Mera Vosa Dina Beka ga Eso?

“AU SEGA ni taleitaka na lasu, au cata tale ga meu lasutaki!” e kaya e dua na goneyalewa yabaki 16. Levu e dau vaka oqori na nodra rai. Eda dau vinakata kece me dina na itukutuku e vakadewai vei keda, se mani tukuni se volai. Ia, eda dau vosa dina beka ena gauna eda vakasavui itukutuku kina?

Ena dua na vakatataro a caka mai Jamani, levu era tukuna ni “sega ni cala ke o lasu ena veika lalai mo taqomaki iko kina se so tale, kevaka sara mada ga o lasu me vinaka tiko ga kina na veimaliwai.” E vola e dua na dauvolaitukutuku: “E itovo vinaka na dau vosa dina, ia ni caka e veigauna e sa na sega ni marautaki tale kina na bula.”

Eda dau vinakata beka mera vosa dina ga e so, da qai nanuma ni rawa nida lasu ena so na gauna ke tiko na vuna vinaka? E yaga beka meda dau vosa dina, se sega? Na leqa cava e basika nida dau lasu?

Leqa e Basika Nida Dau Lasu

Vakasamataka mada na leqa e rawa ni basika ena vuku ni lasu. E dau vakavuna me rau sega ni veivakabauti na veiwatini vaka kina ena kedra maliwa na lewenivuvale. Na kakase e sega na kena yavu ena vakacacana na kena irogorogo e dua. Ena nodra dau veidabui na tamata cakacaka e tubu kina na ilavo e vakayagataki ena vakacici bisinisi, qai vakavuna me tubu cake tale ga na isau ni iyaya. Kena dau lasutaki na levu ni ilavo me sauma lesu na matanitu vei ira na dau saumi ivakacavacava, e vakaleqai kina na veiqaravi ni matanitu vei ira na lewenivanua. Nodra lasutaka na dauvakadidike na nodra itukutuku era tini vakayalia kina nodra cakacaka vinaka, rogo ca tale ga kina na isoqosoqo era matataka. Na veidabui me rawati totolo kina na ilavo, era vakalusia kina na dau soli ilavo na ka kece era taukena tu se ra tini vakaloloma sara. Sa rauta me tukuna na iVolatabu ni “yame daulasu” kei “na dautukutuku vakailasu” era okati me ka vakasisila vua na Kalou o Jiova!​—Vosa Vakaibalebale 6:​16-​19.

Na lasu e rawa ni vakaleqa noda bula yadudua se bula vakaitikotiko. Levu era duavata ena tikina oqo. Kevaka e dina oqori, cava ga era dau nakita kina e so mera lasu? Vakacava na kena dau tukuni cala e so na ka se itukutuku e sega ni dina, sa na okati beka oqori me lasu? Eda na dikeva na isaunitaro oqo kei na so tale ena ulutaga e tarava.

[iYaloyalo ena tabana e 3]

Na lasu e vakavuna me rau sega ni veivakabauti na veiwatini