nodra vosa na sivia na 90 na pasede na lewe i vuravura.

2, 3. (a) Na cava era veilecayaki kina na tamata me baleta na ivakavuvuli vakaivolatabu? (b) Na taro cava soti eda na dikeva?

² E vica vata na milioni era wilika e so na tikinivolatabu e veisiga. So era sa wilika tasevu vakavica. E vica na udolu na lotu era kaya ni yavutaki ena iVolatabu na nodra ivakavuvuli, ia levu era sega ni duavata kei na ka e vakavuvulitaka. Kuria oqori na nodra sega mada ga ni duavata o ira era lewenilotu vata ena ka era vakabauta. So era kauaitaka ga na itukuni me baleta na iVolatabu, se a volai vakacava kei na kena yaga. Levu era doka wale tu ga me ivola ni bubului se ivola era bubului kina e valeniveilewai.

³ Ia, e tabaki tu ena iVolatabu na itukutuku ni Kalou e kaukaua qai bibi vei ira na kawatamata. (Iperiu 4:12) Nida iVakadinadina i Jiova, eda vinakata mera vulica na lewenivanua na ka e vakavuvulitaka na iVolatabu. Eda marau ni cakava na itavi e solia o Jisu Karisito vei ira na nona imuri ena nona kaya: “Dou lako . . . qisi ira me ra noqu tisaipeli na lewe ni veivanua kece ga, . . . vakavulici ira.” (Maciu 28:19, 20, VV) Nida lako ena cakacaka vakavunau, eda dau sotavi ira na tamata era rarawataka voli na veilecayaki e kune ena levu na lotu e veiyasa i vuravura. Era via kila na veika dina me baleta na noda Dauveibuli ra qai via vulica tale ga na ka e kaya na iVolatabu me baleta na noda bula. Meda dikeva mada e tolu na taro eda dau taroga vakalevu. Eda na dikeva ena taro tolutolu oqo na cala ni ka era kaya na iliuliu ni lotu, ni vakatauvatani kei na ka sara ga e kaya na iVolatabu. Oqo na taro: (1) E kauaitaki keda beka na Kalou? (2) Na cava na inaki ni bula e vuravura? (3) Na cava e yacovi keda nida mate?

E Veikauaitaki Beka na Kalou?

4, 5. Na cava era nanuma kina e levu na tamata ni sega ni kauaitaki keda na Kalou?

⁴ Meda tekivu mada ena taro, E kauaitaki keda beka na Kalou? E ka ni rarawa ni levu na tamata era kaya ni sega. Na cava era nanuma kina vaka oqori? Na imatai ni vuna oya nira bula tiko ena vuravura e laurai votu kina na veicati, na ivalu, kei na rarawa. ‘Ke veikauaitaki dina na Kalou,’ era kaya, ‘ena tarova dina na veika ca e yaco tiko oqo.’

⁵ E dua tale na vuna era nanuma kina e levu na tamata ni sega ni veikauaitaki na Kalou, oya nira vakavuna sara ga na italatala ni lotu me vaka oya na nodra rai. Na cava era dau kaya vakalevu na italatala ni yaco e dua na leqa se vakacalaka? Ni rau leqa e rua na luvena lalai e dua na marama ena dua na vakacalaka e gaunisala, e kaya vua na nona italatala: “E loma ni Kalou oya. E vinakata na Kalou e rua tale na agilosi.” Nira cavuta na italatala na vosa vaka oya, era sa bilitaka tiko na Kalou ni vakavuna na veika ca e yaco. Ia, e vola na tisaipeli o Jemesa: “Ni sa dauveretaki e dua, me kakua ni kaya, Sa dauveretaki au na Kalou: ni sa sega ni dauveretaki rawa na Kalou ki na ka ca, a sa sega ni dauveretaka e dua na tamata ko koya.” (Jemesa 1:13) E sega ni dau vakavuna na Kalou na veika ca. Io, e “yawa vua na Kalou, me caka ca.”​—Jope 34:10.

6. O cei e vakavuna tiko na ca kei na rarawa e vuravura?

⁶ Ia, na cava e rui levu kina na ca kei na rarawa eda sotava? E dua na vuna oya ni a sega ni vinakata na kawatamata me lewai koya na Kalou, e sega ni vinakata me vakarorogo ina nona lawa kei na nona ivakavuvuli. Ia era sega ni vakila na tamata nira sa vakarorogo sara tiko ga vua na Meca ni Kalou, o Setani, ni “tu na vuravura taucoko e na kaukauwa ni Vunica.” (1 Joni 5:19, VV) Noda kila na veika dina oqori eda kila kina na vuna eda sotava tiko kina na veika dredre. O Setani e vu ni ca, e yaloca, dau veivakacalai, qai dau veivakararawataki. Meda namaka me na vakatale ga oqori na vuravura e liutaka tiko. Sa rauta me levu na ca!

7. Na cava e so na vuna eda sotava kina na rarawa?

⁷ E dua tale na vuna eda sotava tiko kina na rarawa oya nida tamata ivalavala ca. Na tamata ivalavala ca ena dau vinakata me lewai ira na tamata. Oqo e vakavuna na veivaluvaluti, na veivakalolomataki, kei na rarawa. Sa rauta me kaya na Dauvunau 8:9: “Sa dua na gauna sa lewa kina na tamata vua na tamata tani ka sa mani ca kina.” Dua tale na vuna eda rarawa tiko kina oya na “gauna kei na veika tawanamaki” eda sotava. (Dauvunau 9:​11, NW) Eda dau sotava vakalevu na leqa baleta nida tiko ena vanua cala ena gauna cala.

8, 9. Eda kila vakacava ni kauaitaki keda dina o Jiova?

⁸ E veivakacegui na noda kila ni sega ni dau veivakararawataki o Jiova. Ia e kauaitaka beka na Kalou na veika eda sotava tiko? Io, e vaka kina! Eda kila ni veikauaitaki o Jiova baleta ni tukuna vei keda na nona Vosa na vuna e vakatara tiko kina mera cakava na veika ca na tamata. Oqo na rua na vuna: na dodonu ni nona veiliutaki kei na nona yalodina na tamata. Ni Dauveibuli cecere, e sega ni gadrevi me tukuna vei keda o Jiova na vuna e vakatara tiko kina na rarawa. Ia, e vakatakila ga vei keda na vuna baleta ni kauaitaki keda.

⁹ Vakasamataka mada e so tale na vuna e kauaitaki keda kina na Kalou. E ‘rarawa na lomana’ ena levu ni ca a vakayacori tiko ena gauna i Noa. (Vakatekivu 6:5, 6) Ena duidui beka nona rai ena gauna oqo? Sega, baleta ni sega ni dau veisau se veivukiyaki o koya. (Malakai 3:6) E cata o koya na veivakalolomataki kei na noda vakararawataki. E vakavuvulitaka na iVolatabu ni sa voleka na gauna me vakaotia kina na ca e vu mai na nona veiliutaki na tamata kei na veivakamuai ni Tevoro. E sega beka ni vakadeitaka oya ni kauaitaki keda na Kalou?

10. E raica vakacava o Jiova na rarawa eda sotava tiko?

¹⁰ Era beitaka vakailasu na Kalou o ira na iliuliu ni lotu ena nodra kaya ni veika rarawa eda sotava e inaki ni Kalou. Me kena veibasai, e inaki i Jiova me vakaotia vakadua na rarawa. E kaya na 1 Pita 5:7: “Sa daunanumi kemudou ko koya.” Oya sara ga na ka e kaya na iVolatabu!

Cava na iNaki ni Noda Bula e Vuravura?

11. Na cava era kaya e levu na lotu e vuravura me baleta na nona bula na tamata e vuravura?

¹¹ Meda dikeva mada na ikarua ni taro eda dau vaqaqa vakalevu, Na cava eda bula kina e vuravura? Era sauma na taro oqori na lotu e vuravura ena nodra kaya ni tamata e mai tiko vakawawa ga e vuravura. Era raica na noda vuravura me vaka e idewadewa ga ina bula ina dua tale na vanua. Era vakavuvulitaka e so na italatala ni na vakarusa na vuravura oqo na Kalou. Na ivakavuvuli lasu oqori e vakavuna nodra kaya e levu na tamata ni vinaka cake ga mera vakayagataka vinaka na bula oqo baleta ni sa waraki ira tu ga na mate. Na cava sara mada e kaya na iVolatabu me baleta na inaki ni noda bula e vuravura?

12-14. Na cava e kaya na iVolatabu me inaki ni Kalou me baleta na vuravura kei na kawatamata?

¹² E totoka vakaoti na inaki ni Kalou me baleta na vuravura kei na kawatamata. E “sega ni cakava [na vuravura] me lala” ia e “bulia ga me tawa.” (Aisea 45:18) “Sa vakataudeitaki vuravura” tale ga o Jiova “e na kena yavu, me kakua ni yavala rawa ka sega ni mudu.” (Same 104:5) E vukei keda meda kila na inaki ni noda bula e vuravura na noda vulica na inaki ni Kalou me baleta na vuravura kei na kawatamata.

¹³ E vakaraitaka na Vakatekivu wase 1 kei na 2 na nona vakarautaka vakamaqosa o Jiova na vuravura oqo me tawana na tamata. Sa “vinaka sara” na noda vuravura ena gauna e cava kina na nona bulia. (Vakatekivu 1:31) E vakatikori rau na imatai ni tagane kei na yalewa, o Atama kei Ivi, ena were totoka o Iteni qai vakarautaka vakalevu na Kalou na kakana vinaka me kedrau. E tukuna vei rau na imatai ni veiwatini: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka.” A vinakati me rau vakaluveni, mera sega ni ivalavala ca na luvedrau, me rau vakatetea na nodrau itikotiko me roboti vuravura, rau qai lewai ira vinaka tale ga na manumanu kece.​—Vakatekivu 1:26-28.

¹⁴ E nakita o Jiova me bula e vuravura me tawamudu na kawatamata e sega ni ivalavala ca. E kaya na Vosa ni Kalou: “Era na taukena na vanua ko ira na yalododonu, ka tiko kina ka sega ni mudu.” (Same 37:29) Io, a nakiti me bula tawamudu ena Parataisi e vuravura na kawatamata. Oya e inaki ni Kalou, oqori sara ga na ka e kaya na iVolatabu!

Na Cava e Yaco Nida Mate?

15. Na cava era kaya e levu na lotu me baleta na ka e yacovi keda nida mate?

¹⁵ Meda raica mada na ikatolu ni taro eda dau lomaleqataka vakalevu: Na cava e yacovi keda nida mate? E levu ga na lotu e vuravura era vakavuvulitaka ni bula tu ga e dua na ka e tiko e lomada ena gauna e mate kina na yagoda. Era se vakabauta tiko ga e so na lotu ni na totogitaki ira na valavala ca na Kalou ena nona vakararawataki ira me tawamudu ena bukawaqa mai eli. Ia na cava e kena dina? Na cava sara mada e kaya na iVolatabu me baleta na mate?

16, 17. Na cava e kaya na iVolatabu me baleti ira na mate?

¹⁶ E kaya na Vosa ni Kalou: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka, a sa sega tale na kedrai voli.” Nira “sega ni kila e dua na ka” o ira na mate, era na sega ni rogoca e dua na ka, rai, vosa, vakasama, se vakila e dua na ka. Sa sega tale na kedra ivoli. Mera rawata vakacava na ivoli? Era sa sega ni rawa ni cakacaka! Era sa sega tale ga ni vakaraitaka rawa na lomadra baleta ‘ni sa oti na nodra loloma, kei na nodra veicati, kei na nodra vuvu.’​—Dauvunau 9:5, 6, 10.

¹⁷ E matata vinaka sara na ka e kaya na iVolatabu ena ulutaga oqori, era sega ni lai bula tale tiko na mate ena dua na vanua. E sega ni dua na ka e biuta na yagoda nida sa mate me lai bula tale tiko se sucu tale ina dua tale na yago, me vaka era kaya o ira na vakabauta ni bula e dewa ina dua tale na bula. E rawa ni vakatauvatani beka vaka oqo: Na noda bula e vaka ga na waqa ni kadrala. Ni sa boko, e sega ni lako tale ina dua na vanua. Sa oti ga e kea.

18. Ena vakacava na nona rai e dua e vulica tiko na iVolatabu ni sa kila nira sega ni vakila e dua na ka o ira na mate?

¹⁸ Vakasamataka mada na kena tarai ira e so na nodra kila na ka dina oqori. Ni dua e vulica tiko na iVolatabu e sa mai kila nira sega ni vakila e dua na ka o ira na mate, ena kila o koya ni veitalia se mani vakacava na nodra cati koya na nona qase era sa mate, era na sega ni rawa ni vakaleqai koya. Ena kila tale ga ni o ira na wekana era sa mate era sega ni rogoca e dua na ka, rai, vosa, vakasama, se vakila e dua na ka. Era sega ni galili tu mai puregatorio se vakararawataki tiko ena bukawaqa. Ia, e kaya na iVolatabu nira na vakaturi o ira e nanumi ira na Kalou. Sa dua dina na inuinui totoka!​—Joni 5:28, 29.

iVola Vou Meda Vakayagataka

19, 20. Na cava e noda itavi na lotu Vakarisito, na ivola cava e vakarautaki meda vakayagataka ena cakacaka vakavunau?

¹⁹ Eda dikeva e tolu ga na taro era dau tarogi vakalevu. E matata vinaka sara tu ga na ka e kaya na iVolatabu ena taro tolutolu oqori. E ka marautaki dina na noda wasea na veika dina oqori vei ira na via kila na ka e kaya na iVolatabu! Ia e tiko e levu tale na taro bibi era vinakata o ira na tamata lomadina me saumi vinaka. E noda itavi na lotu Vakarisito meda sauma na veitaro oqori.

²⁰ E sega toka ni ka rawarawa meda vakavuvulitaka vakamatata na ka dina mai na iVolatabu me tara na loma ni tamata. Me vukei keda, a vakarautaka “na dauveiqaravi yalo dina ka vuku” e dua na ivola meda vakayagataka ena noda cakacaka vakavunau. (Maciu 24:45-47, VV) Oqo na ivola e 224 na tabana e yacana Na Cava Sara Mada e Kaya na iVolatabu?

21, 22. Na cava e so na ka e duatani kina na ivola Na Cava Sara Mada e Kaya na iVolatabu?

²¹ A tekivu veisoliyaki na ivola oqori ena nodra Soqo ni Tikina na iVakadinadina i Jiova, “Talairawarawa Vua na Kalou,” ena yabaki 2005/06. Oqo e vica na tikina e duatani kina. Me kena ivakaraitaki, na ivakamacala taumada e lima na tabana sa yaga sara tiko vakalevu ena kena tekivutaki na vuli iVolatabu. De dau rawarawa vei iko na nomu vakamacalataka na iyaloyalo kei na veitikinivolatabu ena ivakamacala taumada oqori. O rawa ni vakayagataka tale ga na veika e tukuni kina mo vukei koya e vuli iVolatabu me kunea na wase kei na tikina ena iVolatabu.

²² E rawarawa qai matata na ivakarau ni volavola e vakayagataki kina. E sagai sara ga me tarai na loma i koya e vuli iVolatabu tiko. E tarogi ena itekivu ni wase e so na taro qai kunei na kena isau vakaivolatabu ena kato “Na Ka e Kaya na iVolatabu” ni cava na veiwase yadua. Na iyaloyalo kei na kena ivakamacala ena ivola oqo ena vukei koya e vuli iVolatabu me matata vinaka vua na veika vou e vulica. E rawarawa sara na kena kilai na lewenivola ena vulici, ia e qai tiko tale na ikuri e tiko kina e 14 na ulutaga bibi e titobu cake ke mani gadreva o koya e vuli iVolatabu tiko.

23. Na cava e vakaturi me baleta na kena vakayagataki na ivola Kaya na iVolatabu ena vulici ni iVolatabu?

²³ E tabaki na ivola Kaya na iVolatabu me vukei keda ena noda vakavulici ira e duidui na ivakatagedegede ni nodra vuli qai duidui na lotu era lewena. Ke dua e vulagi ena iVolatabu, de na rairai taura beka e rua na vuli se sivia na kena vulici e dua na wase. Kua ni vakatotolotaka wale ga na vuli, saga mo tara na loma i koya e vuli tiko. Ke sega ni matata vua e dua na vosa vakatautauvata e vakayagataki ena ivola, vakamacalataka se vakayagataka e dua na ivakatautauvata e kila. Vakavakarau vinaka, saga mo vakayagataka vinaka na ivola, qai kerea na veivuke ni Kalou me rawa kina ni o “wasea vakadodonu nai vakavuvuli dina.”​—2 Timoci 2:15.

Vakavinavinakataka na Veika Uasivi e Soli Vei Iko

24, 25. Na isolisoli uasivi cava e solia o Jiova vei ira na nona tamata?

²⁴ E solia o Jiova e levu na veika uasivi vei ira nona tamata. E vukei keda meda kila na veika e baleti koya. Meda vakavinavinakataka na isolisoli oya! Ni Kalou e vunitaka na nona inaki vei ira na dokadoka qai vakaraitaka ga vei ira na yalomalumalumu. E kaya kina o Jisu: “Au sa vakavinavinaka vei kemuni, Tamaqu, na Turaga ni lomalagi kei vuravura, ni ko ni sa vunia na veika oqo vei ira na vuku kei ira na kilaka, ka vakatakila ga vei ira na gone lalai.” (Maciu 11:25, VV) E ka lagilagi dina na noda maliwai ira na yalomalumalumu era sokalou tiko vua na Turaga Cecere ni Lomalagi kei Vuravura, o Jiova.

²⁵ E solia tale ga na Kalou vei keda na itavi ni noda tukuni koya vei ira na tamata. Nanuma ni cala na itukutuku e baleti koya era vakavuvulitaka na ivakavuvuli vakailasu. Sa mai cala kina na nodra nanuma e levu na tamata me baleti Jiova, nira nanuma ni sega ni veikauaitaki qai sega ni veinanumi. O sa tu vakarau mo vakadodonutaka na cala oya? O vinakata mera kila na tamata lomadina kece na veika dina me baleta na Kalou? Vakaraitaka gona na nomu talairawarawa vua na Kalou ena nomu vunau kei na nomu vakavulici ira e so tale ena ka e kaya na iVolatabu ena veiulutaga e so. Era vinakata na vakasaqara tiko na ka dina mera vulica na ka sara ga e kaya na iVolatabu.

O na Sauma Vakacava?

• Eda kila vakacava ni kauaitaki keda na Kalou?

• Na cava eda bula kina e vuravura?

• Na cava e yacovi keda nida mate?

• Na tikina cava ena ivola Kaya na iVolatabu o taleitaka vakalevu?

[iYaloyalo ena tabana e 22]

E kaya na iVolatabu ni na oti na rarawa

[Credit Line]

E cake, imatau, goneyalewa: © Bruno Morandi/age fotostock; imawi, marama: AP Photo/Gemunu Amarasinghe; e ra matau, isenivalu: © Sven Torfinn/Panos Pictures

[iYaloyalo ena tabana e 23]

Era na bula tawamudu na tamata yalododonu ena Parataisi